ཟླ་འདིའི་ཕྱི་ཚེས་ ༡༢ ནས་ཉིན་གསུམ་རིང་ངྷ་ས་གངས་སྐྱིད་དུ་ཤེས་རིག་ལས་ཁུངས་ཀྱིས་གསར་དུ་རྩོམ་སྒྲིག་བྱས་པའི་གཞི་རིམ་བར་མ་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་ལ་མཐའ་མའི་བསྐྱར་ཞིབ་དང་གཏན་འབེབ་བྱེད་པའི་ཚོགས་འདུ་ཞིག་ཚོགས་ཡོད།
ཉིན་གསུམ་གྱི་ཚོགས་འདུ་དེར་ཤེས་རིག་ལས་ཁུངས་དང་། སློབ་དེབ་རྩོམ་སྒྲིག་སྡེ་ཚན། སམ་བྷོ་ཊ། བོད་ཁྱིམ། དབུས་བོད་སློབ་འཛིན་ཚོགས་བཅས་ཀྱི་འབྲེལ་ཡོད་མི་སྣ་དང་སྤྱི་ཚོགས་ཚན་རིག་གི་དགེ་རྒན་ཁག་ཅིག་མཉམ་ཞུགས་ཀྱིས། གསར་དུ་རྩོམ་སྒྲིག་ཟིན་པའི་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་ལ་མཐའ་མའི་བསྐྱར་ཞིབ་དང་གཏན་འབེབ་བྱས་ཡོད་ལ། དེ་སྔོན་དཔྱད་ཞིབ་དང་ལེགས་བཅོས་ཐེངས་གཉིས་ཙམ་བྱས་ཟིན་ཡོད་པ་མ་ཟད། སློབ་གྲྭ་ཁག་ལ་ཆེད་བསྐྱོད་ཀྱིས་བོད་ཡིག་ཏུ་རྩོམ་སྒྲིག་བྱེད་པའི་སློབ་དེབ་འདི་འབྲེལ་ཡོད་སྤྱི་ཚོགས་ཚན་རིག་དགེ་རྒན་ཚོར་ངོ་སྤྲོད་དང་ཟབ་སྦྱོང་གནང་ཡོད་པ་རེད།
ད་སྔ་གཞི་རིམ་འོག་མ་འཛིན་རིམ་ལྔ་བ་བར་སློན་ཚན་ཡོངས་རྫོགས་བོད་ཡིག་ཏུ་ཕབ་སྒྱུར་རྩོམ་སྒྲིག་ཟིན་པ་ལྟར་དངོས་སུ་སློབ་ཁྲིད་འགྲོ་བཞིན་པ་དང་། ༢༠༡༠ ལོར་གཞི་རིམ་བར་མའི་བསླབ་གཞིའི་རྩ་འཛིན་ཟིན་བྲིས་ལ་བཀའ་ཤག་གིས་བཀའ་འཁྲོལ་གཏན་འབེབ་བྱུང་བ་ལྟར། གཞི་རིམ་བར་མའི་སློབ་ཚན་ཁག་བོད་སྒྱུར་རྩོམ་སྒྲིག་གི་ལས་གཞི་མགོ་བརྩམས་པའི་ཁྲོད། འཛིན་རིམ་དྲུག་པའི་སྤྱི་ཚོགས་ཚན་རིག་གི་སློབ་ཚན་ཆ་ཚང་བོད་སྒྱུར་ཟིན་པའི་སྟེང། སྔོན་ཆད་ཀྱི་བོད་ཡིག་སློབ་དེབ་ནང་ཡོད་པའི་རྒྱལ་རབས་དང་ཆོས་འབྱུང་ལ་བཅོས་སྒྱུར་གྱིས་སྤྱི་ཚོགས་ཚན་རིག་གི་སློབ་ཚན་ཁོངས་སུ་བཏང་འདུག ཤེས་རིག་དྲུང་འཕར་བཀྲིས་དོན་གྲུབ་ལགས་ཀྱིས་ “བཅོས་སྒྱུར་ཟིན་པའི་རྒྱལ་རབས་ཆོས་འབྱུང་འདི་སྔོན་མ་ནང་བཞིན་བློ་འཛིན་བྱ་མི་དགོས་པ་ཞིག་ཆགས་ཡོད་” ཅེས་བརྗོད་བྱུང་ལ། དེ་ནི་འཛིན་རིམ་དྲུག་པའི་སློབ་ཕྲུག་ཅིག་ལ་གཞུང་ལུགས་ཁྲིད་རྒྱུ་མ་ཡིན་པར་རིག་གནས་ཀྱི་ངོ་བོར་བསླབ་གཞི་བཅོས་སྒྱུར་བྱས་པ་ཞིག་རེད་འདུག
