དེ་རིང་ཞོགས་པའི་ཆུ་ཚོད་ ༩ པའི་སྟེང་ངྷ་ས་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་སྐབས་བཅུ་གཅིག་པའི་སློབ་ཐོན་མཛད་སྒོ་ཚོགས་ཏེ། སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཞོན་བསོད་ནམས་བསྟན་འཕེལ་མཆོག་གིས་མཐར་ཕྱིན་སློབ་མ་ཚོར་ལག་འཁྱེར་དང་རྩེ་ཕུད་སློབ་མ་ཁག་ཅིག་ལ་གཟེངས་རྟགས་ཕུལ་སོང་།
བོད་ཀྱི་དགུ་བཅུ་གསུམ་ལས་འགུལ་ཚོགས་པ་ཐོག་མར་༡༩༩༡ལོར་འགོ་བཙུགས་རྗེས་རིམ་བཞིན་བོད་ཀྱི་བསྟན་པ་ཆབ་སྲིད་སྤྱི་དང་།ཡང་སྒོས་བཙོན་འོག་ཏུ་ཡོད་པའི་ཆབ་སྲིད་བཙོན་པ་རྣམས་ཀྱི་བདེ་སྡུག་སྐོར་གྱི་ལས་འགུལ་དང་།ཆབ་སྲིད་བཙོན་ཟུར་རྣམས་གཅིག་སྒྲིལ་དང་དཀའ་ངལ་ཅན་ཚོར་མཐུན་འགྱུར་རོགས་རམ་བྱེད་བཞིན་ཡོད་པའི་ཁྲོད།ཚོགས་པས་དོ་གཉེར་གནང་བཞིན་པའི་འཚེམ་ལས་སྦྱོང་བརྡར་ཁང་དང་སློབ་གྲྭ་གཉིས་ཀྱང་ཆབ་སྲིད་བཙོན་ཟུར་དང་འབྲེལ་ཡོད།འབྲེལ་ཆགས་ཚོར་དམིགས་བསལ་མཐུན་རྐྱེན་སྦྱར་བ་ཞིག་ཡིན་འདུགདགུ་བཅུ་གསུམ་གྱིས་སློབ་གྲྭ་འདི་ཐོག་མར་༢༠༠༡ལོ་ནས་འགོ་བཙུགས་པ་དང་།སློབ་ཐོན་སྐབས་གསུམ་པའི་བར་བོད་གཞུང་འཕྲོད་བསྟེན་ལས་ཁུངས་དང་དགུ་བཅུ་གསུམ་གཉིས་མཉམ་འབྲེལ་གྱིས་མཐུན་འགྱུར་བྱས་པ་དང་།སྐབས་བཞི་བ་ནས་བཟུང་མཐུན་རྐྱེན་ཆ་ཚང་དགུ་བཅུ་གསུམ་ཚོགས་པ་རང་གིས་གནང་སྟེ། ཟབ་སྦྱོང་སློབ་གྲྭའི་དུས་ཡུན་ལོ་གཅིག་རིང་སློབ་ཞུགས་པ་ཚོར་སློབ་ཡོན་དང་སྡོད་གནས།སྨན་བཅོས་མཐུན་འགྱུར་བཅས་ཆ་ཚང་བྱས་དང་བྱེད་མུས་ཐོག ལོ་རེར་ཧིན་སྒོར་༥༠༠ལག་དངུལ་ཞིག་ཀྱང་སྤྲོད་ཀྱི་ཡོད་འདུག
