ལས་ཀ་ནི་ནམ་རྒྱུན་ལྟར་རོ། དམིགས་བསལ་གང་ཡང་མེད། གངས་མཚོ་དེ་རིང་རྗོ་སུ་ལམ་ནས་ཐོན་པ་དང་ངེད་གཉིས་ཀྱིས་ཉིན་མ་འདི་དག་གི་རིང་གི་གནས་ཚུལ་དག་ཕན་ཚུན་གྱི་ངོ་གདོང་ལ་བལྟས་དེ་སེམས་ནང་གི་སྐད་ཆ་ཁ་ཤས་ཤིག་གླེང་མོལ་བྱས་པ་ཡིན། འདང་ནུབ་ང་རང་ལ་རྨི་ལམ་ཁྱད་མཚར་ཞིག་བྱུང་བ་ནི་ང་རང་གི་བུ་ཆུང་དེ་སྐྱེ་ནས་མི་ཚད་ང་དང་གངས་མཚོ་ངེད་ཚོ་རི་བོ་ཐོན་པོ་སྔོ་ལྗང་གི་གཡོག་པ་ཞིག་གི་རྩེ་རུ་སོང་ནས་སྤྲོ་སྐྱིད་གཏོང་བཞིན་འདུག སྐབས་ཤིག་ལ་ང་རང་དང་གྲོགས་པོ་ཞིག་རྗེ་བཙུན་བྱམས་པའི་སྐུ་བརྙན་ཡོད་སའི་ལྷ་ཁང་ཞིག་དུ་སླེབས་འདུག དེ་ནས་མཚམས་ཤིག་ལ་ང་དང་གྲོགས་པོ་ཁ་ཤས་ཀྱི་ལག་དུ་གསེར་གྱི་དོང་ཙེ་མང་བོ་ཞིག་རེག་འདུག་པ་སོགས་རྨིས་པ་ནི། དངོས་ནས་བསམ་བློ་གཏོང་བཞིན་གཏོང་བཞིན་ཡ་མཚར་བ་ཞིག་རེད་འདུག ཡིན་ཡང་། རྨི་ལམ་ནི་རྨི་ལམ་ཞིག་ལས་ང་རང་གི་དེ་ལ་བརྟག་དཔྱད་ལེགས་པོ་ཞིག་བྱེད་ཤེས་མ་སོང་། སང་ཉིན་ནི་གཟའ་པ་སངས་ཡིན་སྟབས། རྗོ་ཤུ་ཚང་གི་ལུགས་སྲོལ་ལྟར་ང་རང་ཡང་གུང་གསེང་རེད། ནངས་ཉིན་ཕྱི་དྲོ་ཆུ་ཚོད་བདུན་པ་བར་དུ། ༢༩།༡།༠༩
ཁ་སང་དེ་རིང་གཉིས་ནི་གུང་གསེང་ཡིན་སྟབས། མཚོ་འགྲམ་དང་འཚིག་ཇ་འཐུང་ས་ཟ་ཁང་སོགས་སུ་སོང་དེ་ཉིན་མ་བསྐྱལ།ཕྱི་དྲོ་རྒྱ་གར་དུ་ཡོད་པའི་ནུ་མོ་ལྷ་མོ་སྐྱིད་ལ་ཁ་པར་བཏང་ནས་ཁ་བརྡ་བྱས་པ་དང་གྲོགས་པོ་དཀོན་མཆོག་བསྟན་འཛིན་གྱིས་རོགས་རམ་འོག་དུ་ཁོ་གཉིས་བདེ་ཐང་ཡིན་པ་སོགས་དང་ང་རང་གི་ལས་ཀ་སོགས་ཀྱི་བསྐོར་ནས་ཁ་བརྡ་སྐར་མ་བཅུ་ལྷག་ཞིག་ལ་བྱས་པ་ཡིན། ཡིན་ཡང་། དོ་ནུབ་ཕྱི་དྲོ་ཆུ་ཚོད་བདུན་པའི་སྟེང་དུ་ང་རང་ལ་དགོང་མོའི་ལས་ཀ་ཡོད་སྟབས། རྒྱུན་ལྡན་ལྟར་ཐབ་ཚང་ནང་གི་ལས་ཀ་ཆུ་ཚོད་བཅུ་གཅིག་སྐར་བཅུ་མ་ཟིན་བར་དུ་བྱས། གངས་མཚོས་མོ་རང་གི་རླངས་འཁོར་རྙིང་ཀོག་དེ་བཏང་ནས་ང་རང་བསུ་རུ་འབྱོར་བ་ལྟར་ངེད་གཉིས་ལྷན་དུ་ཁང་ཆུང་དུ་ལོག ༣༡།༡།༠༩
འདང་ནུབ་ང་རང་ལ་རྨི་ལམ་ཁྱད་དུ་འཕགས་པ་ཞིག་རྨིས། དེ་ནི་གངས་མཚོ་ངེད་གཉིས་མི་མང་བོ་ཞིག་གི་དཀྱིལ་ནས་༧གོང་ས་མཆོག་གིས་དམིགས་བསལ་གྱིས་མཇལ་ཁ་གནང་བ་མ་ཟད། ངེད་གཉིས་ཀྱི་ནང་གི་སྔུན་མ་གངས་མཚོ་རེད་འདུག་ལ་ང་རང་ཁོ་མོའི་རྒྱབ་ལོག་དུ་འདུག་པ་དང་༧གོང་ས་མཆོག་གིས་གངས་མཚོའི་མགོ་ལ་ཕྱག་གི་ཕྱིད་ཕྱིད་གཏོང་ཞོར་དུ་རྗེ་བཙུན་སྒྲོལ་མ་ཞེས་གསུངས་པ་དང་འཛུམ་འདང་ང་ལ་སྟོན་ཞོར་དུ་གསུངས་བ་དེ་འདྲ་ཞིག་རྨིས་སོང་། དེ་ནི་ང་རང་གི་ཡུན་རིང་བོར་སྒྲོལ་མའི་ཁ་འདོན་མ་བྱས་པར་བསྡད་པ་དེའི་སྟབས་ཀྱི་ལུང་བསྟན་ཞིག་ང་རང་གི་མུ་མཐུད་དུ་འདོན་དགོས་པར་སྐུལ་བ་ཡིན་ནམ་གཞན་ཞིག་ཡིན་ནམ་གང་ཡིན་མི་ཤེས་པར་ང་རང་ལ་དམིགས་བསལ་གྱི་བསམ་བློ་ཞིག་འཁོར་དུ་བཅུགས་སོང་། དེ་རིང་ཉིན་གོང་ཆུ་ཚོད་དང་བོ་མ་ཟིན་ཙམ་དུ་ང་རང་ཡར་བླངས་དེ་གངས་མཚོ་ལ་དེ་ལྟར་བཤད་དེ་ངས་མོ་རང་ལ་མ་ཎི་ཡི་གེ་དྲུག་མ་འདོན་སྟངས་བསླབས་པ་ཡིན། ཁོ་མོས་ཀྱང་སྤྱན་རས་གཟིགས་ལ་བསྟོད་པ་ཚིག་གཞི་དེ། ཕྱག་སྟོང་བསྐལ་བ་བཟང་བོ་སངས་རྒྱས་སྟོང་།། སྤྱན་སྟོང་བསྐལ་བ་བཟང་བོ་སངས་རྒྱས་སྟོང་།། གང་ལ་གང་མདུད་དེ་ལ་དེར་སྟོན་པ།། བཙུན་པ་སྤྱན་རས་གཟིགས་ལ་ཕྱག་འཚལ་ལོ།། ཟེར་ནས་ཁོ་མོའི་སྐད་ནང་དུ་འབྲི་རྒྱུ་བྱས་སོང་། དགོང་མོ་ལས་ཀར་མཚམས