རྒྱ་ནག་གིས་ཏཱ་ལའི་བླ་མར་སློབ་སྦྱོང་བྱ་དགོས།

བློ་བཟང་སེང་གེ་ཡིས་བརྩམས། ས་དཀར་བཀྲ་ཤིས་ཀྱིས་བསྒྱུར།

གཟའ་ལྷག་པའི་ཉིན།    ཏཱ་ལའི་བླ་མའི་ཝེ་རིས་ཟོན་ལྟེ་གནས་སུ་མི་མང་གཅིག་ཁྲི་གཅིག་སྟོང་ལྷན་དུ་འཁྲུངས་སྐར་སྲུང་བརྩི་བྱ་རྒྱུ་ཡིན་པ་དང་། འཁྲུངས་སྐར་གྱི་མཛད་སྒོར་ཕེབས་པའི་སྐུ་མགྲོན་གྲས་སུ་ཨ་རིན་གྷན་ངྷི་དང་མར་ཊན་ལོ་ཏེན་ཁན་གསུམ་པ་ཡོད་ལ། ཁོང་རྣམ་པ་གཉིས་ནི་རླབས་ཆེ་བའི་འཚེ་མེད་ཞི་བ་རིང་ལུགས་པའི་དབུ་ཁྲིད་གཉིས་ཀྱི་ཚ་བོ་དང་བུ་རེད།

ད་ལོའི་དབྱར་ཁར་མེ་ཏོག་བ་སྤུའི་གསར་བརྗེ་བྱུང་བ་དང་། མི་མང་གིས་མང་གཙོ་བརྩོན་ལེན་ཆེད་རང་སྲོག་དོར་བཞིན་ཡོད། ཡིན་ནའང་མོ་ཨར་མར་ཁ་ཊ་ཧྥུ་དམག་སྤྱི་ཡིས་སྲིད་དབང་གཅིག་སྡུད་སྲུང་སྐྱོབ་ཆེད་མི་མང་དམར་གསོད་གཏོང་བཞིན་པ་རེད། སྐབས་འདིར་ཏཱ་ལའི་བླ་མས་བོད་མི་མང་གི་འབོད་སྐུལ་ཤུགས་དྲག་པོ་བྱེད་བཞིན་པ་ལ་མ་ལྟོས་བར་རང་ཉིད་ཀྱི་ཆབ་སྲིད་དབང་ཆ་མང་གཙོའི་ལམ་ནས་འོས་འདེམས་གནང་བའི་བོད་མིའི་འགོ་ཁྲིད་ལ་རྩིས་སྤྲོད་བྱས། དེ་ནི་ཏཱ་ལའི་བླ་མས་གྲོས་ཚོགས་དང་ཁྲིམས་ཞིབ། འཛིན་སྐྱོང་བཅས་འཕོ་འགྱུར་དང་། གྲོས་གཞི་ཁག་ལ་ཆོག་མཆན་དང་ཡང་ན་མོས་མཐུན་མེད་པའི་ས་རྟགས་འགོད་པ། ཛ་དྲག་ཚོགས་འདུ་བསྡུ་བསྐོང་། ཕྱི་འབྲེལ་སྐུ་ཚབ་བསྐོ་འཇོག་བཅས་བཅའ་ཁྲིམས་སུ་གསལ་བའི་འགན་དབང་ཚང་མ་དོར་བ་རེད།