ཟབ་སྦྱོང་འཛིན་གྲྭའི་སློབ་དུས་རེར་སློབ་མ་༢༠རེ་ཡིག་རྒྱུགས་ཀྱི་ལམ་ནས་བསྡུ་བཞིན་པ་དང་།ཐེངས་འདིའི་མཐར་ཕྱིན་སློབ་མ་ཚུད་པའི་ཁྱོད་ད་སྔ་སློབ་མ་གྲངས་༡༤༠སློབ་མཐར་ཕྱིན་ཡོད་ཅིང་།སློབ་ཚན་ནང་བོད་ཡིག་དང་དབྱིན་ཡིགགློག་ཀླད་གསུམ་སློབ་ཁྲིད་བྱེད་ཀྱིན་འདུག་ལ།སྐབས་བཅུ་གཉིས་པའི་སློབ་དུས་གསར་པ་ལོ་འདིའི་ཕྱི་ཟླ་བདུན་པའི་ནང་འགོ་འཛུགས་བྱ་རྒྱུན་ཡིན་འདུག
མཛད་སྒོའི་སྟེང་ཚོགས་གཞོན་བསོད་ནམས་བསྟན་འཕེལ་མཆོག་གིས་མཐར་ཕྱིན་སློབ་མ་ཚོར་བླངས་དོར་གྱི་གསུང་བཤད་གནང་དོན།ད་ལྟའི་ཆར་བཙན་བྱོལ་སྤྱི་ཚོགས་ཀྱི་ཆབ་སྲིད་ལ་ཕྱོགས་ཡོངས་ནས་འགྱུར་པ་ཆེན་པོ་འགྲོ་བཞིན་པའི་སྐབས་ཤིག་ཏུ་འཁེལ་ཡོད་པ་དང་།བོད་ནང་ལ་༢༠༠༨ལོར་ཞི་རྒོལ་ཆེ་མོ་དང་ཉེ་ཆར་ཨ་མདོའི་རྔ་བ་ཁུལ།ད་ལྟའི་དཀར་མཛེས་ཁུལ་གྱི་གནས་བབ་བཅས་ཧ་ཅང་ཛ་དྲག་ཆགས་ཡོད་པ་དེ་ནི། ཁོང་ཚོས་སྡོད་ས་དང་ཟ་རྒྱུ་རག་གི་མི་འདུག་ཅེས་རྒྱ་གཞུང་ལ་ངོ་རྒོལ་བྱེད་པ་ཞིག་མ་རེད།བོད་མི་ཚོའི་བསམ་བློ་དང་སྨྲ་བརྗོད་རང་དབང་།ཆོས་དད་རང་དབང་བཅས་ལ་རྒྱ་གཞུང་གིས་དམ་དྲག་བྱས་པ་དེ་རྒྱལ་སྤྱིའི་ཁྲིམས་དང་འགལ་ཡོད་པ་རེད།ཅེས་དང་།
ཁོང་གིས་མུ་མཐུད།ཁྱེད་རྣམ་པ་ཚོ་ཡིན་ན་བོད་ཕྱི་ནང་གཉིས་ཀྱི་གནས་སྟངས་ལ་ཤེས་རྟོགས་ཡོད་པ་ཙམ་མ་ཟད།ཆབ་སྲིད་ཀྱི་ལས་འགུལ་སྤེལ་མཁན་གྱི་མི་སྣ་ཤ་སྟག་ཆགས་ཡོད་དུས།བོད་ཕྱི་ནང་གཉིས་ཀྱི་འབྲེལ་མཐུད་པ་ཞིག་ཆགས་རྒྱུ་དེ་གལ་ཆེན་པོ་རེད།རྣམ་པ་ཚོར་རང་ཉིད་སྒེར་ངོས་ནས་ཀྱང་ཆེ་མཐོང་ཆེན་པོ་ཡོད།ལྷག་པར་དུ་བོད་མིའི་བསྟན་སྲིད་གྱི་དོན་དུ་འབྱུང་འགྱུར་བོད་དེ་བོད་མི་ས་ཡ་དྲུང་གི་ངོ་བོར་བདག་ཐུབ་རྒྱུར། མུ་མཐུད་མི་ཚེས་མཇུག་སྐྱོང་ནུས་པ་ཞིག་ལ་འབད་བརྩོན་བྱ་དགོས་པ་ཧ་ཅང་གལ་ཆེན་པོ་རེད།དེ་བཞིན་ལོ་གཅིག་རིང་ཤེས་ཡོན་སློབ་སྦྱོང་གང་བྱས་པ་དེས་འདོད་བློ་ཁེངས་མ་བསྡད་པར།མུ་མཐུད་ཤེས་ཡོན་དང་ཀུན་སྤྱོད།ལག་ཤེས།སྤྱི་ཚོགས་འཆམ་མཐུན་བཅས་ཀྱི་ཐད་ཡར་རྒྱས་གོང་འཕེལ་གཏོང་དགོས་པ་དང་།བོད་ནང་གི་གནས་སྟངས་རྒྱལ་སྤྱིའི་སྟེང་འགྲེལ་བརྗོད་བྱ་ཐུབ་པ་ཞིག་བྱ་དགོས།ཞེས་གསུངས་སོང་།
