བོད་ཀྱི་དམངས་གཞས་ཉམས་ཞིབ་ཆེད་སྒྲིག་གློག་བརྙན་༼ དབྱངས་ལ་ཐིམ་པའི་བོད ༽ཅེས་པ་དེ། ཉིན་འདི་འགར་ངྷ་ས་ཁུལ་གྱི་མི་མང་ལ་གཟིགས་འབུལ་ཞུས་ཡོད་ཅིང་། གློག་བརྙན་དེ་ནི་བོད་རིགས་ངག་དབང་ཆོས་འཕེལ་ལགས་ཀྱིས་མི་ལོ་ ༡༦ རིང་རྒྱུ་ཆ་འཚོལ་བསྡུ་གནང་བ་ཞིག་ཡིན་པ་མ་ཟད། ཁོང་བོད་ནང་དངོས་སུ་བསྐྱོད་དེ་ལོ་ ༦ རིང་རྒྱ་ནག་གི་བཙོན་ལ་ཚུད་པ་སོགས་དཀའ་ཚེགས་ཀྱི་གོ་རིམ་མང་པོ་བརྒྱུད་དེ་བཟོ་སྐྲུན་གནང་བ་ཞིག་རེད།
འདི་གའི་གསར་འགོད་པ་ངག་དབང་ཆོས་འཕེལ་ལགས་སུ་ཐུག་འཕྲད་བྱས་ཏེ། ཁོང་གི་ཀྱག་ཀྱོག་གི་མི་ཚེའི་བརྒྱུད་རིམ་དང་༼ དབྱངས་ལ་ཐིམ་པའི་བོད ༽ ཅེས་པའི་གློག་བརྙན་བཟོ་ཕྱོགས་སྐོར་བཅས་ལ་གླེང་མོལ་བྱས་སྐབས། ཁོས་འདི་ལྟར་ངོ་སྤྲོད་གནང་བྱུང་། ང་རང་སྐྱེས་ས་སྟོད་མངའ་རིའི་མདའ་བ་རྫོང་ཡིན། ད་ལྟ་རྒྱ་ནག་གིས་རྩ་མདའ་རྫོང་ཟེར་གྱི་འདུག ཕྱི་ལོ་ ༡༩༦༨ ལོར་ངེད་ཚང་དང་གཉེན་ཉེ་མི་ཚང་ ༣ གྱིས་ཁྱིམ་གཞི་གནས་སྤོར་བྱས་ཏེ་རྒྱ་གར་ལ་སྐྱབས་བཅོལ་དུ་ཡོང་བ་རེད། སྐབས་དེར་ང་ཚོས་ར་ལུག་ཀྱང་དེད་ནས་ཡོང་བ་ཡིན་ས་རེད། ང་རང་ལོ་གཉིས་རེད་ཟེར། རྒྱ་གར་བྱང་ཤར་ནས་ཟླ་བ་ཁ་ཤས་བསྡད་རྗེས་ར་ལུག་བཙོང་དགོས་བྱུང་འདུག དེའི་རྗེས་རྒྱ་གར་གཞུང་གིས་ལྷོ་ཕྱོགས་མོན་གྷོ་ལ་གཞིས་ཆགས་སུ་བཏང་ཞིང་། ང་སློབ་གྲྭ་འཛིན་རིམ་བཅུ་གཉིས་ཐོན་རྗེས་བོད་གཞུང་ཟློས་གར་དུ་ལོ་གསུམ་རིང་དགེ་རྒན་འོས་སྦྱོང་བྱས་པ་ཡིན། ༡༩༩༣ ལོར་ལོ་གཅིག་རིང་ ( full-bright )ཞེས་པའི་མིང་ཐོག་ཏུ་ཨ་རིར་སློབ་སྦྱོང་དུ་ཕྱིན་ཏེ། གློག་བརྙན་བཟོ་སྟངས་ཐོག་སློབ་སྦྱོང་འཁྱུག་ཙམ་བྱ་རྒྱུ་བྱུང་སོང་། སྐབས་དེར་བོད་པའི་དམངས་གཞས་སྐོར་ལ་གློག་བརྙན་ཞིག་བཟོ་ཐུབ་ན་སྙམ་པའི་བསམ་བློ་འཁོར་སོང་། རྗེས་སུ་སྒེར་ངོས་ནས་སྐར་མ་ ༡༩ ཅན་གྱི་གློག་བརྙན་ ༼ སྐྱབས་བཅོལ་སྒྲ་སྙན ༽ ཞེས་པ་ཞིག་བཟོས་ཏེ། ཨ་རིར་མུ་མཐུད་གློག་བརྙན་ཐོག་སློབ་སྦྱོང་གི་གོ་སྐབས་གནང་རོགས། ཞེས་སྙན་ཞུ་ཞིག་ཕུལ་ཡང་བོད་གཞུང་སྐུ་ཚབ་དོན་གཅོད་ཀྱིས་ཆོག་མཆན་སྤྲད་མ་སོང་། ཞེས་ངོ་སྤྲོད་གནང་བྱུང་།
ཁོང་ལ་༼ དབྱངས་ལ་ཐིམ་པའི་བོད ༽ ཅེས་པའི་གློག་བརྙན་དེ་ཐོག་མར་མགོ་འཛུགས་ཇི་ལྟར་གནང་བའི་སྐོར་དྲིས་པར་ཁོང་གིས། ང་རང་ཆུང་དུས་ནས་བོད་དུ་འགྲོ་འདོད་ཆེན་པོ་ཡོད་ལ། ཨ་རིར་སློབ་སྦྱོང་བྱས་རིང་འདུན་པ་དེ་སྔར་ལས་ཆེ་རུ་ཕྱིན་སོང་། ཕྱིར་རྒྱ་གར་དུ་ལོག་མ་ཐག་སྐབས་དེའི་བཀའ་བློན་ཁྲི་པ་བཀྲས་མཐོང་བསྟན་འཛིན་རྣམ་རྒྱལ་མཆོག་ལ། ངས་དམངས་གཞས་བསྡུ་རུབ་བྱ་འདོད་ཡོད་སྐོར་སྙན་སེང་ཞུས་པ་ཡིན། ཁོང་གིས་དེ་ཡག་པོ་འདུག འོན་ཀྱང་བོད་གཞུང་ཟློས་གར་དང་མཉམ་འབྲེལ་བྱས་ན་བཟང་གི་རེད་གསུངས་སོང་། འོན་ཀྱང་། གནས་ཚུལ་དེར་ངའི་ཨ་མ་ལགས་དང་ཨ་ཞང་གཉིས་ཀྱིས་མོས་མཐུན་རྩ་བ་ནས་གནང་མ་སོང་། མཐར་ངས་ཁོང་ཚོར་རྒྱ་གར་ནང་གི་བོད་པའི་གཞིས་ཆགས་ཁག་ནང་དམངས་གཞས་བསྡུ་རུབ་བྱེད་དུ་འགྲོ་རྒྱུའི་བཀའ་འཁྲོལ་ཞུས་ཏེ། ངྷ་རམ་ས་ལར་ཡོང་བ་ཡིན། སྐབས་དེར་ངའི་གཉེན་ཉེ་ཨ་ཅག་ཅིག་བོད་གཞུང་གི་ལས་བྱེད་རེད། ཁོང་མོའི་ལག་ཏུ་ཡི་གེ་བརྒྱད་དགུ་ཞིག་བཞག་སྟེ། ང་བོད་ནང་འགྲོ་རྒྱུ་ཡིན། ཁྱེད་ཀྱིས་ཟླ་བ་རེ་རེའི་ནང་ཨ་མ་ལགས་སུ་ཡི་གེ་གཅིག་རེ་གཏོང་རོགས། ང་མང་མཐར་ལོ་གཅིག་ལས་མི་འགོར་ཞེས་ཁ་ཆེམས་བཞག་སྟེ་ཕྱིན་པ་ཡིན། ཡི་གེ་དེ་དག་ནང་ང་བོད་མིའི་གཞིས་ཆགས་ཁག་ནང་སྐོར་སྐྱོད་བྱེད་ཀྱི་ཡོད་ཚུལ་འཁོད་ཡོད་པ་རེད། ཅེས་གད་མོ་དགོད་བཞིན་བརྗོད་བྱུང་།
