ཊི་བྷི་ནད་པའི་གྲངས་འབོར་ཧ་ཅང་མཐོ་བོར་སླེབས་འདུག

དེང་སྐབས་བོད་ནང་ཊི་བྷི་ན་ཚ་འགོས་ཁྱབ་ཀྱི་ཚད་གཞི་ཧ་ཅང་མཐོན་པོར་སླེབས་ཡོད་སྐོར་ལབ་བྱུང་། བོད་པའི་གྲོང་གསེབ་ཁ་ཤས་ནང་མི་འབོར་གྱི་བརྒྱ་ཆ་ ༥༠ ནས་ ༦༠ ཙམ་ལ་ཊི་བྷི་ན་ཚ་བྱུང་འདུག་ཟེར།

ཕྱི་ཚེས་་༢༧ ཉིན་གྱི་སྔ་དྲོར། ཕྱི་དྲིལ་ལྷག་པ་ཚེ་རིང་ཚོགས་ཁང་ནང་། དབུས་བོད་མིའི་འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་གཉིས་ཀྱིས་གོ་སྒྲིག་འོག  བཙན་བྱོལ་བོད་མིའི་ས་གནས་གཞིས་ཆགས་ཁག་གི་སྨན་ཞབས་པ་རྣམས་གཙོས་པའི་གྲྭ་ས་དང་སློབ་གྲྭ་ཁག་གི་འཐུས་ཚབ་མི་སྣ་བཅས་མི་གྲངས་ ༥༠ ཙམ་ལ་ཉིན་གསུམ་རིང་ཊི་བྷི་ན་ཚ་སྔོན་འགོག་གི་ཟབ་སྦྱོང་ཞིག་སྤྲོད་མགོ་བརྩམས་ཡོད་པ་དང་། ཟབ་སྦྱོང་དེའི་མཛད་སྒོའི་སྟེང་འཕྲོད་བསྟེན་བཀའ་བློན་དཔལ་འབྱོར་ཚེ་རིང་དང་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད། ཨི་ཊ་ལིའི་AISPO ་རོགས་ཚོགས་ཀྱི་སྨན་པ་ཧྥེལ་བེའོ (Fulvio Snlvo) ། དེ་བཞིན་ཊི་བྷི་ན་ཚའི་ཐད་ཉམས་ཞིབ་གནང་མཁན་བདེ་ལེགས་སྨན་ཁང་གི་སྨན་པ་དཀོན་མཆོག་བཅས་ཆེད་ཕེབས་ཀྱིས་ཐེངས་འདིའི་ཊི་བྷི་ན་ཚ་སྔོན་འགོག་ཟབ་སྦྱོང་གི་དམིགས་ཡུལ་དང་བཙན་བྱོལ་ནང་ཊི་བྷི་ན་ཚ་འགོས་ཁྱབ་ཀྱི་ཉེན་ཁའི་སྐོར་ནས་གཏམ་བཤད་གནང་སོང་།

གསུང་བཤད་གནང་མཁན་ཚོས་བརྗོད་པ་ལྟར་ན། ཉེ་ཆར་འཛམ་གླིང་གི་སྙན་གྲགས་ཅན་གྱི་ཚགས་ཤོག་མང་པོའི་ནང་། བོད་མིའི་སྤྱི་ཚོགས་ནང་ཊི་བྷི་ན་ཚའི་དཀའ་ངལ་ཤུགས་ཆེན་པོ་ཡོད་པའི་གནས་ཚུལ་ཐོན་ཡོད་པ་དང་། དེ་བཞིན་ཨ་རིའི་ནེའུ་ཡོག་གྲོང་ཁྱེར་གྱི་སྨན་ཁང་ནང་བོད་པའི་ཆེད་དུ་དམིགས་བསལ་ཊི་བྷི་ན་ཚའི་སྡེ་ཚན་ཞིག་ཀྱང་བཙུགས་ཡོད་འདུག  སྤྱིར་རྒྱལ་སྤྱིའི་ནང་ཊི་བྷི་ནད་པ་མང་ཤོས་དེ་རྒྱ་གར་ཆགས་ཡོད་པ་དང་།  