ཟླ་སྔོན་མའི་ཕྱི་ཚེས་ ༢༦ ཉིན་དཀར་མཛེས་ལམ་བྲག་དགོན་གྱི་བཙུན་མ་འཆི་མེད་ལགས་དང་། ཆོས་དགའ་ལགས་གཉིས་ཉེས་མེད་བཙོན་འཇུག་བྱས་འདུག དེ་ནི་ཉེ་ཆར་དཀར་མཛེས་སྤྱི་བདེ་ལས་ཁུངས་ནས་དཀར་མཛེས་སུ་ཡོད་པའི་དགོན་པ་ཁག་ལ་གྲྭ་བཙུན་སུ་ཡིན་ཡང་གྲོང་ཁྱེར་ནང་གང་བྱུང་དུ་འགྲོ་མི་ཆོག་པ་དང་། གལ་སྲིད་ནད་མནར་བྱུང་ཚེ་ས་གནས་དང་ཞང་གི་མགོ་ཁྲིད་བརྒྱུད་ཡི་གེ་བླངས་ཏེ་ཁག་ཐེག་ལས་བྱེད་མི་སྣ་གཅིག་དང་མཉམ་དུ་མ་ཡོང་ན་འཛིན་བཟུང་བྱ་རྒྱུ་ཡིན་སྐོར་བཙན་བཀའ་བཏང་བའི་འོག ཁོང་གཉིས་སྨན་ཁང་དུ་འགྲོ་བའི་ལམ་བར་ནས་རྒྱ་དམར་ཉེན་རྟོག་པས་ཁྲོམ་སྐྱོད་ལག་འཁྱེར་མེད་པར་བསྙོན་འཛུགས་བྱས་ཏེ། ཉེན་རྟོག་ལས་ཁུངས་སུ་ཁྲིད་ནས་བཙོན་འཇུག་བྱས་པ་ཞིག་ཡིན་ཞིང་། ད་ཆར་བཙུན་མ་ཆོས་དགའ་ལགས་དཀར་མཛེས་ས་གནས་བཙོན་ཁང་དུ་ཡོད་ཚུལ་ཙམ་ལས། ཨ་ནེ་འཆི་མེད་ལགས་གར་ཡོད་ཤེས་རྟོགས་ཐུབ་མེད།
རང་ལོ་ ༣༧ ཡིན་པ་ཨ་ནེ་འཆི་མེད་ནི། སྐྱེས་ཡུལ་དཀར་མཛེས་རྫོང་། ཁོག་བཙན་ཨ་རུ་ར་གྲོང་། ཕ་རྡོ་རྗེ་ཚེ་རིང་དང་། མ་ངག་དབང་ཆོས་སྒྲོན་གཉིས་སུ་ཕྱི་ལོ་ ༡༩༧༤ ལོར་སྐྱེས། ཆུང་དུས་ནས་ལམ་བྲག་བཙུན་དགོན་དུ་ཞུགས་ནས་ ཕྱི་ལོ་ ༡༩༩༣ ཡས་མས་ནས་ལམ་བྲག་རིན་པོ་ཆེའི་བཀའ་ལྟར་སྨན་ལ་སྦྱོང་། སྨན་མཐར་ཕྱིན་པ་དང་ལམ་བྲག་སྒེར་གཉེར་སྨན་ཁང་༼ ལམ་བྲག་རིན་པོ་ཆེས་མི་མང་ཉམ་ཐག་ཚོའི་ཆེད་དུ་བཙུགས་པའི་དཀར་མཛེས་ཁྲོམ་གཞུང་དུ་ཡོད་པའི་སྨན་ཁང་ཞིག་རེད།༽ དུ་བོད་རྒྱ་ཟུང་འབྲེལ་གྱི་སྨན་པར་གནང་སྟེ་ཉིན་ལྟར་ཉམ་ཐག་ནད་པ་བརྒྱ་ཕྲག་བརྒལ་བར་ལྟ་རྟོག་གནང་བཞིན་ཡོད། རང་ལོ་ ༣༥ ཡས་མས་ཡིན་པ་བཙུན་མ་ཆོས་དགའ་ནི་སྐྱེས་ཡུལ་དཀར་མཛེས་རྫོང་། ཁྱིམ་དཀར་གྲོང་། ཕ་ངག་དབང་དགེ་འདུན་དང་། མ་བུ་མོ་བཀྲ་ལུ་གཉིས་སུ་སྐྱེས། ཆུང་དུས་ནས་ལམ་བྲག་བཙུན་དགོན་དུ་ཞུགས་ཏེ་ལོ་མང་རིང་ལམ་བྲག་སྨན་ཁང་དུ་སྨན་གཡོག་བྱས།
