ཉེར་གཉིས།
རྗོ་སུ་ལམ་ང་རང་བསྡོད་ས་ནས་ང་ཚོ་འགྲོ་སའི་མཚོ་འགྲམ་དེར་ཆུ་ཚོད་གཅིག་ཏག་ཏག་གི་རླངས་འཁོར་བཏང་ནས་སོང་ན་སླེབས་ཀྱི་ཡོད། རྒྱལ་ཁབ་དཀྱིལ་དབུས་སུ་འཁེལ་ཡོད། མཚོ་འགྲམ་དེ་ཡི་མིང་དུ་ཕ་མ་ལེམ་མཚོ་འགྲམ་དུ་འབོད་ཀྱི་ཡོད། མཚོ་འགྲམ་མང་ཤོས་ཤིག་ལ། གུར་ཕུབ་ནས་བསྡོད་ཆོག་མིན་ཡོད་ལ། བསྡོད་ཆོག་པའི་དབང་དུ་བཏང་རུང་། དེ་ལ་བསྡོད་རིན་སྤྲོད་དགོས་ཀྱི་ཡོད་པ་རེད། ད་རེབས་ཀྱི་མཚོ་འགྲམ་འདི་ནས་བསྡོད་རིན་མི་དགོས་པ་མ་ཟད། བསྡོད་སའི་འགྲམ་དུ་གཙང་བཟོ་བྱེད་མཁན་གྱི་མི་ཡོད་ལ། མཚོ་འགྲམ་གཞན་དག་ལས་ཀྱང་མི་ཉུང་ན་ཡང་། ཡོང་མཁན་མང་ཤོས་ཤིག་ནི་ན་གཞོན་ཕོ་མོ་དག་རེད།
མཛའ་མོ་དང་ངེད་གཉིས་དེ་རུ་འབྱོར་དུས། སྐར་མ་བཅུའི་སྔོན་དུ་གྲོགས་པོ་བུ་ཆུང་གི་རྒན་མོ་ཤེས་རབ་ལྷ་མོ་དང་མོ་རང་གི་སྲིང་མོ་དང་བུ་མོ་གཉིས། གཞན་པའི་བུད་མེད་ངོ་མི་ཤེས་པའི་བུད་མེད་ཅིག ཚང་མ་འབྱོར་འདུག་ལ། ཤེས་རབ་ལྷ་མོའི་སྲིང་མོ་ཡི་ཁྱོ་ག་ཡིས་གུར་ཕུབ་ཚར་འདུག ཉི་མ་ཡང་ཚ་བོ་རེད། ངས་རང་གི་ཅ་ལག་དག་འཁུར་ནས་ཁོང་ཚོའི་འགྲམ་དུ་བཞག ངའི་མཛའ་མོ་ཡིས་བུ་མོ་ཐར་མ་མཚོ་ལ་བལྟ་དགོས་པ་དང་། མོ་རང་སྤྲུམ་མ་ཡིན་དུས། ཅ་དངོས་ལྕི་མོའི་རིགས་ཡར་འཇོག་མི་ཐུབ་པ་ཡིན། ཅ་ལག་བསྐྱེལ་བར་རོགས་པ་བྱེད་ཆོག་ཟེར་ནས་མ་བཤད་ཀྱང་། ཁོ་རང་གི་འགྲམ་དུ་ང་རང་གིས་གུར་ཕུབ་བཞིན་ཡོད་པ་དང་། གུར་ཕུབ་པ་ལ་རོགས་པ་ཞིག་ཡོད་ན་སྟབས་བདེ་བོ་ཡོད་པ་ཁོ་རང་གིས་ཀྱང་ཤེས་གསལ་ཡིན། རེད་དེ། ང་ལ་རོགས་པོ་དགོས་མིན་གྱི་སྐད་ཆ་ཚིག་གཅིག་དྲིས་མ་སོང་།
ངས་ཅ་ལག་ཡང་བསྐྱེལ་ཚར་སོང་ལ། གུར་ཡང་ཕུབ་ཚར་ཡིན། དེ་དུས་ཁོ་རང་གིས་བུད་མེད་གཞན་དེ་ཡི་གུར་ཕུབ་བཞིན་འདུག