སྐབས་དེར་ཁོང་གིས་ཅུང་གཟབ་ནན་གྱིས་བོད་ནང་བསྐྱོད་པའི་བརྒྱུད་རིམ་གླེང་མགོ་བརྩམས་སོང་། ང་ ༡༩༩༥ ལོའི་ཟླ་ ༧ པར་གནམ་གྲུ་བརྒྱུད་ལྷ་སར་ཕྱིན་པ་ཡིན། གནམ་གྲུའི་ནང་སྐྱོད་སྐབས་རྒྱ་ནག་གིས་འཇུ་བཟུང་བྱེད་མིན་དང་ཉེས་རྡུང་གཏོང་མིན་ལ་ཞེད་སྣང་གང་ཡང་མི་འདུག ང་རང་གི་སྒྲ་འཇུག་དང་བརྙན་ལེན་འཕྲུལ་ཆས་སོགས་བདེ་བླག་ངང་འཁྱེར་ཐུབ་ན་བསམ་པ་དེ་རེ་བ་ཆེ་ཤོས་རེད། འོན་ཀྱང་ལྷ་ས་གོང་དཀར་གནམ་ཐང་ནས་དཀའ་ངལ་གང་ཡང་འཕྲད་མ་སོང་། དེ་ནས་སྤྱི་སྤྱོད་རླངས་འཁོར་ཞིག་ལ་བསྡད་དེ་ལྷ་སའི་རླངས་འཁོར་འབབས་ཚིགས་སུ་འབྱོར་སྐབས། ཕྱི་རྒྱལ་བ་ཚོར་གླ་ཆ་མཐོན་པོ་ལེན་གྱི་འདུག་ཀྱང་། ང་ལ་གླ་ཆ་དམའ་བོ་བྱས་སོང་། དེ་ལ་ང་རང་དགའ་ཚོར་ཆེན་པོ་ཞིག་བྱུང་སོང་། ལྷ་སར་འབྱོར་རྗེས་དམངས་གཞས་ཐོག་ཆེད་མཁས་པ་ཁ་ཤས་ལ་ཐུག་དགོས་ཀྱི་ཡོད། དེའི་ནང་གི་གཅིག་དམ་པ་ཞོལ་ཁང་བསོད་ནམས་དར་རྒྱས་རེད། མི་ཞིག་གི་མི་ཚེ་ནང་ཡ་མཚན་པའི་གནས་ཚུལ་མང་པོ་ཡོང་གི་ཡོད་ཀྱང་། ང་དམ་པ་ཁོང་ལ་མཇལ་བ་དེ་ཡ་མཚན་ཆེ་ཤོས་ཤིག་ཆགས་སོང་། ཁོང་གིས་བོད་པའི་གནའ་བོའི་རིག་གཞུང་ཉར་ཚགས་བྱེད་སྟངས་དང་། དེ་དག་གི་ཐོག་དགའ་ཞེན་དང་གཅེས་སྤྲས་ཆེན་པོ་བྱེད་ཀྱི་ཡོད་པ་དེར་ང་ཧང་སངས་སོང་། ཞེས་བརྗོད་སོང་།
ངག་དབང་ཆོས་འཕེལ་ལགས་ཀྱིས་སྐབས་དེའི་ལྷ་སའི་མཐོང་ཐོས་འགའ་བརྗོད་དོན། ང་རང་ལྷ་སར་འབྱོར་སྐབས་ཕྱི་ཟླ་ ༧ ཚེས་ ༢ རེད། ཚེས་ ༦ ཉིན་ནི་༧གོང་ས་མཆོག་གི་འཁྲུངས་སྐར་ལ་འཁེལ་ཡོད་སྟབས་ལྷ་སའི་མི་མང་ཚོས་གྲ་སྒྲིག་བྱེད་ཀྱི་འདུག ལྷ་སའི་བར་སྐོར་ནས་རྨོ་མོ་ཞིག་ལ། ང་རང་རྒྱ་གར་ནས་ཡོང་བ་ཡིན། སང་ཉིན་འཁྲུངས་སྐར་ཐོག་འགྲོ་ཆོག་གམ་ཞེས་དྲིས་སྐབས། རྨོ་མོ་དེ་ངའི་ལག་མགོར་འཐམ་སྟེ་མིག་ཆུ་བཏང་སོང་། ཁྱེད་ཚོ་༧གོང་ས་ཡིད་བཞིན་ནོར་བུར་མཇལ་ཁ་རག་ཡོད་པ་རེད། བསོད་ནམས་ཆེན་པོ་རེད་ཟེར་ནས་ངུ་ཤུམ་བྱས་སོང་། ཚེས་ ༦ ཉིན་གྱི་ཞོགས་པ་བོད་པ་ཚོས་གཟབ་མཆོར་སྤྲས་ཏེ་འཁྲུངས་སྐར་བསང་གསོལ་ལ་སྐྱོད་ཀྱི་འདུག ལོ་དེ་ནི་ལྷ་སར་སྐུའི་འཁྲུངས་སྐར་སྲུང་གཙི་གནང་བ་མཐའ་མ་དེ་ཆགས་ཡོད། དེའི་རྗེས་སུ་རྒྱ་ནག་གིས་བཀག་སྡོམ་བྱས་པ་རེད། ང་ལྷ་ས་ནས་ཉིན་བཅུ་གྲངས་ཤིག་ལ་བསྡད་རྗེས་ལྷོ་ཁར་ཕྱིན་པ་ཡིན། དེར་བསམ་ཡས་དཔལ་ལྷའི་དུས་ཆེན་ལ་འཁེལ་ཡོད་པས་ཉིན་རྟག་པར་འཆམ་འཁྲབ་ཀྱི་འདུག ས་དེ་ནས་ངས་དམངས་གཞས་གང་ལ་གང་འཚམ་ཞིག་བསྡུ་རུབ་བྱ་ཐུབ་སོང་། དེ་ནས་ཡར་ལུང་ཡུམ་བུ་བླ་མཁར་ཡོད་སའི་གྲོང་སྡེ་རུ་ཕྱིན་ཏེ། དམངས་གཞས་ལ་མཁས་པ་སྐད་གྲགས་ཅན་རྒན་པདྨ་དོན་གྲུབ་ལགས་སུ་མཇལ་བྱུང་། ཁོང་སྐབས་དེར་བཀྲ་ཤིས་མཆོད་པའི་ལྷ་མོའི་དགེ་རྒན་རེད་ལ། རྒྱལ་དབང་སྐུ་ཕྲེང་བཅུ་གསུམ་དང་བཅུ་བཞི་གཉིས་ཀར་ལྷ་མོ་གཟིགས་འབུལ་ཞུས་མྱོང་འདུག ཁོང་དང་མཇལ་སྐབས་ང་རང་གི་ལས་ཀའི་ཁ་ཕྱོགས་ནོར་མི་འདུག་བསམ་པ་ཞིག་དྲན་སོང་། གནས་ཚུལ་གཞན་ཞིག་ལ། ང་འགྲོ་བའི་ལོ་དེ་ནི་༧གོང་ས་མཆོག་གི་དགུང་གེགས་ལ་འཁེལ་ཡོད་སྟབས། ལྷོ་ཁ་ཁྱོན་ཡོངས་སུ་ས་བརྐོ་རྡོ་སློག་དང་སྡིག་ལས་གཅིག་ཀྱང་བྱེད་ཀྱི་མི་འདུག ཁང་པ་མང་པོ་ཞིག་ཀྱང་བཟོ་འཕྲོས་སུ་བཞག་འདུག ཅེས་བརྗོད་བྱུང་།
