དེ་རིང་ཉིས་སྟོང་དགུ་ལོའི་སྤྱི་ཟླ་བརྒྱད་པའི་ཚེས་གཅིག་གི་ཕྱི་དྲོ་རེད། ང་རང་ལས་ཀ་རུ་ཡོད། མཛའ་མོས་ང་རང་ལ་ཁ་པར་འབྱོར་ནས་ཁོ་མོ་གྲོགས་མོ་སྒྲ་ཝས་དང་ཝན་གཉིས་ཀྱི་མཉམ་དུ་སྨན་ཁང་དུ་སླེབས་ཚར་བ་ཡིན། གཅིག་བྱས་ན་ཁྱེད་རང་ལས་ཀ་མ་གྲོལ་སྔོན་དེར་ཞི་མོ་སྐྱེ་ན་ཐང་གི ད་ལྟ་ང་ལ་ན་ཟུག་དེ་འདྲ་དམིགས་བསལ་གང་ཡང་མེད་ཀི སྨན་པས་བཤད་ན་ཆུ་ཐོན་རྗེས་སུ་སྐྱེ་བར་ཐག་ཉེ་བ་རེད་ཟེར་གྱི་འདུག དེ་སྔོན་ང་ཚོ་མཚོ་འགྲམ་དུ་ཡོད་དུས། སྐྱེ་ལ་རན་པའི་རྟགས་མཚན་སླེབས་ནས་སྨན་ཁང་དུ་ཡོང་བཞིན་པའི་ལམ་སྐབས་སུ། ཆུ་ཐོན་སོང་། ཁྱེད་རང་གིས་ལས་ཀ་ཚར་བ་དང་ཐད་ཀར་སྨན་ཁང་གི་སྒོ་འགྲམ་ནས་འབབ་ཏེ་ང་རང་ཡོད་སར་ཤོག་ཟེར།
སྐད་ཆ་དེ་གོ་བ་དང་ང་རང་ཅུང་འཚབ་འཚུབ་དུ་གྱུར་ནས། ང་རང་ད་ལྟ་རང་ལས་ཀ་ནས་དགོངས་པ་ཞུ་ཐབས་ཁག་ན་ཡང་། ངས་ཐད་ཀར་འགན་འཛིན་ཨེས་རྒོལ་ལ་ཁ་པར་བཏང་ནས་དགོངས་པ་ཞུ་ཐབས་འདུག་མིན་བལྟས་ན་ག་འདྲ་འདུག་ཞེས་བཤད་དུས། མོས་མི་སྐྱོན་གི ཕལ་ཆེར། སྨན་པས་བཤད་པ་ལྟར་བདེན་པར་གྱུར་ཚེ། ཁྱེད་རང་གི་ལས་ཀ་གྲོལ་རེག་བར་ད་སྒུག་ཐུབ་ས་རེད་འདུག་ཟེར། ངས་ཀྱང་དེར་ཡིད་ཆེས་མི་བྱེད་རང་བྱེད་ཆགས་པ་མ་ཟད། ཐབ་ཚང་དུ་ང་རང་མེད་སོང་བ་ཡིན་ན། མ་བྱན་གཞན་མེད་ཀྱང་། ལས་རོགས་མ་ཐེ་ལན་གྲའི་བུད་མེད་རྒྱགས་པ་ཆུང་ཆུང་དེ་ཡིས་ཟ་མ་ཚང་མ་བཟོ་ཤེས་ཀྱི་ཡོད། ངས་ཁོ་མོ་ལ་ང་རང་གི་མཛའ་མོས་ཁ་པར་འབྱོར་བའི་སྐོར་བཤད་དུས། མོས་ཁྱེད་རང་བུད་ལ་སོང་། གཅིག་བྱས་ན་དོ་ནུབ་མགྲོན་པོ་མང་བོ་མེད་ས་རེད། ངས་ཕལ་ཆེར་མགོ་ཐོན་ངེས་ཡིན་ཟེར་ནས་བཤད་པ་དང་དུས་མཚུངས་སུ། སྐུ་མགྲོན་མི་ཉུང་བ་ཞིག་གི་ཟས་ཐོ་སྒེའུ་ཁུངས་ནས་ཞབས་ཞུ་མ་ཞིག་གིས་སྤྲད་སོང་།
