བསོད་ནམས་རྡོ་རྗེ་ལགས་སུ་ངྷ་ས་ས་གནས་མགོ་འཛིན་གྱི་འོས་ཆོས་ཚང་མིན་གྱི་གླེང་རྙོག་ཐད་དོ་བདག་གིས་གསལ་བཤད་གནང་ཡོད་ལ། ནང་སྲིད་དྲུང་འཕར་ལཊ་ཀྱིས་ཀྱང་འོས་བསྡུ་ཡག་པོ་བྱུང་སོང་། མི་འགྱང་བར་རྩིས་སྤྲོད་རྩིས་ལེན་བྱ་རྒྱུ་རེད་ཟེར།
བཞུགས་སྒར་ངྷ་རམ་ས་ལའི་ས་གནས་མགོ་འཛིན་གྱི་འོས་འདེམས་ཐེངས་གཉིས་པའི་ཁྲོད། ས་གནས་གཞོན་ནུའི་ཚོགས་ཟུར་བསོད་ནམས་རྡོ་རྗེ་ལགས་སུ་འོས་གྲངས་བརྒྱ་ཆ་ ༥༣།༦༠ ཙམ་ཐོབ་སྟེ། ངྷ་ས་ས་གནས་མགོ་འཛིན་དུ་བདམས་ཐོན་བྱུང་ཡོད་ཀྱང་། འོས་གྲངས་ཞིབ་བཤེར་སྐབས་དྲང་བདེན་བྱུང་ཡོད་མེད་དང་། ལྷག་པར་དུ་བསོད་ནམས་རྡོ་རྗེ་ལགས་ལ་འོས་ཆོས་ཚང་ཡོད་མེད་ཀྱི་རྙོག་གླེང་ཞིག་བྱུང་ཡོད། དེ་ནི་བསོད་ནམས་རྡོ་རྗེ་ལགས་ཀྱི་སྐྱེས་ཡུལ་ཀུ་ལུ་མ་ཎ་ལི་ཡིན་པ་དང་། ཁོང་གི་རང་བཙན་ལག་དེབ་ཀྱང་ས་གནས་དེ་གར་བཟོས་ཡོད་སྟབས། བཞུགས་སྒར་ངྷ་རམ་ས་ལའི་ས་གནས་མགོ་འཛིན་གནང་ཆོག་གི་མེད་ཚུལ་བཤད་ཡོད།
བསོད་ནམས་རྡོ་རྗེ་ལགས་ཀྱིས་བརྗོད་ན། བཙན་བྱོལ་བོད་མིའི་བཅའ་ཁྲིམས་ནང་བོད་མི་སུ་འདྲ་ཞིག་ཡིན་རུང་། ས་གནས་ཞིག་ནས་ས་གནས་གཞན་ཞིག་གི་ཁོངས་སུ་ཚུད་རྒྱུར། སྔར་ཡོད་པའི་ཁང་པ་དང་ཞིང་ཁའི་ཐོབ་ཐང་ཡོངས་རྫོགས་ཁྲིམས་མཐུན་ཐོག་ས་གནས་གཞིས་མགོ་དེར་རྩིས་སྤྲོད་གནང་ཟིན་པ་དང་། རང་ཉིད་འགྲོ་ཡུལ་གྱི་ས་གནས་དེའི་ཁོངས་ནས་ལོ་ ༥ ཙམ་བསྡད་ཡོད་པ་ཞིག་ཡིན་ན་རང་བཞིན་གྱིས་ས་གནས་དེའི་ཁོངས་མི་བཟོ་ཆོག་པའི་ཆ་རྐྱེན་ཚང་ཡོད་སྟབས། བསོད་རྣམས་རྡོ་རྗེ་ལགས་སྐྱེས་ཡུལ་ཀུ་ལུ་མཱ་ཎ་ལི་ཡིན་ཡང་། ཁོང་ལ་བཅའ་ཁྲིམས་ཀྱི་ཆ་རྐྱེན་རྣམས་ཚང་ཡོད་པས་ངྷ་