གཞི་རིམ་སློབ་གྲྭའི་སློབ་ཚན་བོད་སྒྱུར་རྩོམ་སྒྲིག་གི་ལས་གཞི་འདི་༢༠༠༤ ལོར་གྲོས་ཚོགས་ཀྱིས་བཙན་བྱོལ་བོད་མིའི་གཞི་རིམ་ཤེས་ཡོན་སྲིད་བྱུས་གཏན་འབེབ་གནང་རྗེས། དཔེ་སྟོན་སློབ་གྲྭ་གསར་འཛུགས་དང་། ༢༠༠༨ ལོར་གཏན་འབེབ་བྱས་པའི་གཞི་རིམ་འོག་མའི་བསླབ་གཞིའི་རྩ་འཛིན་དང་། ༢༠༡༠ གཞི་རིམ་བར་མའི་བསླབ་གཞིའི་རྩ་འཛིན་གཏན་འབེབ་གནང་པ་ཁག་གི་དགོངས་དོན་ལྟར། རྩིས་རིག་དང་ཚན་རིག སྤྱི་ཚོགས་ཚན་རིག་བཅས་དབྱིན་ཡིག་ནས་བོད་ཡིག་ནང་ཕབ་སྒྱུར་གྱིས་བོད་ཡིག་གི་བསླབ་གཞིར་རྩོམ་སྒྲིག་བྱེད་ཀྱི་ཡོད་པའི་ལས་གཞི་ཞིག་ཆགས་ཡོད། འོན་ཀྱང་། གསར་དུ་རྩོམ་སྒྲིག་བྱས་པའི་སློབ་དེབ་འདི་ཁྲིད་གཞིར་འཇོག་མིན་སློབ་གྲྭ་སོ་སོར་ཐག་གཅོད་ཀྱི་དབང་ཆ་ཡོད་ན་ཡང་། སློབ་གྲྭ་ཁག་གི་བསླབ་གཞིའི་སློབ་ཚན་རྣམས་ཤེས་ཡོན་སྲིད་བྱུས་གསར་པའི་རྩ་འཛིན་གཏན་འབེབ་འོག་འགྲོ་དགོས་པ་ཞིག་ཆགས་ཡོད་འདུག་ལ། གནད་དོན་དེར་དམིགས་ཏེ་རྩ་འཛིན་གཏན་འབེབ་ཀྱི་དགོངས་དོན་གཞིར་བཞག་སློབ་དེབ་འདི་རྩོམ་སྒྲིག་བྱས་པ་ཞིག་ཡིན་འདུག
གཞི་རིམ་སློབ་གྲྭའི་བསླབ་གཞིའི་རྩ་འཛིན་བཟོ་འགོད་ཚོགས་ཆུང་གི་ཚོགས་གཙོ་ཤེས་རིག་དྲུང་འཕར་བཀྲིས་དོན་གྲུབ་ལགས་ཀྱིས། བསླབ་གཞིའི་སློབ་ཚན་ཁག་བོད་སྒྱུར་བྱེད་པའི་ཐད་དཀའ་ངལ་ཆེ་ཤོས་རྩོམ་སྒྱུར་བྱེད་མཁན་ཆེད་ལས་པ་མེད་པ་དང་། ཐེངས་འདིའི་སློབ་ཚན་རྩོམ་སྒྲིག་སྡེ་ཚན་གྱི་རྩོམ་སྒྱུར་བྱེད་མཁན་ཚོ་ནི་ཆེད་ལས་པ་མིན་ཀྱང་། བོད་དབྱིན་གཉིས་ཀྱི་ཐད་མཐོ་སློབ་ལག་འཁྱེར་ཡོད་པའི་སྟེང་། སློབ་ཕྲུག་གི་ཤེས་ཡོན་སློབ་གསོ་དང་འབྲེལ་པའི་ཉམས་མྱོང་ཡང་གང་འཚམ་ཡོད་པ་དེ་འདྲ་ཆགས་ཡོད་སྟབས། གསར་དུ་རྩོམ་སྒྲིག་ཟིན་པའི་འཛིན་རིམ་དྲུག་པའི་སློབ་དེབ་རྩོམ་སྒྲིག་ཐད། “འབྲེལ་ཡོད་སྡེ་ཚན་ཁག་ནས་ཕེབས་པའི་མི་སྣ་དང་དགེ་རྒན་ཚོས་གདེང་འཇོག་ཆེན་པོ་བྱེད་ཀྱི་འདུག” ཅེས་བརྗོད་བྱུང་ལ། བཙན་བྱོལ་བོད་མིའི་སྤྱི་ཚོགས་ནང་བོད་དབྱིན་གཉིས་ཀར་ཤེས་ཚད་ལེགས་པོ་ཡོད་པའི་ཐོག་ཡིག་སྒྱུར་ཡང་བྱེད་ཐུབ་མཁན་དཀོན་པོ་ཡིན་སྟབས། མ་འོངས་པར་ཤེས་རིག་ལས་ཁུངས་ཀྱི་ངོས་ནས་ཡིག་སྒྱུར་ཆེད་ལས་པ་གསོ་སྐྱོང་བྱ་རྒྱུའི་ལས་འཆར་ཡང་སྒྲིག་བཞིན་འདུག
སློབ་དེབ་རྩོམ་སྒྲིག་སྡེ་ཚན་གྱི་བུངྷ་སྐྱབས་དང་བསོད་ནམས་བཟང་པོ་གཉིས་ཀྱིས། སློབ་དེབ་རྩོམ་སྒྲིག་གི་བརྒྱུད་རིམ་ནང་སློབ་ཚན་ཁག་ཕྱིའི་སྐད་ཡིག་ནས་བོད་ཡིག་ཏུ་རྩོམ་སྒྱུར་བྱེད་སྐབས་དཀའ་ངལ་ཆེ་ཤོས་དབྱིན་ཇིའི་ཐ་སྙད་མང་པོ་ཞིག་བོད་སྐད་དུ་མེད་པ་དེ་ཆགས་ཡོད་སྟབས། བོད་ཕྱི་ནང་གཉིས་ཀྱི་བོད་དབྱིན་ཚིག་མཛོད་དང་ཐ་སྙད་གསར་ཐོན་རིགས་ལ་ཞིབ་འཇུག་གིས་ཐ་སྙད་དང་བརྗོད་ཚིག་གཏན་འབེབ་བྱེད་པ་དང་། དེ་དག་ལས་བརྒལ་པའི་ཐ་སྙད་རིགས་ཤེས་རིག་ལས་ཁུངས་ཀྱི་ཐ་སྙད་གཏན་འབེབ་སྡེ་ཚན་གྱིས་གཏན་འབེབ་ལྟར་ཐག་གཅོད་བྱེད་ཀྱི་ཡོད་འདུག་ལ། སློབ་དེབ་རྩོམ་སྒྲིག་ཟིན་རྗེས་སློབ་གྲྭ་ཁག་ཏུ་བསྐྱོད་དེ་འཛིན་རིམ་དྲུག་པའི་སྤྱི་ཚོགས་ཚན་རིག་དགེ་རྒན་ཚོར་ཟབ་སྦྱོང་ཐེངས་གཉིས་ཙམ་སྤྲད་ཡོད་པའི་སྐོར་ནས། “དགེ་རྒན་ཚོས་ཚོད་ལྟའི་སློབ་ཁྲིད་བྱས་པ་བཅས་ཀྱི་སྐབས་སུ་བརྗོད་དོན་གང་གི་ཐད་ནས་ཚད་ཐིག་ཅིག་གི་སྟེང་སླེབས་ཡོད་པའི་ཚོར་སྣང་བྱུང་།” ཞེས་བརྗོད་བྱུང་ལ། སློབ་དེབ་འཆད་ཁྲིད་ཐད་དགེ་རྒན་ཚོར་བོད་ཡིག་གི་ཤེས་ཚད་གང་འཚམ་དགོས་ཀྱི་ཡོད་པའི་བསམ་ཚུལ་ཡང་འདུག
