བཀའ་ཤག་གིས་མཐུན་འགྱུར་རོགས་རམ་གནང་བ་ལྟར། ཉེ་ཆར་ནས་འཕྲོད་བསྟེན་ལྷན་ཁང་དང་ཆེས་མཐོའི་ཁྲིམས་ཞིབ་ཁང་གི་ལས་ཁུངས་ཁག བཀའ་ཤག་རྙིང་པའི་ཚོགས་ཁང་དུ་གནས་སྤོར་བྱེད་མགོ་བཙུགས་འདུག
ཉེ་ལམ་དབུས་བོད་མིའི་སྒྲིག་འཛུགས་ཀྱི་བཀའ་ཤག་གསར་པའི་ཁང་བརྩེགས་ལེགས་འགྲུབ་བྱུང་རྗེས། བཀའ་ཤག་དང་འཆར་འགོད་ལས་ཁུངས། དེ་བཞིན་འོས་བསྡུ་བཅས་ཁང་པ་གསར་པའི་ནང་སྤོར་ཡོད་ལ། ཟླ་འདིའི་ཚེས་མགོ་ནས་བཟུང་འཕྲོད་བསྟེན་ལྷན་ཁང་དང་ཆེས་མཐོའི་ཁྲིམས་ཞིབ་ཁང་གི་སྡེ་ཚན་ཁག་ཅིག་བཀའ་ཤག་རྙིང་པའི་ལས་ཁུངས་ནང་སྤོར་མགོ་བཙུགས་ཡོད་པ་རེད།
དེ་སྔོན་འཕྲོད་བསྟེན་ལྷན་ཁང་སྒེར་ལ་ཆེད་དམིགས་ལས་ཁུངས་མེད་པར། སྤྱི་འཐུས་ཚོགས་དྲུང་ལས་ཁུངས་ཀྱི་ཐོག་ཁང་གི་ཁང་མིག་འགའ་གཡར་ནས་འདུག་དགོས་བྱུང་ཡོད་པ་དང་། དེ་བཞིན། ཆེས་མཐོའི་ཁྲིམས་ཞིབ་ཁང་ལའང་ལས་ཁུངས་ཀྱིས་མ་འདང་བའི་དཀའ་ངལ་འོག ཁྲིམས་ཞིབ་པ་ ༢ དང་། ཡིག་སྒྱུར་སྡེ་ཚན། ཉམས་ཞིབ་སྡེ་ཚན་གྱི་ལས་ཁག་ཅིག་བཅས་ཤེས་རིག་ལས་ཁུངས་ཀྱི་ཁང་མིག་འགའ་གཡར་ནས་སྡོད་དགོས་བྱུང་ཡོད།
གནས་ཚུལ་དེ་སྐོར་ལ་འཕྲོད་བསྟེན་དྲུང་ཆེ་ཕ་ཟུར་དབང་ཕྱུག་ལགས་སུ་བཅར་འདྲི་ཞུས་པར། དེ་སྔ་འཕྲོད་བསྟེན་ལས་ཁུངས་སྒེར་ལ་དབང་བའི་ཁང་པ་མེད་པར་སྤྱི་འཐུས་ཚོགས་དྲུང་ལས་ཁུངས་ཀྱི་ཐོག་ཁང་དུ་བསྡད་ཡོད་པ་དང་། ད་ཆར་ཚོགས་དྲུང་ལས་ཁུངས་རྒྱ་སྐྱེད་གཏོང་འཆར་ཡོད་སྟབས། དེ་སྔོན་འཕྲོད་བསྟེན་ལ་གཡར་ཡོད་པའི་ཁང་མིག་དག་ཀྱང་ཕྱིར་རྩིས་སྤྲོད་བྱ་དགོས་བྱུང་ཡོད་འདུག འཕྲོད་བསྟེན་ལྷན་ཁང་གིས་དཀའ་ངལ་དེ་དག་བཀའ་ཤག་ལ་སྙན་སེང་ཞུས་པ་བརྒྱུད་བཀའ་ཤག་རྙིང་པའི་ལས་ཁུངས་ཆ་བགོས་བྱས་པ་ཞིག་ཡིན་འདུག
