ཟླ་འདིའི་ཚེས་མགོ་ནས་བཟུང་ཁམས་དཀར་མཛེས་ས་ཁུལ་གྱི་བོད་རིགས་སེར་སྐྱ་མི་མང་གི་རང་དབང་གི་འབོད་སྒྲ་མཚམས་ཆད་མྱོང་མེད་ལ། ད་ཆར་རྒྱ་གཞུང་གིས་དཀར་མཛེས་དགོན་གྲོང་གཉིས་ནང་དམ་དྲག་ཤུགས་ཆེན་བྱས་ཤིང་། སྲིད་གཞུང་གི་མི་སྣ་དགོན་སྡེ་ཁག་ཏུ་ཡོང་སྟེ་སོ་སོའི་དགོན་པའི་གྲྭ་བ་ཚོར་བདག་པོ་རྒྱག་རྒྱུ་མིན་ན་དགོན་པ་སྒོ་རྒྱག་རྒྱུ་ཡིན། ཞེས་ཉེན་བརྡ་བཏང་ཡོད་འདུག
ཕྱི་ཚེས་ ༡༧ ཉིན་དཀར་མཛེས་ཁང་དམར་དགོན་གྱི་རང་ལོ་ ༢༢ ཡིན་པའི་གྲྭ་རིན་ཆེན་རྒྱ་མཚོ་དང༌། རང་ལོ་ ༢༡ ཡིན་པའི་གྲྭ་བླ་མ་ཚེ་རིང་རྣམ་གཉིས་ཀྱིས་དཀར་མཛེས་རྫོང་ཐོག་ཏུ་རྒྱ་གཞུང་ལ་ངོ་རྒོལ་སྐད་འབོད་བྱས་ཏེ་ཉེན་རྟོག་པས་འཛིན་བཟུང་བྱས་ཡོད་འདུག
ཕྱི་ཚེས་ ༡༨ ཉིན་གྱི་ཞོགས་པའི་ཆུ་ཚོད་ ༦ པ་ཙམ་ལ་ཉ་རྒྱས་དགོན་གྱི་བཙུན་མ་བློ་བཟང་དབྱངས་མཚོ་དང་བློ་བཟང་མཁའ་འགྲོ། འཕྲིན་ལས་སྒྲོལ་མ་གསུམ་གྱིས་དཀར་མཛེས་རྫོང་ཐོག་ཏུ་ཞི་བའི་སྐད་འབོད་བྱས་ཏེ། རྒྱ་གཞུང་གི་ཉེན་རྟོག་པས་ཉེས་རྡུང་ཚད་མེད་གཏོང་བཞིན་འཛིན་བཟུང་བྱས་ཡོད་འདུག
ཕྱི་ཚེས་ ༡༩ ཉིན་དགའ་ལྡན་ཆོས་གླིང་དགོན་གྱི་བཙུན་མ་བཀྲ་ཤིས་སྒྲོལ་དཀར་དང་བཙུན་མ་ཕུན་ཚོགས་སྒྲོལ་མ་རྣམ་གཉིས་དང༌། དཀར་མཛེས་དགོན་གྱི་གྲྭ་དབང་དབྱངས་བཅས་ཀྱིས་དཀར་མཛེས་རྫོང་ཐོག་ཏུ་ཞི་བའི་ངོ་རྒོལ་སྐད་འབོད་གནང་སྟེ་ཅུང་ཙམ་ལས་མ་འགོར་བར་རྒྱ་གཞུང་གི་ཉེན་རྟོག་པ་བསླེབས་ཏེ་འཛིན་བཟུང་བཙན་འཁྲིད་བྱས་ཡོད་འདུག
ཕྱི་ཚེས་ ༢༠ ཉིན་དཀར་མཛེས་དགའ་ལྡན་ཆོས་གླིང་དགོན་པའི་བཙུན་མ་བཅུ་གཉིས་ལྷ་མོ་ལགས་ཀྱིས་དཀར་མཛེས་རྫོང་ཐོག་ཏུ་བོད་ཀྱི་རྒྱལ་དར་འཕྱར་ཏེ་ཞི་རྒོལ་བྱས་བར། དེ་མ་ཐག་རྒྱ་གཞུང་གི་ཉེན་རྟོག་པ་འབྱོར་ཏེ་འཛིན་བཟུང་བྱས་ཡོད་འདུག
