སོག་སྐད་ལས་རིམ་དགོས་ཀྱི་འདུག

གཟའ་མིག་དམར་ཉིན་༧གོང་ས་མཆོག་ཨ་རིའི་ཨེ་ཤ་ཡ་རང་དབང་རླུང་འཕྲིན་ཁང་དུ་ཕེབས་ཏེ། སྐད་ཡིག་འདྲ་མིན་གྱི་སྡེ་ཚན་ཁག་གི་ལས་བྱེད་ཚོར་བཀའ་མོལ་གནང་འདུག

༧གོང་ས་མཆོག་གིས་ཨ་རིའི་རྒྱལ་ས་ཝ་ཤིན་ཊོན་དུ་ཡོད་པའི་ཝེ་རཱ་ཛོན་ཚོགས་ཁང་ཆེན་མོར། མང་ཚོགས་ལ་དུས་འཁོར་དབང་ཆེན་གྱི་སྔོན་འགྲོའི་གསུང་ཆོས་བསྩལ་རྗེས། ཕྱི་ཚེས་ ༡༢ ཉིན་རྒྱལ་སར་རྟེན་གཞི་བྱས་པའི་ཨེ་ཤེ་ཡ་རང་དབང་རླུང་འཕྲིན་ཁང་གི་གདན་ཞུ་ལྟར། ལས་ཁུངས་དེར་ཆེད་ཕེབས་ཀྱིས་སྡེ་ཚན་ཁག་འདྲ་མིན་གྱི་ལས་བྱེད་ཚོར། ཨ་རི་དང་རྒྱ་གར་ལྟ་བུའི་དམངས་གཙོའི་རྒྱལ་ཁབ་ཆེ་ཤོས་ཁག་གིས་དམིགས་བསལ་འགན་འཁུར་དགོས་པ་དང་། རང་དབང་རླུང་འཕྲིན་ཁང་དེ་ཡིས་དམངས་གཙོ་དང་འགྲོ་བ་མིའི་ཐོབ་ཐང་ཐོག་ཞབས་འདེགས་བསྒྲུབ་རྒྱུར་འགན་ཆེན་པོ་ཡོད་སྐོར་བརྗོད་འདུག་ལ། དེ་མིན། སྔོན་མ་འཇར་མན་གྱི་བྷིར་ལིན་རྩིག་གྱང་ Berlin Wall མ་བཤིག་སྔོན་ལ། ཡུ་རོབ་རླུང་འཕྲིན་ཁང་གིས་ཤར་འཇར་མན་གྱི་མང་ཚོགས་ལ་གོ་རྟོགས་སྤེལ་བའི་སྐོར་ངོ་སྤྲོད་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ཡང་མང་ཚོགས་ཀྱི་གོ་རྟོགས་སེལ་རྒྱུའི་བརྒྱུད་ལམ་གལ་ཆེན་ཞིག་ཡིན་སྟབས། སོག་སྐད་རྒྱང་སྲིང་ལས་རིམ་ཞིག་ཀྱང་དགོས་གལ་ཆེ་ཚུལ་གསུངས་འདུག

རླུང་འཕྲིན་ཁང་དེ་གའི་རྒྱ་སྐད་ཚན་པའི་གསར་འགོད་པའི་བཅར་འདྲི་དང་ལེན་བྱས་ཏེ། ཁོང་ཉིད་ཀྱིས་བོད་ཀྱི་ཆབ་སྲིད་དང་འཛིན་སྐྱོང་གི་འགན་དབང་མི་དམངས་ཀྱིས་བདམས་པའི་མགོ་ཁྲིད་ཚོར་རྩིས་སྤྲོད་གནང་པ་དང་། ད་ལྟའི་བོད་རྒྱའི་འབྲེལ་མོལ་གྱི་གནས་སྟངས་སོགས་ངོ་སྤྲོད་གནང་འདུག

དེའི་རྗེས་ཐེངས་འདིའི་དུས་དབང་གི་སྦྱིན་བདག་ཚོས་ཡ་རབས་བཟང་སྤྱོིད་གཞི་རྩར་བཞག་པའི་ཐོག་ནས་ནང་ཆོས་ལ་སློབ་སྦྱོང་བྱས་ཏེ། ཤེས་ནས་དད་པ་འཐོབ་པ་ཞིག་གནང་དགོས་སྐོར་གྱི་བཀའ་སློབ་དང་། ཕྱི་ཚེས་ ༡༢ ཉིན་གྱི་ཕྱི་དྲོར་༧གོང་ས་མཆོག་གིས་ཨུ་རུ་སུའི་ཁོངས་ཀྱི་བོད་བརྒྱུད་ནང་བསྟན་གྱི་བླ་སྤྲུལ་དང་ཆོས་ལུགས་ཁག་གི་འཐུས་མི་ཚོར། འཛམ་གླིང་འདིའི་དཀའ་ངལ་མང་པོ་ཞིག་བཟང་སྤྱོད་ཉམས་པ་ལས་འབྱུང་བཞིན་ཡོད་སྟབས། འགྲོ་བ་མིའི་རིན་ཐང་དང་འབྲེལ་བའི་བཟང་སྤྱོད་གོང་མཐོར་གཏོང་རྒྱུ་ཤིན་ཏུ་གལ་ཆེན་ཡིན་པ་སོགས་གསུངས་ཏེ“ ད་ལྟ་བོད་མི་ཚོ་ཧ་ཅང་གཉན་འཕྲང་ཆེ་བའི་སྐབས་སུ་བསླེབས་ཡོད་སྟབས། སོག་རིགས་ཚོས་བོད་བརྒྱུད་ནང་བསྟན་གསོན་པོ་གནས་རྒྱུར་འགན་ཆེན་པོ་འཁུར་དགོས་ཀྱི་འདུག ” ཅེས་གསུངས་འདུག