དྲུང་ཆེ་ཕ་ཟུར་དབང་ཕྱུག་ལགས་ཀྱིས་བརྗོད་དོན། “ ང་ཚོའི་འཆར་འགོད་སྡེ་ཚན་དང་རྩིས་ཁང་། ཆབ་སྲིད་བཙོན་པའི་སྡེ་ཚན་གྱི་ལས་བྱེད་ ༣༣ ཙམ་བཀའ་ཤག་རྙིང་པའི་ཐོག་ཁང་གསུམ་པར་སྤོ་ཡོད་ཀྱང་། ཁང་མིག་རེ་ཟུང་ནང་མི་ ༩ རེ་མཉམ་དུ་སྡོད་དགོས་ཀྱི་འདུག་ལ། ད་དུང་ཡང་ལས་ཁུངས་ཀྱི་མ་འདང་པའི་དཀའ་ངལ་ཕྲན་བུ་འདུག ” ཅེས་བརྗོད་བྱུང་།
ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་ཀུན་དགའ་རྡོ་རྗེ་ལགས་སུ་བཅར་འདྲི་ཞུས་པར། ཁྲིམས་ཞིབ་ཁང་གི་ལས་ཁུངས་ཨ་མ་ཆུང་དྲགས་པའི་སྐོར་དང་། ད་ལྟ་ཁྲིམས་ཞིབ་ཁང་གི་ཁྲིམས་ཞིབ་པ་གཉིས་དང་། ཡིག་སྒྱུར་དང་ཉམས་ཞིབ་སྡེ་ཚན་གྱི་ལས་བྱེད་ ༥ བཅས། ཤེས་རིག་ལྷན་ཁང་གི་ཁང་ཆུང་ཞིག་གཡར་ནས་བསྡད་ཡོད་སྐོར་སོགས་བརྗོད་བྱུང་། ཁོས་བརྗོད་དོན། “ ཉིན་འདི་འགར་བཀའ་ཤག་རྙིང་པའི་ནང་གནས་སྤོ་བྱེད་བཞིན་པ་དག་ནི། དེ་སྔ་ཤེས་རིག་ལས་ཁུངས་ཀྱི་ཁང་པ་གཡར་ནས་བསྡད་ཡོད་པའི་ལས་བྱེད་རྣམ་པ་དང་། ཁྲིམས་ཞིབ་ཁང་ནས་ཁྲིམས་ཞིབ་པ་ཆེ་བ་དང་དྲུང་ཆེ། རྩིས་པ། དཔེ་མཛོད་ལས་བྱེད་སོགས་ཁྱོན་ལས་བྱེད་ ༡༤ ཙམ་ཡོད ” ཅེས་བརྗོད་བྱུང་།
ཡང་གསར་འགོད་པས་བཀའ་དྲུང་མི་འགྱུར་རྡོ་རྗེ་ལགས་སུ་བཀའ་ཤག་རྙིང་པའི་ལས་ཁུངས་བགོ་འགྲེམས་བྱེད་ཕྱོགས་སྐོར་ལ་བཅར་འདྲི་ཞུས་པར། བཀའ་ཤག་དང་བཀའ་དྲུང་ཡིག་ཚང་གཉིས་བཀའ་ཤག་གི་ཐོག་ཁང་གསར་པའི་ནང་སྤར་བ་དེ། བཀའ་ཤག་ལ་ལས་ཁུངས་ཀྱིས་མ་འདང་བའི་དཀའ་ངལ་མིན་པར། འཕྲོད་བསྟེན་ལྷན་ཁང་གཙོས་པའི་ཁྲིམས་ཞིབ་ཁང་དང་གཞུང་ཞབས་འདེམས་བསྐོ་ལྷན་ཁང་བཅས་ལས་ཁུངས་ཀྱིས་མ་འདང་པའི་དཀའ་ངལ་འོག བཀའ་ཤག་གིས་ལས་ཁུངས་གསར་པ་འཛུགས་སྐྲུན་བྱས་པ་ཡིན་སྐོར་གསུངས་སོང་། བཀའ་དྲུང་མཆོག་གིས་བརྗོད་དོན། “ བཀའ་ཤག་རྙིང་པའི་ནང་འཕྲོད་བསྟེན་ལས་ཁུངས་ཀྱི་ལས་བྱེད་དང་ཁྲིམས་ཞིབ་ཁང་གི་ལས་བྱེད་བཅུ་གྲངས་ཤིག་སྤར་ཡོད་སྟབས། གཞུང་ངོས་ནས་ལས་ཁུངས་དེ་དག་གི་དཀའ་ངལ་གང་འཚམས་སེལ་ཐུབ་ཡོད ” ཅེས་གསུངས་སོང་།
