བལ་ཡུལ་གཞུང་གིས་བོད་ནས་བྲོས་བྱོལ་དུ་ཡོང་མཁན་གྱི་བོད་མི་དྲུག་རྒྱལ་ས་ཀ་ཐ་མན་གྲུའི་བྱང་ཤར་གྱི་གྲོང་གསེབ་ཞིག་ནས་འཛིན་བཟུང་བྱས་ཡོད་འདུག
ཁ་སང་ཧྥ་རན་སི་གསར་སྤེལ་ཁང་གིས་གནས་ཚུལ་སྤེལ་བ་ལྟར་ན། བལ་ཡུལ་གཞུང་གིས་ཉེ་ཆར་བལ་བོད་ས་མཚམས་བརྒལ་ཏེ་བོད་ནས་རྒྱ་གར་ནང་སྐྱབས་བཅོལ་དུ་ཡོང་མཁན་རང་ལོ་ ༡༦ ནས་ ༢༧ བར་ཡིན་པའི་བོད་མི་ ༦ རྒྱལ་ས་ཀ་ཐ་མན་གྲུའི་བྱང་ཤར་གྱི་ཀི་ལོ་མི་ཊར་ ༡༢༠ ཡི་མཚམས་སུ་ཡོད་པའི་གྲོང་གསེབ་ཞིག་ནས་འཛིན་བཟུང་བྱས་ཡོད་འདུག
གནས་ཚུལ་ནང་བཀོད་པ་ལྟར་ན། ཐེངས་འདིར་འཛིན་བཟུང་བྱས་པའི་བོད་མི་དེ་དག་ཟླ་འདིའི་ཕྱི་ཚེས་ ༡༢ ཉིན་གྱི་ཞོགས་པའི་སྐྱ་རེངས་མ་གསལ་གོང་འཛིན་བཟུང་བྱས་ཏེ་བལ་ཡུལ་ཕྱི་མི་ལས་གཞིས་སྤོ་ལས་ཁུངས་སུ་རྩིས་སྤྲོད་བྱས་ཡོད་སྐོར་རྡོ་ལ་ཁ་རྫོང་གི་ཉེན་སྲུང་སྤྱི་ཁྱབ་གཞོན་པ་ཨུ་མེ་ཤེ་ར་རྗི་རྗོ་ཤི་ཡིས་བརྗོད་ཡོད་འདུག
བོད་ནས་བལ་ཡུལ་བརྒྱུད་སྐྱབས་བཅོལ་དུ་ཡོང་མཁན་གྱི་བོད་མི་ཚོ་བལ་ཡུལ་གཞུང་དང་རྒྱལ་ཚོགས་སྐྱབས་བཅོལ་ལས་ཁུངས་མཉམ་འབྲེལ་ཐོག་ཞིབ་འཇུག་བྱས་རྗེས་རྒྱ་གར་ནང་གཏོང་གི་ཡོད་ནའང་། ས་བྱི་ཞི་རྒོལ་ཆེན་མོའི་ལས་འགུལ་བྱུང་བ་ནས་བཟུང་རྒྱ་ནག་གཞུང་བལ་ཡུལ་གཞུང་དང་མཉམ་འབྲེལ་གྱིས་བལ་བོད་ས་མཚམས་ཁག་ལ་དམ་དྲག་ཤུགས་ཆེར་བྱས་ཡོད་པ་དང་། ད་ལྟའི་བར་བལ་ཡུལ་བོད་ས་མཚམས་ནས་བོད་མི་བརྒྱ་ཕྲག་མང་པོ་འཛིན་བཟུང་གིས་བལ་བོད་ས་མཚམས་ནས་ཕྱིར་བཏང་བ་སོགས་བོད་ནས་སྐྱབས་བཅོལ་དུ་ཡོང་བཞིན་པའི་བོད་མི་མང་པོ་ཞིག་ལ་དཀའ་ངལ་འཕྲད་ཀྱི་ཡོད་པ་མ་ཟད། ཉེ་བའི་ལོ་འདི་དག་ཏུ་རྒྱ་ནག་གཞུང་གིས་གནོན་ཤུགས་ལ་བརྟེན་ནས་བལ་ཡུལ་གནས་སྡོད་སྐྱབས་བཅོལ་བོད་མི་ཚོར་༸གོང་ས་མཆོག་གི་འཁྲུངས་སྐར་གཙོས་པའི་དུས་ཆེན་ཁག་དང་དེ་མིན་གྱི་མཛད་སྒོ་སོགས་གསང་བའི་སྒོ་ནས་ཚོགས་དགོས་པའི་གནས་སུ་གྱར་ཡོད་འདུག
གསར་འགོད་པ། དོན་གོ
བལ་ཡུལ་གཞུང་ནི་རྒྱ་གཞུང་ལ་བསྟུན་གང་ཐུབ་བྱེད་དགོས་ཀྱི་ཡོད་པས་སྙིང་རྗེ། དེ་ལས་ང་ཚོའི་བལ་ཡུལ་དབུས་སྣེ་ལེན་ཁང་སོགས་ནས་འགན་འཁུར་ཏེ་གནས་འཚུལ་དེ་འདྲ་ལྷག་མ་བཅུག་ན་སྙམས།
བལ་ཡུལ་གཞུང་ལ་ང་ཚོས་ནམ་ཞིག་གི་ཚེ་ན་དྲིན་ལན་མཇལ་ཐུབ་བོད་ཕྲུག་ཚོ་མ་རྗེད་པ་གྱིས་ཨ།