ཁ་སང་༸སྐུའི་འཁྲུངས་ཉིན་དཔེ་མཛོད་ཚོགས་ཁང་དུ་༼ཤེས་རབ་ཀྱི་ནམ་མཁར་ཕྱོགས་པའི་འདུ་འཛོམས༽ཐེངས་གསུམ་པ་ཚོགས་ཏེ། ༸གོང་ས་མཆོག་གི་མཛད་རྗེས་སྐོར་ནས་གཏམ་བཤད་དང་སྙན་ངག་གྱེར་འདོན་བཅས་གནང་སོང་།
ཕྱི་ཟླ་ ༧ ཚེས་ ༦ ཉིན་གྱི་ཕྱི་དྲོའི་ཆུ་ཚོད་ ༢ པའི་སྟེང་། སྤྱི་འཐུས་རྨོག་རུ་བསྟན་པ་དང་ནོར་གླིང་ཉམས་ཞིབ་པ་བོན་རྒྱ་བསྟན་འཛིན་རབ་རྒྱས་གཉིས་ཀྱིས་གོ་སྒྲིག་འོག བོད་ཀྱི་དཔེ་མཛོད་ཚོགས་ཁང་གསར་པའི་ནང་༼ཤེས་རབ་ཀྱི་ནམ་མཁར་ཕྱོགས་པའི་འདུ་འཛོམས༽ཐེངས་གསུམ་པ་དེ་ཚོགས་སོང་། ཐོག་མར་སྐུ་མགྲོན་རྣམས་ཀྱིས་༸གོང་ས་མཆོག་གི་སྐུ་པར་ལ་མཇལ་དར་ཕུལ་ཞིང་། ཚོགས་ཞུགས་པ་ཡོངས་ཀྱིས་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས། དབུས་འོས་བསྡུ་ལྷན་ཁང་གི་འགན་འཛིན་ལས་འཕར་གཡང་མཁོ་རྒྱལ་ལགས་ཀྱིས་རྨོག་རུ་ཚང་གི་ཕོ་བྲང་ཞེས་པའི་དྲ་ཚིགས་དབུ་འབྱེད་དང་། དེ་རྗེས་སྤྱི་ཟུར་ཡོན་ཏན་རྒྱ་མཚོ་ལགས་ཀྱིས་དྲ་ཚིགས་བཟོ་འགོད་པ་པ་སངས་རྗེ་རྡོ་རྗེ་ལགས་སུ་ལག་རྟགས་ཕུལ་ཞིང་། དེ་རྗེས་གདན་ཞུའི་སྐུ་མགྲོན་བོད་མི་སྤྱི་འཐུས་རྒྱ་རིགས་ཐར་དང་། གངས་ལྷ་མོ། ཤར་གླིང་ཟླ་སྒྲོན། བོད་ཀྱི་དུས་བབ་རྩོམ་སྒྲིག་པ་ཟུར་པ་རབ་གསལ། ནོར་གླིང་བོད་ཀྱི་མཐོ་སློབ་ཉམས་ཞིབ་ཁང་གི་འགན་འཛིན་རྡོ་རྗེ་དབང་ཕྱུག བོད་ཀྱི་དཔེ་མཛོད་ཁང་གི་ལོ་རྒྱུས་ཉམས་ཞིབ་པ་མགོ་ལོག་དམ་ཆོས་དཔལ་བཟང་བཅས་ཀྱིས། ༸གོང་ས་སྐུ་ཕྲེང་ ༡༤ མཆོག་གི་མཛད་རྗེས་སྐོར་ནས་གཏམ་བཤད་གནང་ཞིང་། སྒྱུ་རྩལ་པ་མགོ་ལོག་ཟླ་བྷེ་གཙོས་པའི་སྙན་ངག་གྱེར་འདོན་པ་བཅུ་གྲངས་ལྷག་གིས་༸གོང་ས་མཆོག་གི་མཛད་རྗེས་ལ་བསྔགས་པའི་སྙན་ངག་གྱེར་འདོན་དང་། དེ་བཞིན། ༸གོང་ས་མཆོག་གི་མཛད་རྗེས་དང་འབྲེལ་སྐོར་ནས་དྲི་བ་དྲིས་ལན་གྱི་བགྲོ་གླེང་བཅས་གནང་སོང་། ཐེངས་འདིའི་ཤེས་རབས་ཀྱི་ནམ་མཁར་ཕྱོགས་པའི་འདུ་འཛོམས་ཐོག་སྐྱ་སེར་མི་གྲངས་ ༡༠༠ ཙམ་མཉམ་ཞུགས་གནང་འདུག
