བོད་པའི་སློབ་ཕྲུག་ ༥ ལ་ཨ་རིར་སློབ་སྦྱོང་གི་ཐོངས་མཆན་མ་རག

འདི་ལོར་ཨ་རིའི་ཡཱོ་སཱེ་ཨེ་ UCI  གཙུག་ལག་སློབ་གྲྭའི་ངོས་ནས་སཱ་ར་མཐོ་རིམ་སློབ་གཉེར་ཁང་གི་སློབ་ཕྲུག་ ༥ ལ་སློབ་ཡོན་གོ་སྐབས་སྤྲད་ཡོད་ཀྱང་།  ལྡི་ལིའི་ཨ་རིའི་གཞུང་ཚབ་ཀྱིས་སློབ་ཕྲུག་དེ་དག་ལ་ཕྱིར་ལོག་གི་ཁག་ཐེག་མེད་སྐོར་བརྗོད་དེ་ཐོངས་མཆན་སྤྲད་མི་འདུག

ལོ་འགའི་སྔོན་ནས་དབུ་འཛུགས་ཀྱིས་བཞུགས་སྒར་མཚན་ཉིད་རིགས་ལམ་སློབ་གཉེར་ཁང་གི་ཡན་ལག་སཱ་ར་བོད་ཀྱི་མཐོ་རིམ་རིག་གནས་སློབ་གཉེར་ཁང་དང་། ཨ་རིའི་ཨེ་མོ་རཱེ་གཙུག་ལག་སློབ་གྲྭ་  Emory University  དང་མཱ་ཡཱ་མཱེ་གཙུག་ལག་སློབ་གྲྭ་ Miami University ། ཡཱོ་སཱེ་ཨེ་གཙུག་ལག་སློབ་གྲྭ་ UCI University བཅས་དང་ཤེས་ཡོན་འགྲོ་འོང་གི་གན་རྒྱ་བཞག་སྟེ། སློབ་མ་ཕར་གཏོང་ཚུར་ལེན་གྱི་ལས་གཞི་ཞིག་འགྲོ་བཞིན་ཡོད་ལ། ལྷག་པར་དུ་ ༢༠༡༠ ལོར་ཡཱོ་སཱེ་ཨེ་གཙུག་ལག་སློབ་གྲྭའི་སློབ་མའི་ལྟ་སྐོར་ཚོགས་པ་ཞིག་ངྷ་སར་འབྱོར་ཏེ། སཱ་ར་མཐོ་སློབ་དང་ཐོག་མའི་འབྲེལ་བ་བྱུང་འདུག་ལ། སྐབས་དེར་སློབ་གྲྭ་གཉིས་བར་སློབ་མའི་ཉམས་མྱོང་དང་བསམ་ཚུལ་བརྗེ་རེས་བྱ་རྒྱུའི་གན་རྒྱ་བཞག་ཡོད་འདུག འདི་ལོར་སཱ་ར་མཐོ་སློབ་ཀྱི་སློབ་ཕྲུག་ ༥ ལ་ཡཱོ་སཱེ་ཨེ་གཙུག་ལག་སློབ་གྲྭ་ནས་ལོ་ཕྱེད་སློབ་སྦྱོང་གོ་སྐབས་སྤྲད་པ་ལྟར། ཉེ་ཆར་སློབ་ཕྲུག་དེ་ཚོ་ལྡི་ལིའི་ཨ་རིའི་གཞུང་ཚབ་དུ་ཐོངས་མཆན་ཞུ་རུ་བསྐྱོད་སྐབས། གཞུང་ཚབ་ལས་བྱེད་ཀྱིས་སློབ་ཕྲུག་དེ་དག་ཕྱིར་ལོག་རྒྱུར་ཁག་ཐེག་མི་འདུག་ལབ་སྟེ་ཐོངས་མཆན་སྤྲད་མི་འདུག