རྒྱ་གར་དུ་མི་འབུམ་གཅིག་གི་ཁྲོད་ཊི་བྷི་ནད་པ་  ༡༦༠ ཙམ་ཡོད་འདུག ད་ལྟ་བཙན་བྱོལ་བོད་མིའི་སྤྱི་ཚོགས་ནང་མི་འབུམ་གཅིག་གི་ཁྲོད་ཊི་བྷི་ནད་པ་  ༤༠༠ ལས་བརྒལ་ཏེ་འཛམ་གླིང་གི་ཊི་བྷི་ནད་པ་ཆེས་མང་བའི་སྤྱི་ཚོགས་ཤིག་ཆགས་ཡོད་པར་མ་ཟད།  གཞོན་སྐྱེས་ཚོའི་ནང་ཉེན་ཚབས་ཅན་གྱི་ཊི་བྷི་ནད་རིགས་ MDR དང་ XDR  TDR བཅས་འགོས་ཁྱབ་འགྲོ་བཞིན་ཡོད་པ་དང་།  ཤུགས་ཆེ་ཤོས་དེ་སློབ་གྲྭ་དང་གྲྭ་ས་ཁག་ཆགས་ཡོད་འདུག  དེ་བཞིན་བོད་ནང་དུའང་ཊི་བྷི་ན་ཚ་འགོས་ཁྱབ་ཀྱི་གནས་སྟངས་ཧ་ཅང་ཛ་དྲག་ཆགས་ཡོད་པ་དང་། ས་ཁུལ་རེ་འགའི་ནང་མི་གྲངས་ཀྱི་བརྒྱ་ཆ་ ༦༠ ཙམ་ཊི་བྷི་ནད་པ་ཆགས་ཡོད་འདུག 

ཉེ་སྔོན་བཙན་བྱོལ་བོད་མིའི་ས་གནས་གཞིས་ཆགས་ཁག་ནང་ཊི་བྷི་ན་ཚའི་གནས་སྟངས་ཐད་ཉམས་ཞིབ་གནང་མཁན། བདེ་ལེགས་སྨན་ཁང་གི་སྨན་པ་དཀོན་མཆོག་ལགས་ཀྱིས་བརྗོད་དོན།  སྔོན་ཆད་བོད་ས་ཤོར་ཏེ་བཙན་བྱོལ་དུ་ཐོག་མར་འབྱོར་སྐབས། འཚོ་བའི་གནས་སྟངས་སྐྱོ་བའི་དབང་གིས་བཙན་བྱོལ་སྤྱི་ཚོགས་ནང་ཊི་བྷི་ན་ཚ་ཤུགས་ཆེན་པོ་བྱུང་ཡོད་པ་རེད།  ༡༩༦༠ ནས་ ༧༠ སྐབས་དེ་ལ་འཕྲོད་བསྟེན་ལུས་ཁུངས་ཀྱི་འབྲེལ་ཡོད་ཡིག་ཆ་དག་ལ་བལྟས་ཡོང་དུས།  སྐབས་དེར་ཧ་ལམ་བཙན་བྱོལ་བོད་མིའི་བརྒྱ་ཆ་ ༣༠ ཙམ་ལ་ཊི་བྷི་ན་ཚ་བྱུང་འདུག  ཕྱིས་སུ་འཚོ་བའི་མཐུན་རྐྱེན་དང་སྨན་བཅོས་ལག་རྩལ་ཇེ་ལེགས་སུ་གྱུར་སྟབས། ཊི་བྷི་ན་ཚ་རིམ་པ་དང་པོ་དང་རིམ་པ་གཉིས་པའི་རིགས་ཕོག་མཁན་ཇེ་ཉུང་དུ་ཕྱིན་འདུག  ཡིན་ནའང་། ད་སྐབས་ཉེན་ཁ་ཆེ་བའི་ཊི་བྷི་ནད་རིགས་  MDR དང་ XDR།  TDR བཅས་ཕོག་མཁན་མང་དུ་འགྲོ་བཞིན་པའི་དཀའ་ངལ་གསར་བ་ཞིག་འཕྲད་ཀྱིན་འདུག  ཊི་བྷི་ནད་རིགས་ MDR ལ་ནམ་རྒྱུན་གྱི་ཊི་བྷི་ན་ཚ་རིམ་པ་དང་པོ་དང་གཉིས་པའི་སྨན་གྱིས་ནུས་པ་འཐོན་མི་ཐུབ་པར།  