རྒྱ་ནག་གཞུང་གིས་བླ་བྲང་དགོན་པའི་གྲྭ་ཀླུ་གཅོད་པ་བསྟན་འཛིན་རྒྱ་མཚོར་མི་འགྱངས་པར་ཁྲིམས་ཐག་གཅོད་རྒྱུའི་བརྡ་ཡིག་ཅིག་ལ་ཁོང་གི་ནང་མིར་མཚན་རྟགས་བཀོད་དུ་བཅུག་ཡོད་འདུག
ཨེ་ཤ་ཡ་རང་དབང་རླུང་འཕྲིན་ཁང་གི་བལ་ཡུལ་གསར་འགོད་པ་ཀླུ་འབུམ་བཀྲ་ཤིས་ལགས་སུ་བོད་ནས་ཁ་པར་བརྒྱུད་གནས་ཚུལ་མཁོ་སྤྲོད་གནང་བ་ལྟར་ན། འདི་ལོ་ཕྱི་ཟླ་ ༣ པའི་ནང་རྒྱ་ནག་གཞུང་གིས་མདོ་སྨད་བླ་བྲང་དགོན་པར་དམ་དྲག་བྱས་སྐབས་གསང་སྟབས་ཀྱིས་འཛིན་བཟུང་བཀག་ཉར་བྱས་ཡོད་པའི་གྲྭ་ཀླུ་གཅོད་པ་བསྟན་འཛིན་རྒྱ་མཚོ་ལགས། ཕྱི་ཟླ་ ༥ ལྷག་གི་རིང་གར་ཡོད་ཅི་བྱུང་གི་གནས་ཚུལ་ཅི་ཡང་ཤེས་རྟོགས་བྱུང་མེད་ཀྱང་། ཟླ་སྔོན་མའི་ཕྱི་ཚེས་ ༡༠ ཡས་མས་སུ་ས་གནས་ཉེན་རྟོག་ལས་ཁུངས་ཀྱིས་ཁོང་གི་ནང་མི་འབོད་འགུག་གིས་ཁོང་དངོས་སུ་འཛིན་བཟུང་བྱས་ཡོད་ཚུལ་བསྒྲགས་ཡོད་པར་མ་ཟད། མི་འགྱངས་པར་ཁྲིམས་ཐག་གཅོད་རྒྱུ་ཡིན་པའི་བརྡ་ཡིག་ཅིག་གི་སྟེང་ལ་མིང་རྟགས་བཀོད་དུ་བཅུག་ཡོད་འདུག
གྲྭ་ཀླུ་གཅོད་པ་བསྟན་འཛིན་རྒྱ་མཚོ་ལགས། འདི་ལོ་ཕྱི་ཟླ་ ༣ པའི་ཚེས་ ༡༦ ཉིན་གྱི་དགོང་དྲོའི་ཆུ་ཚོད་ ༨ ཡས་མས་ཤིག་ལ་ནག་ཉེས་ཅི་ཡིན་གསལ་ཁ་མེད་པའི་ཐོག་ནས་ཉེན་རྟོག་པས་གསང་སྟབས་ཀྱིས་འཛིན་བཟུང་བྱས་ཡོད་ཅིང་། ཐེངས་འདིའི་ཁོང་གི་ཁྲིམས་གཅོད་ཀྱི་བརྡ་ཡིག་ནང་། ཁོང་སྔོན་མར་ཆབ་སྲིད་ཀྱི་དོགས་གཞིའི་འོག་འཛིན་བཟུང་བྱས་མྱོང་ཡང་། ཁོང་གིས་རྒྱལ་ཁབ་ཀྱི་ཁྲིམས་ལུགས་བརྩི་སྲུང་མ་བྱས་པར་ ༢༠༠༨ ལོ་ནས་བཟུང་མདོ་སྨད་བླ་བྲང་ཡུལ་གྱི་ཞི་རྒོལ་ཆེན་མོའི་སྣེ་ཁྲིད་པ་དང་རྒྱལ་སྤྱིའི་གསར་འགོད་པའི་མདུན་ནས་གནས་ཚུལ་ངོ་སྤྲོད་བྱས་ཡོད་ཚུལ། བོད་ཀྱི་ལོ་སར་སྐབས་མི་སྣ་བསྡུ་སྐོང་གིས་ལོ་སར་དང་འབྲེལ་བའི་ལས་འགུལ་སྤེལ་ཡོད་ཚུལ། རྒྱ་ནག་གཞུང་གི་མནར་གཅོད་འོག་འདས་གྲོངས་སུ་ཕྱིན་པའི་རྒྱ་གཅེས་པ་གྲྭ་འཇམ་དབྱངས་སྦྱིན་པ་ལགས་ཀྱིས་སྐུ་གདུང་སྟེང་བོད་ཀྱི་རྒྱལ་དར་བཀལ་ཏེ་མྱ་ངན་ཞུས་ཚུལ། ད་དུང་བོད་ཕྱི་ཕྱོགས་སུ་བོད་མི་ཚོས་བཀའ་བློན་ཁྲི་པའི་འོས་བསྡུའི་སྐབས་གསང་སྟབས་ཀྱིས་ས་གནས་བོད་མི་ཚོར་གནས་ཚུལ་མཁོ་སྤྲོད་དང་སྐུལ་སློང་བྱས་པ། ༸གོང་ས་མཆོག་གི་སྐུ་པར་མི་མང་ནང་འགྲེམས་སྤེལ་བྱས་ཡོད་ཚུལ་སོགས་ཀྱི་ནག་ཉེས་བགྲངས་ཡོད་འདུག
གྲྭ་ཀླུ་གཅོད་པ་བསྟན་འཛིན་རྒྱ་མཚོ་ལགས་ནི། མདོ་སྨད་བླ་བྲང་དགོན་པའི་རྒྱུད་སྨད་གྲྭ་ཚང་གི་ཡིན་ཞིང་། སྔོན་རྒྱ་གར་དུ་ཡོང་སྟེ་ལྷོ་ཕྱོགས་འབྲས་སྤུངས་དགོན་པའི་ནང་སློབ་གཉེར་གནང་མྱོང་ཡོད་འདུག་ལ། ཕྱིར་བོད་ནང་ལོག་རྗེས་ས་བྱི་ཞི་རྒོལ་ཆེན་མོའི་ལས་འགུལ་དང་ཆབ་སྲིད་ཀྱི་དོགས་གཞིའི་འོག་སྔ་ཕྱི་ཐེངས་གཉིས་ལ་རྒྱ་ནག་གཞུང་གིས་འཛིན་བཟུང་བཙོན་འཇུག་བྱས་ཡོད་འདུག
གསར་འགོད་པ། དོན་གོ
ཕ་བཟང་བུ་ཁྱོད་གངས་ཅན་བོད་ཀྱི་རྒྱན།།
བུ་རྒོད་སྟག་ཕྲུག་འདྲ་བ་ཁྱོད་ཚོ་རྣམས།།
ཕ་མེས་བརྒྱུད་པའི་སྙིང་གི་ནོར་བུ་རེད།།
ཁྱོད་ཚོའི་སྐུ་ཚེ་བརྟན་པའི་སྨོན་ལམ་ཡོད།།
ང་ཚོས་ཁྱེད་རྣམས་ནམ་ཡང་བརྗེད་མི་སྲིད།།
ཁོག་པའི་སྙིང་ཁྲག་ས་ལ་འཐོར་གྱུར་ནའང་།།
གུང་ཁྲན་རྒྱ་ལ་ཁ་གཏད་བཅག་རྒྱུ་ཡིན།།
ཤི་གསོན་གཅིག་པའི་སྤུན་ཟླ་རྒྱལ་གྱུར་ཅིག །
དེ་དུང་གྱི་ཕོ་རྒོད་ཁྱོད་ལ་རྗེས་སུ་ཡིན་རང་ཡོད་་་་་ང་ཚོ་ཁྱོད་དང་མཉམ་དུ་སྡུག་སེམས་མཉམ་སྐྱིད་བྱེད་ཀྱི་ཡིན་་་་་ཕོད་རྒོད་འགྱོགས་པོ་བཙན་ར་ནས་ཐར་བའི་སྨོན་འདུལ་དང་བཅས་་་
གྲྭ་རྒན་འདི་ངོ་ཤེས། ཁོང་ལ་ལོ་ཚད་མང་པོ་ཞིག་མི་གཅོད་པའི་སྨོན་ལམ་ཡོད།