་བཞག་པ་དང་ནམ་རྒྱུན་ངས་ལས་རོགས་མ་བྱན་ཆེན་མོ་དང་མ་གཡོག་བུད་མེད་དེ་གཉིས་ཀྱིས་ག་དུས་ཡིན་ཡང་། བྱ་ཤ་དང་ཡང་ན་གླང་ཤ། ཉ་ཤ་གང་རུང་གི་ཟ་མ་རེ་བཟོས་དེ་རང་རང་གི་ནང་དུ་གང་དགོས་པ་དེ་འཁུར་ནས་འགྲོ་མོད། ངས་དོ་ནུབ་བར་དུ་གང་ཡང་མ་འཁུར། དོ་ནུབ་གངས་མཚོས་དགོང་ཟས་ཟོས་མེད་ཟེར་བས་ངས་ཀྱང་དོ་ནུབ་མོ་རང་གི་ཆེད་དུ་ཤ་མེད་ཀྱི་ཟ་མ་ཞིག་མོ་རང་ལ་འཁུར་ནས་ཡོང་བ་ཡིན། དངོས་ནས་བཤད་ན་དེ་ནི་མ་བྱིན་པར་ལེན་པ་ཟེར་བ་དང་ཁྱད་པར་ཆེན་པོ་མེད་ཀྱང་། ང་རང་གི་ཆེད་དུ་མ་ཡིན་ཡང་། རང་གི་དགའ་མའི་ཆེད་དུ་ཟ་མ་ཉུང་ཉུང་ཞིག་མ་བྱིན་ལེན་གྱི་ཉེས་པ་ཞིག་བསགས་སོང་། དངོས་ནས་བཤད་པ་ཡིན་ན་ནི་ང་རང་འདི་ལྟར་བྱེད་རྒྱུར་རྩ་ནས་མོས་པ་མེད་ཀྱང་། དོ་ནུབ་མ་བསམ་ས་ནས་དེ་ལྟར་བྱེད་དགོས་བྱུང་བ་དེ་ལ་ང་རང་དངོས་ནས་རང་ཉིད་ལ་ངོ་གནོང་དགོས་པ་བཟོས་སོང་། ༢།༢།༠༩
ཞོགས་པ་ཆུ་ཚོད་བཅུ་བ་ཙམ་ཞིག་ལ་ཡར་བླངས་དེ་བྱ་ཤ་དང་གླང་ཤ་གཉིས་ཀྱིས་མོག་མོག་ཞིག་བཟོས་དེ་གངས་མཚོ་ངེད་གཉིས་ཟ་ཁང་ཤར་ཕྱོགས་ཀྱི་ཟ་ཁང་ཁ་ཤས་ཤིག་གི་ནང་དུ་མོག་མོག་འདི་འདྲ་དགོས་ཚེ་འབྲེལ་གཏུགས་བྱེད་རོགས་ཞེས་བཤད་དེ་ངེད་གཉིས་ཨེས་ལ་གྲི་གྲོང་ཁྱེར་ནང་གི་ཤར་ཕྱོགས་པའི་ཁ་ལག་བཟོ་སའི་ཟ་ཁང་ཁ་ཤས་ཤིག་གི་ནང་དུ་སོང་རྗེས། ང་རང་ལས་ཀ་འགྲོ་བའི་དུས་ཚོད་ལ་སླེབས་འདུག་པ་ལྟར། རྒྱུན་ལྡན་ལྟར་དུ་ལས་ཀ་བྱེད་དུ་སོང་བ་ཡིན། ལས་མཚམས་བཞག་དེ་ཕྱིར་ནང་དུ་མ་ལོག་པའི་སྐར་མ་ཁ་ཤས་ཀྱི་སྔོན་དུ་གངས་མཚོས་མོ་རང་གྲོགས་མོ་ཝན་དང་ལྷན་དུ་ཟ་ཁང་ཞིག་གི་ནང་དུ་ཡོད་ལ་དེ་རུ་མོག་མོག་གི་མཚན་མོ་ཞིག