ཡང་ཁོ་རང་རྒྱ་ནག་གི་བཙོན་ལ་ཚུད་པའི་སྐོར་དྲིས་སྐབས། ལྷ་ས་ཁུལ་གྱི་ང་རང་གི་ལས་རིམ་ཡོངས་སུ་གྲུབ་རྗེས་མངའ་རིས་ཕྱོགས་སུ་ཆས་པ་ཡིན། འོན་ཀྱང་སྟབས་མ་ལེགས་པར་གཞིས་རྩེ་ནས་རྒྱ་གཞུང་གི་ཉེན་རྟོག་པས་འཇུས་སོང་། ཅ་ལག་ཡོངས་རྫོགས་གཞུང་བཞེས་བཏང་སོང་། ཁོང་ཚོས་ཉིན་ལྟར་འདྲི་རྩད་བྱས་ཏེ། ལོ་བརྒྱད་ནས་ད་ལྟའི་བར་སློབ་སྦྱོང་གང་ནས་བྱས་པ་དང་། ལས་ཀ་ཅི་ཞིག་བྱས་པ་སོགས་སྐད་ཆ་དྲིས་སོང་། མཐར་གཞིས་རྩེ་འབྲིང་རིམ་མི་དམངས་ཁྲིམས་ཁང་གིས་ང་ལ་དམངས་གཞས་ལ་ཁ་གཡར་ཏེ་གསང་མྱུལ་བའི་ལས་ཀ་བྱས་པར་ལོ་ ༡༥ དང་། གསར་བརྗེ་ངོ་ལོག་པར་ལོ་ ༣ བཅས་སྡོམ་པའི་ལོ་ ༡༨ ཀྱི་ཁྲིམས་ཐག་བཅད་སོང་། ང་རང་རྒྱའི་བཙོན་དུ་ཚུད་རྗེས་ཨ་མ་ལགས་ཀྱིས་སེམས་ཁྲལ་གནང་བ་བཤད་མ་དགོས་པ་རེད། མོ་རང་གིས་སྣེ་ཁྲིད་དེ་ལས་འགུལ་ཡང་མང་པོ་སྤེལ་འདུག་ལ། མོ་རང་གཅིག་པུས་ཟས་བཅད་ངོ་རྒོལ་ཡང་གནང་འདུག ༢༠༠༠ ལོར་ཨ་མ་ལགས་དང་ཨ་ཞང་གཉིས་རྒྱ་ནག་གི་བཙོན་ཁང་དུ་ང་ལ་ལྟ་རུ་བསླེབས་སོང་། ཞེས་བརྗོད་བྱུང་།
སྐབས་དེར་གསར་འགོད་པས་ཁོང་ལ། སྐུ་ཉིད་ཀྱི་ལས་དོན་ཁྲོད་ཆབ་སྲིད་དང་འགལ་བའི་ལས་ཀ་གང་ཡང་བྱས་མེད་མོད། ལོ་དེ་འདྲ་མང་པོ་ཞིག་ལ་ཁྲིམས་ཐག་གཅོད་དོན་གང་ཡིན་སྐོར་དྲིས་པར་ཁོང་གིས། ངས་ད་ལྟ་ཕྱིར་འདང་བརྒྱབ་ན། ང་ལ་གསང་མྱུལ་བའི་དོགས་པ་ཟོས་རེད་དྲན་གྱི་མི་འདུག ངས་དམངས་གཞས་ལ་ཞིབ་འཇུག་བྱེད་ཀྱི་ཡོད་པ་དེ་ཁོང་ཚོས་གནད་འགག་ཅིག་ལ་མཐོང་གི་ཡོད་པ་འདྲ། སྤྱིར་དམངས་གཞས་ཟེར་དུས་མི་རིགས་ཤིག་གི་ལོ་རྒྱུས་སམ། ཤ་དང་ཁྲག་གི་ཁུངས་ཤིག་འདེད་ཀྱི་ཡོད་པ་རེད། དམངས་གཞས་ཀྱི་གདངས་དང་ཚིག་ལས་བོད་མི་རིགས་ནི་མི་རིགས་གཞན་ལས་ལོགས་ཤིག་ཡིན་པ་ཁ་གྲག་གི་ཡོད་པ་རེད། མཐར་གཏུགས་ན་དེ་ནི་མི་རིགས་དབྱེ་འབྱེད་ཀྱི་ལས་ཀ་ཞིག་ཆགས་ཡོད། གཉིས་པ། ཕྱི་གླིང་བ་བོད་དུ་འགྲོ་མཁན་ཚོ་དང་། ལྷག་པར་དུ་ཕྱི་ལོགས་ཀྱི་བོད་མི་ཚོ་བོད་ནང་ཕྱིན་ཏེ། གནས་ཚུལ་འདྲ་མིན་ལ་ཞིབ་འཇུག་བྱེད་པར་འཇིགས་སྐུལ་བྱས་པ་རེད་བསམ་གྱི་འདུག