སྨན་སྣ་མང་པོ་དང་སྨན་ཤུགས་ཆེན་པོ་བསྟེན་དགོས་པར་མ་ཟད། དུས་ཡུན་ལོ་གཉིས་ལྷག་ལ་མུ་མཐུད་དེ་སྨན་བཅོས་གནང་དགོས་ཀྱི་ཡོད་པ་ཞིག་རེད། ཊི་བྷི་ནད་རིགས་ XDR དང་  TDR ནི་དེ་བས་ཀྱང་ཉེན་ཁ་ཆེན་པོ་རེད།  སྔོན་ཆད་ཊི་བྷི་ན་ཚ་རིམ་པ་དང་པོ་དང་གཉིས་པར་དུས་ལྟར་སྨན་བཅོས་གནང་མ་ཐུབ་པར་བརྟེན་ནས།  ཊི་བྷི་ནད་རིགས་ MDR གྱི་ངོ་བོར་འཕེལ་བཞིན་ཡོད་པ་རེད། ད་སྐབས་ཊི་བྷི་ནད་རིགས་ MDR དེ་ཊི་བྷི་ན་ཚ་མེད་པའི་མི་རྣམས་ལ་ཐད་ཀར་འགོས་ཁྱབ་འགྲོ་བཞིན་པའི་གནས་སྟངས་ཛ་དྲག་ཅིག་ལ་སླེབས་འདུག  ང་ཚོས་ཐོ་གཞུང་མང་པོ་ཞིག་ལ་ཞིབ་འཇུག་བྱས་ཡོང་དུས། བཙན་བྱོལ་བོད་པའི་སྤྱི་ཚོགས་ནང་ཊི་བྷི་ནད་པའི་གྲངས་འབོར་ཧ་ཅང་ཚད་མཐོ་བོར་སླེབས་འདུག  ལྷག་པར་དུ་བདེ་སྐྱིད་གླིང་ས་ཁུལ་དུ་མང་ཆེ་ཤོས་སློབ་ཕྲུག་དང་། དྷ་རམ་ས་ལ་ཁུལ་དུ་མང་ཆེ་ཤོས་ལས་མེད་དང་སློབ་ཕྲུག་བཅས་ཆགས་འདུག དེར་བརྟེན།  མི་ཚོགས་འདུས་སྡོད་ཀྱི་སློབ་གྲྭ་ཁག་དང་གྲྭ་ས་ཁག་ཏུ་ཊི་བྷི་ན་ཚ་འགོས་ཁྱབ་ཏུ་འགྲོ་རྒྱུའི་ཉེན་ཁ་ཆེན་པོ་འདུག  ཅེས་བརྗོད་སོང་། 

དེ་རྗེས་བདེ་ལེགས་སྨན་ཁང་གི་འགན་འཛིན་ཟླ་བ་ཕུན་སྐྱིད་ལགས་ཀྱིས།  ཊི་བྷི་ན་ཚ་སྔོན་འགོག་ཐད་ཚང་མས་མཉམ་རུབ་ཀྱི་ཕྱག་ལས་གནང་དགོས་པའི་སྐོར་ནས་བརྗོད་དོན། ང་ཚོའི་སྤྱི་ཚོགས་ནང་ཊི་བྷི་ན་ཚ་སྔོན་འགོག་དང་རྩ་མེད་བཟོ་བའི་ཆེད་ལས་འགུལ་རབས་དང་རིམ་པ་སྤེལ་བ་རེད། བདེ་ལེགས་སྨན་ཁང་ལ་མཚོན་ནའང་ཕྱི་ལོ་ ༡༩༨༠ ནས་ད་ལྟའི་བར་དུ་ཊི་བྷི་ན་ཚ་སྔོན་འགོག་ཐད་ཤུགས་རྒྱག་མཁན་ཞིག་ཆགས་ཡོད་པ་རེད། ཡིན་ནའང་། ང་ཚོའི་སྤྱི་ཚོགས་ནང་ཊི་བྷི་ན་ཚའི་དཀའ་ངལ་ད་དུང་མུ་མཐུད་གནས་ཡོད་པ་དང་།  