གོ་སྒྲིག་པ་བོད་མི་མང་སྤྱི་འཐུས་རྨོག་རུ་བསྟན་པ་ལགས་ཀྱིས་བརྗོད་པ་ལྟར་ན། ༸གོང་ས་མཆོག་དགུང་གྲངས་ ༧༦ ལ་ཕེབས་པའི་སྐུའི་འཁྲུངས་སྟབས་བསྟུན་ཏེ། བོད་ནང་གི་དད་ལྡན་པ་ཁག་གིས་༸གོང་ས་མཆོག་ལ་བརྟན་བཞུགས་ཀྱི་ཆེད་དུ། ཉ་ ༣༢༩༩༡༤༠༠ དང་རྟ་ནོར་ལུགས་གསུམ་ ༨༠ བཅས་ཚེ་ཐར་བཏང་སྐོར་བརྗོད་བྱུང་།
ཤེས་རབ་ཀྱི་ནམ་མཁར་ཕྱོགས་པའི་འདུ་འཛོམས་ཐེངས་དང་པོ་དང་གཉིས་བ་ནི། ཕྱི་ལོ་ ༢༠༠༩ དང་ ༢༠༡༠ སོ་སོར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་མཐོ་སློབ་ཚོགས་ཁང་དང་རབ་གསལ་ཚོགས་ཁང་གཉིས་སུ་སྔ་རྗེས་ཚོགས་ཡོད་འདུག
གསར་འགོད་པ། ཚེ་རིང་རྒྱལ།
རྨོག་རུ་ཚང་གི་ཕོ་བྲང་ནི་ཤེས་རབ་དང་རྣམ་དཔྱོད་ཀྱིས་བརྩིགས་པའི་ཕོ་བྲང་ཞིག་ཏུ་འགྱུར་རྒྱུའི་རེ་བ་ཡོད། བདག་ལས་འགུལ་འདིར་ཞུགས་མ་ཐུབ་པ་འགྱོད་ནས་ཡོད།
༧གོང་ས་མཆོག་གི་སྐུའི་འཁྲུངས་སྐར་ཚང་མའི་ནང་གི་རྩ་ཆེན་དེ་ནི་རྨོག་རུ་ཚང་དང་འབྲེལ་བའི་བོད་མི་མང་པོ་ཞིག་གི་ཉ་སོགས་རྟ་ནོར་ལུག་གསུམ་སོགས་སེམས་ཅན་མང་པོ་ཚེ་ཐར་བཏང་པ་ནི་ངོ་མ་འཁྲུངས་སྐར་ཐབས་ཅན་གྱི་མཆོག་ཏུ་མཐོང་ཐུགས་རྗེ་ཆེ་ཞུ།
དྲ་གྲོགས་ཚང་མས་ལྷག་བསམ་རྣམ་དག་གིས་རྒྱབ་སྐྱོར་དང་སྐུལ་སློང་གནང་བར་བཀའ་དྲིན་ཆེ།
༸གོང་ས་སྐྱབས་མགོན་ཆེན་པོ་མཆོག་གི་སྐུ་ཚེ་བསྐལ་བར་བརྟན་པ་དང་།བོད་གཞིས་བྱེས་གཉིས་ཀྱི་སྤྱི་དོན་འགྲུབ་པར་ཤོག་་་་་བོད་རྒྱལ་ལོ།
ཁྱེད་ཅག་གི་སེམས་ཤུགས་དང་ལྷག་བསམ་ལ་ཉམས་པ་མེད་པར་སྨོན།
ཁ་སང་དང་པོ་རྨོག་རུ་ཚང་གི་ཕོ་བྲང་བཞེངས་རབ་གོ་མ་ཐག་དེ་ནི་ཏན་ཏན་ཨར་འདམ་དང་ལྕགས་སོགས་ཀྱིས་བཟོ་བསྐྲུན་བྱས་པ་ཞིག་ལོས་ཡིན་དྲན་སོང། འོན་ཀྱང་དེ་རིང་སྐུ་ཉིད་ཀྱིས་འགྲེལ་བཤད་གནང་སྟེ།