གསུམ་པ། ང་ཆབ་སྲིད་ཀྱི་དགོས་མཁོར་བེད་སྤྱོད་བཏང་བ་རེད་དྲན་གྱི་འདུག ང་ལ་ཐོག་མར་ལོ་མང་པོར་ཁྲིམས་ཐག་བཅད་དེ། ཕྱིས་སུ་དགོས་མཁོ་དང་བསྟུན་ཏེ་རྣམ་འགྱུར་ཡག་པོ་ཡིན་མདོག་གིས་ཀློད་གྲོལ་བཏང་བ་རེད། གང་ཡིན་ཟེར་ན། ༢༠༠༢ ཟླ་ ༢ ནང་ཨ་རིའི་སྲིད་འཛིན་ཇོར་ཇི་བྷུ་ཤི་རྒྱ་ནག་ལ་ཕེབས་ཀྱི་ཡོད་པ་རེད། ང་ལོ་དེའི་ཟླ་ ༡ ནང་བཙོན་གྲོལ་བཏང་བ་རེད། ཅེས་བརྗོད་བྱུང་།
ཁོས་མུ་མཐུད་དུ་རྒྱའི་བཙོན་ནང་གི་གནས་ཚུལ་སྐོར་བརྗོད་དོན། ང་རང་གཞིས་རྩེ་ཉལ་རི་བཙོན་ཁང་ནས་ལོ་ ༣ དང་ཁམས་པོ་རུ་བཙོན་ཁང་ནས་ལོ་ ༢ ། སི་ཁྲོན་ཏི་ཡཱང་བཙོན་ཁང་ནས་ལོ་ ༡ དང་ཕྱེད་བཅས་ལ་བསྡད་པ་ཡིན། སི་ཁྲོན་ཏི་ཡཱང་བཙོན་ཁང་དུ་སྡོད་སྐབས་དེ་གའི་ལས་བྱེད་ཅིག་གིས་ཁྱོད་རང་ཕྱི་མི་ཡིན་པ་དང་། ལྷག་པར་དུ་ཆབ་སྲིད་བཙོན་པ་ཡིན་སྟབས། ཕྱི་རྒྱལ་ལ་སྨན་བཅོས་བྱེད་དུ་འགྲོ་དགོས་པའི་མིང་ཐོག་ནས་ནད་དགོངས་ཞུས་ན། གཅིག་བྱས་ན་རེ་བ་ཡོད་པ་རེད་ཟེར། དེ་ནས་ངས་ཡི་གེ་ཞིག་ཕུལ་ཏེ་ཟླ་གཅིག་ཙམ་གྱི་རྗེས་སུ་ང་སྐད་བཏང་སོང་། མ་ཁཱི་ཀྲེང་ཟེར་བའི་ཁ་ཆེ་ལས་བྱེད་ཅིག་ཡོད་པ་དེས། དེ་རིང་ཁྱེད་ལ་གཏམ་བཟང་ཞིག་བཤད་རྒྱུ་ཡོད། ཁྱེད་ཀྱི་རེ་འདུན་དེར་གོང་རིམ་ནས་ཆོག་མཆན་ཐོབ་སོང་ལ། ཨ་རིའི་གཞུང་གིས་ཀྱང་ངོས་ལེན་བྱས་འདུག་ཟེར། དེ་ནས་ ༢༠༠༢ ཟླ་ ༡ པོའི་ཚེས་ ༢༠ ཉིན་ང་དངོས་སུ་བཙོན་གྲོལ་བཏང་བ་མ་ཟད། རྒྱ་ནག་གི་ཉེན་རྟོག་པས་ང་པེ་ཅིན་རྒྱལ་སྤྱིའི་གནམ་ཐང་དུ་བསྐྱལ་སྐབས། དེར་ཨ་རིའི་གཞུང་ཚབ་ཀྱི་མི་གཉིས་ལེན་དུ་ཡོང་འདུག ཅེས་བརྗོད་བྱུང་།
