ཉི་ཧོང་གནས་སྡོད་བོད་མི་ཚོས་ྋགོང་ས་མཆོག་གི་འཁྲུངས་སྐར་དང་བསྟུན་ཏེ་བོད་ཀྱི་རྒྱན་གོས་གཟིགས་འབུལ་གྱི་སྤྲོ་ཚོགས་ཤིག་བསྡུས་ཡོད་འདུག
ཟླ་འདིའི་ཕྱི་ཚེས་ ༢ ཉིན་ཉི་ཧོང་བོད་པའི་སྡེ་ཚོགས་ཀྱི་གོ་སྒྲིག་འོག་ཉི་ཧོང་གནས་སྡོད་བོད་རིགས་དང་། ཉི་ཧོང་བ་བཅས་མི་ ༡༢༠ བརྒལ་བ་འདུ་འཛོམས་ཐོག་རྒྱལ་ས་ཁྲོ་ཀེའོ་རུ་ཡོད་པའི་ཇོ་ཨེན་ཇི་དགོན་པའི་ནང་ྋགོང་ས་མཆོག་དགུང་གྲངས་ ༧༦ ལ་ཕེབས་པའི་སྐུའི་འཁྲུངས་སྐར་སྲུང་གཙི་གནང་ཡོད་འདུག་ལ། དེ་དང་མཉམ་དུ་༼ བོད་ཀྱི་རྒྱན་གོས་སྒེག་ཉམས་དང་མཱོ་མཱོ་གསོལ་སྟོན་གྱིས་༧གོང་ས་མཆོག་གི་སྐུའི་འཁྲུངས་སྐར་ལ་རོལ་བ ༽ ཞེས་པའི་རྒྱན་གོས་གཟིགས་འབུལ་གྱི་སྤྲོ་ཚོགས་ཞིག་ཀྱང་བསྡུས་ཡོད་འདུག
སྤྲོ་ཚོགས་ཐོག་ཉི་ཧོང་བོད་པའི་སྡེ་ཚོགས་ཀྱི་ཚོགས་གཙོ་བློ་བཟང་ཡེ་ཤེས་ལགས་ཀྱིས་དེར་ཡོད་མི་མང་ལ་ད་ལྟའི་བོད་ནང་གི་ཆབ་སྲིད་དང་འབྲེལ་བའི་དྲག་གནོན་གྱི་གནས་སྟངས་ངོ་སྤྲོད་དང་འབྲེལ། ྋགོང་ས་མཆོག་འཛམ་གླིང་ཞི་བདེའི་དེད་དཔོན་དང་བོད་མི་རྣམས་ཀྱི་འདི་ཕྱིའི་སྐྱབས་གནས་ཡིན་པ་དང༌། མ་འོངས་པར་བོད་མི་ཚོས་ྋགོང་ས་མཆོག་གིས་གནང་བའི་བྱམས་བརྩེའི་བཀའ་སློབ་ལ་བསམ་བློ་ནན་གྱིས་བཏང་སྟེ་རང་ངོས་ནས་འབད་བརྩོན་བྱ་དགོས་པའི་གཏམ་བཤད་གནང་ཡོད་འདུག
དེ་བཞིན་ཉི་ཧོང་སྐུ་ཚབ་དོན་གཅོད་ཨ་རྱ་ཚེ་དབང་རྒྱལ་པོ་ལཊ་དང་རྗན་ཁོ་ཇི་དགོན་པའི་མཁན་པོ་ཝ་ཀ་ཨོ་མེ་ལགས་རྣམ་གཉིས་བཅས་ཀྱིས་རིམ་པས་གཏམ་བཤད་གནང་གྲུབ་རྗེས། ༧གོང་ས་མཆོག་གི་ཞབས་བརྟན་གསོལ་འདེབས་དབྱངས་སུ་གྱེར་པ་དང༌། ཧི་མ་ལ་ཡའི་སློབ་ཕྲུག་ཚོགས་པའི་གཞོན་སྐྱེས་ཁག་ཅིག་གིས་བོད་ཆོལ་ཁ་གསུམ་གྱི་སྲོལ་རྒྱུན་དང་དེང་རབས་ཀྱི་རྒྱན་གོས་གཟིགས་འབུལ། དེ་བཞིན་གཞས་སྣ་འཁྲབ་སྟོན་སོགས་ཞུས་ཡོད་འདུག
བོད་ཀྱི་རྒྱན་གོས་སྒེག་ཉམས་དང་མཱོ་མཱོ་གསོལ་སྟོན་གྱིས་༧གོང་ས་མཆོག་གི་སྐུའི་འཁྲུངས་སྐར་ལ་རོལ་བ།
བོད་ཀྱི་རྒྱན་གོས་སྒེག་ཉམས་དང་མཱོ་མཱོ་གསོལ་སྟོན་གྱིས་༧གོང་ས་མཆོག་གི་སྐུའི་འཁྲུངས་སྐར་ལ་རོལ་བ།
གསར་འགྱུར་མཁོ་གཏོང་བ། ཉི་ཧོང་བོད་པ་སྡེ་ཚོགས་ཀྱི་བསོད་ནམས་ཚེ་རིང་ལགས།
རང་གོས་རང་གིས་གོན། རང་སྐད་རང་གིས་བཤད་ན། དེ་ལས་ལྷག་པའི་བོད་དོན་སྒྲུབ་ཚུལ་ཞིག་མེད། ཐུགས་རྗེ་ཆེ།
འདི་ལྟར་གླེང་ན་ངོ་མ་ཡག་པོ་རེད་གང་ཡིན་ཞེ་ན་ད་སྐབས་བོད་མི་གང་མང་ཞིག་ཕྱི་རྒྱལ་ཡུལ་ལུང་འདྲ་མིན་ཞིག་ཏུ་གནས་ཡོད་པ་དངོས་ཡོད་རེད་དེ་འདྲ་ཡིན་དུས་བོད་ཀྱི་ཁྱད་ཆོས་མཚོན་པའི་ཐོག་ནས་རིག་གཞུང་དེ་འདི་འདྲ་ཞིག་ཡིན་པ་བསྟོན་ཐུབ་ན་ངོ་མ་ཡག་པོ་རེད་དྲན་སོང་ཐུགས་རྗེ་ཆེ།