རྨོག་རུ་ཚང་གི་ཕོ་བྲང་》ཞེས་པའི་དྲ་ཚིགས་ནི་དུས་རབས་ཉེར་གཅིག་པའི་འགྲོས་དང་བསྟུན་པའི་བརྡ་འཕྲིན་གསར་བའི་ཅོང་བརྡ་དང་ལྷན་དུ་གཞེངས་བསྐྲུན་ཞེས་པ་ཡིན་ལ།གནའ་བོའི་ལོ་རྒྱུས་ཁྲོད་ཀྱི་ས་ཕག་དང་རྡོ་བ་བརྩིགས་པའི་ཕོ་བྲང་བཟོ་ལས་ཀྱི་རྒྱ་ལས་བརྒལ་བའི་དུས་རབས་ཀྱི་ཚབ་མཚོན་ཞིག་ཀྱང་ཡིན། ཞེས་གསུངས་ཡོང་དུས་ང་ནི་ཧ་ལས་སོང། ངོ་མ་དགའ་ནི་ཞིག་རེད།
ད་ནི་ངས་ཀྱང་དགའ་བསུའི་གླུ་ཞིག་ཀྱང་ལེན་གྱི་ཡིན།
ཡེ་ཡེ་ཡེ་་་་་་་་་་་་་་་་་་་་་་་་་་་་་་་་་་་་་་་་་་་་་་ཧོ།
ལྷོ་ཙན་དན་ནགས་ཀྱི་སྨན་ལྗོངས་འདི་ནས། །
རྨོག་རིག་པའི་ཁུ་ཕྱུག་བྱང་ལ་ཆས་ཡོད། །
གསུང་དོན་ལྡན་སྙན་འགྱུར་བར་མེད་སྒྲོགས་དང་། །
བོད་མགོ་ནག་ཡིད་དབང་ཁྱེད་ལ་ཕྱོགས་འགྲོ། །
ད་ངས་གླུ་མང་པོ་བླང་བསྡད་ན་གྲྭ་ཚང་ལས་སྣེ་ཚོས་ཀྱང་གོ་འགྲོ་ཉེན་ཆཻ།
མདོར་ན་སྐུ་ཞབས་མཆོག་ལ་བཀྲ་ཤིས་བདེ་ལེགས་ཡོད།
བཀྲ་ཤིས་བདེ་ལེགས་ཞུ།
བདག་དེ་ཉིན་ང་རང་ཚོའི་མཐུན་ཚོགས་ངོས་ནས་ཀྱང་དེ་མཚུངས་ཀྱི་ལས་འགུལ་ཞིག་སྤེལ་བས་ཚོགས་བཅར་མ་ཐུབ། དེ་བས་ད་རིང་འདིར་མགྲོན་པོ་ཞིག་ཚུལ་དུ་སྐད་ཆ་ཚིག་གཅིག་ཞུ་འདོད་བྱུང།
བོད་དོན་དང་འབྲེལ་བའི་གནས་ཚུལ་མང་པོ་ཞིག་བོད་ནང་དང་རྒྱ་ནང་ལ་གང་མང་སྤེལ་རྒྱུར་དྲ་ཚིགས་འདི་དག་གིས་ཕན་ནུས་ཧ་ཅང་ཐོན། ཡིན་ན་ཡང་དྲ་བའི་ཁ་བྱང་དེ་གསང་ཐབས་ཀྱིས་འགྲེམས་སྤེལ་ཐུབ་ན་བཟང། གལ་ཏེ་བོད་ཀྱི་དུས་བབ་ཀྱི་དྲ་བྱང་ནང་སོགས་ལ་ཁྱབ་བསྒྲགས་བྱས་ན་རྒྱ་གཞུང་གི་ལྟ་རྟོག་པ་ཚོས་ལམ་སང་འགོག་ཐབས་གནང་གི་རེད། དེ་ལས་བོད་ནང་གི་གྲོགས་པོ་སོགས་བརྒྱུད་ནས་འགྲེམས་སྤེལ་གནང་ན་ཁྱབ་སྤེལ་ཡང་ཐུབ་ལ་འགོག་ཉེན་ཡང་ཆུང་གི འདི་ངའི་ཉམས་མྱོང་ཞིག་གི་ཐོག་ནས་བཤད་ཀྱིན་ཡོད།