ཏཱ་ལའི་བླ་མ་སྐུ་ཕྲེང་བཅུ་བཞི་པ་འདི་ཉིད་ཀྱིས་ཏཱ་ལའི་བླ་མའི་སྐུ་ཕྲེང་རིན་བྱོན་གྱི་རྒྱུན་སྲོལ་ཏེ་མི་ལོ་ ༤༠༠ རིང་གི་ཆབ་སྲིད་འགོ་ཁྲིད་ཀྱི་གོ་གནས་མཚམས་འཇོག་པར་ཐག་གཅོད་གནང་བ་དང་།  ཐག་གཅོད་འདི་ལ་བོད་མི་མང་པོ་དང་འཛམ་གླིང་མི་མང་ཧ་ལས་པར་གྱུར་པ་རེད།  ཡིན་ནའང་ཐག་གཅོད་འདི་གློ་བུར་དུ་བྱུང་པ་ཞིག་མིན་པས་བློ་ཡུལ་ལས་འདས་བ་ཞིག་མ་རེད།  དོན་དངོས་སུ་ཐག་གཅོད་འདི་སྔོན་མ་ནས་ཡོང་བ་ཞིག་རེད། མི་ལོ་བཅུ་ཕྲག་རིང་ཏཱ་ལའི་བླ་མའི་བོད་ཀྱི་སྲོལ་རྒྱུན་ཁྲོད་ལྷ་དང་སྐུ་དྲག་གིས་དབང་སྒྱུར་བའི་མ་ལག་རིམ་བཞིན་དོར་ཏེ་བོད་མི་ཚོར་ཁོང་ཉིད་ཞལ་མ་བཞུགས་པའི་ཉིན་མོ་གྲ་སྒྲིག་བྱ་དགོས་བའི་བརྡ་སྟོན་གྱི་ཡོད། ཏཱ་ལའི་བླ་མའི་སྔོན་མ་ ༡༩༥༤ ལོ་ནས་བཟུང་མང་གཙོ་བཅོས་བསྒྱུར་འགོ་བཙུགས་པ་དང་།  བསྒྱུར་བཅོས་ལྷན་ཚོགས་བཙུགས་ཏེ་དབུལ་ཕོངས་ཅན་གྱི་ཞིང་བ་དང་བོད་མི་ཚོར་བཀལ་བའི་ཁྲལ་ལྗིད་མོ་དག་མེད་པ་བཟོས།  ཡིན་ནའང་བསྒྱུར་བཅོས་དེ་རྒྱ་ནག་དམར་ཤོག་གི་དམག་དཔུང་བོད་ལ་བཙན་འཛུལ་རྗེས་སུ་མཚམས་ཆད་སོང་། 

རྒྱ་ནག་གིས་བོད་ས་བཙན་བཟུང་བྱས་རྗེས་ ༡༩༥༩ ལོར་ཏཱ་ལའི་བླ་མ་རྒྱ་གར་ཏུ་འབྱོར།  ཁོང་གི་དགོངས་གཞི་སྟེ་འཇིག་རྟེན་པའི་མང་གཙོའི་སྤྱི་ཚོགས་མངོན་དུ་གྱུར་བའི་དབུ་བརྩམས།  ༡༩༦༠ ལོ་དགུང་ལོ་ ༢༥ ཡིན་པའི་ཏཱ་ལའི་བླ་མའི་མཛུབ་སྟོན་འོག་བོད་མི་ཚོས་གྲོས་ཚོགས་ཀྱི་འཐུས་མི་ཐོག་མ་བདམས།  ཅུང་མ་འགོར་བར་བོད་ཀྱི་བུད་མེད་ཁ་ཤས་ཀྱང་གྲོས་ཚོགས་ཀྱི་འཐུས་མི་རུ་བསླེབས།  བོད་ཀྱི་ཆེས་ཐོག་མའི་བཅའ་ཁྲིམས་དེ་ ༡༩༦༣ ལོར་གཏན་ལ་ཕབས་པ་དང་།  ཏཱ་ལའི་བླ་མའི་ནན་སྐུལ་འོག་བཅའ་ཁྲིམས་ནང་ཏཱ་ལའི་བླ་མ་གནས་དབྱུང་གཏོང་ཆོག་པའི་དོན་ཚན་ཞིག་བཅུག ༡༩༩༡ ལོར་༼ཐེངས་གསུམ་པའི་མང་གཙོའི་རླབས་རྒྱུན༽སྐབས་བོད་ཀྱི་གྲོས་ཚོགས་རྒྱ་སྐྱེད་བཏང་བ་དང་མཉམ་དུ་གཞུང་འཛིན་བཀའ་བློན་འོས་འདེམས་ཀྱི་འགན་དབང་ཐོབ།  སྔོན་ཆད་ཀྱི་བཀའ་བློན་ནི་དབུ་ཁྲིད་ཏཱ་ལའི་བླ་མའི་ཐད་ཀར་བསྐོེ་བཞིན་ཡོད། ༢༠༠༡ ལོར་ཤར་ཡུ་རོབ་ཀྱི་ཁ་དོག་གསར་བརྗེ་བྱུང་བའི་སྔོན་དེར།  ཏྰ་ལའི་བླ་མས་ཕྱེད་བགྲེས་ཡོལ་གྱི་གསལ་བསྒྲགས་བསྐྱངས་བ་དང་། བཀའ་བློན་ཁྲི་པ་མི་མང་གིས་ཐད་ཀར་འོས་འདེམས་དགོས་བའི་ལམ་སྟོན་གནང་།  ཟམ་གདོང་རིན་པོ་ཆེ་ལ་འོས་གྲངས་བརྒྱ་ཆའི་༩༠ རག་སྟེ་བཀའ་ཁྲི་ཐོབ།

