ཕྱི་ལོ་ ༢༠༠༨ ལོར་བོད་ཆོལ་གསུམ་ནང་རྒྱ་གཞུང་ལ་ཞི་བའི་ངོ་རྒོལ་རིམ་པར་སྤེལ་ཡོད་པ་ལྟར། མཚོ་སྔོན་མཚོ་བྱང་བོད་རིགས་རང་སྐྱོང་ཁུལ་མདའ་བཞི་ཞང་གི་རང་ལོ་ ༣༠ ཡས་མས་ཡིན་པའི་དབང་ཕྱུགས་དང་ཁྲི་ཀ་ནས་ཡིན་པའི་འོད་ཟེར་གཉིས་གཙོས་པའི་བོད་མི་ ༩ ཡིས་བོད་ཀྱི་རྒྱལ་དར་དང་ཆབ་སྲིད་ཀྱི་བརྗོད་ཚིག་འཁོད་པའི་འཕྲེད་དར་སྣ་ཚོགས་གྲ་སྒྲིག་གིས་ངོ་རྒོལ་ལས་འགུལ་སྤེལ་རྩིས་བྱས་ཡོད་ཀྱང་། ཁོང་ཅག་གི་འཆར་གཞི་དེ་རྒྱ་གཞུང་གིས་ཤེས་ཏེ་ལོ་དེའི་ཟླ་ ༨ པའི་ཚེས་ ༢ ཉིན་སྐུ་འབུམ་ནས་ཁོང་ཅག་འཛིན་བཟུང་བྱས་ཡོད་པ་མ་ཟད། ལས་འགལ་ཆེད་གྲ་སྒྲིག་བྱས་ཡོད་པའི་ཅ་དངོས་དག་ཀྱང་ཉེན་རྟོག་པའི་ལག་ཏུ་ཤོར་ཡོད་སྟབས། ཁོང་ཅག་ལ་གཅར་རྡུང་མནར་གཅོད་ཚད་མེད་བཏང་མཐར་དབང་ཕྱུགས་དང་འོད་ཟེར་གཉིས་ཀྱིས་ལས་འགུལ་སྣེ་ཁྲིད་པ་ཁོང་གཉིས་ཡིན་པ་ངོས་ལེན་པ་གནང་ཏེ། རོགས་པ་མི་ ༧ ཀློད་གྲོལ་བཏང་ཡོད་ཀྱང་། ཁོང་གཉིས་ལོ་ ༣ རེའི་ཁྲིམས་ཐག་བཅད་ཡོད་འདུག
ཟླ་སྔོན་མའི་ཚེས་ ༨ ཉིན་དབང་ཕྱུགས་ལགས་ལ་བཙོན་ཁང་དུ་སྡུག་སྦྱོར་མནར་གཅོད་ཚད་ལས་བརྒལ་བ་བཏང་སྟེ་ཀླད་པ་སྐྱོན་ཅན་དུ་བཏང་རྗེས་བཙོན་གྲོལ་བཏང་ཡོད་ནའང་། ཁོང་དང་མཉམ་དུ་བཙོན་འཇུག་བྱས་པའི་འོད་ཟེར་ད་ལྟའི་ཆར་ཡང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་མེད་པ་ཆགས་ལྷག་ཡོད་འདུག
དབང་ཕྱུགས་ལགས་ ༡༩༩༧ ལོར་རྒྱ་གར་ནང་ཡོང་སྟེ་འབྲས་སྤུངས་དགོན་པར་སློབ་གཉེར་གནང་རྗེས་ ༢༠༠༡ ལོར་ཕྱིར་བོད་ནང་ལོག་ཡོད་འདུག་ལ། ཁོའི་རོགས་པ་འོད་ཟེར་ལགས་ཀྱང་རྒྱ་གར་དུ་ཡོང་མྱོང་མཁན་ཞིག་ཡིན་འདུག
གསར་འགོད་པ། དོན་གོ
