གཞན་ཡུལ་ན་ལས་ཀ་དང་འཚོ་བ་འདི་འདྲ་རེད། ཉེར་དྲུག

གཟའ་འཁོར་སྔོན་མའི་ནང་དུ་ང་རང་ལ་མཛའ་མོའི་ཕ་རྒན་ལ་རས་ལགས་ཀྱིས་ངེད་གཉིས་ཁྱེད་རང་གི་ལས་ཀ་བྱེད་ས་དེ་ནས། ཁྱེད་རང་གི་ལས་ཀ་གྲོལ་ན་ལྷན་དུ་འཛོམས་ནས་ཁ་བརྡ་ལྷོད་ལྷོད་ཅིག་བྱེད་འདོད་འདུག དེ་བྱས་ན་འགྲིག་གི་རེད་དམ་ཟེར་ནས་ང་ལ་དྲིས་པ་དེར། ངས་འགྲིག་དང་འགྲིག ག་དུས་འཛོམས་འདོད་ཡོད་ན་དེ་དུས་འཛོམས་ན་འགྲིག་གི་རེད་ཅེས་ལན་བཏབས་པ་ལྟར། ཁ་སང་ང་རང་ལས་ཀ་གྲོལ་ལ་ཉེ་དུས་སུ་ཁོ་རང་གིས་ཁ་པར་སླེབས་ནས་དེ་རིང་ང་དུས་ལྟར་མ་སླེབས་པ་ཡིན་ན། སང་ཉིན་ཏན་ཏན་འུ་གཉིས་ཐུག་ཆོག་ཟེར་བ་ལྟར། དེ་རིང་ཁོས་ང་རང་གི་ལས་ཀ་བྱེད་ས་ནས་ཆུ་ཚོད་ཕྱེད་ཀ་ལྷག་ལ་སྒུག་པ་རེད།

ལས་ཀ་ཆུ་ཚོད་བཞི་བ་སྟེང་ནས་གྲོལ་དགོས་ཀྱི་ཡོད་ན་ཡང་། སྤྱིན་བདག་གིས་ཧམ་སེམས་ཀྱི་སྔ་གཞུག་དུ་ང་རང་ལ་རང་དབང་ཞིག་མེད་པ་ཡིན་དུས། ངས་ཐབ་ཚང་ནང་ཚང་མ་གཙང་མ་བཟོས་ཚར་དུས་ཆུ་ཚོད་བཞི་དང་ཕྱེད་ཀ་ཡོལ་འདུག ང་རང་གིས་ལས་ཀ་ཚར་བ་དང་ཟ་ཁང་གི་ཐོག་ཁར་ང་ལ་སྒུག་ནས་ཡོད་པའི་རང་གི་མཛའ་མོའི་ཕ་རྒན་ལ་ཐུག་འཕྲད་བྱེད་དུ་སོང་། ཁོ་རང་གིས་ང་མཐོང་བ་དང་དགོད་ཞོར་དུ། ངས་དེ་རིང་ཁྱེད་ལ་ཆུ་ཚོད་ཕྱེད་ཀ་ལྷག་ཙམ་ལ་སྒུག་པ་ཡིན། ཁ་སང་འུ་གཉིས་ཐུག་མ་ཐུབ་པ་དེར་གངས་དཀར་ལྷ་མཚོ་ངའི་སྒང་ལ་ཚུགས་པ་ཟ་ཡི་འདུག་ཟེར་ཞོར་དུ་རྐུབ་སྟེགས་སྟེང་གི་རྒྱབ་ཁུག་རྒྱབ་དུ་འཁུར།