ཊི་བྷི་ནད་པའི་གྲངས་འབོར་ཉུང་དུ་ཕྱིན་པ་ཙམ་མ་གཏོགས། ཊི་བྷི་ན་ཚའི་ཉེན་ཁ་ཇེ་ཆེར་འགྱུར་བཞིན་འདུག  སྤྱིར་བཙན་བྱོལ་ནང་བྱིས་པ་རྣམས་ལ་ཆུང་དུས་ནས་ཊི་བྷི་ན་ཚ་སྔོན་འགོག་གི་སྨན་ཁབ་རྒྱག་གི་ཡོད་སྟབས། ལོ་ ༡༨ ཚུན་གྱི་བྱིས་པར་ཊི་བྷི་ན་ཚ་འགོས་ཁྱབ་མི་འགྲོ་བའི་ཁུལ་རེད།  ཡིིན་ནའང་། ད་ལྟ་བཙན་བྱོལ་ནང་ཊི་བྷི་ན་ཚ་ཅན་མང་ཤོས་དེ་སློབ་ཕྲུག་ཆགས་བསྡད་ཡོད་སྟབས།  བོད་ནང་ནས་སླེབས་བཞིན་པའི་སློབ་ཕྲུག་ཚོ་བརྒྱུད་ནས་འགོས་ཁྱབ་འགྲོ་བཞིན་ཡོད་མེད་ཐད་ཉམས་ཞིབ་བྱ་དགོས་པ་ཞིག་ཏན་ཏན་ཆགས་འདུག  དེ་བཞིན། ཌེ་བྷེ་ན་ཚའི་ཐད་ཨི་ཊ་ལིའི་སྨན་པའི་རོགས་ཚོགས་(AISPO) ཡིས་སྔོན་མ་ནས་རོགས་སྐྱོར་གནང་བཞིན་ཡོད་པ་དང་།  ད་ལོ་ནས་བཟུང་འཛམ་གླིང་རྒྱལ་སྤྱིའི་འཕྲོད་བསྟེན་ཚོགས་པའི་ངོས་ནས། ཨ་རིའི་མཐོ་སློབ་ཅིག་གི་སྨན་པའི་སྡེ་ཚན་བརྒྱུད་ནས་རོགས་དངུལ་འབོར་ཆེན་པོ་ཞིག་གནང་གི་ཡོད་པ་རེད། དེའི་ཐད་འཕྲོད་བསྟེན་ལས་ཁུངས་ཀྱི་ངོས་ནས་རྒྱབ་གཉེར་མཐུན་འགྱུར་དང་བདེ་ལེགས་སྨན་ཁང་གིས་འགན་ཁུར་བླངས་པའི་ཐོག་ནས། བཙན་བྱོལ་སྤྱི་ཚོགས་ནང་ཊི་བྷི་ན་ཚ་སྔོན་འགོག་ཐད་ལས་འཆར་ཤུགས་ཆེན་པོ་སྤེལ་འཆར་ཡོད་པ་རེད། ཅེས་བརྗོད་སོང་། 

མཇུག་མཐར་འཕྲོད་བསྟེན་བཀའ་བློན་དཔལ་འབྱོར་ཚེ་རིང་མཆོག་གིས་བོད་ནང་གི་ཊི་བྷི་ན་ཚའི་གནས་སྟངས་སྐོར་ནས་བརྗོད་དོན།  དེ་སྔོན་བོད་ནང་དུ་ལོ་གཉིས་ལྷག་གི་རིང་ཊི་བྷི་ན་ཚའི་གནས་སྟངས་ཐད་ཉམས་ཞིབ་གནང་མཁན་ཕྱི་རྒྱལ་སྨན་པ་ཞིག་གིས།  དེང་སྐབས་བོད་ནང་ཊི་བྷི་ན་ཚ་འགོས་ཁྱབ་ཀྱི་ཚད་ཧ་ཅང་མཐོན་པོར་སླེབས་འདུག་པའི་སྐོར་ང་ལ་ལབ་བྱུང་།  ཁོ་མོས་བརྗོད་ན་བོད་པའི་གྲོང་གསེབ་ཁ་ཤས་ནང་མི་འབོར་གྱི་བརྒྱ་ཆ་ ༥༠ ནས་ ༦༠ ཙམ་ལ་ཊི་བྷི་ན་ཚ་བྱུང་འདུག  དེའི་རྒྱུ་མཚན་གཙོ་བོ་ནི། གཅིག  