ཁྲིམས་ཞིབ་ཁང་གི་ཉམས་ཞིབ་པ་བསྟན་འཛིན་ལགས་ཀྱིས་བཀའ་ཤག་ཏུ་གནས་སྤོ་བྱས་པའི་མྱོར་ཚོར་སྐོར་བརྗོད་རྒྱུར། “ ང་ཚོ་ཡིད་སྐྱོ་བའི་སྐྱབས་བཅོལ་གྱི་གནས་སྟངས་ཐོག་བསྡད་ཡོད་སྟབས། ཁང་པ་གསར་རྙིང་གང་དུ་སྤར་ནའང་། ལས་ཀའི་ངོ་བོར་འགྱུར་བ་སོང་ཡོད་པ་མ་རེད། ང་ལ་དམིགས་བསལ་དགའ་བོ་གང་ཡང་བྱུང་མ་སོང་ ” ཞེས་བརྗོད་སོང་།
བཀའ་ཤག་རྙིང་པའི་ཐོག་ཁང་དེ་ནི་ ༡༩༨༦ ལོར་གསར་རྒྱག་བྱས་པ་ཞིག་ཡིན་འདུག
གསར་འགོད་པ། དཔལ་ལྡན།
སྐུ་ངོ་ཚོའི་གཞུགས་ས་སྐྱིད་པོ་ཞིག་ཡོང་རོགས་བྱེད་ན་མི་སེར་སྐྱུས་མ་ཚོ་ག་རེ་བྱེད་ན་བྱེད་
དུས་བབ་ཚང་ལ་གསར་འགྱུར་མ་རེག་པར་ཨུ་ཐུག་འདུག་ཀ་་་
ཨ་ལ་ཀུ་རེ་ཡིན། ང་ཡང་ཉེ་ཆར་རྡ་རམ་ས་ལར་བཅར་བ་དང་མཉམ་དུ་གངས་སྐྱིད་ཁུལ་དུ་འཁྱུག་ཙམ་སོང་བ་ཡིན། ལས་ཁུངས་སྤོར་གྱི་ཡོད་པ་འདྲ་མཐོང་མ་སོང་མོད། ལས་ཤག་གསར་པ་མང་པོ་ཞིག་བརྒྱབ་འདུག་ལ། ད་དུང་ཁ་ཤས་རྒྱག་བཞིན་འདུག ལས་ཤག་བརྒྱབ་ཚར་བ་དག་ཧ་ཅང་སྤུས་དག་པོ་འགའ་བརྒྱབ་འདུག ཕར་བལྟས་ཚོད་ཀྱིས་སྐུ་ངོ་རྐྱང་རྐྱང་སྡོད་ས་ལོས་ཡིན་བསམ་པ་ཞིག་འདུག
གོང་གསལ་སྤྱི་འཐུས་སྨོན་ལམ་མཐར་ཕྱིན་ལགས་ཀྱིས་གསལ་བཤད་གནང་བ་ལྟར། འདི་གའི་གསར་འགོད་པ་དཔལ་ལྡན་ལགས་ཀྱིས་བཅར་འདྲི་གནང་ཡུལ་དེ་ཁྲིམས་ཞིབ་པ་ངག་དབང་ཐུབ་བསྟན་མ་ཡིན་པར། ཁྲིམས་དྲུང་ཀུན་དགའ་རྡོ་རྗེ་ལགས་ཡིན་པས་ན། མཚན་ནོར་ཤོར་བར་དགོངས་སེལ་དང་སྦྲགས། ཀློག་པ་པོ་ཡོངས་ཀྱིས་དེ་དོན་དགོངས་འཇགས་ཡོང་བ་ཞུ།