ངས་འཁྲིས་ནས་བལྟས་མ་བསྡད་པར་ཐད་ཀར་སོང་ནས་རོགས་བྱས་ནས་ངེད་གཉིས་ཀྱིས་བུད་མེད་དེ་ཡི་གུར་ཕུབ་པ་ཡིན། བུད་མེད་དེ་ནི་བཟའ་ཐོར་ཟིན་པའི་བུ་མོ་གཉིས་ཀྱི་ཨ་མ་རེད་འདུག་ལ། ད་ལྟ་མོ་རང་གི་དགའ་རོགས་སུ་འབོད་པ་ཞིག་ཡོད་ཀྱང་། དེ་ནི་ཆོས་ལུགས་ཀྱི་སྲོལ་རྒྱུན་ལ་གུས་བཀུར་ཡོད་མཁན་ཞིག་ཡིན་སྟབས། མོ་རང་གི་མཉམ་དུ་གཟའ་པ་སངས་དང་སྤེན་པ་ལ་ཕྱི་རུ་ཡོང་ཐུབ་མེད་པ་རེད། དེ་ནས་ཤེས་རབ་ལྷ་མོ་ལ་གུར་ཞིག་ཡོད་པ་དེ་ཕུབ་རོགས་དུ་སོང་དུས། ཤེས་རབ་ལྷ་མོའི་གུར་གྱི་ལྕགས་མཐུད་རྒྱགས་ཕྱེད་དེ་ནི་གུར་དེ་ལ་རན་པ་ཞིག་མ་ཡིན་པ་ཤེས་སྟབས། ངས་འདི་ནི་གུར་འདི་ཡིས་མ་རེད་ཅེས་བཤད་པ་ཡིན།
ཏག་ཏག་ངའི་སྐད་ཆ་དེ་ཡིས་ངའི་གྲོགས་པོ་བུ་ཆུང་ལ་གནོད་པ་ཞིག་བྱེད་ཀྱི་ཡོད་པ་གང་ནས་ཤེས། མོ་རང་གིས་རང་ཉིད་ལ་རོགས་རམ་བྱས་ནས་ལྕགས་མཐུད་གུར་ཕུབ་བྱེད་ཅིག་བུ་ཆུང་གིས་སྤྲད་པ་དེར་ཐུགས་རྗེ་ཆེ་མེད་པར། ཁོ་རང་ལ་ཁ་པར་བཏང་ནས་ཚིག་ངན་བཤད་པའི་འགོ་བཙུགས་སོང་། ཁྱེད་རང་གིས་ང་ལ་རྫུན་བཤད་ནས་གང་བྱེད། ཁྱེད་རང་གིས་ལག་པར་རེག་སོང་ཟེར། དེ་འདྲ་ཞིག་མ་རེད། ཁྱེད་རང་གིས་གུར་ཞིག་ཉོས་ཡོད་ས་རེད། ང་ལ་འགོ་བསྐོར་གཏོང་དོན་གང་འདུག་སོགས་སྐད་ཆ་ཆེས་མང་བོ་ཞིག་བཤད་ཀྱི་འདུག
ངའི་སེམས་སུ། མི་འདིའི་རིགས་ལ་རོགས་བྱེད་པ་དེ་ལ་ཡང་བསམ་བློ་བཏང་ནས་རོགས་མ་བྱས་ན། དངོས་ནས་དྲིན་ལན་མེད་པར་བཀའ་ལོག་ཉོ་བ་རང་རེད་འདུག་སྙམ་ཞོར་དུ། མོ་རང་གི་གུར་དེ་ཕྱིར་བསྡུ་བཞིན། བུད་མེད་གཞན་དེ་ཡི་གུར་ནི་མི་བཅུ་ལྷག་གཤོང་བ་ཞིག་ཡིན་དུས། དེ་ཡི་ནང་དུ་མཉམ་དུ་ཉལ་རྒྱུའི་ཐག་བཅད་བྱུང་བ་ལྟར། མོ་རང་གིས་ཉལ་ཆའི་རིགས་ནང་དུ་བཅུགས་སོང་། ང་རང་གིས་དབུགས་གདན་གཉིས་ཀ་རླངས་འཁོར་ནང་ནས་དབུགས་བརྒྱབས་རྗེས་སུ། ཕྱིར་གུར་འགྲམ་དུ་འབྱོར་དུས། ད་ནི་ང་ཚོས་ཁ་ལག་ག་རེ་བཟོས་ན་འགྲིག་གི་འདུག་ཟེར་ནས་ང་ལ་འདྲི་བཞིན་འདུག
