བུད་མེད་ལྷན་ཚོགས་ཀྱིས་བལ་ཡུལ་ཉེན་རྟོག་པས་བོད་པའི་བུད་མེད་ཚོ་འཛིན་བཟུང་བཀག་ཉར་བྱེད་སྐབས། བཙན་གཡེམ་རིགས་མཚམས་འཇོག་བྱ་དགོས་པའི་དགོས་འདུན་བཏོན་འདུག
ཟླ་འདིའི་ཕྱི་ཚེས་ ༡༡ ནས་ ༢༩ བར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་པའི་གོ་སྒྲིག་འོག་ཨ་རིའི་གྲོང་ཁྱེར་ནེའུ་ཡོག་ཏུ་སྐབས་ ༤༩ པའི་བུད་མེད་ལ་དབྱེ་འབྱེད་ཕྱོགས་ལྷུང་མཚམས་འཇོག་ཞེས་པའི་ལྷན་ཚོགས་ཞིག་འཚོགས་བཞིན་ཡོད་ཅིང་། ཐེངས་འདིའི་ཚོགས་ཆེན་སྟེང་ཨ་ཧྤི་རི་ཀའི་གླིང་ཕྲན་དང་དང་དབུས་ཨ་མི་རི་ཀ ཨེ་ཤེ་ཡའི་གླིང་ཕྲན་གྱི་བལ་ཡུལ་དང་ལྷོ་ཀོ་རི་ཡ་བཅས་རྒྱལ་ཁབ་ ༡༠ ལྷག་གི་སྐུ་ཚབ་མཉམ་འཛོམས་ཐོག་ཡུལ་གྲུ་དེ་དག་གི་འགྲོ་བ་མིའི་ཐོབ་ཐང་སྤྱི་དང་ལྷག་པར་དུ་བུད་མེད་ཀྱི་ཐོབ་ཐང་གི་ཐད་ནས་རྒྱལ་ཁབ་སོ་སོའི་སྙན་ཐོ་སྒྲོག་སྦྱོང་གནང་གི་ཡོད་པ་ལྟར། ཉེ་ཆར་བལ་ཡུལ་གཞུང་གིས་ཐེངས་འདིའི་ཚོགས་ཆེན་སྟེང་འཁུར་བཞིན་པའི་བལ་ཡུལ་ནང་གི་འགྲོ་བ་མིའི་ཐོབ་ཐང་སྤྱི་དང་ལྷག་པར་དུ་བུད་མེད་ཀྱི་ཐོབ་ཐང་སྐོར་གྱི་སྙན་ཐོ་ཕྱིར་བསྒྲགས་བྱས་ཡོད་སྟབས། བོད་ཀྱི་བུད་མེད་ལྷན་ཚོགས་ཀྱིས་བལ་ཡུལ་གཞུང་གིས་ཐེངས་འདིའི་ཚོགས་འདུར་བཏོན་པའི་སྙན་ཐོ་ལ་ཉམས་ཞིབ་གནང་སྟེ། ཐེངས་འདིའི་ཚོགས་འདུར་བལ་ཡུལ་རང་གི་རྒྱལ་ཁབ་ཀྱི་བུད་མེད་དང་ལྷག་པར་དུ་བོད་མི་གཙོས་པའི་སྐྱབས་བཅོལ་བུད་མེད་ཀྱི་དཔལ་འབྱོར་དང་ཆབ་སྲིད་ཀྱི་གནས་བབ་དང་། བུད་མེད་ཀྱི་རང་དབང་བཅས་ཀྱི་ཐད་ནས་གང་འདྲ་ཡིན་མིན་ཁུངས་སྐྱེད་ར་སྤྲོད་ཀྱི་ཚུལ་དུ་སྙན་ཐོ་ཞིག་ཚོགས་ཐོག་ནས་སྒྲོག་སྦྱོང་གནང་འཆར་ཡོད་འདུག
དེ་ནི། ཐེངས་འདིའི་ཚོགས་འདུའི་སྟེང་རྒྱལ་ཁབ་རིམ་པའི་སྙན་ཐོ་སྒྲོག་སྦྱོང་ཁྲོད་བལ་ཡུལ་གཞུང་གི་སྐུ་ཚབ་ཀྱིས་སྒྲོག་སྦྱོང་གི་དུས་ཚོད་ཕྱི་ཚེས་ ༢༨ ཉིན་ལ་འཁེལ་ཡོད་པའི་དུས་དང་བསྟུན་ཏེ། བལ་ཡུལ་ས་གནས་བུད་མེད་ལྷན་ཚོགས་ཀྱི་ཚོགས་གཞོན་འགྱུར་མེད་ལགས་སྐུ་ཚབ་དུ་གོ་སྒྲིག་བྱས་པ་ཞིག་ཡིན་འདུག་ལ། བུད་མེད་ལྷན་ཚོགས་ཀྱི་སྙན་ཐོའི་ནང་། བལ་ཡུལ་ནང་གི་བུད་མེད་སྤྱིའི་གནས་སྟངས་དང་ལྷག་པར་དུ་བལ་ཡུལ་ཉེན་རྟོག་པས་བོད་པའི་བུད་མེད་ཚོ་འཛིན་བཟུང་བཀག་ཉར་བྱེད་སྐབས་གང་བྱུང་དུ་བཙན་གཡེམ་བྱེད་ཀྱིན་པའི་སྐོར་དང་། བོད་པའི་བུད་མེད་ཚོར་བཙོན་པ་ཚོར་ལྟ་སྟངས་ཡག་པོ་མེད་པའི་ཁར། བུད་མེད་སྐྱབས་བཅོལ་བའི་ཐོབ་ཐང་ལ་བརྩི་བཀུར་བྱེད་ཀྱི་མེད་པའི་སྐོར། དེ་བཞིན། བལ་ཡུལ་གཞུང་གིས་བོད་ནས་བྲོས་བྱོལ་དུ་ཕེབས་མཁན་གྱི་བོད་མི་ཚོ་བལ་བོད་ས་མཚམས་ནས་ཕྱིར་ལོག་བཏང་བའི་ཐད་ལ་སྐྱོན་བརྗོད་བྱས་ཡོད་པ་མ་ཟད། མ་འོངས་པར་བལ་ཡུལ་ཉེན་རྟོག་པས་འཛིན་བཟུང་བྱས་པའི་བོད་པའི་བུད་མེད་ཚོར་ཚུལ་མིན་གྱི་བྱ་སྤྱོད་སྤེལ་བཞིན་པའི་རིགས་མཚམས་འཇོག་དང་བཙན་གཡེམ་བཏང་བའི་གྱོད་གཞི་ཁག་ལ་རྟོག་ཞིབ་མཐིལ་ཕྱིན་བྱ་དགོས་པའི་དགོས་འདུན་སོགས་འཁོད་ཡོད་འདུག
འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོང་ཐང་ཚན་པའི་གོ་སྒྲིག་གནང་བཞིན་པའི་བུད་མེད་དབྱེ་འབྱེད་ཕྱོགས་ལྷུང་མཚམས་འཇོག་ཞེས་པའི་ཚོགས་འདུ་དེ་ནི། ཕྱི་ལོ་ ༡༩༩༦ ལོར་ཐོག་མར་ཨ་ཧྤི་རི་ཀ་དང་དབུས་ཨ་མི་རི་ཀ ཨི་ཊ་ལི། ལྷོ་ཀོ་རི་ཡ།སིང་གྷ་ཕོར། བཅས་གཙོས་པའི་རྒྱལ་ཁབ་ ༡༨༦ ལྷག་གིས་མཚན་རྟགས་བཀོད་པ་ནས་བཟུང་དངོས་སུ་མགོ་འཛུགས་གནང་བ་ཞིག་ཡིན་ཞིང་། ཕྱིས་སུ་བལ་ཡུལ་གཙོས་པའི་ཨེ་ཤ་ཡའི་རྒྱལ་ཁབ་ཁག་ཅིག་ཀྱང་མཉམ་ཞུགས་གནང་སྟེ། ད་ལྟའི་ཆར་ལོ་རེར་ཚོགས་འདུ་ཐེངས་གཉིས་རེར་ཚོགས་ཏེ་སྙན་ཐོ་སྒྲོག་སྦྱོང་དང་མཐའ་མའི་གྲོས་ཆོད་སོགས་ཀྱི་ལམ་ནས་བུད་མེད་ཀྱི་ཐོབ་ཐང་དང་འབྲེལ་བའི་དཀའ་ངལ་སེལ་ཐབས་ལ་འབད་པ་བྱེད་ཀྱིན་ཡོད་འདུག
༡༩༩༧ ལོ་ནས་བཟུང་བོད་ཀྱི་བུད་མེད་ལྷན་ཚོགས་ཀྱང་སྔ་ཕྱི་ཐེངས་ལྔར་སྐུ་ཚབ་མཉམ་ཞུགས་ཀྱིས་བོད་གཞིས་བྱེས་གཉིས་ཀྱི་གནས་བབ་དང་ཐོབ་ཐང་སོགས་ཀྱི་ཐད་གཏམ་བཤད་རིམ་པ་སྤེལ་ཡོད་པ་དང་། ཐེངས་འདི་ནི་བོད་ཀྱི་བུད་མེད་ལྷན་ཚོགས་ཀྱི་སྐུ་ཚབ་ཕེབས་ཐེངས་ ༦ པ་དེ་ཆགས་ཡོད་འདུག
གསར་འགོད་པ། དོན་གོ
བུད་མེད་ལྷན་ཚོགས་ལ་ཐུགས་རྗེ་ཆེ་ཞུ།