བོད་དང་རྒྱ་གར་གྱི་འགྲོ་བ་མིའི་ཐོབ་ཐང་ཚོགས་པ་གཉིས་ཀྱིས། ཐུན་མོང་ཐོག་༼ཀྲུང་གོའི་ཁྱད་ཆོས་ལྡན་པའི་དེང་རབས་ཅན་དང་བོད་ཀྱི་རིག་གཞུང་ཉམ་ཉེས་༽ཞེས་པའི་སྙན་ཐོ་གསར་པ་ཞིག་བཏོན་ཡོད་འདུག
ཕྱི་ཚེས་ ༤ ཉིན་གྱི་སྔ་དྲོའི་ཆུ་ཚོད་ ༡༠།༣༠ ཐོག་ཕྱི་དྲིལ་ལྷག་པ་ཚེ་རིང་ཚོགས་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱལ་ལྟེ་གནས་ཁང་དང་། རྒྱལ་ས་ལྡི་ལིར་རྟེན་གཞི་བྱས་པའི་རྒྱ་གར་ཁྲིམས་རྩོད་པའི་འགྲོ་བ་མིའི་ཐོབ་ཐང་འབྲེལ་ལམ་ཚོགས་པ་གཉིས་ཀྱིས། བོད་ནང་གི་འགྲོ་བ་མིའི་ཐོབ་ཐང་སྐོར་གྱི་དངོས་ཡོད་གནས་སྟངས་བརྗོད་པའི་དབྱིན་ཡིག་དཔེ་དེབ་སྙན་ཐོ་ཀྲུང་གོའི་ཁྱད་ཆོས་ལྡན་པའི་དེང་རབས་ཅན་དང་བོད་ཀྱི་རིག་གཞུང་ཉམ་ཉེས་(Imposing Modernity with Chinese Characteristics: The fate of Tibetan civilization)ཞེས་པ་ཞིག་གསར་དུ་དབུ་འབྱེད་གནང་སོང་།
ཐོག་མར་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་སྐུ་ཞབས་ཨོ་རྒྱན་བསྟན་འཛིན་ལགས་ཀྱིས་དམིགས་ཡུལ་སོགས་ངོ་སྤྲོད་སྐབས། ཁོང་ཚོའི་ཚོགས་པས་རྒྱ་གར་ཁྲིམས་གར་ཁྲིམས་རྩོད་པའི་ཚོགས་པ་དང་མཉམ་འབྲེལ་ཐོག རྒྱ་གཞུང་གིས་བོད་དུ་ལག་བསྟར་བྱེད་བཞིན་པའི་སྲིད་བྱུས་ལ་ཞིབ་འཇུག་བྱས་པ་་བརྒྱུད་སྙན་ཐོ་འདི་བཏོན་པ་དང་། དེ་ཡང་ཚོགས་པ་གཉིས་ཀྱིས་དུས་ཡུན་མི་ལོ་ ༢ རིང་འབད་བརྩོན་བྱས་ཡོད་པ་དང་། ད་དུང་ཕྱི་དྲིལ་ལས་ཁུངས་ནས་མཐུན་འགྱུར་གང་ལེགས་གནང་ཡོད་འདུག
མཇུག་ཏུ་སྐུ་མགྲོན་གཙོ་བོ་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་ཀྱིས་གསུངས་དོན། ཚོགས་པ་འདི་གཉིས་ཀྱིས་༧གོང་ས་མཆོག་གི་བཀའ་དགོངས་བཞིན་དེབ་འདི་པར་སྐྲུན་ཐུབ་པ་ནི། རླབས་ཆེན་གྲུབ་འབྲས་རླབས་ཤིག་ཡིན་པ་སོགས་དང་འབྲེལ་ནས་དེ་སྔོན་འདི་ལྟ་བུའི་ཚོགས་པ་དག་གིས། བོད་ཀྱི་འགྲོ་བ་མིའི་ཐོབ་ཐང་སྐོར་གྱི་སྙན་ཐོ་རིམ་པར་བཏོན་པའི་ལོ་རྒྱུས་ངོ་སྤྲོད་དང་། གཞན་ཡང་ཁོང་གིས། “ང་ཚོ་བོད་ཕྱི་ལོགས་སུ་ཡོད་པ་རེད། བོད་ནང་ལོགས་སུ་རྒྱ་མིས་བོད་ཀྱི་རིག་གཞུང་ལ་བདག་པོ་ག་ཚོད་བརྒྱབ་ཡོད་མེད་དང་། རྩ་མེད་ག་ཚོད་ཅིག་གཏོང་བཞིན་ཡོད་མེད་དེ། པཎ་ཆེན་རིན་པོ་ཆེ་མཆོག་གི་ཡིག་འབྲུ་ཁྲི་བདུན་གྱི་སྙན་ཞུ་ལས་གསལ་པོར་ཤེས་ཀྱི་འདུག ཕྱི་ལོ་ ༡༩༨༨ ལོར་པཎ་ཆེན་རིན་པོ་ཆེ་མཆོག་གཞིས་རྩེར་བཞུགས་སྐབས། ཁོང་གིས་མཐའ་མའི་སྡོམ་ཚིག་ནང་། རྒྱ་མིས་བོད་འཛུགས་བསྐྲུགས་བྱས་པ་དེ་བོད་ལ་ཕན་པ་ལས་གནོད་པ་ཆེ་བ་ཡོད།” ཅེས་གསུངས་སོང་།
དེའི་རྗེས་རྒྱ་གར་རྒྱལ་ས་ལྡི་ལིར་རྟེན་གཞི་བྱས་ཡོད་པའི་རྒྱ་གར་ཁྲིམས་རྩོད་པའི་འགྲོ་བ་མིའི་ཐོབ་ཐང་ཚོགས་པའི་སྐུ་ཚབ་ཊོག་ཊར་ཨ་ནན་ཀུ་མིར་ལགས་ཀྱིས་བོད་ནང་གི་འགྲོ་བ་མིའི་ཐོབ་ཐང་སྐོར་ལ་རྒྱབ་སྐྱོར་གཏམ་བཤད་གནང་ཡོད་པ་རེད།
དཔེ་དེབ་དེ་དུམ་མཚམས་གཉིས་སུ་དབྱེ་ཡོད་ཅིང་། དུམ་མཚམས་དང་པོར། རིག་གནས་གསར་བརྗེའི་སྐབས་བྱུང་བའི་བོད་ནང་གི་ཕྱོགས་ཡོངས་ཀྱི་གཏོར་བཤིག་གི་གནས་ཚུལ་དང་། གཉིས་པའི་ནང་། ད་ལྟའི་བོད་ནང་གི་རིག་གཞུང་གཏོར་བཤིག་གི་ཐབས་ལམ་དང་འཆར་གཞི་སོགས་བཀོད་ཡོད་པའི་ནང་། བོད་ཀྱི་འཛུགས་བསྐྲུན་ལས་གཞི་དང་མི་འབོར་གནས་སྤོར། ཤེས་ཡོན་སྲིད་བྱུས། སྐད་ཡིག་དང་རྩོམ་ཡིག ཆོས་དང་རིག་གཞུང་ཉམ་ཆག་བཅས་ཀྱི་སྐོར་རེ་རེ་བཞིན་ཁྱོན་བསྡོམས་ཤོག་གྲངས་ ༣༠༢ སྟེང་བཀོད་ཡོད་པ་རེད། དེབ་འདི་ནི་གོང་གསལ་ཚོགས་པས་རིན་མེད་དུ་འགྲེམས་སྤེལ་བྱེད་བཞིན་འདུག
བོད་ཀྱི་འགྲོ་བ་མིའི་ཐོབ་ཐང་ཚོགས་པ་འདི་ནི། ཕྱི་ལོ་ ༡༩༩༦ ལོར་དབུ་བརྙེས་པའི་གཞུང་འབྲེལ་མ་ཡིན་པའི་ཚོགས་པ་ཞིག་ཡིན་ཞིང་། ཚོགས་པ་འདི་ནི་བོད་ནང་གི་འགྲོ་བ་མིའི་ཐོབ་ཐང་ལ་ལྟ་རྟོག་བྱེད་མཁན་ཞིག་ཡིན་འདུག
གསར་འགོད་པ། དཔལ་ལྡན།