མཐར་རྨོག་རུ་ཚང་གི་ཕོ་བྲང་གི་ནང་རྟེན་བཟང་བོ་དང་ཤེས་རབ་ཀྱི་ནམ་མཁར་ཕྱོགས་པའི་ལས་རིམ་དག་དོན་ཕན་ལྡན་པ་ཞིག་ཡོང་བར་རེ་སྐུལ་ཞུ།
རྨོག་རུ་ཚང་གི་ཕོ་བྲང་》ཞེས་པའི་དྲ་ཚིགས་ནི་དུས་རབས་ཉེར་གཅིག་པའི་འགྲོས་དང་བསྟུན་པའི་བརྡ་འཕྲིན་གསར་བའི་ཅོང་བརྡ་དང་ལྷན་དུ་གཞེངས་བསྐྲུན་ཞེས་པ་ཡིན་ལ།གནའ་བོའི་ལོ་རྒྱུས་ཁྲོད་ཀྱི་ས་ཕག་དང་རྡོ་བ་བརྩིགས་པའི་ཕོ་བྲང་བཟོ་ལས་ཀྱི་རྒྱ་ལས་བརྒལ་བའི་དུས་རབས་ཀྱི་ཚབ་མཚོན་ཞིག་ཀྱང་ཡིན།
ལྷག་པར་༸གོང་ས་སྐྱབས་མགོན་ཆེན་པོ་མཆོག་དང་གཞིས་ལུས་བོད་པ་མི་མང་།ཡང་སྒོས་རྨོག་རུ་ཚང་གི་ལྷ་སྡེ་མི་སྡེ་ཀུན་ཀྱང་ས་ཐག་ཅི་ཙམ་གྱིས་ཁ་ཐག་རིང་ནའང་།མི་མང་གི་དད་པ་དང་ཡིད་ཆེས་དུས་ནམ་ཡང་གཏན་དུ་འབྲལ་ཐབས་མེད་པའི་ལོ་རྒྱུས་ཞིག་གི་དད་འདུན་གྱི་བདེན་རྟགས་ཡིན་པས།འདི་ནས་མི་མང་གི་ཡིད་ཆེས་དང་དད་འདུན་གྱི་ཚབ་མཚོན་ཡོང་ཕྱིར་བརྡ་འཕྲིན་གྱི་སྤྱོད་སྒོ་བརྒྱུད་དེ་འཛམ་གླིང་མི་མང་གི་མིག་སྔར་《རྨོག་རུ་ཚང་གི་ཕོ་བྲང་》ཞེས་པའི་དྲ་ཚིགས་བརྒྱུད་ལམ་གྱི་ཕོ་བྲང་འདི་གསར་གཞེངས་བྱས་པ་ཡིན།
འདི་ནི་ཚབ་མཚོན་ཅིག་དང་།རྟེན་འབྲེལ་ཞིག་གི་ངོ་གདོང་ཡིན་པ་མ་ཟད།རྨད་བྱུང་བསོད་ནམས་བསགས་པའི་དགེ་རྩ་ཞིག་ཀྱང་ཡིན།ལྷག་པར་ལྷག་བསམ་དག་པའི་གསོལ་འདེབས་ཀྱི་ཁྲོད་ནས་༸གོང་ས་སྐྱབས་མགོན་ཆེན་པོ་མཆོིག་གིས་མཚོ་ཆེན་ཁྲི་ཤོར་རྒྱལ་མོའི་འགྲམ་ནས་དཔལ་དུས་ཀྱི་འཁོར་ལོའི་དབང་ཆེན་ཞིག་གནང་སྩལ་ཡོང་བའི་གསོལ་འདེབས་ཀྱི་འབོད་སྒྲའང་ཡིན།
ཀུན་ཁྱབ་བརྡ་འཕྲིན་གྱི་བཟོ་རིག་ལས་གྲུབ་པའི་《རྨོག་རུ་ཚང་གི་ཕོ་བྲང་》ནི་༸གོང་ས་སྐྱབས་མགོན་ཆེན་པོ་སྐུ་ཕྲེང་བཅུ་བཞི་བའི་བཀའ་སློབ་དང་།གསུང་རྩོམ།མཛད་རྣམ་སོགས་དང་།ལྷག་པར་དད་ལྡན་སེར་སྐྱ་ཀུན་གྱིས་ངག་རིག་གི་མཆོད་པའི་ཚོམས་ཆེན་ཀྱི་དཀྱིལ་འཁོར་ཞིག་ཡིན་ལ།དཀྱིལ་འཁོར་འདི་ལ་རྟེན་ཅིང་འབྲེལ་བ་དང་།འབྲེལ་བར་འབྱུང་བའི་རིགས་དྲུག་ཡོད་དོ་ཅོག་གི་བདེན་དོན་དང་སྨོན་ལམ་མྱུར་དུ་འགྲུབ་པ་དང་།འཕགས་པ་སྤྱན་རེས་གཟིགས་ཀྱི་ཐུགས་བསྐྱེད་དུས་སུ་སྨིན་དེ་སྐྱེ་བ་ནས་ཚེ་རབས་ཐམས་ཅད་དུ་རྗེས་སུ་འཛིན་པའི་གསོལ་འདེབས་སྨོན་ལམ་ཡང་ཞུ་རྒྱུ་ཡིན།
http://www.mogrutsang.com
ཤེས་རབ་འོད་ཀྱིས་ཀུན་གསལ་ངོས་ཡངས་ཁྱབ།།
བདེན་པའི་འོད་ཀྱིས་འཛམ་གླིང་མིག་སྒོ་ཕྱེས།།
རྒྱལ་ཀུན་གཟུགས་སུ་སྣང་བའི་སྤྱན་རས་གཟིགས།།
མགོན་པོ་མཆོག་གིས་དུས་རྣམ་ཀུན་དུ་སྐྱོང་།།
དད་ལྡན་སྐྱེ་འགྲོ་ཀུན་གྱི་དད་སྟོབས་དང་།།
བདེན་པ་འབྲས་སུ་རློམ་པའི་གཟི་བྱིན་སྟོབས།།
བསླུ་མེད་སྐྱབས་ཀྱིས་དཔུང་བའི་ཚོགས་རྣམས་ཀྱིས།།
མགོན་པོ་མཆོག་ཉིད་སྐུ་ཚེ་རབ་བརྟན་ཤོག།
ཤེས་རབ་ནམ་མཁར་ཕྱོགས་པའི་ཁུ་བྱུག་གི་གཤོག་རྩལ།།
བདེན་དོན་ནམ་འཕངས་གཅོད་པའི་ཁུ་བྱུག་གི་གསུང་སྙན།།
གང་དུ་ཡོད་དང་དར་ན་ཡི་རང་གི་མེ་ཏོག།
ཞེ་སེམས་རབ་ཏུ་དགའ་བས་དུས་རྟག་ཏུ་བཏེགས་ཡོད།།
བཀུར་འོས་སྐུ་ངོ་རྨོག་རུ་འདི་བ་ཚང་དངོས་གནས་རང་ཐང་ཞིག་མིན། །ད་ཡིན་ན་རྨོག་རུ་ཚང་གི་ཕོ་བྲང་ཡང་འདུག དངོས་གནས་བྱས་ན་ཕོ་བྲང་དེ་ང་ཚོ་དགའ་ལྡན་ལ་ཡོད་དགོས། ཁོང་གིས་རྨོག་རུ་ཚང་གི་ཕོ་བྲང་དེ་དགའ་ལྡན་ལ་བརྒྱབ་ན་ངས་ཁོང་གི་ཕོ་བྲང་གི་རྒྱལ་སྒོའི་ནང་མཚན་སྲུང་དགོས་ཀྱང་འཇོན་ཚོད་ཀྱིས་བྱེད་ངེས་ཡིན། ང་ཚོ་ལ་ཕོ་བྲང་འདི་འདྲ་རེ་ཡོད་ངོ་མ་ན་ཧྲ་གི།
༸གོང་ས་མཆོག་ལ་བརྟན་བཞུགས་ཀྱི་ཆེད་དུ། ཉ་ ༣༢༩༩༡༤༠༠ དང་རྟ་ནོར་ལུག་གསུམ་ ༨༠ བཅས་ཚེ་ཐར་བཏང་པ་དེར་སེམས་བསམ་པའི་གཏིང་ནས་གུས་འདུད་དང་རྗེས་སུ་ཡི་རངས་ཞུ། འགྲོ་རྣམས་བདེ་དང་ལྡན་པའི་སྨོན་ལམ་ཡོད། ༧གོང་ས་མཆོག་གི་སྐུ་ཚེ་བརྟན་ཞིང་། ཁྱེད་ཅག་གི་སྐུ་ཚེ་བརྟན་པའི་སྨོན་ལམ་ཡོད། བཀྲ་ཤིས་བདེ་ལེགས།