ངས་གཅིག་བྱས་ན་ཁ་པར་འདྲ་སླེབས་ཡོང་སྙམ་ཞོར་དུ་ཟ་མ་གང་མགྱོགས་ཅི་མགྱོགས་ཀྱིས་བཟོས་པ་ཡིན། སྟབས་ལེགས་ནས་ལས་ཀ་གྲོལ་སོང་། དུས་ཚོད་དེ་ཡི་རང་དུ་གནས་ཚུལ་ཚང་མ་བདེ་ལེགས་རེད་འདུག ངས་མཛའ་མོ་ལ་ཁ་པར་བཏང་དུས་སུ། ཁོ་མོའི་གྲོགས་མོ་སྒྲ་ཝས་ཀྱིས་བླངས་སོང་། ཁོ་མོས་ད་ལྟ་སྐྱོན་གང་ཡང་མི་འདུག་ལ། ཚང་མ་བདེ་ལེགས་རེད། ཁོ་མོ་ད་ལྟ་བྱིས་སྐྱེ་ཁང་དུ་ཝན་དང་མཉམ་དུ་ཡོད། ཁྱེད་རང་ལྷོད་ལྷོད་བྱས་ནས་ཤོག ང་ཚོས་ཁྱེད་ལ་སྒུག་ནས་འདུག་ཟེར།
སྨན་ཁང་དུ་འབྱོར་ནས་མོ་རང་གི་འགྲམ་དུ་ཐོན་དུས་སུ། མོ་རང་གིས་ང་རང་མཐོང་བ་དང་ན་ཟུག་རེ་ཞིག་བརྗེད་པ་ལྟར། ཁྱེད་རང་སླེབས་སོང་བ་བཟང་གི ད་ཁོ་མོ་གཉིས་ཕྱིར་འགྲོ་རོགས་ཟེར་ནས་བཤད་ན་འགྲིག་གི་འདུག ངས་བསམ་ན་ད་དུང་ཅུང་འགོར་ས་རེད་འདུག སྒྲ་ཝས་འུ་གཉིས་ཀྱི་མགྲོན་པོ་རེད། ཁོ་མོ་འུ་གཉིས་ཀྱི་ནང་དུ་འགྲོ་དགོས། ཁྱེད་རང་གི་ལྡེ་མིག་ཁོ་མོ་སྤྲོད་ཅེས་བཤད་པ་ལྟར། ངས་ཁོ་མོ་གཉིས་ལ་ཐུགས་རྗེ་ཆེ། ག་དུས་སྐྱེ་ན་དེ་དུས་ངས་ཁྱེད་གཉིས་ལ་ཁ་པར་ནང་ནས་འཕྲིན་ཐུང་སྐུར་ངེས་ཡིན་ཞེས་ལམ་འཇུག་བྱས་པ་ཡིན། སྒྲ་ཝས་ཀྱིས་ངས་དོ་ནུབ་ཁ་པར་གྱི་སྒོ་ཕྱེ་ནས་འཇོག་ངེས་ཡིན། གལ་སྲིད། རོགས་པ་འདྲ་དགོས་གལ་བྱུང་ཚེ་དུས་ཚོད་ངེས་མེད་དུ་ཁྱེད་རང་གིས་ང་ལ་ཁ་པར་གཏོང་ཤོག་ཟེར། དེ་མཚུངས་ཀྱིས་ཝན་གྱིས་ཀྱང་སྐད་ཆ་དེ་བཤད་པ་དེར་སླར་ཡང་ངས་བཀའ་དྲིན་ཆེ་ཞུས་པ་ཡིན།
ང་རང་ཁོ་མོའི་ལག་པའི་ནང་དུ་འཐམ་ནས་ཉལ་ཁྲིའི་འགྲམ་དུ་ཡོད། སྨན་ཞབས་མ་ཞིག་ཡོང་ནས་ཁྱེད་རང་རེ་ཞིག་རིང་ཕྱི་ལོག་དུ་བསྡོད་དང་། སྨན་པས་བཟི་ཁབ་རྒྱགས་དགོས་ཀྱི་ཡོད་པ་རེད་ཟེར་བ་ལྟར། ང་རང་སྒོ་འགྲམ་ནས་སྒུག་ཞོར་དུ། སྐྱེ་ལ་རན་པའི་བུ་མོ་ཐར་མ་མཚོ་ལ་སྙན་ངག་ཐུང་ཐུང་ཞིག་བྲིས་པ་ཡིན།
མཛའ་མོ་ལ་ཟུག་རྔུ་ཕྲན་པུ་རེ་རྒྱགས་ཀྱི་འདུག་ན་ཡང་། ངུ་ཟུག་ཆེན་པོ་དེ་འདྲ་གང་ཡང་བཏབས་མ་སོང་བར། ང་ལ་མཚམས་རེར་སྐད་ཆ་འདྲ་བཤད་ཀྱི་འདུག དེ་དུས་སུ་ངེད་གཉིས་ཀྱིས་བུ་མོའི་མིང་ཐག་མ་གཅོད་པར་བཞག་ཡོད་པ་དེར། ངས་ཁོ་མོ་ལ་བུ་མོའི་མིང་ལ་ག་རེ་འདོག་འདོད་ཡོད་ན་ཁྱེད་རང་གི་འདོད་པ་ལྟར་ཡིན། ངས་དེ་ལ་མོས་མཐུན་བྱས་པ་ཡིན་ཟེར་ནས་མོ་རང་གི་ཐོད་པའི་སྒང་དུ་འོ་ཞིག་བྱས་པ་ཡིན། དངོས་ནས་བཤད་ན་སྐབས་འདི་འདྲ་ཞིག་ལ་ཁོ་མོ་ལ་སྐད་ཆ་སྙན་མོ་རེ་འཁོ་བ་ནི་བཟི་སྨན་ལས་ཀྱང་གལ་ཆེ་བ་ང་ཡིས་ཤེས་ནས་སྐད་ཆ་དེ་ལྟར་བཤད་དགོས་ཐུག་སོང་།
ཆུ་ཚོད་གཉིས་པ་སྐར་མ་ལྔའི་མ་ཟིན་གོང་དེར། མོ་རང་གིས་ན་ཟུག་དང་ངུ་འབོད་ཀྱང་རེ་ཞིག་ཆེ་རུ་སོང་བའི་སྐབས་དང་། མོ་རང་གིས་ཤུགས་གང་ཡོད་ཀྱིས་དབུགས་སྟོད་ནས་སྨད་ལ་དེད་པ་བཅས་ལ་བསྟེན། ངེད་གཉིས་ཀྱི་བུ་མོ་ཆུང་ཆུང་། འཇིག་རྟེན་མི་ཡུལ་གྱི་མངལ་སྒོ་དང་བོ། སྐྱེ་བའི་མ་དང་དྲིན་ཆེན་མའི་བྱམས་བརྩེ་ལས་སྐྱེ་བྱུང་། ངས་སྐྱེ་བའི་སྡུག་བསྔལ་ངེས་ལ་བསམ་བློ་གཏོང་ཞོར། རང་གི་མཛའ་མོའི་སྡུག་བསྔལ་དེ་དག་ལ་བསམ་ཞོར། དབུགས་སྟོད་ནས་སྨད་ལ་ཡང་ཡང་འདེད་སྐབས་ཀྱི་ན་ཟུག སྨན་ཞབས་མ་ཞིག་གིས་ཤུགས་གང་ཡོད་ཀྱིས་མོ་རང་གི་རྐུབ་སྒོ་བཀག་པའི་སྣང་ཚུལ། སྨན་པས་ཤུགས་དང་རྩལ་གྱིས་བུ་མོ་ཆུང་ཆུང་དེ་ཕྱི་ལ་འཐེན་པའི་ངང་ཚུལ། དེ་དག་ཚང་མ་ཚར་མ་ཐག མོ་རང་གིས་དབུགས་ཀྱི་ལེན་མཚམས་ཀྱང་རེ་ཞིག་རིང་གྲགས་འགུལ་མེད་པ་ལྟ་བུ་ཞིག་དུ་གྱུར་ན་ཡང་། གཟུགས་པོའི་ཆ་ཤས་གཞན་དག་ནས་ཁོ་མོ་ག་ལེར་འགུལ་བསྐྱོད་བྱེད་ཀྱི་ཡོད་པ་མཐོང་ཐུབ་ཀྱི་འདུག