ཐེངས་འདིར་རྩོམ་སྒྲིག་གཏན་འབེབ་ཟིན་པ་འཛིན་རིམ་དྲུག་པའི་སྤྱི་ཚོགས་ཚན་རིག་སློབ་དེབ་འདི་ནི་ཤེས་ཡོན་སྲིད་བྱུས་གསར་པའི་དགོངས་དོན་ལྟར་སློབ་ཚན་གཏན་འབེབ་དང་སློབ་དེབ་རྩོམ་སྒྲིག་གི་ལས་གཞིའི་ཆ་ཤས་ཤིག་དང་། ༢༠༡༣ བར་གཞི་རིམ་བར་མའི་འཛིན་རིམ་དྲུག་པ་ནས་བརྒྱད་པ་བར་གྱི་སྤྱི་ཚོགས་ཚན་རིག་གི་སློབ་དེབ་རྣམས་ཡོངས་ཁྱབ་འགྲེམས་སྤེལ་བྱ་འཆར་རེད་འདུག
གསར་འགོད་པ། བནྡེ་སྐྱབས།
གཞི་རིམ་བར་མའི་སློབ་དེབ་ལེགས་གྲུབ་བྱུང་བ་ནི་ཧ་ཅང་རླབས་ཆེན་རེད། ཡིན་ན་ཡང་སློབ་དེབ་བཟོས་པ་ཙམ་གྱིས་བོད་ཡིག་ཡར་རྒྱས་འགྲོ་མི་ཐུབ། གལ་སྲིད་བོད་ཡིག་ཡར་རྒྱས་གཏང་དགོས་ན་གཞི་རིམ་སྔོན་འགྲོ་ནས་བཟུང་སློབ་ཁྲིད་བྱེད་ཕྱོགས་ལ་འགྱུར་བ་མ་བཏང་ན་སློབ་ཕྲུག་གི་རྒྱུད་ལ་ཤེས་ཡོན་བརྟན་པོ་ཞི་གནས་རྒྱུ་ཧ་ཅང་དཀའ། ། ད་ལྟ་འགྲོ་བཞིན་པའི་གཞི་རིམ་སློབ་གྲྭ་ཁག་ལ་ཕན་ཐོགས་ཡོད་ཅིང་དངོས་ཡོད་བདེན་འཚོལ་གྱིས་ལམ་ལུགས་ཤིག་གཏན་འབེབས་བཟོ་དགོས་འདུག ཐོག་མར་བོད་ཕྲུག་རྣམས་བོད་ཡིག་ལ་སྤྲོ་བའི་ཐོག་ནས་སྦྱང་འདུན་ཡོད་པ་བཟོ་ཐབས་ལ་འབད་དགོས། སྔོན་འགྲོ་ནས་བཟུང་བོད་ཡིག་འབྲི་ཀློག་གཏན་འབེབས་གསར་པ་ཞིག་མ་བཟོས་ཚེ་བོད་ཕྲུག་འདི་དག་ལ་བོད་ཡིག་གོམས་འདྲིས་ཟབ་མོ་ཞིག་ཡོང་རྒྱུ་ཁག་པོ་རེད། དེང་དུས་མི་ལ་བྱ་བ་གང་ཞིག་ཡིན་ཀྱང་ལས་སླ་བོའི་ཐོག་ནས་འགྲོ་མ་ཐུབ་ཚེ་དེ་ལ་གྲུབ་འབྲས་ཐོན་ཁག་པོ་རེད། དེ་འདྲ་སོང་ཙང་བོད་ཡིག་སྦྱོང་སྟངས་ལ་སྔ་མོའི་སྡེ་པ་གཞུང་གི་ཡིག་གཟུགས་འདྲ་མིན་ཐོག་ནས་མི་ཚེ་བསྐྱལ་བསྡད་པ་དེར་འགྱུར་བ་ཞིག་མ་ཕྱིན་ཚེ། དེང་དུས་སློབ་ཚན་སྣ་མང་ཅན་གྱི་དུས་འདིར་བོད་ཡིག་གི་རྨང་གཞི་བརྟན་པོ་བཟོ་རྒྱུ་ཁག་པོ་རེད་སྙམ། ངས་འདི་བཤད་ན་མང་པོ་ཞིག་གི་སྣང་ངོར་མི་འགྲོ་བར་ང་ཚོ་བོད་ཀྱི་རིག་གཞུང་རེད། དེ་བདག་པོ་རྒྱག་དགོས་རེད་ལབ་མདོག་ཁ་བོ་རེད། ང་ཚོ་བོད་ཕྲུག་རྣམས་ཀྱིས་སྔོན་འགྲོ་ནས་ལོ་ངོ་དྲུག་ཙམ་རིང་དབུ་མེད་ཡིག་གཟུགས་ཚུགས་རིང་དང་། ཚུགས་ཐུང་། ཡིག་ཆུང་སོགས་མི་ཚེའི་ནང་བེད་སྤྱོད་དེ་ཙམ་མེད་པ་ཞིག་ལ་སྦྱངས་སྦྱངས་ནས་དུས་ཚོད་བསྐྱལ་དགོས་པ་དང་། དེ་ནས་འཛིན་རིམ་བཞི་པ་ནས་དབུ་ཅན་ཀློག་སྟངས་ལ་གོམས་འདྲིས་བྱ་དགོས་ཤིང་། འཛིན་རིམ་དྲུག་པ་ནས་འཁྱུག་མ་ཚུགས་འབྲི་འགོ་འཛུགས་དགོས་པས་སློབ་ཕྲུག་རྣམས་ཀྱི་ཀླད་པར་ཡིག་གཟུགས་གཅིག་བརྟན་པོར་གནས་ཐུབ་རྒྱུ་ཁག་པོར་ཆགས་འདུག ཡིག་གཟུགས་ནི་དེ་འདྲ་གལ་ཆེན་པོ་ཡིན་ན་འཛིན་རིམ་བཅུ་པ་བཅུ་གཅིག་ནས་ལག་བདེ་བོ་ཅན་གང་འཚམས་ཤིག་ལ་ཡིག་གཟུགས་ཀྱི་རིགས་གཅིག་རྐང་འཛིན་པ་བཙུག་ན་མི་འགྲིགས་པ་མེད། སྔོན་འགྲོ་ནས་ཀློག་དེ་དབུ་ཅན་ཁོ་ན་དང་། ཡིག་གཟུགས་དེ་འཁྱུག་མ་ཚུགས་འབྲི་བཅུག་ན་དེས་ལོ་མང་རིང་ཕྲུ་གུ་རྣམས་ཀྱི་སེམས་ལ་རི་མོ་གཅིག་ཁོ་ནའི་བག་ཆགས་བརྟན་པོ་འཇོག་ཐུབ་པར་བརྟེན་བོད་ཡིག་ཡག་པོ་ཤེས་པར་ཕན་ཐོགས་ཆེ་ངེས། དེ་མིན་ཡིག་གཟུགས་གཅིག་སེམས་ལ་བརྟན་པོ་མ་ངེས་གོང་ཡིག་གཟུགས་གཞན་ཞིག་བསླབ་དགོས་པས་བོད་ཡིག་འབྲི་ཀློག་བརྟན་པོ་ཞིག་ཡོང་རྒྱུ་དཀའ། བོད་ཡིག་ལ་ཞེན་ཁོག་བྱས་པ་ཙམ་གྱིས་གང་ཡང་མི་ཕན་པར་དེ་བདག་པོ་རྒྱག་སྟངས་ཐད་ཐབས་ལམ་མ་བཙལ་ན་ད་ལྟའི་དུས་འདིར་བོད་ཡིག་བདག་པོ་རྒྱག་རྒྱུ་དཀའ་ལས་ཁག་པོ་རེད་སྙམ། ཚང་མ་བདག་པོ་རྒྱག་གི་ཡིན་ཟེར་ན་དུས་ཀྱི་རྐྱེན་པས་ཁག་པོ་རེད། དེ་ལས་འོ་མའི་ནང་ནས་མར་དེ་ལེན་ཨེ་ཐུབ་བལྟས་ན་ཁེ་སང་ཆེ་བ་ཡོད་པ་ཤེས་དགོས། ང་ཚོས་དུས་དང་མཐུན་པའི་འགྱུར་བ་གཏང་དགོས། རྙིང་ཞེན་ཁོ་ནས་བོད་ཡིག་བདག་པོ་རྒྱག་མི་ཐུབ་པ་ནི་དུས་ཀྱིས་ང་ཚོར་གསལ་སྟོན་བྱེད་ཡོང་གི་ཡོད།
བསམ་ཚུལ་འདིར་བློ་འདོད་མེད་མཁན་རྣམས་ཀྱིས་གཞི་རིམ་སློབ་གྲྭར་དངོས་སུ་ཞིབ་འཇུག་བྱེད་རོགས་ཞེས་འབོད་སྐུལ་ཞུ་གི་ཡིན།
འདི་དང་ཆབ་ཅིག་ཚན་རིག་བརྡ་ཆད་ཀྱི་ཐད་ནས་བོད་གཞིས་བྱེས་གཉིས་སུ་གཅིག་གྱུར་ཞིག་ཡོང་བ་བྱ་རྒྱུ་དེ་ཧ་ཅང་གི་གལ་གནད་ཅིག་རེད། མ་གཏོགས་ཕན་ཚུན་འབྲེལ་བ་གང་ཡང་མེད་པར་རང་རང་གི་ས་ནས་རང་རང་གི་འདོད་བབ་བཞིན་བརྡ་ཆད་འགའ་གཏན་འབེབ་བྱས་བསྡད་ན་འབྱུང་འགྱུར་དཀའ་ངལ་ཆེན་པོ་ཞིག་སྔུན་དེར་ལྷག་ཡོང་རྒྱུ་གཏན་ཁེལ་རེད། འདིའི་ཐོག་ལ་བཙན་བྱོལ་སྒྲིག་འཛུགས་ཀྱི་ངོས་ཐད་ནས་ཐད་ཀར་བོད་ནང་གི་ཤེས་ཡོན་སྡེ་ཁག་རྣམས་ལ་འབྲེལ་བ་བྱ་མི་ཐུབ་སྟབས། ཆེས་མཐོའི་མཁས་པའི་ལྷན་ཚོགས་ལྟ་བུ་ཞིག་གཞུང་འབྲེལ་མ་ཡིན་པར་བཙུགས་ཏེ་བོད་ཕྱི་ནང་གི་ཤེས་ཡོན་སྡེ་ཁག་མཉམ་སྒྲིལ་བྱ་ཐུབ་ན་ལེགས་ཚོགས་ཆེ།
འབྲེལ་ཡོད་ཚང་མར་སྙིང་ཁོང་ནས་ཐུགས་རྗེ་ཆེ་ཞུ་རྒྱུ་ཡིན། ཤེས་ཡོོན་སྲིད་ཇུས་འདིས་འབྱུང་འགྱུར་གྱི་བོད་མི་རབས་གསར་པ་རྣམས་བོད་རང་མཚན་པའི་ངོ་བོར་སྲུང་སྐྱོབ་བྱས་པ་རེད། ལས་དོན་གང་ཞིག་སྒྲུབ་དགོས་ཀྱང་དང་ཐོག་རང་ཉིད་བརྟན་པོ་ཞིག་དགོས་པ་དེ་ཡོངས་རྫོགས་ཀྱི་ནང་ནས་གལ་ཆེ་བར་མཐོང་གི་ཡོད།
ལས་བྱེད་པ་ཚང་མ་ལ་ཐུགས་རྗེ་ཆེ་ཞུ་བ་དང་ཆབ་ཅིག་ཏུ་། མ་འོང་བོད་ཀྱི་སྐད་ཡིག་དེ་གཅིག་གྱུར་ཞིག་ཡོང་བའི་ཆེད་དུ་གཞེས་བྱེས་་གཉིས་ཀ་མཐུན་པ་ཞིག་ཡོང་ཐབས་ལ་འབད་པར་སྙིང་ཐགས་པ་ནས་རེ་བ་ཞུ་ཞུ་
ཤེས་རིག་གི་བྱ་འགུལ་གསར་པར་བཀྲིས་བདེ་ལེགས་ཞུ། གཞི་རིམ་སློབ་གྲྭའི་དཀའ་ངལ་ཆེ་ཤོས་ནི། ད་ལྟའི་སློབ་དགེ་རྣམས་ནས་བོད་ཀྱི་སྐད་ཡིག་ལ་རང་སྐྱ་ཕེར་ངེས་ཀྱི་གདེང་ཚོད་མེད་པ་དེ་ཡིན་པས། ཛ་དྲག་གི་ཛ་དྲག་དང་པོ་ནི་ད་ཡོད་གནང་བཞིན་པའི་སློབ་དགེ་རྣམས་ལ་སློབ་མའི་ཉིན་རེའི་འགྲོ་འདུག་སྤྱོད་གསུམ་ལ་ངེས་པར་མཁོ་པའི་སྙན་ངག་གི་བརྡ་ཆད་དང་འབྲེལ་བའི་སློབ་