ས་ས་གནས་མགོ་འཛིན་གྱི་འོས་མིའི་ཁྲོད་ཞུགས་པར་ཆ་རྐྱེན་ཚང་ཡོད་པ་དང་། མ་འོངས་པའི་བདུན་ཕྲག་གཉིས་ནང་ཁོང་གིས་ནང་སྲིད་ལས་ཁུངས་ཀྱི་གོ་སྒྲིག་ལྟར་ས་གནས་མགོ་འཛིན་གསར་རྙིང་གི་རྩིས་སྤྲོད་རྩིས་ལེན་གནང་རྒྱུ་ཡིན་ཟེར།
བསོད་ནམས་རྡོ་རྗེ་ལགས་ཀྱིས། “ ང་ཚོས་ངྷ་སའི་ཉམ་ཐག་མི་མང་གི་དངོས་ཡོད་དཀའ་ངལ་ལ་ཞིབ་འཇུག་བྱས་ཏེ་རོགས་རམ་བྱ་རྒྱུ་དང་། མྱོས་རྫས་སྤྱོད་མཁན་དང་གཞོན་སྐྱེས་ལས་མེད་ཚོར་ངྷ་ས་བོད་པའི་ཟ་ཁང་དང་མགྲོན་ཁང་ཁག་གི་སྦྱིན་བདག་ལ་འབྲེལ་བ་བྱས་ཏེ་ལས་ཀ་འཚོལ་རྒྱུ། ༧གོང་ས་མཆོག་གི་སྐུ་ཕྱཱ་དང་ངྷ་སའི་ཁོར་ཡུག་སྲུང་སྐྱོབ་བཅས་ལ་འབད་བརྩོན་གནང་རྒྱུ་ཡིན་ ” ཞེས་བརྗོད་བྱུང་།
དབུས་འོས་བསྡུ་ལས་ཁུངས་ཀྱི་འགན་འཛིན་འཇམ་དཔལ་ཆོས་བཟང་ལགས་ཀྱིས་གསུངས་དོན། “ ངྷ་ས་ས་གནས་མགོ་འཛིན་གྱི་འོས་བསྡུ་དེ་དབུས་འོས་བསྡུའི་ལས་ཁུངས་ཀྱི་སྒྲིག་གཞིའི་ལྟར་ལག་བསྟར་གནང་ཡོད་ཀྱང་། ཐེངས་འདིའི་འོས་བསྡུའི་ནང་དབུས་འོས་བསྡུ་ལས་ཁུངས་ནས་ལག་པ་འཆང་ཡོད་པ་མ་རེད་ ” ཅེས་བརྗོད་བྱུང་།
ནང་སྲིད་དྲུང་འཕར་དོན་གྲུབ་རྡོ་རྗེ་ལགས་ཀྱིས“ ད་ཐེངས་ངྷ་ས་ས་གནས་མགོ་འཛིན་གྱི་འོས་བསྡུ་ཡག་པོ་བྱུང་ཡོད་པ་རེད། ནང་སྲིད་ལས་ཁུངས་ཀྱི་ངོས་ནས་མི་འགྱང་བར་ས་གནས་མགོ་འཛིན་གསར་རྙིང་གི་རྩིས་ཁྲ་རྩིས་ལེན་གནང་དུ་འཇུག་རྒྱུ་ཡིན་ ” ཡིན་ཞེས་གསུངས་སོང་།