ངས་སྐྱོན་ཡོད་ནི་མ་རེད། ངེད་གཉིས་ད་གང་དུ་འགྲོ་ཞེས་བཤད་དུས། ཁོ་རང་གིས་ང་རང་གི་ལས་ཀ་བྱེད་སའི་སྤྱིན་བདག་ནི་ཚོང་འབྲེལ་ཡིན་པའི་ཟ་ཁང་གཞན་དེ་ཡི་ནང་དུ་འགྲོ་ཟེར། ངེད་གཉིས་སྔ་གཞུག་བྱས་ནས་སློབ་གྲྭ་ཆེན་མོའི་ར་སྐོར་ནང་ནས་འགྲོ་བཞིན་ཁ་བརྡ་ལ་ཞུགས། ཁོ་རང་གིས་རང་ཉིད་ཀྱིས་སྔོན་ཆད་འདི་ནས་སློབ་ཁྲིད་བྱེད་མྱོང་ན་ཡང་། ད་ལྟའི་འཆར་གང་ནས་གང་དུ་འགྲོ་དགོས་མིན་གྱི་ལམ་ཁ་ཡག་པོ་ཞིག་མི་ཤེས་ཀི ཁྱེད་རང་སྔོན་དུ་སོང་དང་། ང་སོང་ནས་ཟ་ཁང་དེ་སྐད་ཆ་ཞིག་འདྲི་ཟེར།

ཟ་ཁང་གི་ཞབས་ཞུ་མ་བུད་མེད་དེ་ཡིས་ངེད་གཉིས་མཐོང་བ་དང་། མོ་རང་གིས་ང་རང་ལ་འཚམ་འདྲི་ཞིག་བྱས་རྗེས། མོ་རང་ཕར་ཕྱོགས་སུ་སོང་ནས་རོགས་པ་ཁ་ཤས་དང་མཉམ་དུ་བསྡད་ནས་ཁ་བརྡ་བྱེད་ཀྱིན་བསྡད་སོང་། དེ་དུས་ངའི་ཕ་གཡར་ལ་ངེད་གཉིས་ཀྱིས་ག་རེ་འཐུང་གི་ཡིན། ང་སོང་ནས་བསྔགས་ཆོག་ཞེས་བཤད་དུས། ཁོས་ཅུང་ཙམ་སྒུག་དང་མོ་རང་ཕྱིར་ཡོང་གི་རེད་ཟེར། ངས་ཕལ་ཆེར་ཡོང་གི་མ་རེད། མོ་རང་ནི་ང་ཚོའི་ལས་ཀ་བྱེད་རོགས་གཅིག་ཡིན། ཟ་ཁང་འདི་ནི་ང་རང་གི་ལས་ཀ་བྱེད་སའི་སྤྱིན་བདག་གི་མཉམ་འབྲེལ་ཟ་ཁང་རེད། མོ་རང་གིས་ངེད་གཉིས་འདིར་ངལ་གསོ་བྱེད་དུ་ཡོང་བ་རེད་བསམ་པ་རེད། མོ་རང་གིས་སྔོན་ཆད་ཕར་ཕྱོགས་ངས་ལས་ཀ་བྱེད་ས་དེར་ལས་ཀ་བྱས་པ་རེད། ཕྱིས་སུ་མོ་རང་འདི་ལ་བཏང་འདུག ང་སོང་ནས་སྐད་གཏོང་།

མོ་རང་སླེབས་པ་དང་ཕ་གཡར་ནི་རྩེད་དགོད་ལ་དགའ་བའི་མི་ཞིག་ཡིན། ཁོས་བུད་མེད་དེར་ཀུ་རེ་བྱེད་ཞོར་དུ་ངེད་གཉིས་ལ་འཚིག་ཇ་གཉིས་དང་ཀུ་ཤུའི་མངར་ཟས་དུམ་པུ་གཉིས་བསྔགས། ངས་འཚིག་ཇ་དེ་འཁུར་རོགས་བྱེད་ཆོག ཁྱེད་རང་སོང་ནས་བཞུགས་དང་ཞེས་བཤད་ན་ཡང་། ཁོས་ཀྱང་རང་ཉིད་ནི་སྔོན་ཆད་ཟ་ཁང་གི་ཞབས་ཞུ་བྱེད་མྱོང་བ་དང་། ཞབས་ཞུ་བ་ཆེས་སྐད་གྲགས་ཅན་ཞིག་ཡིན་ཞེས་དགོད་ཀྱིན་དུ། འཚིག་ཇ་གཅིག་ཁོ་རང་གིས་འཁུར། གཞན་དེ་ངས་འཁུར། ངེད་གཉིས་བསིལ་ཞིང་ཁ་ཁུ་སིམ་པའི་ཟ་ཁང་དེ་ནས་ལྷོད་ལྷོད་འདུག