དེའི་ཐད་སཱ་ར་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཀྱིས་བརྗོད་པ་ལྟར་ན། ཨ་རིའི་གཙུག་ལག་སློབ་གྲྭ་དེ་དག་སཱ་ར་མཐོ་སློབ་གཉིས་བར་གྱི་ལས་གཞི་འདིར་བོད་གཞུང་དང་འབྲེལ་བ་གང་ཡང་མེད་པར་ཨ་རིའི་མཐོ་སློབ་ཁག་དང་ཐད་ཀར་མཉམ་ལས་བྱེད་ཀྱི་ཡོད་སྐོར་དང་། ཐེངས་འདིར་སཱ་ར་མཐོ་སློབ་ཀྱིོ་སློབ་ཕྲུག་ཚོར་ཨ་རིའི་གཞུང་ཚབ་ཀྱིས་ཐོངས་མཆན་མ་སྤྲད་པ་དེ་ནི་ཅུང་བློ་ཕམ་གྱི་རང་བཞིན་ཞིག་ཡིན་རུང་། མཐོ་སློབ་འདི་གཉིས་བར་ལ་གན་རྒྱ་བཞག་ནས་ལོ་ ༡ ཙམ་ལས་ཕྱིན་མེད་སྟབས། ད་དུང་ཕྱོགས་གཉིས་ལ་སློབ་མ་ཕར་གཏོང་ཚུར་ལེན་གྱི་གོ་སྐབས་མང་པོ་ཡོད་སྐོར་བརྗོད་བྱུང་ལ། ཨེ་མོ་རཱེ་དང་མཱ་ཡཱ་མཱེ་མཐོ་སློབ་གཉིས་ནི། ཡཱོ་སཱེ་ཨེ་མཐོ་སློབ་དང་མི་འདྲ་བར་སཱ་ར་མཐོ་སློབ་ལ་དུས་ཡུན་རིང་པོའི་འབྲེལ་བ་ཡོད་པ་མ་ཟད། མཐོ་སློབ་དེ་གཉིས་ནས་སཱ་ར་མཐོ་སློབ་ཀྱི་སློབ་ཕྲུག་ཚོར་དུས་ཡུན་ངེས་མེད་ཀྱི་སློབ་ཡོན་རོགས་རམ་གནང་བཞིན་ཡོད་སྐོར་ཡང་གསུངས་སོང་།

དགེ་བཤེས་འཇམ་དཔལ་གྲགས་པ་ལགས་ཀྱིས་ཐེངས་འདིར་སློབ་ཕྲུག་ཚོར་ཐོངས་མཆན་མ་རག་པའི་སྐོར་བརྗོད་དོན།  “ སྔོན་མ་བོད་མི་རེ་ཟུང་གིས་སོ་སོར་ཨ་རིར་ཐོངས་མཆན་ Visa མ་རག་སྟབས་གཞུང་ཚབ་ཀྱི་ཤེལ་སྒོ་བཅག་པ་དང་། གཞུང་ཚབ་ལས་བྱེད་ཚོར་འཁྲུག་པ་རྒྱག་མཁན་སོགས་བྱུང་ཡོད་པ་རེད། གཞུབ་ཚབ་ལ་འཁྲུག་པ་བརྒྱབ་སྟེ་མ་དགའ་བ་བཟོས་ན། ཨ་རིའི་གཞུང་ལ་འཁྲུག་པ་བརྒྱབ་པ་དང་གཅིག་པ་རེད། མི་རེ་ཟུང་གིས་བོད་པ་ཡོངས་ལ་མཚན་ཤས་བཟོས་ཡོད་པ་རེད། སྔོན་ཆད་བོད་པ་ཚོར་དེབ་སེར་པོ་ཡོད་པ་ཙམ་གྱིས་ཨ་རིར་ཐོངས་མཆན་རག་གི་ཡོད། ད་ལྟ་བོད་པའི་སློབ་ཕྲུག་ཚོར་ཡང་ཐོངས་མཆན་རག་གི་མི་འདུག རྒྱུ་མཚན་གཞན་ཞིག་ནི། བཙན་བྱོལ་སློབ་གྲྭ་ཁག་ནས་ཨ་རིར་བཏང་བའི་བོད་པའི་སློབ་ཕྲུག་མང་པོ་ཞིག་ཕྱིར་མ་ལོག་པའི་སྟབས་ཀྱིས་ཡིན་སྲིད་པ་རེད། ” ཅེས་བརྗོད་བྱུང་།

