༧གོང་ས་མཆོག་གིས་དཔྱ་དངུལ་ལག་དེབ་བཞེས་ཡོད་འདུག

༧གོང་ས་མཆོག་གི་དགོངས་བཞེད་ལྟར་དེ་རིང་བཀའ་བློན་ཁྲི་པ་མཆོག་དང་དཔལ་འབྱོར་བཀའ་བློན་རྣམ་གཉིས་རྒྱལ་བའི་ཕོ་བྲང་དུ་བཅར་ཏེ། ༧གོང་ས་མཆོག་ལ་བཙན་བྱོལ་བོད་མིའི་དང་བླང་དཔྱ་དངུལ་ལག་དེབ་འབུལ་ལམ་ཞུས་ཡོད་འདུག

བོད་གཞུང་དྲ་བའི་སྟེང་གནས་ཚུལ་བཀོད་པ་ལྟར་ན། ༸གོང་ས་མཆོག་ནས་འདི་ལོ་ཕྱི་ཟླ་ ༥ ཚེས་ ༢༩ ཉིན་བཅའ་ཁྲིམས་བསྐྱར་བཅོས་ལ་ཆོག་མཆན་བསྩལ་བ་ནས་བཟུང་། བོད་ཀྱི་ཆབ་སྲིད་ཀྱི་སྐུ་དབང་འོས་འདེམས་བྱས་པའི་མགོ་ཁྲིད་ལ་རྩིས་སྤྲོད་མཛད་པ་དང་མཉམ་དུ་བཙན་བྱོལ་བོད་མིའི་དང་བླང་དཔྱ་དངུལ་ཕྱག་དེབ་བཞེས་གནང་མཛད་རྒྱུའི་དགོངས་བཞེས་བྱུང་བ་ལྟར། དེ་རིང་བོད་མིའི་སྒྲིག་འཛུགས་ཀྱི་བཀའ་བློན་ཁྲི་པ་མཆོག་དང་དཔལ་འབྱོར་བཀའ་བློན་རྣམ་གཉིས་རྒྱལ་བའི་ཕོ་བྲང་དུ་ཆེད་བཅར་གྱིས་དང་བླང་དཔྱ་དངུལ་ལག་དེབ་དངོས་སུ་འབུལ་ལམ་ཞུས་ཡོད་འདུག

བོད་གཞུང་དྲ་བར།“༧གོང་ས་སྐུ་ཕྲེང་བཅུ་བཞི་པ་ཆེན་པོ་མཆོག་ནི་ཕྱི་ལོ་ ༡༦༤༢ ལོར་༧གོང་ས་ལྔ་པ་ཆེན་པོས་ཆོལ་གསུམ་བོད་ལྗོངས་ཡོངས་ལ་དབང་བསྒྱུར་བའི་དགའ་ལྡན་ཕོ་བྲང་གི་གཞུང་དབུ་བརྙེས་པ་ནས་བཟུང་བོད་ཀྱི་ལུགས་གཉིས་ཀྱི་མངའ་དབང་ཆ་ཚང་༧གོང་ས་སྐུ་ཕྲེང་ན་རིམ་ནས་བདག་གིར་བཞེས་བཞིན་པའི་རྒྱལ་ཁབ་ཀྱི་དབུ་ཁྲིད་ཡིན་པའི་ཆ་ནས་ད་བར་དང་བླང་དཔྱ་དངུལ་གནང་ཐབས་མ་བྱུང་ཡང་། ད་ཆ་དེའི་གནས་བབ་འགྱུར་བ་ཕྱིན་པའི་དབང་གིས་འདི་ལོའི་ཕྱི་ཟླ་ ༥ ཚེས་ ༢༩ ནས་དབུ་འཛུགས་ཀྱིས་དང་བླང་དཔྱ་དངུལ་གསོལ་བསྩལ་གནང་སྟེ་ཕྱག་དེབ་དགྱེས་བཞེས་མཛད་ཡོད” ཅེས་བཀོད་འདུག