རྒྱ་ནག་གཞུང་གིས་ཁམས་དཀར་མཛེས་རྫོང་གི་ཁྲོམ་གཞུང་དུ་སྐད་འབོད་བྱེད་མཁན་གྱི་བོད་མི་གསུམ་འཛིན་བཟུང་བྱས་ཏེ་ད་ཆར་གར་ཤེས་རྟོགས་མེད་པ་ཆགས་ཡོད་འདུག
ཟླ་འདིའི་ཕྱི་ཚེས་ ༡༥ ཉིན་གྱི་བོད་ནང་གི་ཞོགས་པའི་ཆུ་ཚོད་ ༩ ཡས་མས་སུ་དཀར་མཛེས་རྫོང་དར་རྒྱས་དགོན་པའི་ཉེ་ཁུལ་དུ་ཡོད་པའི་རི་མགོ་གྲོང་རུ་ཁག་བརྒྱད་པའི་ངག་དབང་ཕུན་ཚོགས་དང་བསམ་འཕེལ་དོན་འགྲུབ། བློ་བཟང་ཕུན་ཚོགས་བཅས་བོད་མི་གསུམ་གྱིས་རྫོང་ཁྲོམ་གཞུང་དུ་ཞི་བའི་སྐད་འབོད་བྱེད་སྐབས། རྒྱ་གཞུང་གི་ཉེན་རྟོག་པས་འཛིན་བཟུང་བྱས་ཡོད་པ་དང་། ད་ཆར་ཁོང་ཅག་གི་ནང་མི་ཚོས་གར་ཡོད་ཅི་བྱུང་གི་གནས་ཚུལ་ཤེས་རྟོགས་མ་ཐུབ་པར་སེམས་འཁྲལ་གནང་བཞིན་ཡོད་འདུག
ཐེངས་འདིར་རྒྱ་ནག་གཞུང་གིས་འཛིན་བཟུང་བྱས་པའི་རང་ལོ་ ༣༤ ཡིན་པའི་ངག་དབང་ཕུན་ཚོགས་ལགས་ནི། ཕ་དགེ་འདུན་བཀྲ་ཤིས་དང་མ་ཚེ་འདས་ཡེ་ཤེས་མཁའ་འགྲོ་གཉིས་ཀྱི་བུ་ཡིན་པ་དང་། སྔོན་མར་བཙན་བྱོལ་དུ་ཡོང་སྟེ་ལྷོ་ཕྱོགས་སེ་ར་དགོན་པར་སློབ་གཉེར་གནང་འདུག་ལ། ཕྱིར་བོད་ནང་ལོག་རྗེས་གཉེན་སྒྲིག་བྱས་ཏེ་ཕྲུ་གུ་གཉིས་ཡོད་འདུག
རང་ལོ་ ༢༣ ཡིན་པའི་བསམ་འཕེལ་དོན་འགྲུབ་ལགས་ནི། དཀར་མཛེས་རྫོང་ལམ་སྣ་གྲོང་ཚོའི་ཕ་ཤེས་རབ་རྒྱ་མཚོ་དང་མ་དབྱང་ཅན་ལྷ་མོ་གཉིས་ཀྱི་བུ་ཡིན་འདུག རང་ལོ་ ༡༧ ཡིན་པའི་བློ་བཟང་ཕུན་ཚོགས་ལགས་ནི། དཀར་མཛེས་རྫོང་རི་མགོ་གྲོང་ཚོའི་ཕ་དཀོན་མཆོག་ཚེ་བརྟན་དང་མ་ཚེ་འདས་དབང་ཕྱུག་གཉིས་ཀྱི་བུ་ཡིན་འདུག
ཁོང་གསུམ་ལས་གཞན། དཀར་མཛེས་ནོར་འཛིན་གྲོང་ཚོའི་བློ་བཟང་ལྷུན་གྲུབ་དང་། གཞན་མིང་གསལ་ཁ་མེད་པའི་བོད་མི་གཅིག་བཅས་ཀྱིས་རྫོང་ཐོག་ཏུ་ཞི་བའི་སྐད་འབོད་བྱས་སྟབས། ཉེན་རྟོག་པས་ཁྲོམ་གཞུང་ནས་གཅར་རྡུང་ཚད་ལས་བརྒལ་བ་བཏང་སྟེ་བཙན་འཁྲིད་བྱས་ཡོད་འདུག
གསར་འགོད་པ་དོན་གོས་བསྡུ་སྒྲིག་བྱས།
དཀོན་མཆོག་མཁྱེན། ཉམ་ཆུང་བོད་མི་ཚོ་སྙིང་རྗེ།
༄༅། གཞི་ལུས་བོད་མིའི་སྙིང་སྟོབས་ལ་བསྔགས་བརྗོད་ཞུ་རྒྱུ་ཡིན། བོད་རྒྱལ་ལོ།
ཁམས་དཀར་མཛེས་སུ་སྐད་འབོད་གནང་པ་འདི་ནི་ངོ་མ་ལེགས་པོ་ཞིག་ཏུ་དངོས་འཛིན་བྱེད་ཀྱི་ཡོད་གང་ཡིན་ཞེ་ན་བར་མ་ཆད་པར་སྐད་འབོད་གནང་མཁན་ཡོད་པ་དེ་ཕྱོགས་གཅིག་ནས་ལྟས་ན་དེ་ནི་ཐབས་ལམ་ཡག་ཤོས་ཞིག་ཏུ་དངོས་འཛིན་གནང་ན་མི་ཁྱོག་པ་མེད་པ་ལྟ་བུ་རེད། ཨ་མདོ་རྔ་བ་དང་ཁམས་དཀར་མཛེས་གཉིས་ཀྱི་དཀའ་སྡུག་ནི་ངོ་མ་བཟོད་ཐུབ་མེད་པ་ཞིག་རེད་གང་ལྟར་ཡང་ད་དུང་མི་མཐུད་དུ་འདི་དང་འདི་ལྟ་བུ་གང་མང་ཞིག་ས་ཕྱོགས་གཞན་ཐམས་ཅད་དུ་བྱུང་ན་རྒྱ་ནག་དམར་གཞུང་གི་ཅི་བྱེད་ཐབས་མེད་ལྟ་བུ་འགྱུར་མི་སྲིད་པ་ཞིག་མ་ཡིན། དེ་འདྲ་ཡིན་དུས་ངེས་པར་ཟབ་ཟབ་བྱས་ནས་བྱེད་སྟངས་དེ་ཤེས་ཀྱི་གལ་ཆེན་རེད་བསམ་གྱི་འདུག་མ་ཟད་བོད་མི་སྤྱི་བོ་གནམ་སྟན་ཡོངས་ཀྱི་འབད་པ་བྱེད་རྒྱུ་དང་རང་ནུས་གང་ཡོད་བོད་མི་རིགས་ཀྱི་སྐད་དང་ཡི་གེ་རིག་གཞུང་སོགས་སྲོང་སྐྱོབས་གནང་རྒྱུ་གལ་ཆེན་པོ་ཞིག་མ་ཡིན་ནམ།
ཡང་དཀར་མཛེས་ནས་དཔའ་བོ་གསུམ་ལོངས་འདུག་དེར་བསྔགས་བརྗོད་ཡོད།
ངོ་མ་དཀར་མཛེས་ཁུལ་གྱི་མི་འཇོན་པོ་འདུག ་་་་ ཡིན་ཡང་གསར་འགྱུར་རྒྱུད་ལམ་ཁག་མང་པོ་མ་ཐོན་པ་གང་ཡིན་ནམ།