དེ་དུས་ཁོས་རེད། རྡོ་རྗེ། རེད། ད་འུ་གཉིས་འདིར་འདུག ནང་འདྲ་བོ་མ་རེད། ཐར་མ་མཚོ་ལ་བལྟ་མི་དགོས། ཕར་ཕྱོགས་ཚུར་ཕྱོགས་ཀྱི་སྐད་ཆར་སྙམ་འཇོག་མི་དགོས། འུ་གཉིས་གཅིག་བུ་རེད། དེ་ཡིན་དུས། ང་རང་གིས་ཁྱེད་རང་ལ་ཁ་བརྡ་ཞིག་བྱེད་འདོད་པ་དེ་ཡིན། ཁྱེད་རང་གིས་དེབ་དེ་ཡི་སྐོར་གང་འདྲ་འདུག ངས་འདི་ནས་ཁྱེད་རང་གི་དེབ་དེ་དཔར་རོགས་ཐུབ་ཀྱི་ཡོད། དེ་འགྲིག་གི་རེད་དམ་ཟེར།

ངས་ད་ལྟ་ད་དུང་ཤེས་མ་སོང་། གྲོགས་པོ་ཞིག་ལ་ཞུ་དག་གི་ཆེད་དུ་བཏང་ནས་ཟླ་ངོ་དགུ་ལྷག་སོང་འདུག ཉེ་དུས་སུ་ཁོ་རང་གིས་ཚར་གྲབས་ཡོད་ཟེར། ཕྱོགས་གཅིག་ནས་ཁོ་རང་ཡང་ཕ་རྒན་ཞིག་ཡིན་ལ། ལས་ཀ་ཡང་ཡོད། དེ་ཡིན་དུས་ལས་སླ་བོ་མ་རེད། གང་ལྟར། མི་རིང་བར་ཚར་རྒྱུར་རེ་བ་བརྒྱབས་ནས་ཡོད། ངས་བསམ་པ་ལ་རྒྱ་གར་ནས་དཔར་བསྐྲུན་བྱེད་ཐུབ་ན་བསམ་གྱི་ཡོད། འདི་ནས་དཔར་བསྐྲུན་བྱེད་པ་ནི། དངོས་ནས་གོང་ཆེན་པོ་རེད། ཁྱེད་རང་གིས་དེ་འདྲ་བསམ་པ་དེར་དངོས་ནས་དགའ་ནི་ཡིན།

