ཁ་སང་གཟའ་མིག་དམར་ཉིན་ཧྥ་རན་སིའི་ཕྱི་སྲིད་བློན་ཆེན་གྱིས་རྒྱལ་ས་པེ་རེ་སི་རྒྱལ་ཡོངས་རླུང་འཕྲིན་བརྒྱུད་གནས་ཚུལ་བསྒྲགས་གསལ་ལྟར་ན། ད་ལྟ་ལེ་བྷེ་ཡའི་སྲིད་དབང་སྒེར་འཛིན་པ་གྷ་ཌཱ་ཧྥེ་སྲིད་སྟེགས་ལས་འབབ་རྒྱུར་གྲ་སྒྲིག་བྱས་ཡོད་འདུག
འདི་ཟླའི་ཚེས་ ༡༢ ཉིན་གྷ་ཌཱ་ཧྥེ་ཡི་འཐུས་མི་ཁག་ཅིག་ཧྥ་རན་སིའི་རྒྱལ་ས་པེ་རེ་སིར་འབྱོར་ཏེ་གཞུང་གི་གནད་ཡོད་མི་སྣ་དག་དང་འབྲེལ་གཏུགས་བྱུང་རྗེས། ཕྱི་སྲིད་བློན་ཆེན་ཇུ་པེེ་(Alain Juppe) ལགས་ཀྱིས། ད་ལྟ་གྷ་ཌཱ་ཧྥེ་གཞུང་གིས་ལེ་བྷེ་ཡའི་ཟིང་འཁྲུག་ཁྲོད་ཐེ་ཇུས་ཡོད་པའི་རྒྱལ་ཁབ་ཚང་མར་འཐུས་མི་བཏང་དང་གཏོང་བཞིན་ཡོད་ཅིང་། ཐེངས་འདིའི་འཐུས་མིའི་ཐུག་འཕྲད་ནི་གྲོས་མོལ་དངོས་མིན། འོན་ཀྱང་། འཐུས་མི་ཚོས་གྷ་དཱ་ཧྥེ་སྲིད་སྟེགས་ནས་འབབ་རྒྱུར་གྲ་སྒྲིག་ཡོད་སྟབས། གྲོས་མོལ་ཞི་འགྲིག་བྱ་རྒྱུའི་བསམ་ཚུལ་བཏོན་ཡོད་ལུགས་བསྒྲགས་འདུག
ཧྥ་རན་སི་ནི་ཐེངས་འདིའི་ལེ་བྷེ་ཡའི་ཟུང་འཁྲུག་ལ་ཎ་ཏོ(Nato) མཉམ་འབྲེལ་དམག་དང་རྒྱལ་ཚོགས་བདེ་འཇགས་དམག་དཔུང་བཏང་པའི་ནང་གི་ནུས་སྟོབས་ཆེ་ཤོས་ཤིག་ཆགས་ཡོད་ཅིང་། ལེ་བྷེ་ཡའི་རྒྱལ་ཁོངས་ནས་ཧྥ་རན་སིའི་དམག་དཔུང་ཕྱིར་འཐེན་དང་ཕན་ཚུན་བར་གྲོས་མོལ་ཅི་བྱ་བཅས་ཧྥ་རན་སིའི་གྲོགས་ཚོགས་ནང་ཐག་གཅོད་བྱ་དགོས་སྟབས། གང་མགྱོགས་གྲོས་ཚོགས་འཚོགས་ཏེ་མང་མོས་ཐག་གཅོད་བྱ་རྒྱུ་ཡིན་འདུག
རྒྱལ་སྤྱིའི་ཁྱོན་ཡོངས་ནས་གྷ་ ཌཱ་ཧྥེ་སྲིད་སྟེགས་ནས་འབབ་དགོས་པ་དེ་གཡོ་ཐབས་མེད་པ་ཞིག་ཡིན་ཀྱང་། དྲི་བ་གཙོ་བོ་ནི་དུས་ཚོད་ནམ་ཞིག་ལ་རྣམ་པ་གང་འདྲ་ཞིག་གི་ཐོག་ནས་སྲིད་སྟེགས་ལས་འབུད་རྒྱུ་དེ་རེད་ལ། ཧྥ་རན་སི་གཙོས་ཐེངས་འདིའི་ལེ་བྷེ་ཡའི་ཟིང་འཁྲུག་ནང་ཐེ་ཇུས་ཡོད་པའི་རྒྱལ་ཁབ་ཁག་གིས། འཁོན་འཛིན་དང་དམག་འཁྲུག་མཇུག་སྒྲིལ་ཕྱིར་གྷ་ཌཱ་ཧྥེ་སྲིད་དབང་སྒེར་འཛིན་གྱི་སྲིད་སྟེགས་ལས་འབབ་དགོས་པའི་གནོན་ཤུགས་རིམ་པར་སྤྲད་ཡོད།
གྷ་ཌཱ་ཧྥེ་ཡིས་ལོ་༤༡ རིང་ལེ་བྷེ་ཡའི་སྲིད་དབང་སྒེར་འཛིན་བྱས་ཡོད་ལ། འདི་ལོ་མི་མང་གིས་སྲིད་དབང་འཕོ་འགྱུར་དགོས་པའི་ངོ་རྒོལ་ཐད་རྒྱལ་སྤྱིའི་དམག་རོགས་བཏང་སྟེ། ད་ལྟ་གྷ་ཌཱ་ཧྥེ་སྡོད་སའི་གྲོང་ཁྱེར་ཊི་རེ་པོ་ལེ་ (Tripoli) མ་གཏོགས་ས་ཁུལ་གཞན་ཚང་མ་གྱེན་ལངས་ཤོག་ཁག་དང་རྒྱལ་ཚོགས་དམག་གིས་བཟུང་འདུག
གསར་འགོད་པ། བནྡེ་སྐྱབས།