ཟླ་སྔོན་མའི་ཕྱི་ཚེས་ ༡༠ ཉིན་བཞུགས་སྒར་ཁུལ་གྱི་མི་མང་ཚོས་ས་གནས་མགོ་འཛིན་འོས་འདེམས་ཐེངས་གཉིས་པ་དེ་གནང་ཡོད་ཅིང་། ཐེངས་འདིར་ངྷ་ས་ཁུལ་དུ་དེབ་སྐྱེལ་བྱེད་མཁན་ ༡༠༠༠༠ དང་། དངོས་སུ་འོས་ལྡུག་མཁན་ ༩༤༤ ཙམ་བྱུང་ཡོད་པ་ལས་བསོད་ནམས་རྡོ་རྗེ་ལགས་སུ་འོས་ཤོག་ ༥༠༦ དང་། བརྒྱ་ཆ་ ༥༣།༦༠ ཙམ་ལོངས་ཏེ་ཨང་དང་པོ་ཆགས་ཡོད་པ་དང་། དྭངས་ཟུར་བུ་ཆུང་ཚེ་རིང་ལགས་སུ་འོས་ཤོག་ ༤༡༦ དང་། བརྒྱ་ཆ་ ༤༤།༦ ཙམ་ལོངས་ཏེ་ཨང་གཉིས་པ་བཅས་ཆགས་ཏེ། ངྷ་ས་ས་ནས་གཞོན་ནུའི་ཚོགས་ཟུར་བསོད་ནམས་རྡོ་རྗེ་ལགས་ངྷ་རམ་ས་ལའི་ས་གནས་མགོ་འཛིན་དུ་བདམས་ཐོན་བྱུང་ཡོད།
སྔར་ལོའི་ཕྱི་ཟླ་ ༡༡ པའི་ནང་བཞུགས་སྒར་ངྷ་རམ་ས་ལའི་ས་གནས་མགོ་འཛིན་འོས་འདེམས་སྐབས། འོས་མི་ ༦ ལ་དངོས་གཞིའི་འོས་ཤོག་བླུགས་སྐབས་འོས་ཤོག་ཁ་ཐོར་དུ་ཕྱིན་ཏེ་བརྒྱ་ཆ་མ་ལོངས་སྟབས། ངྷ་ས་ས་གནས་མགོ་འཛིན་བདམས་ཐུབ་མེད་པ་དང་། སྐབས་དེའི་འོས་བསྡུའི་ཁྲོད་ཁྱོན་མི་ ༡༥༠༠ ཙམ་བྱུང་ཡོད་པའི་ཁྲོད། སྐུ་ཞབས་བསོད་ནམས་རྡོ་རྗེ་ལགས་སུ་འོས་གྲངས་ ༤༠༥ ཐོབ་སྟེ་ཨང་གཉིས་པ་ཆགས་ཡོད་འདུག
གསར་འགོད་པ། དཔལ་ལྡན།
བསོད་ནམས་རྡོ་རྗེ་ལགས་སུ་རྡ་ས་ས་གནས་མགོ་འཛིན་གྱི་འོས་ཐོབ་པར་སྙིང་ཐག་པ་ནས་དགའ་ཡོད །བཀྲ་ཤིས་བདེ་ལེགས་ཞུ །
ས་གནས་འོས་བསྡུ་ལེགས་གྲུབ་བྱུང་བ་ལ་དགའ་བསུ་ཞུ། ས་གནས་འོས་བསྡུ་ལེགས་གྲུབ་བྱུང་ན་རང་བཞིན་གྱིས་བོད་མིའི་སྤྱི་མཐུས་དང་བཀའ་ཁྲིའི་འོས་བསྔུ་དེ་ལ་ཡང་རང་བཞིན་གྱིས་ཕན་འབྲས་ཐོན་ངེས་རེད། སླར་ཡང་གཞོན་སྐྱེས་ཤིག་ཐོན་པ་དགའ་བསུ་ཞུ།
སྤྱི་ལ་ཕན་པའི་ལས་དོན་འགྲུབ་མཁན་ཡིན་ན་བོད་མི་སུས་ཀྱང་ས་གནས་འགོ་འཛིན་གནང་ཀྱང་ཁྱད་མེད་ རང་ཡུལ་མེད་པའི་སྤྱི་ཚོགས་ལ་ངའི་ས་དང་ཁོ་ཡུལ་སོགས་མིན་པར་ཕན་པའི་མི་ཤིག་ཡིན་ན་འགྲིག
རྩིས་སྤྲད་རོགས་གནང།་དེ་ཡང་ལོ་ཆུང་ཆུངཞིག་རེད་འདུག་ག