༼ དབྱངས་ལ་ཐིམ་པའི་བོད༽ ཅེས་པའི་ཆེ་སྒྲིག་གློག་བརྙན་དེའི་ནང་དུ། བོད་ཕྱི་ནང་གཉིས་ཀྱི་གཞས་པ་གཞས་མ་དང་། སྤྱི་ཚོགས་ནང་གི་ཤེས་ལྡན་མི་སྣ་མང་པོ་ཞིག་ལ་བཅར་འདྲི་ཞུས་ཏེ། བོད་པའི་སྲོལ་རྒྱུན་དམངས་གཞས་ཀྱི་ཁྱད་ཆོས་སྐོར་ལ་དཔྱད་བརྗོད་བྱས་ཡོད་པ་མ་ཟད། རྒྱ་ནག་གིས་བོད་ས་བཙན་བཟུང་བྱས་རྗེས་བོད་པའི་དམངས་གཞས་ལ་ཉམ་ཉེས་ཆེན་པོ་བྱུང་བ་སོགས་བསྡུས་འདུག་ལ། གློག་བརྙན་འདི་ཐོག་མར་ ༢༠༠༩ ཟླ་ ༡ ནང་ལེགས་འགྲུབ་བྱུང་སྟེ་ཨ་རིའི་གློག་བརྙན་དུས་སྟོན་ཞིག་ཏུ་ཐེངས་དང་པོར་བསྟན་ཡོད་ཅིང་། ད་བར་སྔ་ཕྱིར་གཟེངས་རྟགས་ཀྱང་བཅུ་གྲངས་ཤིག་རག་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
ངག་ཆོས་ལགས། ཁྱོད་རང་༢༠༠༢ལོའི་ཕྱི་ཟླ་༢པར་ཨ་རིར་འབྱོར་དུས་ཁྱོད་ཀྱིས་<< རྒྱ་ནག་གཞུང་ང་ལ་དྲིན་ཆེན་ཡིན་>>ཅེས་བཤད་ཡོད། ཚིག་དེ་ནི་ཁྱོད་ཀྱི་ལོ་རྒྱུས་སྟེང་གི་ནག་ཐིག་ཆེན་པོ་ཞིག་ཡིན་ལ་སྔོན་ཆད་ཁྱོད་ལ་རྒྱབ་རོགས་བྱེད་མཁན་གྱི་བོད་མི་རྣམས་ཀྱི་སེམས་གྲང་མོར་ཆགས་བྱེད་ཀྱི་ཁ་བ་མིན་པར་སྙམ།
ངག་དབང་ཆོས་འཕེལ་ཁོང་བཙོན་ཁང་ནས་ཀློད་ཏེ་ད་ལྟའི་བར་ལོ་མང་རིང་གྲགས་འགུལ་ཅི་ཡང་མེད་པར་བོར་ཀླག་བྱུང་སོང་། ཡིན་ནའང་ད་རེས་ཁོས་འདི་འདྲའི་བྱེད་སྒོ་ཞིག་སྤེལ་བར་དགའ་བོ་བྱུང་། ད་རེས་ཁོས་བཤད་རྒྱུར། ཁོ་རང་བཙོན་ཁང་དུ་སྡད་ཡུན་རིང་ལ་ཁོའི་ཨ་མས་སྣེ་ཁྲིད་ཀྱིས་ལས་འགུར་སྤེལ་བ་ཙམ་ལས་གཞན་གང་ཡང་གླེང་མི་འདུག་པར་ཅུང་བློ་ཕམ་བྱུང་། དེ་དུས་འདི་ཕྱོགས་སུ་གཞུང་དང་གཞུང་འབྲེལ་མ་ཡིན་པའི་