སྤྱིར་བཏང་དེང་སང་དྲ་ལམ་ཁག་གི་ཁ་ཕྱོགས་མང་ཆེས་ཤོས་སྐྱོན་བརྗོད་ཀྱི་དབང་དུ་རྔམ་རྔམ་ཤུགས་ཀྱིས་བསྐྱོད་བཞིན་ཡོད་པའི་ལྟ་ཚུལ་བཙན་བྱོལ་སྤྱི་ཚོགས་ནང་དུ་ཡོང་གི་ཡོད་པ་རེད། ཕྱོགས་གཅིག་ནས་བསམ་བློ་བཏང་ན་རྒྱུ་མཚན་མེད་པ་མ་རེད། ཡིན་ནའང་ངན་ཕྱོགས་བཅོས་ཐབས་བྱས་ན་བཟང་ཕྱོགས་རང་བཞིན་གྱི་ཡོད་ཡོད་པ་རེད། ཉེ་ལམ་དབུས་བོད་མིའི་སྒྲིག་འཛུགས་ཀྱི་བཀའ་ཤག་གསར་པའི་ཁང་བརྩེགས་ལེགས་འགྲུབ་བྱུང་ཙང་དེ་རིང་་ནས་འཕྲོད་བསྟེན་ལྷན་ཁང་དང་ཆེས་མཐོའི་ཁྲིམས་ཞིབ་ཁང་གི་ལས་ཁུངས་ཁག བཀའ་ཤག་རྙིང་པའི་ཚོགས་ཁང་དུ་གནནས་སྤོར་བྱེད་གནང་བ་བཀྲ་ཤིས་བདེ་ལེགས་དང་བོད་བསྟན་པ་ཆབ་སྲིད་ཀྱི་ཕྱག་ལས་སྔར་ལྷག་པའི་དར་རྒྱས་གོང་འཕེལ་ཡོང་བའི་སྨོན་འདུན་ཞུ། གཞན་ཡང་དབུས་བོད་མིའི་སྒྲིགས་འཛུགས་ཀྱི་བཀའ་ཤག་འབྲེལ་ཡོད་དང་བོད་མི་མང་སྤྱི་འཐུས་རྒྱུན་ལས་ཡོངས་་ལ་རེ་བསྐུལ་ཞུ་རྒྱུ། བཀའ་ཤག་གསར་པའི་ནང་ལོག་བཟོ་བཀོད་ཐད་ཧ་ཅང་ཞན་ཆ་མང་པོ་འདུག་པས་བློ་ཕམ་པ་ཞིག་ཡིན་ནའང་ད་བཟོ་བཅོས་བྱེད་ཐབས་བྲལ་འདུག
ནང་ལོགས་བཅའ་ངོས་སོགས་ཀྱི་ཐད་ནས་ཡང་བསྐྱར་བཟོ་བཅོས་རེ་བྱེད་རོགས་ཞུ། མཐའ་ན་ས་གདན་དང་ཀློག་སྐུད་གློག་གི་ཤེར་ཐོ་བཀའ་ཤག་གི་ཚོགས་ཁང་ནང་གི་གོང་ས་སྐྱབས་མགོན་མཆོག་གི་བཞུགས་ཁྲིའི་འོག་གི་ས་གདན་སོགས་ཐབས་སྐྱོ་བོ་ཞེ་དྲག་གོ་སྒྲིག་གནང་འདུག་པས་དོན་སྣང་གནང་རོགས་ཞུ་ཞུ།
ནོར་བཅོས།
གསར་འགོད་པ་ལགས་ཀྱིས་གོང་དུ་གསར་འགྱུར་ནང་(ཆེས་མཐོའི་ཁྲིམས་ཞིབ་ཁང་གི་དྲུང་ཆེ་ངག་དབང་ཐུབ་བསྟན་ལགས་སུ་བཅར་འདྲི་ཞུས་པར།) ཞེས་བྲིས་གནང་བ་དེ་ནོར་འདུག
གལ་སྲིད་ངག་དབང་ཐུབ་བསྟན་ལགས་སུ་བཅར་འདྲི་ཞུས་པ་ཡིན་ཚེ་ཁོང་ནི་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་གཞན་གཉིས་ལས་གཅིག་རེད་མ་གཏོགས་ཁྲིམས་ཞིབ་ཁང་གི་དྲུང་ཆེ་མ་རེད། ཁྲིམས་ཞིབ་ཁང་གི་དྲུང་ཆེ་ལ་བཅར་འདྲི་ཞུས་པ་ཡིན་ཚེ་དྲུང་ཆེ་ནི་མདའ་ཟུར་ཀུན་དགའ་རྡོ་རྗེ་ལགས་ཡིན་པས་དེ་ལུགས་ནོར་བཅོས་ཡོང་བ་ཞུ།