གུང་ཁྲན་དམར་ཤོག་ལ་དབང་ཆ་མེད།

ངོས་ཀྱི་སྤྲུལ་སྐུའི་གནད་དོན་ཐད་ཀྱི་མཐའ་མའི་ཐག་གཅོད་ཀྱི་དབང་ཆ་དེ། ངོས་རང་ལ་ཡོད་པ་ལས་གཞན་སུའང་ཡོད་པ་མ་རེད། རྒྱ་ནག་གུང་ཁྲན་དམར་ཤོག་དེ་བས་ཀྱང་ཡོད་པ་མ་རེད།

ཕྱི་ཟླ་ ༧ ཚེས་ ༡ ཉིན་བཞུགས་སྒར་དྷ་སར་༸གོང་ས་མཆོག་ལ་ཨེ་ཕའེ་གསར་ཁང་གིས་བཅར་འདྲི་གནང་སྐབས། ཏ་ལའི་བླ་མ་སྐུ་ཕྲེང་ ༡༥ པ་དེ་བོད་ནང་མ་ཡིན་པའི་ཕྱིའི་ཡུལ་གྲུ་ཞིག་ནང་འཁྲུངས་རྒྱུ་ཡིན་པ་དང་། གཅིག་བྱས་ན་ཁོང་དགོངས་པ་མ་རྫོགས་སྔོན་ལ་མ་འདས་སྤྲུལ་སྐུ་ཐུགས་ཐག་གཅོད་སྲིད་པ་རེད་ཅེས་གསུངས་འདུག

ཨེ་ཕའེ་གསར་ཁང་གིས་གནས་ཚུལ་སྤེལ་བ་ལྟར་ན། བཅར་འདྲིའི་སྐབས་༸གོང་ས་མཆོག་གིས། “ངོས་ནས་ཏོག་ཙམ་ཁ་གསལ་བོའི་སྒོ་ནས་བཤད་ན། ངོས་ཀྱི་སྤྲུལ་སྐུའི་གནད་དོན་ཐད་ཀྱི་མཐའ་མའི་ཐག་གཅོད་ཀྱི་དབང་ཆ་དེ། ངོས་རང་ལ་ཡོད་པ་ལས་གཞན་སུ་ལའང་ཡོད་པ་མ་རེད། རྒྱ་ནག་གུང་ཁྲན་དམར་ཤོག་དེ་བས་ཀྱང་ཡོད་པ་མ་རེད།” ཅེས་གསུངས་པ་མ་ཟད།  སྐྱེས་པ་སྔ་ཕྱི་ཁས་མི་ལེན་པའི་དམར་ཤོག་རིང་ལུགས་པ་ཞིག་གིས་སྤྲུལ་སྐུའི་གནད་དོན་ཐག་གཅོད་བྱེད་ཐབས་ཡོད་པ་མ་རེད། རྒྱ་ནག་དམར་ཤོག་པས་གནད་དོན་འདིའི་ཐད་ལག་པ་སྐྱོང་གི་ཡོད་པ་འདི་ནི་ཞབས་འདྲེན་གྱི་ལས་ཀ་ཞིག་ཡིན་པ་གསུངས་འདུག

གཞན་ཡང་ཨེ་ཕའེ་གསར་ཁང་གིས་༸གོང་ས་མཆོག་གིས་ཆབ་སྲིད་དང་འཛིན་སྐྱོང་གི་སྐུ་དབང་མི་མང་གིས་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་གནང་པའི་རྗེས།  ཆབ་སྲིད་ཀྱི་གནད་དོན་གཞན་དང་མ་འབྲེལ་བའི་ཐོག་ནས་ཕྱིར་བོད་ནང་དུ་ཕེབས་རྒྱུའི་ཐད་རྒྱ་ནག་གཞུང་དང་གྲོས་མོལ་བྱ་རྒྱུའི་འདུན་པ་ཡོད་མེད་དྲིས་སྐབས། ༸གོང་ས་མཆོག་གིས་བོད་ཀྱི་གནད་དོན་ནི་ཁོང་སྐུ་སྒེར་ཕྱིར་བོད་དུ་ཕེབས་ཐུབ་མིན་གྱི་གནད་དོན་མ་ཡིན་པར། བོད་མི་ས་ཡ་དྲུག་གི་གཞི་རྩའི་ཐོབ་ཐང་དང་ཐུན་མོང་མ་ཡིན་པའི་རིག་གནས་རྒྱུན་འཛིན་ཐུབ་མིན་གྱི་གནད་དོན་ཡིན་པ་གསལ་བཤད་གནང་འདུག་ལ།  དེ་བཞིན། གོང་ས་མཆོག་གིས་ “གལ་སྲིག་རྒྱ་ནག་གཞུང་གིས་བློ་ཁོག་ཆེན་པོའི་ཐོག་ནས་དངོས་ཡོད་དཀའ་ངལ་ལ་གདོང་གཏད་དེ་སེལ་ཐབས་བྱ་རྒྱུའི་འདུན་པ་ཡོད་ཚེ།  ངོས་ནས་བདེན་པ་བདེན་དྲང་གི་ཐོག་ནས་དཀའ་ངལ་སེལ་རྒྱུར་ཁོང་ཚོར་རོགས་རམ་གནང་རྒྱུའི་འདུན་པ་ཡོད” ཅེས་གསུངས་ཡོད་པ་རེད།

གོང་བཀོད་གནད་དོན་ཐད་སྐུ་སྒེར་དྲུང་ཆེ་རྔ་པ་ཚེ་རྒྱམ་ལགས་ཀྱིས་ཨ་རིའི་རླུང་འཕྲིན་ཁང་ལ་བརྗོད་པ་ལྟར་ན།  གཅིག སྤྲུལ་སྐུའི་ཐག་གཅོད་ནི་ཆོས་ལུགས་དང་འབྲེལ་བའི་གནད་དོན་ཞིག་ཡིན་པས། ངེས་པར་དུ་ཆོས་ལུགས་ཀྱི་སྤྲུལ་སྐུ་གཅོད་ལམ་ལུགས་ལྟར་གནང་དགོས་པ་རེད། གཉིས། ༸གོང་ས་མཆོག་གི་སྤྲུལ་སྐུ་ཇི་ལྟར་འཚོལ་མིན་ཐད་ཀྱི་སྐུ་དབང་ཡོངས་རྫོགས། གཙོ་བོ་༸གོང་ས་མཆོག་སྐུ་སྒེར་ལ་ཡོད་པ་ལས་གཞན་སུ་ལའང་ཡོད་པ་མ་རེད། གསུམ། སྐྱེས་པ་སྔ་ཕྱི་ཁས་མི་ལེན་པའི་དམར་ཤོག་རིང་ལུགས་པ་ཞིག་གིས་སྤྲུལ་སྐུའི་གནད་དོན་ཐད་ལག་པ་འཆང་བ་དེ་ནི། རིག་པའི་གཞུང་ལུགས་དང་ཡང་རྒྱབ་འགལ་དུ་གྱུར་བ་ཞིག་རེད། ཅེས་བརྗོད་འདུག 

ཉེ་སྔོན་བཙན་བྱོལ་གཞུང་གི་སྲི་ཞུ་ལས་བྱེད་པ་ཡོངས་རྫོགས་དང་གཞུང་རྟེན་དགྲ་ལྷ་ཚང་མའི་ངོས་ནས་༸གོང་ས་མཆོག་ལ་བརྟན་བཞུགས་བསྟར་འབུལ་ཞུས་སྐབས། ༸གོང་ས་མཆོག་གིས་དགུང་ལོ་ ༡༡༣ ལ་བཞུགས་རྒྱུ་ཡིན་པ་ཞལ་བཞེས་མཛད་ཡོད་པ་རེད།

གསར་འགོད་པ། ཚེ་རིང་རྒྱལ།