ཚོགས་པ་མང་བོས་ཛ་དྲག་གིས་ལས་འགུལ་རབ་དང་རིམ་པ་མང་བོ་སྤེལ་བ་ཁོ་རང་གི་མ་ཐོས་བསམ། འདིར་ཅིས་ཕྱིར་མི་གླེང་བ་ཡིན་ནམ། ཁོས་ཁོ་རང་གིས་བཙོན་ནས་སྙན་ཞུ་ཞིག་གི་ནུས་པས་ཁོ་ཀློད་པ་རེད་འདོག་འདོག་བྱེད་པ་དེ་ཆེ་མ་རུང་བའི་ཐ་ཤལ་གྱི་རང་འདོག་ངན་པ་ཕྱི་རུ་མངོན་པ་ཞིག་མ་ཡིན་ནམ། དངོས་གནས་བྱས་ན། ཕྱི་ལོག་ན་ཡོད་པའི་བོད་མི་ཆེས་མང་བོས་ག་ས་གང་ནས་ལས་འགུལ་སྤེལ་བ་ལ་བསྟེན་ནས་རྒྱལ་སྤྱིའི་གནོན་ཤུགས་ཀྱིས་ཁོ་ཀློད་གྲོལ་བཏང་བ་ནི། ཆེ་གསལ་བོ་དང་འབྲེལ་བཤད་མ་དགོས་བ་ཞིག་རེད་མོད། ཡིན་ནའང་། ཁོས་དེ་དག་དངོས་ལེན་མི་བྱེད་དོན་ག་རེ་ཡིན་ནམ། ད་དུང་གསལ་འདེབས་བྱེད་དགོས་བ་ཞིག་ལ། ཁོ་བཙོན་གྲོལ་བཐོབ་ནས་ཕྱིར་ཨ་རིར་འབྱོར་སྐབས་གསར་འགོད་པ་དག་གིས་དྲི་བར་ཆེས་སྐྱུག་དྲོ་བའི་ལན་འདེབས་དག་གིས་མི་མང་གི་སེམས་ལ་ཆུ་འཆག་བླུག་པ་མ་ཡིན་ནམ། ད་དུང་མ་ཡིན་ཡིན་འདོག་གི་རྣམ་འགྱུར་བསྟན་པར་ངོ་མི་ཚའམ། དེ་དུས་ཀྱི་གནས་ཚུལ་རོབ་ཙམ་ཚགས་པར་དག་དུའང་གསལ་བོ་བཀོད་ཡོད་སྙམ། ད་རེ་དངོས་གནས་ཁོ་གཟི་དངས་སོང་བ་ཡིན་ན། ད་ལྟ་སྐྲག་མི་དགོས་སྟབས་ཁོའི་བཙོན་གྲོགས་བོད་མི་དག་གི་དཀའ་སྡུག་གི་རིམ་པ་དག་ཅིང་གསལ་བོ་བརྗོད་རོགས། ཅེས་ཞུ་འདོད་བྱུང་།
དབྱངས་ཀྱིས་བརྒྱལ་བའི་མི་སྟེ། ངག་དབང་ཆོས་འཕེལ་ལ་ཐུགས་རྗེ་ཆེ་ཞུ།
རང་ས་གོར་མོར་རེ་སེམས་མ་ལྷོད་པར། །
རང་མགོ་ཁུག་མ་གར་ལྷུང་མ་ལྟོས་པར། །
རང་བྱུང་སྲོལ་རྒྱུན་ཉག་མའི་སྲོག་རྩ་ལ། །
རང་ནུས་སྲི་ཞུ་བསྒྲུབ་པར་སྤོབས་པ་ཅན། །
རང་རེའི་ཨོ་ལོ་ཁྱོད་ཀྱང་དཔའ་བོ་རེད། །
ངག་དབང་ཆོས་འཕེལ་ལགས་ལ་ཐུགས་རྗེ་ཆེ་ཞུ། ལས་ག་འདི་འདྲ་ལས་རྒྱུ་རྩ་མོ་མ་རེད།