༢༠༡༡ ལོའི་ཟླ་ ༣ པར་ཏཱ་ལའི་བླ་མས་ཆབ་སྲིད་ཀྱི་འགན་དབང་ཡོངས་རྫོགས་མི་མང་གིས་འོས་འདེམས་བྱས་པའི་འགོ་ཁྲིད་ལ་རྩིས་སྤྲོད་གནང་བ་དང་། ཁོང་ཉིད་མུ་མཐུད་གཞུང་གི་མཚན་འཛིན་དབུ་ཁྲིད་གནང་དགོས་བའི་འབོད་སྐུལ་ལ་དང་ལེན་མ་གནང་།  མི་འགྱངས་པར་བོད་པའི་བཅའ་ཁྲིམས་བསྒྱུར་བཅོས་གཏན་ལ་ཕབས་པ་དང་སྒྲིག་འཛུགས་ཀྱི་རྣམ་པ་གསར་བ་ཞིག་མངོན།  བཀའ་བློན་ཁྲི་པ་སྟེ་སྒྲིག་འཛུགས་ཀྱི་ཁྲིམས་མཐུན་འགོ་ཁྲིད་ཆགས་པ་དང་། ད་ནས་བཟུང་ཁྲིམས་ཡིག་ལ་ཆོག་མཆན་འགོད་པ།  སྐུ་ཚབ་དང་དམིགས་བསལ་སྐུ་ཚབ་བསྐོ་འཇོག  གལ་གནད་ཆེ་བའི་སྲིད་བྱུས་ལག་བསྟར་སོགས་ལ་འགན་ཁུར་དགོས་བ་རེད། 

སྲིད་དབང་བརྒྱུད་སྤྲོད་འདི་ལ་བོད་མི་མང་པོ་ཞིག་གིས་སེམས་ཁྲལ་བྱེད་བཞིན་པ་ནི་བརྗོད་མི་དགོས་བ་ཞིག་རེད།  ཡིན་ནའང་དུས་སྐབས་འདི་ནི་བོད་མིའི་རང་དབང་འཐབ་རྩོད་དེ་སྔར་ལས་མི་སྐྱ་ཅན་དང་སྟོབས་ཤུགས་ཅན།  མུ་མཐུད་རྒྱུན་འཛིན་ཐུབ་པ་ཅན་ཞིག་ཆགས་པའི་གོ་སྐབས་ཤིག་ཀྱང་ཡིན།  བོད་མི་ཚོར་མཚོན་ན་འདི་ནི་ལོ་རྒྱུས་སྟེང་མ་བྱུང་བའི་ཁྱབ་ཁོངས་ཆ་མེད་ཅིག་རེད།  ཡིན་ནའང་བོད་མི་ཚོ་སེམས་ཤུགས་བསྐྱེད་དེ་གདོང་ལེན་གསར་བ་འདི་བསུ་བར་སྟ་གོན་བྱེད་བཞིན་པའི་རྟགས་མཚན་མངོན་བཞིན་པ་རེད།