སྐབས་དེར་ངས་ག་རེ་བཟོས་ན་འགྲིག་གི་རེད། ད་མགྱོགས་པོ་བཟོས་ན་མ་གཏོགས། འདི་ཁུལ་དུ་གློག་ཡོད་ས་མ་རེད། གློག་མེད་དུས། ང་ཚོས་ས་རུབ་ན་ཟ་མ་བཟོ་བར་དཀའ་ངལ་འཕྲད་ངེས་ཡིན་ཞེས་བཤད་དུས། ཤེས་རབ་ལྷ་མོས་སྲིང་མོ་ཡིས་དེ་རེད། ངས་ཀྱང་ད་ལྟ་རང་དེ་ལྟར་བཤད་པ་ཡིན་ཟེར། ང་ཚོས་སྐད་ཆ་དེ་འདྲ་ཞིག་བཤད་རྗེས་ང་རང་གིས་ཅ་ལག་གཞན་ཞིག་གི་ཆེད་དུ་རླངས་འཁོར་ཡོད་སར་སོང་ནས་ཕྱིར་སླེབས་དུས། ཤེས་རབ་ལྷ་མོའི་སྲིང་མོ་ཡིས། དོ་ནུབ་ང་ཚོས་ཟ་མ་བཟོ་དགོས་ཀྱི་མི་འདུག རྒ་ལས་ཐུ་ཡིས་ཟ་མ་མང་བོ་ཞིག་བཟོས་ཚར་བ་ཉོ་ནས་ཡོང་འདུག་ཟེར།
རྒ་ལས་ཐུ་ནི། གོང་དུ་བཤད་མ་ཐག་པའི་བུ་མོ་གཉིས་ཀྱི་ཨ་མ་དེ་ཡིན། མོ་རང་ནི་དངོས་ནས་རྒྱགས་པ་ཞིག་རེད། ལྷག་དུ་རྐུབ་ཤ་དེ་ནི་ཆེ་བ་ནི། དངོས་ནས་ཡར་འགྲོའི་མར་འགྲོའི་སྐབས་སུ་མི་བལྟ་བསམ་ཡང་། ངའི་མིག་ལས་ངན་འདི་དང་། སེམས་སྡུག་ཆག་དེ་གཉིས་ཀྱིས་མོ་རང་གི་རྗེས་སུ་ཡང་ཡང་ཤོར། མཚོ་མོའི་རླབས་སྒྲ་ནི་ཤག་ཤག་བྱེད་བཞིན་ཡོད་ལ། ཉེ་འགྲམ་དུ་དོར་ཐུང་དང་ནུ་ཁེབ་ལག་འཐིལ་ཙམ་རེ་གྱོན་ནས་ཕར་འགྲོ་ཚུར་འགྲོ་བྱེད་མཁན་གྱི་ན་གཞོན་བུད་མེད་ཀྱང་ཆེས་མི་ཉུང་བ་ཞིག་ང་ཚོའི་གུར་འགྲམ་དུ་གུར་ཕུབ་ནས་བསྡད་ཡོད་པ་མ་ཟད། དེ་དག་གི་ཕྱོགས་སུ་ཡང་མཚམས་རེར་མི་བལྟ་བསམ་ཡང་། སེམས་འདི་དངོས་ནས་རང་དབང་མེད་སོང་བ་ཡིན་ནམ། ཡང་ན། མིག་འདིས་ལོང་སྤྱོད་ཅིག་བྱེད་ཀྱི་ཡོད་མེད་གང་ལྟར། ཉེ་ཁོར་དུ་ཡང་ཡང་མིག་གིས་ཕྱོགས་པ་ཡིན།
མཚོ་མོའི་རླབས་སྒྲ་ནི་ཆེ་ཆེར་འགྲོ་བཞིན་ཡོད་ལ། ཉེ་འགྲམ་སུ་མར་མེ་སྒྲོན་མཁན་གྱི་སྐོར་སྐོར་བྱས་ནས་ཡོད། ང་ཚོས་ཀྱང་མར་མེ་ཁ་ཤས་ཤིག་སྒྲོན་རྗེས་སུ། ཁ་ལག་གི་རྗེས་ཀྱི་ཞོར་ཟས་མངར་མོའི་རིགས་དང་འཚིག་ཇ་། སྤི་རག་འཐུང་མཁན་གཅིག་གཉིས་ཤིག་གིས་སྤི་རག་འཐུང་འགོ་བཙུགས། ང་ཡིས་ཟུར་ཞིག་ནས་ཐ་མག་ཞིག་མེ་ལ་སྒྲོན་ཞོར་དུ། ཟླ་འོད་ཀྱི་འོག་ནས་ང་ཚོས་སྒྲོན་པའི་མེ་སྤུངས་ཆུང་ཆུང་དེ་ཡི་འགྲམ་དུ་ཤེས་རབ་ལྷ་མོའི་སྲིང་མོ་ཡི་ཁྱོ་ག་དང་མཉམ་དུ་ཁ་བརྡ་ལ་ཞུགས།
མུ་འགོད།
མུ་མཐུད་ནས་མགྱོགས་པོར་འབྲི་རོགས། རྗེས་མར་འདི་དེབ་ཅིག་ཏུ་དཔར་ཐུབ་ན་བཟང་གི་ཡ། འཕྲོག་ཉོ་བྱེད་ཐག་ཆོད་རེད།