ཁོང་གིས་ངས་སྔོན་ཆད་ང་རང་གི་དེབ་དཔར་བསྐྲུན་བྱས་པ་དེར། མང་བོ་ཞིག་དཔར་དུ་བཏབས་ཡོད་པ་མ་རེད། ང་རང་གི་འགོ་སྔ་ཚང་མ་བྱས་པ་ཡིན། གལ་སྲིད། ཁྱེད་རང་གི་དེབ་དེ་རོགས་པས་ཞུ་དག་ཚར་ནས་འབྱོར་བ་ཡིན་ན། ང་རང་གིས་ལག་བཟོའི་དཔར་བསྐྲུན་དེབ་རྐང་གཅིག་བྱེད་འདོད་ཡོད། དེ་བྱེད་དུ་མ་བཅུགས་ན་ང་ཁོང་ཁྲོ་ཟ་ངེས་ཡིན། ཁྱེད་རང་གིས་ང་ཁོང་ཁྲོ་ཟ་བ་མཐོང་ན་འདོད་དམ་ཟེར་ནས་གདོང་ལ་ཁྲོ་ཉམས་ཤིག་སྟོན་ཁུལ་བྱས། ངས་དེར་ཁས་ལེན་བྱས་པ་ཡིན། དེ་ཡི་འཕྲོར། ཁོང་གིས་ཉེ་དུས་སུ་ལག་ཁྱེར་ལག་ཀླད་ཆུང་ཆུང་ཞིག་ཉོས་ཡོད་ལ། དེ་ནི་དེབ་གཅིག་གི་ཆེ་ཆུང་ལས་མེད་པ་རེད། ཁོ་རང་གིས་ང་རང་དེར་དགའ་བོ་ཡོད་ན། ང་དང་གངས་དཀར་ལྷ་མཚོ་ལ་གཅིག་ཉོས་ཆོག་ཟེར།

དངོས་ནས་བཤད་ན། ཁོ་རང་གིས་ད་ལྟ་ངས་སྤྱོད་བཞིན་པའི་གློག་ཀླད་འདི་ཡང་ཁོ་རང་གིས་ང་ཚོར་སྤྲད་པ་ཡིན། ད་དུང་། བརྙན་འཕྲིན་དཔར་ཆས། སྒྲ་རྡུལ་འཕྲུལ་ཆས། སྒྲ་གསར་བ་ཞིག་བཅས་སྤྲད་ཡོད། དངོས་ནས་ཁོ་རང་གིས་སྤྲད་པ་མང་མེད་ན་ཉུང་མེད། དང་ཐོག་ངེད་གཉིས་ཁྲོམ་དུ་ག་དུས་སོང་ན་ཡང་། ངེད་གཉིས་ལ་འཁོ་ངེས་ཀྱི་ཅ་ལག་ཙག་ཙག་གི་རིགས་མི་ཉུང་བ་ཞིག་ལ་ཁོ་རང་གིས་དངུལ་བཏང་བ་ཡིན། ང་རང་དངོས་ནས་མུ་མཐུད་དུ་ཁོ་རང་གི་ལག་པ་ནས་ཅ་ལག་ལེན་པར་འཚེར་སྣང་འདུག དངོས་ནས་བཤད་ན། ང་རང་ལ་གློག་ཀླད་ཀུ་ཤུ་རྟགས་ཅན་ཆུང་ཆུང་དེ་དགའ་བོ་ཡོད། རང་ཉིད་ཀྱིས་གཅིག་ཉོ་འདོད་ཡོད་ཀྱང་། མཛའ་མོ་དང་མཉམ་དུ་ཁ་རྩོད་རྒྱགས་པར་སུན་སྣང་འདུག དེ་ཡི་སྟབས་ཀྱིས་མ་ཉོས་པར་བཞག་ཡོད།

གང་ལྟར། ངས་ཁོང་ལ་ད་ལྟའི་འཆར་ང་རང་ལ་དངོས་ནས་དགོས་པ་གང་ཡང་མི་འདུག་ཞེས་ལན་བཏབས་པ་ཡིན། དེ་དུས་ཁོ་རང་གིས་ང་ལ་གངས་དཀར་ལྷ་མཚོ་ཁྱེད་གཉིས་མཚམས་མཚམས་སུ་ལས་ཀ་གྲོལ་ནས་བུ་མོ་ཐར་མ་མཚོ་མེ་ཝལ་{མཛའ་མོའི་མ་རྒན་མིང་}གྱི་སར་བཞག་ནས་གློག་བརྙན་རེ་བལྟ་རུ་འདྲ་སོང་། སྐྱིད་སྐྱིད་འདྲ་བཏང་ན་ག་འདྲ་འདུག འགྲོ་བཞིན་ཡོད་དམ། དངོས་ནས་ང་རང་གིས་རང་ཉིད་ཀྱི་འདས་པའི་བྱ་བ་དག་ལ་ཕྱིར་དྲན་ཞིག་བྱོས་དུས། ད་གཟོད་ད་ལྟའི་འཆར་འགྱོད་པ་བྱེད་དགོས་ས་མང་བོ་ཞིག་འདུག

ང་རང་ཡང་ཆུང་དུས་སུ། ཁྱེད་རང་དང་འདྲ་བར་གློག་ཀླད་ལ་དངོས་ནས་དགའ་བོ་ཡོད། དེ་དུས་སུ་གློག་ཀླད་ཀྱི་ལམ་ནས་དྲ་རྒྱ་བེད་སྤྱོད་བཏང་བར་དངོས་ནས་ཧ་ལས་པའི་གོང་ཆེན་པོ་རེད། དུས་ཚོད་གཅིག་ལ་ཨ་སྒོར་བདུན་བརྒྱ་རེད། དེ་ཡང་ལས་སླ་བོ་རེག་གི་མ་རེད། དེ་ཡིན་ཡང་ངས་མེ་ཝལ་ལ་གློག་བརྙན་ལ་བལྟ་རུ་འགྲོ་ཞེས་དུས་ཚོད་བསྒོས་ཡོད་ཀྱང་། མཚམས་རེར་ང་རང་གློག་ཀླད་ལ་འགོ་འཐོམ་ནས་དུས་ཚོད་ལྟར་འགྲོ་ཐུབ་ཀྱི་མེད་ལ། རང་གི་བྱིས་པ་དག་ལ་གཉོར་སྐྱོང་ཡག་པོ་ཞིག་ཀྱང་བྱེད་ཐུབ་ཡོད་པ་མ་རེད། ཕྱིས་སུ་ཤེས་དུས་བྱིས་པ་ཚོ་ནི་དངོས་ནས་ཆེན་པོ་ཆགས་པ་ནི་སྐད་ཅིག་ཡུན་ཙམ་རེད་འདུག ད་ལྟ་དེ་རིང་ཡིན་ན་ཡང་ང་རང་མེ་ཝལ་ལ་བརྩེ་བ་ཡོད་པ་དང་མོ་རང་གི་མཉམ་དུ་དུས་ཚོད་རེ་གཏོང་འདོད་ཀྱང་། ད་ནི་ཁྱེད་ཀྱི་ཤེས་པ་དེ་རེད། དབྱིན་ཇིའི་བཤད་ཚུལ་ཞིག་ལ། ལས་ཀ་གལ་ཆེའམ། ནང་མི་གལ་ཆེ་ཟེར་སྲོལ་ཡོད་པ་གཉིས་ནས། ངས་དེ་དུས་ལས་ཀ་གལ་ཆེ་བར་བཟུང་ནས། མང་ཤོས་རང་ཉིད་ཀྱི་ལས་ཀའི་སྐོར་ལ་བཏང་བ་རེད་ལ། ལས་ཀ་དེ་ཡང་རང་ཉིད་དགའ་སའི་ལས་ཀ་ཞིག་ཡིན་ལ། ལས་ཀའི་དངུལ་སྒོར་མང་ཤོས་ཤིག་ཀྱང་ནང་མིའི་ཆེད་དུ་བཏང་པ་རེད་ཟེར་ན་འགྲིག་གི་ཡོད་པ་རེད།