སྔོན་ཆད་ཤ་མར་འོ་ཞོ་སོགས་ཟས་བཅུད་འཛོམས་པོ་ཡོད་པའི་བོད་མི་ཚོའི་འཚོ་བའི་གནས་སྟངས་ལ་འགྱུར་བ་ཆེན་པོ་ཕྱིན་ཏེ།  ད་ལྟ་གོར་སྐྱ་དང་འབྲས་སྐྱ་སོགས་ལ་འགྱུར་ཡོད་སྟབས་ཟས་བཅུད་ཀྱིས་འདང་གི་མེད་པའི་རྐྱེན་དང་། གཉིས།  བོད་ཀྱི་ས་ཁུལ་ཁག་ཏུ་རྒྱ་ནག་ནང་ལོགས་ཀྱི་ཊི་བྷི་ན་ཚ་ཅན་མང་པོ་གནས་སྤོར་བྱེད་ཤུགས་ཆེ་རུ་འགྲོ་བཞིན་པ། གསུམ། བོད་མིའི་སྤྱི་ཚོགས་ནང་ཊི་བྷི་ན་ཚའི་ཉེན་ཁའི་སྐོར་ཧ་མ་གོ་བ་དང་།  རྒྱ་གཞུང་གིས་རང་ཉིད་ལ་མིང་ཆད་ཕོག་རྒྱུར་དོགས་ཏེ་ཊི་བྷི་ན་ཚའི་གནས་སྟངས་ཛ་དྲག་ཆགས་ཡོད་པ་ངོས་ལེན་མ་གནང་བར་སྦས་གསང་བྱ་བཞིན་པ་བཅས་ཀྱིས་ཡིན་འདུག  སྤྱིར་རྒྱ་གཞུང་གིས་བོད་ནང་ཕུན་སུམ་ཚོགས་པའི་གཏེར་ཁ་ཡོངས་རྫོགས་གང་འདོད་དུ་བསྔོགས་ཏེ་དཔལ་འབྱོར་གྱི་ཁེ་ཕན་ལེན་རྐྱང་བྱེད་བཞིན་ཡོད་པ་རེད།  ཡིན་ནའང་། ས་གནས་བོད་མི་ཚོའི་འཕྲོད་བསྟེན་གནས་སྟངས་ཚུན་ཆད་ལ་ལྟ་སྐྱོང་བྱེད་ཀྱིན་མེད་པའི་ཉེར་ལེན་ལ་བརྟེན་ནས་ཛ་དྲག་གི་ཀའ་ངལ་དེ་དག་འབྱུང་བཞིན་པ་རེད། ད་ལྟའི་ཆར་ང་ཚོའི་ངོས་ནས་བོད་ནང་གི་དཀའ་ངལ་དེར་གདོང་ལེན་གྱིས་ན་ཚ་སྔོན་འགོག་བྱ་ཐབས་བྲལ་ནའང་། བཙན་བྱོལ་ནང་སྡོད་མཁན་ཚོ་ཚགས་ཚུད་པོ་ཞིག་དང་། ཊི་བྷི་ན་ཚ་མེད་པ་བཟོ་རྒྱུའི་ལས་འགན་ཐོག་ཚང་མས་ཐུགས་འགན་བཞེས་རྒྱུ་གལ་ཆེན་པོ་རེད། ཅེས་བརྗོད་སོང་། 

འཕྲོད་བསྟེན་ལས་ཁུངས་དང་བདེ་ལེགས་སྨན་ཁང་སོགས་འཕྲོད་བསྟེན་ལ་འབྲེལ་ཡོད་དག་གིས་འདས་པའི་དུས་ཚོད་རིང་ཊི་བྷི་སྔོན་འགོག་གི་ལས་འགུལ་སྤེལ་བཞིན་ཡོད་པ་རེད།  བཙན་བྱོལ་བོད་མིའི་སྤྱི་ཚོགས་ནང་མི་འབུམ་གཅིག་ནང་ཊི་བྷི་ནད་པ་  ༤༠༠ ་བརྒལ་ཡོད་པ་དང་། བོད་ནང་ས་ཁུལ་རེ་འགར་མི་གྲངས་ཀྱི་བརྒྱ་ཆ་ ༦༠ ཙམ་ཊི་བྷི་ནད་པ་ཆགས་ཡོད་འདུག

གསར་འགོད་པ། ཚེ་རིང་རྒྱལ།