་གྲ་སྒྲིག་བྱེད་ཐུབ་མིན་ཐད་དུ་ཟ་ཁང་དེའི་སྤྱིན་བདག་ལ་སྐད་ཆ་བཤད་རྒྱུ་ཡིན། དེའི་སྟབས་ཀྱི་ང་རང་ཆུ་ཚོད་བཅུ་གཅིག་སྟེང་དུ་ནང་ལ་འབྱོར་མི་ཐུབ་པས་ལྡེ་མིག་སྒོ་འགྲམ་དུ་བཞག་ཡོད་ཟེར་ནས་ཁ་པར་འབྱོར་སོང་། ང་རང་ནང་གི་སྒོ་འགྲམ་དུ་སླེབས་དུས་ལྡེ་མིག་བཞག་ཡོད་ན་ཡང་། སྒོ་ཡག་པོ་བརྒྱབ་མི་འདུག སྟབས་ཡག་ནས་འདི་རུ་རྐུན་མ་འདྲ་མ་ཡོང་བ་རེད་མ་གཏོགས། ནང་གི་གློག་ཀླད་རྐུན་མ་ཤོར་བ་ཡིན་ན་ནི་ཚར་སོང་བསམ་ཞོར་དུ་སྒོ་ཕྱེ་ནས་ནང་གི་ལག་ཁྱེར་གློག་ཀླད་ཡོད་མེད་ལ་བལྟས་དུས། གློག་ཀླད་འདུག་པས་ང་རང་སེམས་ལྷོད་དུ་འབབ་ཞོར་ནང་དུ་འཛུལ་བ་ཡིན། ༣།༢།༠༩
ཆུ་ཚོད་བཅུ་གཉིས་མ་ཟིན་བར་དུ་ཉལ་བ་ཡིན།གངས་མཚོས་ང་རང་ལ་ཚ་ལུ་མའི་ཁུ་བ་ཞིག་བཟོས་དེ་ཉལ་སའི་ནང་དུ་སྤྲད་སོང་། དེ་ནས་ངེད་གཉིས་འགྲོག་ནས་འཚིག་ཇ་འཐུང་སར་ང་རང་ནམ་རྒྱུན་དུས་ཚོད་ཡོད་དུས་སུ་དེ་རུ་སོང་དེ་གློག་ཀླད་དྲ་རྒྱའི་བརྡ་རྟགས་ཡོད་སྟབས། དེ་ནས་ཆུ་ཚོད་གཉིས་རིང་དུ་ཟིན་བྲིས་ཁག་ལ་ཀློག་མྱུལ་བྱེད་དུ་སྤྱོད་དུས་སུ།དུས་བབ་ཚང་གི་ཟིན་བྲིས་ནང་དུ་བདག་གི་གྲོགས་པོ་ལྷ་ཆབ་སྤྱིན་པ་འཛུལ་ཞུགས་བྱས་འདུག་པ་དེ་མཐོང་བས་དངོས་ནས་དགའ་སོང་།ཡ་མཚར་བ་ཞིག་ལ་ཉིན་འགའི་སྔོན་དུ་ངས་ལྷ་ཆབ་ཁོ་རང་ཟིན་བྲིས ་ནང་དུ་ཞུགས་ཐུབ་པ་ཡིན་ན་ཅི་འདྲའི་བཟང་སྙམ་སོང་མོད། འཛམ་གླིང་གི་མི་མང་ཕལ་ཆེ་བས་ཚོར་བ་འདི་འདྲ་ཞིག་ཡིན་ནམ་སྙམ་ཞོར་ང་རང་བྲེལ་བྲེལ་འཚབ་འཚུབ་ངང་དུ་གངས་མཚོས་རླངས་འཁོར་དུ་བསྡད་ནས་ལས་ཀའི་ཕྱོགས་སུ་ཤར་བསྐྱོད་བྱས་པ་ཡིན།དེ་རིང་ནི་དངོས་སུ་ཁོ་རང་ཟིན་བྲིས་སུ་ཞུགས་འདུག་པ་དེ་མཐོང་མ་ཐག་ང་རང་རང་གི་ཚོར་བའི་དྲན་སྟངས་ཁ་ཤས་ལ་ཧ་ལས་སོང་། ལས་ཀ་ནི་རྒྱུན་ལྡན་ཡིན་ན་ཡང་།དེ་རིང་ཟ་ཁང་ནང་ནས་ཆུ་ཚོད་བརྒྱད་ཀྱི་རིང་དུ་བསྡད་ཀྱང་། སྐུ་མགྲོན་ནི་སྤྱིན་བདག་རེད་ཟེར་བས་མི་གཉིས་ལས་སྐུ་མགྲོན་གཅིག་ཀྱང་མ་ཡོང་ན་ཡང་། ངེད་ཅག་ལས་མི་དག་གིས་ཆུ་ཚོད་ཚང་བར་སྒུག་ནས་ཡར་འགྲོ་མར་འགྲོ་བྱས་དེ་བསྡོད་རྒྱུ་ལས་ཐབས་ཤེས་གང་ཡང་མེད། ཆུ་ཚོད་བཅུ་གཅིག་ཟིན་པར་སྐར་མ་གཅིག་འདུག ང་རང་གིས་ཐོ་འགོད་བྱས་དེ་རང་གི་བསྡོད་གནས་སུ་ལོག་ཞོར་དུ་གངས་མཚོ་རྗོ་སུ་ལམ་དུ་ཡོད་པ་དེ་ལ་ཁ་བརྡ་བྱས། ༤།༢།༠༩
ཞོགས་པ་ཆུ་ཚོད་དགུ་བ་ཙམ་ཡོལ་ནས་ཡར་བླངས་དེ་འཚིག་ཇ་ཁང་དུ་བྱིན་ནས་ཆུ་ཚོད་བཞིའི་རིང་དུ་ཟིན་བྲིས་དག་ཀློག་པ་དང་ལན་བྲིས་པ་སོགས་བྱས་དེ་འཚིག་ཇ་འཐུང་ས་དེ་ནས་བསྡད་པ་ཡིན། ཆུ་ཚོད་ལྟར་ལས་ཀ་བྱེད་དུ་སོང་། དེ་རིང་ཆུ་ཚོད་བདུན་ཡོལ་ནས་སྒོ་ཕྱེ་ནས་ཅུང་མ་འགོར་བས་སྐུ་མགྲོན་དག་ནི་ཆུ་ཚོད་བཅུ་དང་ཕྱེད་ཀ་ཟིན་རེག་བར་དུ་གཅིག་རྗེས་གཅིག་གིས་མཐུད་དེ་རྒྱུན་ཆད་མ་སོང་བ་དང་ངེད་ཚོ་ཡང་བྲེལ་བྲེལ་འཚབ་འཚུང་ངང་ནས་ལས་མཇུག་བསྡུས་དེ་ང་རང་ནང་དུ་ལོག་མ་ཡོང་སྔོན་དུ་གངས་མཚོས་སང་ཉིན་དགོང་མོ་ང་རང་གི་བོད་རིགས་གྲོགས་པོ་བསྐོར་ཞིག་ལ་དགོང་ཟས་ཟ་བར་ཁོ་མོའི་ཨ་མའི་ནང་དུ་སྐད་བཏང་ཡོད་པ་དང་ང་རང་གིས་ཀྱང་ཐེ་ལན་གྲའི་ཟ་མ་རེ་ཟུང་ཞིག་བཟོས་ན་ཟེར་བ་སོགས་ཀྱིས་བསམ་ཚུལ་མང་བོ་ཞིག་བཤད་སོང་། གང་ལྟར། ང་རང་སང་ཉིན་ཞོགས་པ་ཆུ་ཚོད་བཅུ་བའི་སྟེང་འགྲིམ་འགྲུལ་རླངས་འཁོར་ནང་དུ་འབུད་དེ་ཨེས་སུ་རལ་གྱི་དབུས་དང་རྒྱལ་ས་རྗོ་སུ་ལམ་དུ་ལོག་དགོས་ཀྱི་ཡོད། འདི་ནས་རླངས་འཁོར་ནང་ནས་ཆུ་ཚོད་བཞི་དང་ཕྱེད་ཀའི་ལམ་ཐག་རེད།
དེ་རིང་ང་རང་ལ་དམིགས་བསལ་གྱིས་རང་གི་མི་ཚེ་ནང་དུ་༧རྒྱལ་བ་རིན་པོ་ཆེའི་རྨི་ལམ་རྨིས་པ་དག་ལ་ཕྱིར་དྲན་གསལ་བོ་ཞིག་བྱེད་དགོས་བྱུང་སོང་ལ། རྨི་ལམ་དེ་དག་གིས་ཀྱང་ང་རང་ལ་མ་འོངས་ལུང་བསྟན་མང་བོ་ཞིག་གནང་ཡོད་པ་ཡང་། གཞི་ནས་གཅིག་གཅིག་གཉིས་གཉིས་བྱས་དེ་སེམས་སུ་གསལ་ནས་ཡོང་གི་འདུག་པ་དེའི་ང་རང་གི་སེམས་ནང་དུ་དམིགས་གསལ་གྱིས་རྒྱལ་བ་རིན་པོ་ཆེ་དྲན་པ་ཞིག་བྱུང་སོང་། སྤྱན་རས་གཟིགས་ལ་ཕྱག་འཚལ་ལོ། གང་ནས་སྐྱེ་ཞིང་སྐྱེ་བ་ཐམས་ཅད་དུ། ཁྱེད་དང་མི་འབྲལ་བར་བྱིན་གྱིས་སློབས་ཤིག བདག་དང་ཉམ་ཐག་འགྲོ་བ་སེམས་ཅན་ཐམས་ཅད་སངས་རྒྱས་ཀྱི་གོ་འཕང་མ་ཐོབ་པ་དེ་སྲིད་དུ།འབྲལ་མེད་རྗེས་སུ་འཛིན་གྱུར་ཅིག ༥།༢།༠༩
མུ་འགོད།
ཐོག་མར་གནམ་ཐང་དུ་འགྲོ་སྐབས་ཁྱེད་ཀྱིས་དག་ཡིག་གསར་བསྒྲིགས་ཤིག་ཁྱེར་ཡོད་ཟེར་གྱིན་འདུག་ག
ད་ལྟ་དག་ཡིག་ལག་ན་ཡོད་དམ།
བཀླགས་ནས་བུད་སོང
ད་ལྟ་རང་ཁྱེད་ཀྱི་འཁོར་བ་སྐྱ་བོ་དེ་ཡི་ནང་དུ་འགྲོ་ངེས་ཡིན།
ཁྱོད་ལ་རྨི་ལམ་མང་ཡ།
ཁོམ་པ་རེ་ཡོད་ན་ངའི་འཁོར་ངན་ནང་ལ་མིག་ཟུར་ཞིག་བྱོས།
ཤུ་རེ་བྱེད་ཀྱི་ཡོད། ཁྱེད་རང་བར་ནས་རིག་མ་སོང་། ཕ་ཡུལ་ལ་སོང་བ་ཡིན་ནམ
ཨ་རོགས། ཁྱོད་ཀྱིས་ད་དུང་མུ་མཐུད་ནས་འབྲི་བཞིན་ཡོད་དམ། ངས་ཁྱོད་ཀྱིས་རྒན་མོའི་ཨ་མར་འཁོན་རེས་བྱས་བ་དེ་ནས་བཟུང་ཀློག་ཐུབ་མ་སོང་། དེ་རིང་སོ་མ་ཡུལ་ནས་ཕྱིར་འབྱོར་བ་ཡིན། འདི་ར་ད་དུང་བཀླགས་མེད། ཡུན་གྱིས་བཀླག་གི་ཡིན། འདི་འབྱོར་ཐོ་ཙམ་ཡིན།