ཁྲག་དང་གཞང་ཆུ་ལས་ཐོན་མ་ཐག་པའི་ཤ་ལས་མཆེད་པའི་བུ་མོ། སྨན་ཞབས་མ་ཞིག་གིས་ལག་པའི་རྩེ་གཉིས་ནས་བཟུང་དེ། གཙང་མ་ཡང་མ་བཟོས་པར། མཛའ་མོའི་བྲང་གར་བཞག་ནས་སྐར་མ་ཁ་ཤས་ཤིག་བཞག་སོང་། མཛའ་མོས་ཀྱང་རང་གི་ན་ཟུག་ཡོད་ཚད་སྐད་ཅིག་དེ་ཉིད་ལ་བརྗེད་ནས་ང་ཡི་སྙིང་གི་གཅེས་ཕྲུག་མ་ཞེས་ཡང་ཡང་བཤད་དུས། ང་ལ་གནམ་འོག་གི་སྐྱེས་མ་དག་གི་རླབས་ཆེ་བའི་བརྩེ་བ་དྲོན་མོ་དེ་ཤེས་སུ་བཅུགས་སོང་། སྨན་ཞབས་མས་སྐར་མ་ཁ་ཤས་ཀྱི་རྗེས་ཏག་ཏག་སུ། ཁོ་མོའི་ལག་པ་ནས་བླངས་དེ་ཕར་ཕྱོགས་སུ་འཁུར་སོང་ནས། བུ་མོ་གཙང་བཟོ་བྱས་པ་དང་སྤྱི་རྒྱའི་ནང་དུ་བཞག་སྤྱི་རྒྱ་ག་ཚོད་ཡོད་མེད་བལྟས། བུ་མོ་སྤྱི་རྒྱ་གཉིས་དང་གྲངས་ཆུང་དགུ་འདུག
བུ་མོའི་ལག་མགོ་དང་མཛའ་མོའི་ལག་མགོ་གཉིས་ལ་ཨང་གྲངས་གཅིག་པ་བཏགས་རྗེས། བུ་མོ་བུ་གཉེར་ཁང་དུ་འཁྲིད་ནས་བུད་སོང་། ངས་མཛའ་མོ་སྲུང་ནས་ཁོ་མོའི་ཉལ་ཁྲི་འགྲམ་དུ་གཉིད་མ་སད་ཀྱིས་མཚན་བཀང་བོ་རྐུབ་སྟེགས་ཤིག་ནས་ལུས། མོ་རང་ཡང་ག་ལེར་གཉིད་རྗེས་སུ། ང་རང་གཉིད་དུ་ཤོར། དངོས་ནས་བཤད་ན། སྨན་ཁང་ནས་ནད་པ་མ་གཏོགས་མཚན་མོ་མི་སུ་ཡང་ནད་པའི་འགྲམ་དུ་བསྡོད་ཆོག་པའི་མེད་པའི་སྒྲིག་ཁྲིམས་དེ་ནི་ཞོགས་པ་སྨན་ཞབས་མ་ཞིག་ཡོང་ནས་ང་རང་ཡར་དཀྲོགས་རོགས་བར་དུ་ངེད་གཉིས་ཀྱིས་ཤེས་མེད། དེ་དུས་མཛའ་མོས་ང་རང་ལ་ཁྱེད་རང་སོང་ན་འགྲིག་གི་འདུག