གནས་ཚུལ་བཏང་འབྱོར་བྱུང་བ་ལྟར་ན། ཕྱི་ཟླ་ ༦ ཚེས་ ༢༥ ཉིན་ཨོ་སི་ཊྲརི་ཡའི་རྒྱལ་ས་ཝེ་ཡ་ན་རུ་བོད་རིགས་མཐུན་ཚོགས་ཀྱི་རྒྱུན་ལས་གསར་འདེམས་ཀྱི་ཚོགས་འདུ་རྒྱས་འཛོམས་ཤིག་ཚོགས་ཡོད་འདུག་ལ། ཚོགས་འདུ་དེའི་སྟེང་བོད་རིགས་ཚོགས་པའི་ཚོགས་གཙོ་ཟུར་བ་དང་རྒྱུན་ལས། དེ་བཞིན་ཨོ་སི་ཊྲརི་ཡར་རྟེན་གཞི་བྱས་པའི་ནང་བསྟན་གཙུག་ལག་ཁང་གི་འགན་འཛིན་བཅས་དབུ་བཞུགས་ཐོག བོད་རིགས་མཐུན་ཚོགས་ཀྱི་ཚོགས་མི་ ༡༠༠ ལ་ཉེ་བ་མཉམ་ཞུགས་གནང་ཡོད་འདུག
སྐབས་དེར་ཚོགས་གཙོ་ལས་ཐོག་པ་བསྟན་འཛིན་ཀུན་དགའ་ལགས་ཀྱིས་ཚོགས་པ་ངོ་སྤྲོད་དང་འབྲེལ་རྒྱུན་ལས་ལྷན་ཚོགས་ཀྱིས་ལོ་གཉིས་རིང་ལས་ཀ་བྱས་པའི་སྙིང་དོན་གསལ་བཤད་དང་། ད་ལྟའི་རྒྱུན་ལས་དུས་ཡུན་རྫོགས་པ་དང་མཉམ་དུ་རྒྱུན་ལས་གསར་འདེམས་དགོས་པའི་གལ་ཆེའི་རང་བཞིན་སྐོར་ངོ་སྤྲོད་གནང་ཡོད་ཅིང་། དེའི་རྗེས་ཚོགས་གཞོན་ངག་དབང་བློ་གྲོས་ལགས་ཀྱིས་རང་ཉིད་ཀྱི་ཉམས་མྱོང་དང་འབྲེལ་ཏེ་དབུས་རྒྱུན་གསར་པའི་ངོས་ནས་ལས་དོན་བྱ་ཕྱོགས་སྐོར་བརྗོད་ཅིང་། ནང་བསྟན་གཙུག་ལག་ཁང་གི་འགན་འཛིན་མཆོག་ནས་བོད་རིགས་མཐུན་ཚོགས་འདི་ཨོ་སི་ཊྲརི་ཡ་རྒྱལ་ཁབ་ཀྱི་གཞུང་འབྲེལ་མིན་པའི་ཚོགས་པའི་རྩྭ་ཁྲིམས་འོག་དེབ་སྐྱེལ་བྱས་ཡོད་སྟབས། ཚོགས་པའི་ལས་དོན་ཡོངས་རྩ་དོན་ཁྲིམས་གཞི་ལྟར་འགྲོ་དགོས་པ་གལ་ཆེན་ཡིན་སྐོར་དང་། ཚོགས་མི་ཡོངས་ལ་འོས་འཕེན་གྱི་ཐོབ་ཐང་དང་ལས་འགན་ཡོད་པ་དེར་དོ་སྣང་དང་འགན་ལེན་གནང་དགོས་པའི་འབོད་སྐུལ་ཞུས་ཡོད་འདུག
ཉིན་དེར་ཚོགས་མི་ཡོངས་ནས་བགྲོ་གླེང་གོ་བསྡུར་ཞིབ་ལྷུག་གནང་མཐར་དགོང་མོའི་ཆུ་ཚོད་ ༩ ཙམ་ལ་འོས་བསྡུ་གནང་སྟེ། འོས་ཤོག་གི་མཐོ་དམན་གཞིར་བཟུང་སྐུ་ཞབས་ངག་དབང་བློ་གྲོས་ལགས་སྐབས་གསར་པའི་ཚོགས་གཙོ་དང་ལྕམ་ཚེ་རིང་དབྱངས་ཅན་ལགས་ཚོགས་གཞོན། ལྕམ་ཀུན་བཟང་དབང་མོ་ལགས་དྲུང་ཆེ་དང་དངུལ་གཉེར་གཅིག་ལྕོགས། ལྕམ་བདེ་སྐྱིད་ལགས་རྩིས་པ་བཅས་སུ་བསྐོ་བཞག་གནང་ཡོད་འདུག