ཁྲིད་ལག་བསྟར་གྱི་གཞི་གདན་སྲ་མཁྲེགས་བཟོ་དགོས་པའི་ཟབ་སྦྱོང་དགོས་པ་ལས། སློབ་དེབ་གཙོ་མིན། དང་པོ་སློབ་མཁན་གྱི་སྤུས་ཚད་ལ་དོ་འཁུར་མེད་པར་སློབ་གཞི་གྲ་སྒྲིག་གནང་བ་ནི་དེ་ཙམ་རེད། ལས་འཁུར་གནང་མཁན་རྣམས་ལ་ཐུགས་རྗེ་ཆེ་ཞུ་སྤྲོ།
ཕལ་ཆེར་ཡག་པོ་ཆགས་ཡོད་ས་རེད།སློབ་དེབ་འདི་འདྲ་སྟོན་ཐུབ་པ་ཧ་ཅིང་ཡག་པོ་རེད་ཤེས་རིག་ལས་ཁུངས་ཀྱིས་དངོས་གནས་ཤེས་ཡོན་རིག་གནས་ཐོག་ལ་ཐུགས་ཁུར་ཆེ་ཙམ་བཞེས་ནས་ཡིག་སྒྱུར་སྡེ་ཚན་གྱི་ཆེད་ལས་པ་ཙམ་མིན་པར་ཆེད་ལས་པ་གང་མང་གསོ་སྐྱོང་བྱེད་དགོས་ས་རེད།།
སྤྱི་ཚོགས་ཚན་རིག་གི་སློབ་དེབ་བསྒྱུར་པ་པོ་བསོད་ནམས་བཟང་པོ་ལགས་དང། བུདྡྷ་སྐྱབས་གཉིས་ལ་སྙིང་དབུས་ནས་ཐུགས་རྗེ་བླ་མེད་ཞུ་རྒྱུ་ཡིན། ཁོང་གཉིས་ནི་རྩོམ་བསྒྱུར་གྱི་ཐད་ལ་རིགས་གཅིག་རྐང་འཛིན་ཟེར་ནའང་ཆོག
ཤེས་ཡོན་སྲིད་བྱུས་འདི་འདྲ་ལག་ལེན་ལྟར་ཐུབས་པ་ཡག་པོ་རེད་འོན་ཀྱང་ཤེས་ཡོན་དང་ཉམས་མྱུང་ལྡན་པ་གང་མང་ཞིག་གིས་ཐོག་ནས་སློབ་དེབ་བསྒྲིགས་ཐུབ་ན་དགེ་མཚན་ཆེ་བར་མ་ཟད་མ་འོངས་བ་ཡིན་པ་རིན་ཐང་ཚང་པ་ཞིག་ཏུ་དངོས་འཛིན་བྱེད་ཐུབ་རྒྱུ་དང་སློབ་དེབ་དེ་སྤྱོང་མཁན་སློབ་མ་ཚོས་ཡིན་ན་ཡང་དགའ་ཚོར་ཆེན་པོས་སྤྱོང་འདོད་ཡོད་པ་ཞིག་གལ་ཆེན་རེད་ཐུགས་རྗེ་ཆེ།
སློབ་དེབ་གསར་བསྒྲིགས་དང་དགེ་རྒན་ལ་ཟབ་ སྦྱོང་སྤྲོད་པ་སོགས་ལ་བདག་གིས་བོད་ཀྱི་ཤེས་རིག་དང་སྐད་ཡིག་ལ་གཅེས་འཛིན་ཅན་ཚང་མའི་ཚབ་ཞུས་ཏེ་ཐུགས་རྗེ་ཆེ་དང་བཀྲིས་བདེ་ལེགས། དེ་བཞིན་གྲུབ་འབྲས་ལེགས་ཐོན་ཡོང་བའི་སྨོན་འདུན་ཡང་ཞུའོ༎
འོན་ཀྱང་བདག་གི་ཉམས་མྱོང་གི་ཐོག་ནས་ཞུ་ན་བོད་ཀྱི་སྐད་ཡིག་སོགས་རྒྱུན་འཛིན་བྱེད་པར་བོད་ཕྲུག་འདི་དག་གང་དུ་གནས་སྡོད་བྱེད་སར་བོད་མི་རང་གི་ཁོར་ཡུག་གཙང་མ་ཞིག་བསྐྲུན་གལ་ཆེ་བར་འདུག དེ་མིན་ཁག་ཙམ་འདུག་ལགས།