ནང་དུ་སོང་ནས་གཟུགས་པོ་ཞིག་དཀྲུས། དེ་ནས་ཕྱིར་ཡོང་ན་རེད། གཅིག་བྱས་ན། དེ་རེག་བར་དུ་ང་རང་གི་མ་རྒན་ཡང་སླེབས་ངེས་ཡིན། ཁ་སང་ཕྱི་དྲོ་ང་རང་སྨན་ཁང་དུ་ཡོང་བའི་ལམ་ཁར་ཁ་པར་བརྒྱབས་དུས། ཁོ་མོ་དེ་རིང་ཞོགས་པ་བདུན་གཅིག་གི་གུང་གསེང་བླངས་ནས་ཡོང་གི་ཡོད་པ་རེད། དེ་ཡིན་དུས། ཁྱེད་རང་ལས་ཀ་ཡང་རྒྱུན་ལྡན་ལྟར་སོང་འགྲིག་གི་ཡོད་པ་རེད་ཟེར།
མུ་འགོད།
བཀླགས་ཡོད། ངེད་ཚང་ལ་ཡོང་ནོ་བཟང་ཐལ།
བཀླགས་ནས་བུད་སོང་།
ཨ་རོ། ངས་ཉིན་ལྟར་ཁྱོད་ཀྱི་ཉིན་ཐོ་ཀློག་གིན་ཡོད། དེ་ཕལ་ཆེར་ང་གཅིག་བུ་ཡིན་རྒྱུ་མ་རེད། ཁྱོད་ངོ་ཤེས་མཁན་ཚང་མས་ཀློག་གིན་ཡོད་སྲིད། ད་དུང་ངོ་མི་ཤེས་མཁན་ག་ཚོད་ཅིག་ཡོད་སྲིད། ཉེ་འཆར་གྲོགས་པོ་བསོད་འཕེལ་དང་མཉམ་དུ་ཆང་འཐུང་ཞོར་ཡར་མར་གྱི་ཁ་བརྡ་མང་པོ་བྱས་མཐར་ཟིན་བྲིས་བའི་སྐོར་བཤད། ཁོ་ཡང་ཁྱོད་ཀྱི་ཟིན་བྲིས་ཀློག་མཁན་གྱིས་གྲས་རེད་འདུག མ་འོངས་བ་ན་ཁྱོད་ཀྱི་ཉིན་ཐོ་འདི་ཐག་ཚེ་རིང་དོན་འགྲུབ་ལྟ་བུའི་བརྩམས་སྒྲུང་འབྲི་མཁན་ཞིག་གིས་རྩོམ་སྒྲིག་ལེགས་པོ་ཞིག་བྱས་རྗེས་དེབ་གཟུགས་སུ་འགོད་ཐུབ་པར་སྨོན། ང་ལ་བསམ་འཆར་གཅིག་ཡོད་པ་ནི་ཟིན་བྲིས་རྙིང་བ་དང་གསར་བ་དག་གི་གོ་རིམ་སྣོག་མི་ཉན་གི རྒྱུ་མཚན་བྱུང་རིམ་དག་འཁྲུག་སོང་ནས་མཚམས་རེར་དོན་དག་ལ་ལའི་བྲོ་བ་བརླགས་འགྲོ་གི། དཔེར་ན་མུ་འབྲེལ་བརྙན་འཕྲིན་ཞིག་གི་ལེའུ་གཅིག་རྫོགས་སྐབས་ལེའུ་རྗེས་མའི་ནང་གི་དོན་དག་འགའི་མཇུག་འབྲས་ལ་རེ་སྒུག་བྱེད་སྐབས་ལེའུ་གཞན་ཞིག་ནས་ལྟོས་བ་དང་གཅིག་མཚུངས་རེད། དེ་མ་གཏོགས་བཤད་རྒྱུ་ཞིག་མི་འདུག། ཁྱོད་ངོ་མ་ངར་བ་ཞིག་རེད། ་ཧུར་བརྩོན་བྱོས། ་བུ་རྒོད་པོ།