ཉེ་ཆར་ཁམས་དཀར་མཛེས་དགོན་དུ་དཀར་མཛེས་ཁུལ་ནས་ལས་བྱེད་འགའ་ཡོང་སྟེ་མཁན་ལས་ཟུར་དང་དཔེ་ཁྲིད་དགེ་རྒན། ཁམས་ཚན་དགེ་རྒན་སོགས་བསྡུ་བསྐངས་བྱས་ཏེ། དཀར་མཛེས་ས་གནས་སུ་ལོ་ལྟར་རྙོག་གླེང་རྒྱུན་ཆད་མེད་པར་ཡོང་གི་འདུག་པས་དེའི་ཐད་དགོན་པ་ནས་འགན་འཁུར་དགོས་པ་དང་། དེ་ལྟར་བྱུང་ཚེ་དཀར་མཛེས་ས་གནས་སུ་འཛུགས་བསྐྲུན་སོགས་ཡར་རྒྱས་གང་ལེགས་བྱ་ཆོག་ཅེས་བརྗོད་ཡོད་འདུག སྐབས་དེར་ཚོགས་འདུར་ཕེབས་པའི་དགེ་འདུན་པ་ཚོས་རྙོག་གླེང་མི་ཡོང་བའི་ཐད་ལ་འགན་ཁུར་མི་ཐུབ་ལ། ས་གནས་ཀྱི་འཚོ་བའང་སྔར་ནས་ས་གནས་རང་གི་ཐོན་ཁུངས་ཀྱིས་འགྲིག་ཙམ་ཡོད། དེ་ལས་གཞུང་ནས་བོད་མི་སྤྱི་དང་ཁྱད་པར་དགེ་བཙུན་གྱི་རིགས་ལ་མཐོང་ཆུང་དང་ཁྱད་གསོད་བྱེད་པ་མཚམས་འཇོག་རྒྱུ་དང་། དཀར་མཛེས་བོད་ཡིག་འབྲིང་རིམ་སློབ་གྲྭའི་ནང་སློབ་མ་གསར་བསྡུ་མི་ཆོག་པ་དང་། དགེ་རྒན་རྣམས་ཁ་འཐོར་བཏང་བ་སོགས་མི་མང་གི་སེམས་ལ་གནོད་པའི་ལས་གཞི་དེ་ཚོ་མཚམས་འཇོག་ངེས་པར་བྱེད་རོགས་མ་གཏོགས་ད་མུས་བཞིན་བྱས་ཚེ་དཀར་མཛེས་ཡུལ་དགོན་གཉིས་ཀ་ལང་རྒྱུའི་ཉེན་ཁ་ཆེན་པོ་འདུག་ལན་འདེབས་བྱས་ཡོད་འདུག
གནས་ཚུལ་མཁོ་གཏོང་བ། སེར་བྱེས་ཏྲེ་གྲྭ་དཀར་མཛེས་པདྨ་ཚེ།
སྙན་ངག་འགྲན་ཚོགས་ལ་རྗེས་སུ་ཡངས་དང་བཅས་ཐུགས་རྗེ་ཆེ་ཞུ།
གོང་གསལ་པར་ངོས་ལ་བོད་ལྭ་གྱོན་མེད་མཁན་ཚོའི་བོད་ཀྱི་ཐུན་མོང་མ་ཡིན་སྙན་ངག་གི་དར་རྒུད་དེ་བསམ་གྱི་ཡོད་ན་མ་འོངས་པ་བོད་ལྭ་གཙང་མ་གྱོན་རོགས་ཞེས་པས་འབོད་སྐུལ་དུ།
དཔའ་བོ་དཔའ་མོ་རྣམས་ལ་ཐུགས་རྗེ་ཆེ་ཞུ།