ཁ་སང་བལ་ཡུལ་བོད་མིའི་འབྲེལ་མཐུད་པ་འཕྲིན་ལས་བླ་མ་དང་དྲུང་ཡིག་བྱམས་པ་དོན་གྲུབ་གཉིས་ཀྱིས་བལ་ཡུལ་སྐྱབས་བཅོལ་བོད་མིའི་དཀའ་ངལ་གྱི་གསར་འགོད་ལྷན་ཚོགས་ཤིག་བསྐྱངས་པར་རྐྱེན་བྱས་ཏེ། ཁོང་ཉིས་བལ་ཡུལ་ཉེན་རྟོག་པས་བཀག་ཉར་བྱས་འདུག
ཟླ་འདིའི་ཕྱི་ཚེས་ ༥ ཉིན་བོད་ཡུལ་བོད་མིའི་སྤྱི་ཁྱབ་འབྲེལ་མཐུད་ལས་ཁུངས་ཀྱིས་གོ་སྒྲིག་འོག་རྒྱལ་ས་ཀ་ཐ་མན་གྲུའུ་ཡོད་པའི་ཨེམ་བྷ་སཱ་ཌོར་ Ambassador ཞེས་པའི་མགྲོན་ཁང་དུ་གསར་འགོད་ལྷན་ཚོགས་ཤིག་བསྐངས་ཏེ། བལ་ཡུལ་སྐྱབས་བཅོལ་བོད་མིའི་གནས་སྟངས་སྤྱི་དང་། ལྷག་པར་དུ་བལ་ཡུལ་གནས་སྡོད་བོད་མི་རྣམས་ལ་བལ་ཡུལ་གཞུང་ཕྱོགས་ནས་གནས་སྡོད་ལག་འཁྱེར་མེད་པའི་དབང་གིས་བོད་མི་ཚོར་དཀའ་ངལ་རིམ་པར་འཕྲད་ཀྱི་ཡོད་པའི་ཐད་གཞུང་ཕྱོགས་ནས་བོད་མི་ཚོར་གནས་སྡོད་ཆོག་པའི་ལག་འཁྱེར་སྤྲོད་རྒྱུའི་འབོད་སྐུལ་གསལ་བསྒྲགས་ཤིག་གནང་ཡོད་སྟབས། ཉིན་དེའི་ཉིན་གུང་ཆུ་ཚོད་ ༡༢ ཡས་མས་སུ་བལ་ཡུལ་ཉེན་རྟོག་པས་བལ་ཡུལ་བོད་མིའི་དང་བླངས་སྤྱི་ཁྱབ་འབྲེལ་མཐུད་པ་དང་དྲུང་ཡིག་གཉིས་ལས་ཁུངས་ནས་ཧཱ་ལི་མཱ་ཌོལ་ཀཱ་ཞེས་པའི་བཙོན་ཁང་དུ་འཁྲིད་དེ་འདྲི་གཅོད་བཀག་ཉར་བྱས་འདུག
གནད་དོན་འདིའི་ཐད་གསར་འགོད་པས་བོད་གཞུང་ཕྱི་དྲིལ་དྲུང་ཆེ་ཐུབ་བསྟན་བསམ་འཕེལ་ལགས་སུ་བཀའ་འདྲི་ཞུས་པར་ཁོང་གིས་གནས་ཚུལ་འདིའི་སྐོར་ང་ལ་དམིགས་བསལ་བཤད་རྒྱུ་གང་ཡང་མེད་ཅེས་བརྗོད་བྱུང་།
ཕྱི་ཚེས་ ༥ ཉིན་གྱི་གསར་འགོད་གསལ་བསྒྲགས་དེའི་སྟེང་། དང་བླངས་སྤྱི་ཁྱབ་འབྲེལ་མཐུད་པ་འཕྲིན་ལས་བླ་མ་ལགས་ཀྱིས་བལ་ཡུལ་གཞུང་གིས་སྐྱབས་བཅོལ་བོད་མི་ཚོར་གནས་སྡོད་ཀྱི་གོ་སྐབས་སྐབས་སྤྲད་པ་དེ་ཧ་ཅང་བཀའ་དྲིན་ཆེན་པོ་ཡིན་ཡང་། ད་ལྟའི་ཆར་ཡང་སྐྱབས་བཅོལ་བོད་མིའི་ཁྲོད་མཐོ་རིམ་སློབ་གྲྭར་འགྲོ་བཞིན་པའི་སློབ་མ་དང་ཚོང་རྒྱག་མཁན་སོགས་བོད་མིི་མང་ཆེ་བར་གནས་སྡོད་ལག་འཁྱེར་མེད་པའི་དཀའ་ངལ་འཕྲད་ཀྱི་ཡོད་སྟབས། བལ་ཡུལ་གཞུང་ཕྱོགས་ནས་བོད་མི་སྐྱབས་བཅོལ་བ་ཡོངས་ལ་གནས་སྡོད་ལག་འཁྱེར་སྤྲད་དེ་དཀའ་ངལ་སེལ་ཐབས་བྱ་རྒྱུ་དང་། ད་ལྟ་བལ་ཡུལ་གཞུང་གིས་བཟོ་བཞིན་པའི་རྩ་ཁྲིམས་གསར་བའི་ནང་སྐྱབས་བཅོལ་བའི་གནས་སྟངས་ཁ་གསལ་འགོད་རྒྱུའི་རེ་སྐུ་གནང་ཡོད་པར་མ་ཟད། ཉེ་ཆར་བལ་ཡུལ་གྱི་ལག་འཁྱེར་ཐོག་ཕྱི་རྒྱལ་དུ་འགྲོ་བཞིན་པའི་མི་གཉིས་རྒྱལ་སྤྱིའི་གནམ་ཐང་ནས་བལ་ཡུལ་ཉེན་རྟོག་པས་འཛིན་བཟུང་བྱས་རྗེས་བལ་ཡུལ་འབྲེལ་ཡོད་ལས་ཁུངས་ཀྱིས་འཕྲིན་ལས་བླ་མ་ལ་འབྲེལ་བ་གནང་སྟེ་བོད་མི་ཡིན་སྐོར་བརྗོད་ཡོད་ཀྱང་། ཁོང་གིས་བལ་ཡུལ་དབུས་སྣེ་ལེན་ཁང་དང་མཆོད་རྟེན་ཉེ་འགྲམ་གྱི་ལས་ཁུངས། ངྷ་རམ་ས་ལའི་འབྲེལ་ཡོད་ལས་ཁུངས་བཅས་སུ་འབྲེལ་བ་དང་ཞིབ་བཤེར་བརྒྱུད། གནམ་ཐང་ནས་འཛིན་བཟུང་བྱས་པའི་མི་དེ་གཉིས་ཀྱིས་བོད་མིའི་རང་བཙན་ལག་དེབ་དང་ངོས་སྦྱོར་ཡིག་གེ་ཚང་མ་རྫུན་བཟོ་བྱས་པ་ཡིན་པ་དང་། བོད་པ་ཡིན་པའི་བདེན་དཔང་ཅི་ཡང་མེད་པར་ར་འཕྲོད་བྱུང་ཡོད་འདུག དེ་ཡང་གཙོ་བོ། བལ་ཡུལ་དུ་བོད་མི་མ་ཡིན་པའི་མི་མང་པོ་ཞིག་གིས་འདས་པའི་དུས་ནས་བོད་མིའི་རང་བཙན་ལག་དེབ་སོགས་རྫུན་བཟོ་བྱས་ཏེ་ཕྱི་ཕྱོགས་ལ་སྐྱོད་ཐབས་བྱས་ཡོད་པའི་རིགས་མང་པོ་བྱུང་བ་ལ་བརྟེན་ནས་བོད་མི་ཡིན་པའི་བརྡ་ལན་སྤྲད་ཡོད་སྐོར་ཡང་གསལ་བཤད་གནང་འདུག
ད་ལྟའི་བལ་ཡུལ་བོད་མི་སྐྱབས་བཅོལ་བ་དག་གི་དཀའ་ངལ་ལ་དམིགས་ཏེ། མ་འོངས་པར་དང་བླངས་སྤྱི་ཁྱབ་འབྲེལ་མཐུད་པའི་ངོས་ནས་བལ་ཡུལ་གནས་སྡོད་སྐྱབས་བཅོལ་བོད་མི་སྤྱི་ཡོངས་ཀྱི་མི་གྲངས་དང་གནས་སྡོད་ལག་འཁྱེར་ཡོད་མེད་བཅས་ཀྱི་གྲངས་འབོར་ཞིབ་བཤེར་གནང་སྟེ། བལ་ཡུལ་གཞུང་ལ་རེ་སྐུལ་བྱ་རྒྱུའི་འཆར་གཞི་ཡོད་ཚུལ་བརྗོད་ཡོད་པ་རེད།
བལ་ཡུལ་བོད་མིའི་སྤྱི་ཁྱབ་འབྲེལ་མཐུད་པ་འཕྲིན་ལས་བླ་མ་ལགས་ནི། བལ་ཡུལ་ཤར་ཕྱོགས་མཐའ་མཚམས་ཀྱི་རྭ་སོལ་ཝ་རྫོང་དུ་སྐྱེས་ཡོད་འདུག་ལ། འདི་ལོ་ཕྱི་ཟླ་ ༦ པའི་ཚེས་ ༡༧ ཉིན་བལ་ཡུལ་བོད་མིའི་དང་བླངས་སྤྱི་ཁྱབ་འབྲེལ་མཐུད་པའི་ལས་འགན་བཞེས་ཏེ། བལ་ཡུལ་བོད་མིའི་བདེ་སྡུག་ཐད་ཕྱག་ལས་གནང་གི་ཡོད་པ་རེད།
གསར་འགོད་པ། དོན་གོ
ད་ལྟའི་རྒྱ་ནག་གཞུང་དེ་ཁྲིམས་མེད་ལུགས་མེད་ཅིག་ཡིན་པ་ལྟར། བལ་ཡུལ་གཞུང་དེ་ཡང་རྙོག་གླེང་བཟོ་བཞིན་ཡོད་པར་རྒྱ་གཞུང་ངོ་ཚ་བའི་གནས་རེད། འཕྲིན་ལས་བླ་མ་རྒྱལ་འགྱུར་ཅིག །