ངས་དེ་རིང་འདི་ལྟར་བཤད་པ་དེ་ནི་ཁྱེད་རང་ག་རེ་ཡིན་མིན་ཤེས་ཡོད་ངེས་ཡིན། ཁྱེད་རང་ནི་མི་རིག་ཡག་ཞིག་རེད་འདུག ངའི་རེ་བ་ལ་ཁྱེད་རང་གི་སེམས་ལ་གནོད་མེད་པར་ཤོག་ཟེར། ངས་དཔེ་མི་སྲིད། ང་ཚོའི་བོད་པའི་ཁ་རྒྱུན་དུ་མི་རྒན་པའི་ཁ་ལ་ཉོན་ཟེར་སྲོལ་ཡོད། དེ་ཡིན་དུས་རང་ལས་རྒན་པ་སུ་ཞིག་གི་བཤད་པའི་སྐད་ཆ་དེ་དག་གི་ནང་དུ་བདེན་པ་མང་ནི་རེད་ཅེས་བཤད་དུས། ཁོས་རེད་རེད། ཡིན་ཡང་། ཉན་དགོས་ན་ཡང་དང་ལེན་བྱེད་དགོས་མིན་དེ་ནི་རང་གིས་བསམ་བློ་གཏོང་དགོས་པ་ཞིག་རེད་ཟེར།

ངའི་སེམས་སུ་དངོས་ནས་རང་གི་དགའ་ཕྱོགས་ཀྱི་ལས་ཀ་ནི་འདི་མིན་ལ། ད་ལྟའི་འཆར་རང་གི་བྱེད་བཞིན་པའི་ལས་ཀ་འདི་ནི་ནང་མི་བུ་ཕྲུག་གི་ཆེད་དུ་ཡིན་པ་མ་ཟད། རང་ཉིད་གཅིག་བུའི་ཆེད་དུ་མིན། རང་ཉིད་ཀྱི་དགའ་ཕྱོགས་ཀྱང་མ་རེད་སྙམ་ན་ཡང་། ངས་ཁོང་ལ་ང་རང་གིས་ད་ལྟའི་ལས་ཀ་འདི་ནི་ང་རང་ལ་འཚམ་པོ་ཞིག་མིན་ན་ཡང་། ནང་མིའི་ཆེད་དུ་ཟེར་ན་རེད། སྒོར་མོའི་ཆེད་དུ་ཟེར་ན་རེད། རེ་ཞིག་རིང་མི་བྱེད་ཐབས་མེད་རེད། ང་རང་ནི་ཤ་མི་ཟ་བའི་མི་ཞིག་ཡིན་དུས། ཐབ་ཚང་འདིའི་ལས་ཀ་ནི་ང་རང་ལ་དངོས་ནས་འཚམ་པོ་མི་འདུག་པ་ཁྱེད་རང་ཡང་ཤ་མི་ཟ་མཁན་ཞིག་ཡིན་དུས་ཤེས་ངེས་རེད། གང་ལྟར། ཉིད་ནས་བཤད་པའི་སྐད་ཆ་དེ་དག་ངའི་ཡིད་དུ་འཛིན་ངེས་ཡིན།

ངེད་གཉིས་དུས་ཚོད་གཅིག་ཙམ་ལ་ཁ་བརྡ་བྱས་རྗེས་རླངས་འཁོར་འབབ་ཚིགས་སུ་བསྐྱོད་བཞིན་པའི་ལམ་བར་དུ། ངས་ང་རང་ལ་རེ་སྐུལ་ཞིག་བྱེད་རྒྱུ་ཡོད། ཐེངས་རྗེས་མ་དེར། ང་རང་ཁྱེད་རང་གི་ནང་དུ་བལྟ་འདོད་ཅིག་ཡོད་ཀི དེ་འགྲིག་གི་རེད་དམ་ཞེས་དྲིས་དུས། ཁོས་འགྲིག་གི་རེད། ཡིན་ཡང་། ང་རང་གི་ནང་དུ་གློག་ཀླད་ཡག་པོ་ཞིག་ཡོད། དེ་ཁྱེད་རང་གིས་ཐུག་ཆོག་གི་མེད་ཟེར་ནས་ཀུ་རེ་ཞིག་བྱས།

ང་རང་རྒྱལ་ཁབ་འདིར་སླེབས་ནས་ལོ་ངོ་གསུམ་འགྲོ་གྲབས་ཡོད་ལ། ཁོ་རང་གི་ནང་དུ་ཐེངས་གཅིག་ལ་ཡང་སོང་མྱོང་མེད། ང་རང་གི་མཛའ་མོ་ཡང་ལོ་ངོ་དུ་མའི་རིང་དུ་རང་གི་ཕ་རྒན་གྱི་ནང་དུ་སོང་མྱོང་མི་འདུག ཕ་རྒན་ལ་ཐུག་འཕྲད་བྱེད་པ་ནི་ཟླ་རེ་ནང་དུ་ཉུང་མཐར་ཐེངས་གཅིག་ཡིན་ཟེར་ན་འགྲིག་གི་ཡོད་ཀྱང་། ཐུག་ས་ནི་མོ་རང་གི་ཨ་མའི་ནང་། ཡང་ན། ཟ་ཁང་། ཚོང་ཁང་། ཁྲོམ་རྭ། སྐྱེད་ཚལ། ཡུལ་ལྗོངས་སོགས་དེ་དག་གི་གང་རུང་ཞིག་ཡིན། ཁོ་རང་གི་ཕ་རྒན་ནི་རྗོའུ་ཆོས་ལུགས་ལ་དད་མོས་བྱེད་མཁན་གྱི་དད་ལྡན་པ་ཞིག་ཡིན། འོན་ཀྱང་། ལྟ་བ་མཁྲེགས་པོ་དེ་ཡི་རིགས་དེ་མིན།

ཕྱིར་ཡོང་བའི་ལམ་ཁར་རང་གི་སེམས་སུ་ནང་དུ་སླེབས་ནས་ཉལ་དུ་མ་སོང་བའི་སྔོན་དེར། ཆུ་ཚོད་གཅིག་གཉིས་ཤིག་ལ། དྲ་རྒྱའི་སྟེང་དུ་བསྡོད་པ་དེ་ནི། རང་ཉིད་བོད་མི་ཞིག་དུ་སྐྱེ་བའི་བོད་ཡིག་ལ་དགའ་བ་དང་བོད་ཀྱི་དྲ་ངོས་དག་ལ་ཉུལ་བར་སྤྲོ་བ་དེ་ཡིན་དུས། དེ་ཡི་དུས་ཚོད་དེ་ནི་ཉིན་བཀང་གི་འཕྲུལ་འཁོར་ལྟ་བུའི་ལས་ཚེགས་དེ་ངལ་གསོ་ཐོབ་ཆེད་ཅིག་ཡིན་ཟེར་ན་འགྲིག་གི་ཡོད་ཀྱང་། ཕ་རྒན་ཞིག་གི་དངོས་ནས་རང་གི་མཛའ་མོའི་གྲོད་ཁོག་ནང་དུ་བུ་ཆུང་ཞིག་ཡོད་པ་དེ་དག་ལ་བསམ་ན། བུ་མོ་ཉལ་རེག་བར་དུ་གློག་ཀླད་སྒོ་མ་ཕྱེ་བར་འབད་བརྩོད་བྱས་པ་ཡིན་ན། དེ་ཡང་མ་འགྲིག་པ་གང་ཡང་མི་འདུག་སྙམ་ན་ཡང་། མཛའ་མོའི་དེབ་འདྲ་ཀློག མཛའ་མོའི་མ་རྒན་གྱིས་དེབ་འདྲ་ཀློག ཚགས་པར་འདྲ་ཀློག ཞོར་དུ་བུ་མོ་བལྟས་དུས་སུ། ང་རང་ཡང་རང་དབང་མེད་པར་གློག་ཀླད་སྟེང་དུ་ཤོར་འགྲོ་བཞིན་ཡོད།

མུ་འགོད།