ཏཱ་ལའི་བླ་མའི་སྲིད་འགན་རྩིས་སྤྲོད་ན་ ༣ པའི་ཚེས་ ༢༠ ཉིན་དེ་སྔ་བྱུང་མ་མྱོང་བའི་འོས་བསྡུ་ཆེན་མོ་དང་ལྷན་དུ་བསླེབས་པ་དང་།  ཉིན་དེར་གླིང་ཆེན་ཨེ་ཤ་ཡ་དང་ཡུ་རོབ། བྱང་ཨ་རི་བཅས་ཀྱི་རྒྱལ་ཁབ་ ༣༠ ནང་གི་བོད་མི་ཚོས་བཀའ་བློན་ཁྲི་པ་དང་གྲོས་ཚོགས་འཐུས་མི་གསར་པ་འདམ་དགོས་བ་རེད།  བོད་ནང་བཞུགས་པའི་བོད་མི་ཚོས་ཀྱང་ལོ་རྒྱུས་རང་བཞིན་གྱི་འོས་འདེམས་འདི་ལ་དོ་སྣང་ཆེན་པོ་བྱས།  འོས་འདེམས་བརྒྱུད་རིམ་འདིས་བོད་མི་ཚོ་ཞུམ་པ་མེད་པ་དང་འགྱུར་མེད་ཀྱི་སྙིང་སྟོབས་ཤིག་མཚོན་པ་རེད། ཐེངས་འདིའི་འོས་འདེམས་ཀྱིས་པེ་ཅིན་ལ་བོད་པའི་རང་དབང་ལས་འགུལ་འདི་མི་རབས་གསར་བའི་ཕྲག་ཏུ་བླངས་པ་དང་།  ཁོང་ཚོའི་སྔོན་རབས་པའི་མི་ལོ་ ༥༠ འཐབ་རྩོད་ཀྱི་རྨང་གཞིའི་སྟེང་ནས་མུ་མཐུད་མདུན་སྐྱོད་བྱ་རྒྱུ་ཡིན་པའི་བརྡ་ལན་གསལ་པོ་ཞིག་སྤྲད་ཡོད་པ་རེད། 

ཏྰ་ལའི་བླ་མ་སྲིད་སྟེགས་ལས་གྱེས་བ་དེས་རྒྱ་ནག་སྲིད་གཞུང་གི་ཁྱབ་བསྒྲགས་ནི་ནོར་འཁྲུལ་ཡིན་པ་ར་སྤྲོད་བྱས་པ་དང་།  རྒྱ་ནག་སྲིད་གཞུང་གིས་ནམ་རྒྱུན་ཏཱ་ལའི་བླ་ནི་ཆོས་ལུགས་ཀྱི་དབུ་ཁྲིད་ཅིག་མིན་པར་སྲིད་དོན་མི་སྣ་ཞིག་ཡིན་པར་ཁྱབ་བསྒྲགས་བྱེད་ཀྱིན་ཡོད་པ་རེད། ཡིད་ཕངས་བ་ཞིག་ལ། རྒྱ་ནག་དམར་ཤོག་གིས་ཏཱ་ལའི་བླ་མའི་ཆབ་སྲིད་ཀྱི་གོ་གནས་ལ་དམིགས་ཏེ་མུ་མཐུད་མཚན་སྨོད་བྱེད་ཀྱི་ཡོད་པ་ལས།  བོད་དང་བོད་མིའི་མདུན་ལམ་ལ་སེམས་ཁུར་བྱེད་ཀྱི་མེད་པ་རེད།  དེ་དང་ལྷན་བརྒྱུད་ལམ་ཕྱི་གསལ་ནང་གསལ་མིན་པས་བོད་ནང་དུ་མི་མང་གིས་ཏཱ་ལའི་བླ་མའི་གོ་གནས་ལའང་ངོས་འཛིན་གསལ་བོ་མ་བྱུང་བ་ཆགས་ཡོད།

