རྒྱ་གཞུང་གིས་དབང་ཡོད་ཀྱིས་ཐོབ་ཐང་སྲུང་སྐྱོབ་ཀྱི་ཁྲིམས་རྩོད་པ་ཚོར་གཉའ་གནོན་དང་དམ་དྲག་ཆེ་རུ་གཏོང་བཞིན་པ་དང་། ས་འོག་ཡེ་ཤུའི་ཆོས་ཁང་ (Underground Church) གི་གྱོད་དོན་གྱི་ཁྲིམས་རྩོད་པ་ཝང་ཤ་ཧོང་ཁྱོ་ཤུག་བུ་ཕྲུག་དང་བཅས་ཐའེ་ཝན་དུ་སླེབས་ནས་རྒྱལ་ཁབ་གཞན་དུ་སྐྱབས་བཅོལ་ཞུ་ཐབས་བྱེད་བཞིན་འདུག
ཕྱི་ཟླ་ ༩ ཚེས་ ༥ ཉིན་ཝི་ཞིན་གསར་ཁང་ (Vision Times) གི་གསར་འགོད་པ་ལི་མོ་ཙིས་སྤེལ་བའི་གནས་ཚུལ་ལྟར་ན། རྒྱ་ནག་གིས་དུས་རྒྱུན་ནས་འགྲོ་བ་མིའི་ཐོབ་ཐང་སྲུང་སྐྱོབ་ཀྱི་ཁྲིམས་རྩོད་པ་ཚོར་གནོན་ཤུགས་སྤྲོད་བཞིན་ཡོད་པ་ལྟར། ཉེ་ཆར་རྒྱ་ནག་གཞུང་གིས་པེ་ཅིན་གྱི་ (著名家庭教会) ཁྱིམ་ཚང་ཆོས་ཚོགས་ཏེ་ས་འོག་ཡེ་ཤུའི་ཆོས་ཁང་ (锡安教会) གི་གྱོད་དོན་གྱི་ཁྲིམས་རྩོད་པ་ཝང་ཤ་ཧོང་ (王夏红) ལ་དམ་དྲག་དང་གནོན་ཤུགས་སྤྲད་རྐྱེན། ཟླ་འདིའི་ཕྱི་ཚེས་ ༢ ཉིན་ཁོ་མོའི་ནང་མི་དང་བཅས་ཐའེ་ཝན་ལ་བྲོས་བྱོལ་དུ་འབྱོར་འདུག
ཝང་ཤ་ཧོང་གིས་གསར་འགོད་པ་རྣམས་ལ། ཁོ་མོ་ད་སྐབས་རྒྱ་ནག་གཞུང་གི་དམ་དྲག་འོག་ཡོད་སྐོར་དང་། མོ་དང་མོའི་ལས་གྲོགས་ཚོས་རང་འགུལ་གྱིས་ཁྲིམས་རྩོད་ལས་ཁུངས་ཀྱི་ལས་དོན་མཚམས་འཇོག་མ་བྱས་ན། གཞུང་གིས་བཙན་དབང་གིས་སྒོ་བརྒྱག་རྒྱུ་ཡིན་ལུགས་ཀྱི་བཙན་བཀའ་བཏང་ཡོད་སྐོར་བཤད་འདུག ཁོ་མོ་དང་ཁོ་མོའི་ནང་མི་ཐའེ་ཝན་དུ་འབྱོར་སྐབས། རྒྱ་ནག་ཏུ་ཕྱིར་ལོག་རྒྱུ་མིན་པའི་ཐག་གཅོད་བྱས་པས། ཐའེ་ཝན་གྱི་ཕྱི་མི་གནས་སྤོའི་སྡེ་ཚན་གྱིས་ཀྱང་གནས་སྐབས་རིང་གནམ་ཐང་དུ་སྡོད་ཆོག་པའི་ཆོག་མཆན་སྤྲད་ཡོད་འདུག ད་ལྟ་ཁོ་མོས་ཨ་རི་དང་། ཁ་ན་ཌ་གཙོས་པའི་རྒྱལ་ཁབ་ཁག་ནས་སྐྱབས་བཅོལ་གྱི་ཐོབ་ཐང་རེག་པའི་རེ་བ་བྱེད་བཞིན་ཡོད་སྐོར་སོགས་བཤད་འདུག
རྒྱ་གཞུང་གིས་ཁྲིམས་རྩོད་པར་གཉའ་གནོན་བྱས་པ་ནི་རྒྱུན་རིང་གི་ལོ་རྒྱུས་ཤིག་ཡིན་ཞིང་། ཕྱི་ལོ་ ༢༠༢༠ ལོའི་ཟླ་ ༤ ཚེས་ ༢༤ ཉིན། རྒྱ་ནག་གི་འགྲོ་བ་མིའི་ཐོབ་ཐང་གི་ཁྲིམས་རྩོད་ལྷན་ཚོགས་ཀྱིས་བསྒྲགས་གཏམ་ཞིག་སྤེལ་བའི་ཁྲོད། ཁྲིམས་རྩོད་པ་ཚོའི་ཐོབ་ཐང་སྲུང་སྐྱོབ་ཀྱི་དཀའ་ངལ་ཆེ་བའི་གནས་སྟངས་ལ་ཕྱིར་དྲན་བྱས་ཏེ། ཐོབ་ཐང་སྲུང་སྐྱོབ་ཀྱི་ཁྲིམས་རྩོད་པ་མང་པོའི་ལས་ཀ་ཤོར་བའི་གནས་ཚུལ་བྱུང་ཡོད་པ་དང་། དེ་ནི་འཛམ་གླིང་གི་ཁྲིམས་རྩོད་པ་འཕེལ་རྒྱས་ཀྱི་ལོ་རྒྱུས་ནང་ཛ་དྲག་ཆེ་ཤོས་ཀྱི་གནད་དོན་ཞིག་ཆགས་ཤིང་། ལྷག་པར་རྒྱ་གཞུང་གིས་དབང་ཡོད་འོག་ཕྱི་ལོ་ ༢༠༡༥ ལོའི་ ༧༠༩ ཞེས་པའི་དོན་རྐྱེན་ཁྲོད་དུ་ཁྲིམས་རྩོད་པ་བརྒྱ་ལྷག་ལ་ཁྲིམས་ཐག་བཅད་པ་དང་། བཙོན་འཇུག འབོད་འགུག འདྲི་བརྩད་སོགས་བྱས་ཡོད་པ་མ་ཟད། ཁྲིམས་རྩོད་པའི་ལག་ཁྱེར་ཕྱིར་འཐེན། ལག་ཁྱེར་མེད་པར་བཟོས་པ། ཁྲིམས་རྩོད་པའི་ལས་ཁུངས་ཁག་བཙན་དབང་གིས་སྒོ་རྒྱག་ཏུ་བཅུག་པ་སོགས་ཀྱིས་ཐོབ་ཐང་སྲུང་སྐྱོབ་ཀྱི་ཁྲིམས་རྩོད་པར་མུ་མཐུད་དུ་གཉའ་གནོན་བྱེད་བཞིན་ཡོད་སྐོར་གསལ་ཡོད།
དེ་བཞིན་ཕྱི་ལོ་ ༢༠༢༥ ལོའི་ཟླ་ ༡༠ པར་རྒྱ་ནག་གཞུང་གིས་ཡེ་ཤུའི་ཆོས་དཔོན་ཅིན་མིང་རི་ (金明日) གཙོས་པའི་ས་འོག་ཡེ་ཤུའི་ཆོས་ཁང་གི་ཚོགས་མི་ ༡༨ འཛིན་བཟུང་བྱས་ཡོད། དེ་ནི་རྒྱ་ནག་གཞུང་གིས་ལོ་བཅུ་ཕྲག་ལྷག་གི་རིང་ལ་ཆོས་ཚོགས་ལ་ཐད་ཀར་དམིགས་པའི་གཞི་རྒྱ་ཆེ་ཤོས་ཀྱི་དྲག་སྤྱོད་ཅིག་ཆགས་ཡོད་འདུག
གསར་འགོད་པ། རྟ་མགྲིན་མཚོ། རྩོམ་སྒྲིག་བྱེད་མཁན། ཆོས་རྒྱལ་སྐྱབས།