གནད་དོན་དེའི་ཐད་ཐེངས་འདིར་ཐོངས་མཆན་མ་རག་པའི་སཱ་ར་མཐོ་སློབ་ཀྱི་སློབ་མ་དོན་གྲུབ་སྐྱིད་ལགས་སུ་བཅར་འདྲི་ཞུས་པར། “ཟླ་འདིའི་ཕྱི་ཚེས་ ༡༥ ཉིན་ང་ཚོ་སཱ་ར་མཐོ་སློབ་ཀྱི་སློབ་ཕྲུག་ ༥ ཨ་རིའི་གཞུང་ཚབ་ལ་ཐོངས་མཆན་ཞུ་རུ་ཕྱིན་པ་ཡིན། ང་ཚོའི་ཁྲོད་ཀྱི་མི་ ༢ བོད་ནས་འབྱོར་བ་དང་ ༣ རྒྱ་གར་ནས་སྐྱེས་བ་རེད། ང་དང་རོགས་པ་གཉིས་བོད་ནས་འབྱོར་བ་དང་དབྱིན་སྐད་ཡག་པོ་ཤེས་ཀྱི་མེད་སྟབས། གཞན་ལ་སྐད་བསྒྱུར་བྱེད་དུ་བཅུག་པ་ཡིན། གཞུང་ཚབ་ཀྱིས་ངེད་གཉིས་ལ་དྲི་བ་ནན་གྱིས་གཏོང་བཞིན། ཕྱི་བསྐྱོད་ལག་དེབ་ཕར་སློག་ཚུར་སློག་ཐེངས་འགའ་བྱས་རྗེས། ཁྱོད་རང་ཕྱི་རྒྱལ་ལ་འགྲོ་མྱོང་མི་འདུག ཚུར་ལོག་རྒྱུར་ཁག་ཐེག་གང་ཡང་མི་འདུག་ཟེར་ནས་ཐོངས་ཆེན་སྤྲད་མ་སོང་ལ། རོགས་པ་གཞན་པ་ཚོའི་ཡིག་ཆ་ལ་མིག་གིས་ལྟ་ཙམ་ལས་མ་བྱས་པར་ཕྱིར་སྤྲད་སོང་། དང་ཐོག་མི་དེས་ངེད་གཉིས་ལ་ཐོངས་མཆན་སྤྲོད་རྩིས་བྱས་ཀྱང་། སྐབས་མཚམས་ཤིག་ནས་ལས་བྱེད་གཞན་ཞིག་ཡོང་སྟེ། ཐོངས་མཆན་སྤྲོད་མཁན་དེར་ཤབ་ཤུབ་ཅིག་བཤད་ནས་ཕྱིན་སོང་། དེའི་རྗེས་མི་དེའི་སྐད་ཆ་བཤད་སྟངས་ལ་འགྱུར་བ་ཐེབས་པ་རེད། ཐེངས་འདིར་ང་ཚོའི་སཱ་ར་མཐོ་སློབ་དང་ཡཱོ་སཱེ་ཨེ་མཐོ་སློབ་བར་གྱི་ལས་འཆར་དེ་ལམ་ལྷོང་མ་བྱང་བ་རེད་མ་གཏོགས། ཡཱོ་སཱེ་ཨེ་མཐོ་སློབ་ཀྱི་སློབ་ཡོན་རག་པའི་དགའ་ལྡན་ཤར་རྩེ་ཡི་དགེ་བཤེས་ ༢ དང་། ཕྱི་དྲིལ་ལས་བྱེད་ཀུན་བཟང་རྡོ་རྗེ་བཅས་ལ་ཐོངས་མཆན་རག་འདུག” ཅེས་བརྗོད་བྱུང་།

སཱ་ར་བོད་ཀྱི་མཐོ་རིམ་སློབ་གཉེར་ཁང་ནི། ཕྱི་ལོ་ ༡༩༩༨ ལོར་གསར་འཛུགས་བྱས་པ་ཞིག་ཡིན་ཞིང་། ད་ལྟ་སློབ་མཐོ་དེར་བོད་དང་ཧི་མ་ལ་ཡའི་རི་རྒྱུད་ཀྱི་སློབ་མ་ ༣༡༠ ཙམ་ཡོད་ལ། སློབ་མ་ཕྱིར་གཏོང་གི་ལས་གཞི་དེ་ ༢༠༠༡ ནས་མགོ་འཛུགས་ཀྱིས་དེ་སྔོན་ཨ་རིའི་ཨེ་མོ་རེ་སློབ་གྲྭར་སློབ་ཕྲུག་ ༢ དང་། མ་ཡ་མེ་སློབ་གྲྭར་སློབ་ཕྲུག་ ༢ ཙམ་གཏོང་ཐུབ་ཡོད་འདུག

གསར་འགོད་པ། དཔལ་ལྡན།