མི་ལྔ་བརྒྱས་རང་ཤི་རྒྱག་རྩིས་བྱས།

རྒྱ་ནང་ཅང་ཞིས་ཞིང་ཆེན་ནང་ལས་བཟོ་བ་ ༥༠༠ སྡེབ་གཅིག་ཏུ་ཟམ་ཐོག་ནས་མཆོངས་ཏེ་རང་ཤི་རྒྱག་འཆར་གྱི་ལས་འགུལ་ཞིག་སྤེལ་བར་རྒྱ་གཞུང་གིས་དྲག་རྡུང་འཛིན་བཟུང་བྱས་འདུག 

ཟླ་འདིའི་ཕྱི་ཚེས་ ༤ ཉིན། རྒྱ་ནག་ཅིང་ཞིས་ཞིང་ཆེན་ནན་ཁྲང་གྲོང་ཁྱེར་དུ་གཞི་རིམ་ཞིང་ལས་བ་དང་བཟོ་ལས་པ་ ༥༠༠ ལྷག་གིས་མགོ་ལ་རས་དཀར་པོ་དཀྲིས་ཤིང་། ལུས་ལ་ “མ་ཉེས་ཁག་གཡོགས” དང་ “རྫུན་འགེབས” སོགས་ཀྱི་ཡི་གེ་བྲིས་ཏེ། རྒྱ་གཞུང་ལ་ངོ་རྒོལ་ཆེད་ཟམ་ཐོག་ནས་སྡེབ་གཅིག་ཏུ་མཆོངས་ཏེ་རང་ཤི་རྒྱག་འཆར་གྱི་ལས་འགུལ་ཞིག་སྤེལ་ཡོད་པ་དང་། སྐབས་དེར་རྒྱ་གཞུང་གིས་དྲག་ཆས་དམག་མི་ ༥༠༠ ལྷག་བཏང་སྟེ་ངོ་རྒོལ་དེ་དག་གི་མཐའ་སྐོར་ཏེ་འགོག་སྲུང་བྱས་ཡོད་པ་མ་ཟད། ལས་འགུལ་བ་དག་ལ་དྲག་རྡུང་དང་སྐོར་ཞིག་འཛིན་བཟུང་བཀར་ཉར་བྱས་ཡོད་འདུག

ཧོང་ཀོང་ཤར་ཕྱོགས་ཉིན་རེའི་གསར་ཤོག་གིས་གནས་ཚུལ་སྤེལ་བ་ལྟར་ན། ནན་ཁྲང་གྲོང་ཁྱེར་གྱི་བཟོ་བ་དང་ཞིང་བ་མང་ཚོགས་ཀྱིས་རང་ཤི་རྒྱག་རྩིས་ཀྱིས་རྒྱ་གཞུང་ལ་ངོ་རྒོལ་བྱས་པ་དེ་ནི། ཅང་ཞིས་ཞིང་ཆེན་ཆེས་མཐོའི་མི་དམངས་ཁྲིམས་ཁང་གི་མགོ་གཙོ་གཞོན་པ་གཙོས་པའི་རྒྱ་གཞུང་མཐོ་རིམ་དཔོན་རིགས་ཚོས་དབང་ཆ་སྒེར་གཅོད་བྱས་ཏེ་མི་དམངས་ཀྱི་རྒྱུ་ནོར་ཧམ་ཟ་དང་།  ཁང་ཁྱིམ་དང་ས་ཁང་བདག་དབང་བཙན་འཕྲོག་བྱས་པ་མ་ཟད། གཞན་གུན་གསབ་དང་ཕོག་དངུལ་མ་ཐོབ་པར་ཞུ་གཏུག་བྱེད་མཁན་མང་པོ་ཞིག་ལ་མ་ཉེས་ཁག་གཡོགས་ཀྱིས་བཙོན་འཇུག་ཁྲིམས་ཐག་བཅད་པ་སོགས་ལ་བརྟེན་ཏེ་བྱུང་སྐོར་བཀོད་འདུག  

རང་ཤི་རྒྱག་པའི་ངོ་རྒོལ་ཁྲོད་ཞུགས་མཁན་མང་ཚོགས་ཤིག་གིས་བརྗོད་ན། ཅང་ཞིས་ཞིང་ཆེན་ཆེས་མཐོའི་མི་དམངས་ཁྲིམས་ཁང་གི་མགོ་གཙོ་གཞོན་པ་ཁྲིན་བྷེན་གྱིས།  ཕྱི་ལོ་ ༢༠༠༤  ནས་བཟུང་དབང་ཆ་སྒེར་གཅོད་བྱས་ཏེ། གཞུང་གི་འཛུགས་སྐྲུན་ཁག་གི་མ་དངུལ་སྒེར་ཟོས་དང་། ཁེ་ལས་བ་དག་དང་ལྐོག་འབྲེལ་གྱིས་མི་དམངས་ཀྱི་ས་ཁང་བཙན་འཕྲོག་བྱས་ཏེ་ཁྱོན་བསྡོམས་རྒྱ་སྒོར་དུང་ཕྱིར་ ༡ ལྷག་ལྐོག་ཟ་བྱས་ཡོད་ཚུལ་སོགས་བསྒྲགས་འདུག   

གསར་འགོད་པ། ཚེ་རིང་རྒྱལ།