ད་ལྟ། རྒྱ་ནག་སྲིད་དབང་གཅིག་སྡུད་ལ་གདོང་ལེན་བྱ་དགོས་བ་ཞིག་ཏུ་བསླེབས་ཡོད་དེ། བོད་པའི་མི་ལོ་ ༥༠ རིང་གི་དྲག་པོའི་དབང་སྒྱུར་ལ་བཟོད་སྒོམ་བྱས་པ་དང་།  བོད་ཀྱི་ད་ལྟའི་གནས་སྟངས་ནི་གསལ་བསྒྲགས་མེད་པར་བཀག་སྡོམ།  ཀིརྟི་དགོན་དང་དཀར་མཛེས་སུ་མུ་མཐུད་ངོ་རྒོལ་བྱེད་བཞིན་པ།  ལྟ་སྐོར་བ་བོད་ནང་འཛུལ་མི་ཆོག་པ་སོགས་ལས་པེ་ཅིན་གྱིས་བོད་ལ་དབང་སྒྱུར་ཕམ་ཁ་བྱུང་བ་མཚོན་ཐུབ།  པེ་ཅིན་གྱི་འགོ་ཁྲིད་ཚོའི་མི་མང་ཚོགས་ཁང་ཆེན་མོ་རུ་དམག་འཁྲུག་གི་ཉེས་མིང་ཁུར་བཞིན་པའི་སུའུ་ཏེན་སྲིད་འཛིན་ཨོ་མར་ཧ་སིན་པ་ཤེར་སྣེ་ལེན་བྱེད་པའི་ཚབ་ཏུ་ཏཱ་ལའི་བླ་མར་ལ་སློབ་སྦྱོང་བྱས་དེ།  དབང་ཆ་བོད་མི་མང་ལ་སྤྲོད་པ་དང་བོད་ཀྱི་གནད་དོན་ཐག་གཅོད་བྱེད་པ།  གསེར་ལྟ་བུའི་གོ་སྐབས་འདི་དམ་འཛིན་གྱིས་འཛམ་གླིང་ལ་ལྷག་བསམ་རྣམ་དག་ཕྱིར་མངོན་ཚེ།  རྒྱལ་སྤྱིའི་སྤྱི་ཚོགས་ཀྱིས་བསྔགས་བརྗོད་ཐོབ་ངེས་བ་དང་རྒྱ་ནག་གི་རྒྱལ་སྤྱིའི་སྣང་བརྙན་ལེགས་བཅོས་བྱ་ཐུབ་པ་རེད། གང་ལྟར། རྗེས་སུ་གནས་ཚུལ་ཅི་བྱུང་རུང་༧གོང་ས་ཏཱ་ལའི་བླ་མའི་ཁོང་ཉིད་ནི་མང་གཙོ་འདོད་མཁན་ཞིག་ཡིན་པ་བདེན་དཔང་བྱས་ཡོད།

རྩོམ་པ་པོ་ནི་ཧ་ཝེར་ཊི་ཁྲིམས་ལུགས་སློབ་གཉེར་ཁང་གི་མཐོ་རིམ་ཉམས་ཞིབ་པ་ཡིན་ལ།   ཟླ་༨ པའི་ཚེས་༨ཉིན་བཀའ་ཁྲི་གནང་རྒྱུ་ཡིན་པ་རེད།

དབྱིན་རྩོམ་མ་ཡིག་http://www.washingtonpost.com/opinions/what-china-could-learn-from-the-dalai-lama/2011/07/04/gHQAYBnByH_story.html

རྒྱ་བསྒྱུར་མ་དཔེ། http://global.dwnews.com/news/2011-07-06/57876787.html