ད་ཆར་དགོན་སྡེ་ཁག་གི་གྲྭ་བཙུན་ཚོ་ཡར་མར་འགྲོ་སྐྱོད་བཀག་སྡོམ་བྱས་ཡོད་པ་མ་ཟད། ཛ་དྲག་ནད་མནར་སོགས་བྱུང་སྟེ་དཀར་མཛེས་རྫོང་ཐོག་ཏུ་འགྲོ་དགོས་བྱུང་སྐབས། ས་གནས་ཞང་སྲིད་གཞུང་གི་ཐོ་འགོད་རྒྱབ་གཉེར་ཡི་གེ་དགོས་པ་མ་ཟད། འགན་ལེན་མི་སྣ་གཅིག་བཅས་མཉམ་འཁྲིད་མེད་ཚེ་འཛིན་བཟུང་བྱ་རྒྱུ་ཡིན་པའི་ཉེན་བརྡ་ཡང་བཏང་ཡོད་འདུག
རྒྱ་གཞུང་གི་ཕྱིར་བསྒྲགས་ལྟར་ན། དཀར་མཛེས་བོད་རིགས་རང་སྐྱོང་ཁུལ་ནི། རྒྱལ་ཡོངས་སུ་ཆེས་ཐོག་མར་བཙུགས་པའི་ཆེད་ཁུལ་རིམ་པའི（专区级）མི་རིགས་རང་སྐྱོང་ཁུལ་ཞིག་ཡིན་པ་དང༌། ཟི་ཁྲོན་ཞིང་ཆེན་གྱི་ནུབ་ཁུལ་དང་མདོ་དབུས་མཐོ་སྒང་གི་ཤར་ལྷོའི་མཚམས་སུ་ཆགས་ཡོད་ལ། མངའ་ཁུངས་ཀྱི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ་འབུམ་གཅིག་དང་ཁྲི་ལྔ་སྟོང་གསུམ་ ༡༥༦༠༠༠ ཙམ་ཡོད་པ་དང༌། ༢༠༠༦ ལོའི་ལོ་མཇུག་བར་དུ་ཁུལ་ཡོངས་སུ་ཁྱོན་སྡོམ་མི་གྲངས་འབུམ་དགུ་ཁྲི་གསུམ་དང་ལྔ་བརྒྱ་ ༩༣༠༥༠༠ ཡོད་པ་དང༌། དེའི་ནང་དུ་བོད་རིགས་འབུམ་བདུན་དང་ཁྲི་གསུམ་སྟོང་གཉིས་ ༧༣༢༠༠༠ ཡོད་པས་སྤྱིའི་མི་གྲངས་ཀྱི་བརྒྱ་ཆའི་བདུན་ཅུ་དོན་བརྒྱད་དང་གྲངས་ཆུང་བདུན་ཟིན་ཡོད། ཁུལ་གཏོགས་རྫོང་ཁག་བཅོ་བརྒྱད་ཡོད་པའི་ནང་གི་མང་ཆེ་བ་ཁམས་པའི་སྡེ་ཡིན་པས་བོད་ཀྱི་ལོ་རྒྱུས་འཕེལ་རིམ་ཁྲོད་དུའང་ཁམས་ཡུལ་དུ་འབོད་བཞིན་ཡོད། ཅེས་བཀོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
སྙིང་སྟོབས་བཙན་པོའི་དཔའ་བོས་གད་རྒྱང་གིས་རྒྱུན་མ་ཁྱད་པར་ཉིན་རེ་བཞིན་ཁམས་དཀར་མཛེས་སུ་བོད་མིའི་མངོན་འདོད་སྒྲུབ་བཞིན་ཡོད་པ་འདིའི་རིན་ཐང་གླེང་མི་ཚར་བ་ཞིག་ཡོད་པ་སུ་ཞིག་གིས་མི་ཤེས་བསམ་དེ་བཞིན་དཔའ་རྒོད་ཚོ་ཁྱེད་ཚོའི་མི་རིགས་ཤིག་གཉའ་གནོད་འོག་ཏུ་ཡོད་མཁྱེན་ནས་འདི་འདྲའི་རླབས་ཆེན་གྱི་བྱས་རྗེས་ཞིག་ཡིན་པ་བརྗོད་མ་དགོས་པ་རེད། འོན་ཀྱང་ཁྱེད་ཀྱི་ཚེ་སྲོག་ནི་ངོ་མ་རིན་ཐང་མེད་པ་ཞིག་ཡིན་དུས་རང་ཉིན་དམར་ཕྱོགས་དྲག་དམག་གི་ལག་ཏུ་མི་ཤོར་བར་ཐབ་ལམ་གང་ཡོད་བྱེད་རྒྱུ་གལ་ཆེན་རེད།