དགུ་བཅུ་གསུམ་ལས་འགུལ་ཚོགས་པའི་དྲུང་ཆེ་གངས་ལྷ་མོ་ལགས་ཀྱིས་མཛད་སྒོའི་མཇུག་སྡོམ་དང་འབྲེལ་ཏེ།དེ་རིང་གི་སློབ་ཐོན་པ་ཚོ་དང་བཙན་བྱོལ་དུ་བསླེབས་པའི་ཆབ་སྲིད་བཙོན་ཟུར་རྣམ་པས་བོད་ནས་རྒྱུ་ནོར་ལོངས་སྤྱོད་ཡོངས་རྫོགས་བློས་བཏང་ནས། བཙན་བྱོལ་གཞུང་དང་༧གོང་ས་མཆོག་གི་ཞབས་རྗེས་སུ་འབྲངས་ཏེ་སྐྱབས་བཅོལ་དུ་ཡོང་པ་རེད།འོན་ཀྱང་ད་སྔ་ཆབ་སྲིད་བཙོན་པའི་སྐོར་ལ་སྤྱི་ཚོགས་ནང་གླེང་སློང་མང་པོ་ཞིག་ཡོང་བསྡད་པ་དངོས་ཡོད་ཡིན་སྟབས།རྗེས་ཕྱོགས་ས་གནས་གང་ཞིག་དང་ལས་སྣེ་ཅི་འདྲ་ཞིག་ཏུ་གནས་ཀྱང་།རང་ཉིད་ཆབ་སྲིད་བཙོན་པ་ཞིག་ཡིན་ བསམ་པའི་ཐོག་ནས།འདྲ་འདྲའི་ནང་ནས་མ་འདྲ་པ་ཞིག་བྱ་རྒྱུ་དེ་གལ་ཆེན་པོ་རེད།ཅེས་བརྗོད་བྱུང་།
གསར་འགོད་པས་ཐེངས་འདིའི་སློབ་ཐོན་ཁྲོད་ཀྱི་རྒྱུགས་འབྲས་ཨང་དང་པོ་དང་བཟང་གསུམ་སློབ་མའི་གཟེངས་བསྟོད་བྱ་དགའ་ཐོབ་མཁན་གྲྭ་དཀོན་མཆོག་དོན་ལྡན་ལགས་ལ་གཟེངས་རྟགས་ཐོབ་པའི་མྱོང་ཚོར་དང་།ལོ་གཅིག་གི་སློབ་དུས་དང་འབྲེལ་དགོངས་ཚུལ་དྲིས་པར་ཁོང་གིས།ང་རང་དེ་ཙམ་ཡག་པོ་ཡོད་བསམ་གྱི་མེད་ལ་རང་ཉིད་ལས་ལེགས་པ་གཞན་མཐོང་བསྡད་ཡོད།རྒྱུགས་འབྲས་གཞིར་བཞག་གིས་ང་ལ་ཨང་དང་པོ་ཐོབ་ཙམ་རེད།འོན་ཀྱང་།གློག་ཀླད་དང་དབྱིན་ཡིག་ཕྱོགས་ནས་ཕན་ཐོགས་ཆེན་པོ་བྱུང་།ཕྱིར་དགོན་པར་སོང་སྟེ་གློད་ཀླད་སློབ་ཁྲིད་ཀྱི་ཞབས་ཞུ་ཞིག་བསྒྲུབ་ཐུབ་ན་བསམ་ཡོད།དུས་ཡུན་གྱི་ཆ་ནས་སློབ་སྦྱོང་ཡག་པོ་བྱེད་མཁན་ཞིག་ཡིན་ཚེ་ལོ་གཅིག་ཐུང་དྲགས་འདུགདབྱིན་ཡིག་ལ་མཚོན་ན་ཡར་རྒྱས་ཤུགས་ཆེ་ཤོས་འགྲོ་བཞིན་པའི་སྐབས་སུ་མཚམས་འཇོག་དགོས་བྱུང་གི་འདུགཆེས་བརྗོད་བྱུང་།
ཟབ་སྦྱོང་སློབ་གྲྭའི་སློབ་སྤྱི་ལྷ་ཆབ་སྦྱིན་པ་ལགས་ལ་སློབ་སྦྱོང་གི་གྲུབ་འབྲས་དང་དུས་ཡུན་ཚད་བཀག་སྐོར་ལ་སྐད་ཆ་དྲིས་པར་ཁོང་གིས་ལན་འདེབས་གནང་དོན།སློབ་ཞུགས་པའི་ཁྲོད་བོད་དུ་བཙོན་ཁང་ནང་ལོ་མང་བསྡད་མྱོང་མཁན་སོགས། གང་ལྟར་འདིར་སླེབས་རྗེས་ལོ་གང་འཚམ་ཆེན་པོ་དང་སློབ་སྦྱོང་གི་གོ་སྐབས་མ་རག་པ་རྐྱང་ཆགས་ཡོད་པ་རེད།ལོ་གཅིག་གི་དུས་ཡུན་ནང་ཧ་ལས་པ་ཞིག་ཆགས་རྒྱུ་ཁག་པོ་རེད་དེ།སོ་སོས་འབད་བརྩོན་བྱས་པ་ཡིན་ན་ཏན་ཏན་ཕན་ཐོགས་ཡོང་གི་རེད་དྲན་གྱི་ཡོད།སྤྱིར་ང་རང་སྒེར་ངོས་ནས་ལོ་གཅིག་ཐུང་དྲགས་འདུག་བསམ་གྱི་ཡོད།འོན་ཀྱང་།སྐབས་ཤིག་ལོ་གཉིས་དང་གསུམ་གྱི་སློབ་དུས་ཚོད་ལྟ་ཞིག་བྱས་པ་རེད།ཡིན་ན་ཡང་།གཅིག་ནས་སློབ་ཞུགས་པ་ཚོ་ལོ་གང་འཚམ་ཆེན་པོར་སླེབས་ཡོད་པ་སོགས་རྒྱུ་མཚན་མང་པོ་ཞིག་གི་ཐད་ནས་ལོ་གཅིག་བཟོ་དགོས་བྱུང་པ་ཞིག་རེད།ཅེས་བརྗོད་སོང་།
གསར་འགོད་པ།བནྡེ་སྐྱབས།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
གསར་འགོད་པ་བནྡེ་སྐྱབས་ལགས། ངས་གོ་ཐོས་ལ་དགུ་བཅུ་གསུམ་ལས་འགུལ་ཚོགས་པས་སློབ་ཕྲུག་རེ་ལ་ཟླ་རེར་སྒོར་500སྤྲོད་བཞིན་པ་གོ་ཐོས་བྱུང་ཡང་། དེ་རིང་གསར་འགོད་པས་ལོ་རེར་སྒོར་500སྤྲོད་བཞིན་པའི་གནས་ཚུལ་རྒྱང་སྲིངས་བྱས་འདུག་པས། དོན་དངོས་ཐོག་གསར་འགོད་པའི་ཀླད་གོར་གཅིག་ཆད་པ་རེད་དམ། ངའི་གྲོགས་པོའི་ཀླད་གོར་གཅིག་བསྣན་པ་རེད། གསལ་བཤད་ཅིག་གནང་རོགས།
ཡ་ཡ། དེང་སང་སྤྱི་འཐུས་ཚོགས་གཞོན་ལས་ཚོགས་གཙོ་རྡ་ས་ནས་བརླགས་ཏེ་ཉི་མ་བཞི་ལྔ་ཞིག་ཕྱིན་ཚར་སོང་། སུས་ཁོང་ག་བར་ཡོད་མེད་ཤེས་ན་ལན་སྤྲད་རོགས། ངས་ནི་ལྡི་ལིར་དེ་བར་ངན་ཐབས་ཅི་འདྲ་ཞིག་གནང་བཞིན་ཡོད་ན་བསམ་ནས་སེམས་འཁྲལ་འདུག
གངས་རི་དང་འདྲ་བའི་ལྷ་མོ་ནི་གངས་རི་ཀྱི་རྒྱན་རེད།