༧གོང་ས་མཆོག་གི་ཞབས་པུས་དྲག་སྐྱེད་བྱུང་མུས་ཡིན་པར་གསུངས། 

ལ་དྭགས་སུ་གནས་བཞུགས་རིང་སྐུའི་ཞབས་པུས་གཡོན་མར་དྲག་སྐྱེད་བཞེས་མུས་ཡོད་སྟབས་མུ་མཐུད་ལ་དྭགས་སུ་བདུན་ཕྲག་འགར་བཞུགས་རྒྱུ་ཡིན་འདུག 

ཁ་སང་ཕྱི་ཚེས་ ༨ ཉིན་༧གོང་ས་རྒྱལ་བ་རིན་པོ་ཆེ་མཆོག་ནས་ལ་དྭགས་ཀྱི་རྒྱལ་ས་གླེ་ནས། འདི་ལོར་༧མགོན་པོ་གང་ཉིད་དགུང་གྲངས་ ༩༡ ལ་ཕེབས་པའི་འཁྲུངས་སྐར་སྲུང་གཙི་དང་འཚམས་འདྲི་གནང་བར་ཐུགས་རྗེ་ཆེ་ཞུས་པ་དང་སྦྲགས། དོན་སྙིང་ལྡན་པའི་སྤྱི་ཚོགས་ཤིག་བསྐྲུན་པར་མི་ཚང་མར་གཞན་ཕན་གྱི་སེམས་བློ་དགོས་རྒྱུ་ཧ་ཅང་གལ་ཆེན་ཡིན་སྐོར་སོགས་གསུངས་འདུག

༧གོང་ས་རྒྱལ་བ་རིན་པོ་ཆེ་མཆོག་གི་གསུང་འཕྲིན་དུ།  ངོས་རང་ལོ་ ༩༡ ལ་སོན་པའི་སྐྱེས་སྐར་ལ་འཚམས་འདྲི་གནང་བར་ཐུགས་རྗེ་ཆེ། ཕྱི་ཟླ་ ༧ ཚེས་ ༦ ཉིན་ངོས་རང་གིས་ལ་དྭགས་གླེ་རུ་འདུས་པའི་མི་མང་ལ་བཤད་པ་ལྟར། ངོས་རང་གི་མི་ཚེ་ལ་ཕྱིར་མིག་བལྟས་ན། ངོས་རང་གི་ཉམས་ལེན་གྱི་སྙིང་པོ་ནི་གཞན་ལ་ཕན་ཐོགས་བྱ་རྒྱུ་དེ་ཡིན་པ་མཐོང་གི་འདུག་ལ།  དེ་ནི་གཞན་ཕན་གྱི་བསམ་པས་སད་པའི་ཀུན་སློང་དེ་ཡིན། ཞེས་གསུངས་འདུག 

༧མགོན་པོ་གང་ཉིད་ཀྱིས། ངོས་རང་གི་མི་ཚེའི་ནང་གི་དམིགས་ཡུལ་གཙོ་བོ་བྱམས་དང་སྙིང་རྗེ་ཁྱབ་སྤེལ་གཏང་རྒྱུ་དེ་མུ་མཐུད་ནས་གནས་ཡོད། འཛམ་གླིང་འདི་དོན་སྙིང་ལྡན་པ་ཞིག་ཡོང་བར་ཀུན་སློང་དེ་ལྟ་བུ་ཞིག་མི་ཚང་མར་ཡོད་དགོས་པ་ཞིག་ཡིན། དེར་བརྟེན། ངོས་རང་གིས་ས་ཆ་གང་སར་གནས་པའི་གཞོན་སྐྱེས་དང་རྒན་རབས་ཚང་མར། གཞན་གྱི་བདེ་དོན་ལ་དོ་ཁུར་དང་བཅས། སྙིང་རྗེ་དང་བྱམས་པ་ཉམས་སུ་བླང་དགོས་པའི་འབོད་སྐུལ་ཞུ་རྒྱུ་ཡིན། དེ་ནི་ངོས་རང་གིས་དོན་སྙིང་ལྡན་ཞིང་ཕན་ཐོགས་ཅན་གྱི་མི་ཚེ་ཞིག་སྐྱེལ་བའི་སྙིང་པོ་ཞིག་ཡིན་པར་ཡིད་ཆེས་བྱེད་ཀྱི་ཡོད། ཅེས་གསུངས་འདུག 

ཡང་མགོན་པོ་གང་ཉིད་ཀྱིས། ཁྱེད་ཚོས་ཤེས་གསལ་ལྟར། ཟླ་བ་སྔོན་མར་ལྡི་ལིར་ངོས་རང་གི་པུས་མོ་གཡོན་མར་གཤག་བཅོས་ལེགས་གྲུབ་བྱུང་རྗེས། ངོས་རང་ལ་དྭགས་སུ་དྲག་སྐྱེད་བྱུང་མུས་ཡིན།  ལོ་སྔོན་མ་ཁག་དང་འདྲ་བར། ལ་དྭགས་ཀྱི་དུས་ཚིགས་འདིའི་མཁའ་དབུགས་ནི་ངོས་རང་གི་འཕྲོད་བསྟེན་ལ་འཚམ་པོ་ཡོད་པས། བདུན་ཕྲག་འགའ་ཤས་རིང་ལ་དྭགས་སུ་བསྡད་རྒྱུའི་འཆར་གཞི་ཡོད། ཅེས་གསུངས་འདུག 

ད་ལྟ་དགའ་ལྡན་ཕོ་བྲང་གི་དྲ་རྒྱར་༧གོང་ས་རྒྱལ་བ་རིན་པོ་ཆེ་མཆོག་གི་མཛད་འཆར་གསལ་ཁ་མེད་ནའང་། ཕྱི་ཚེས་ ༧ ཉིན་ནས་དངོས་སུ་མི་མང་ལ་མཇལ་ཁ་བསྩལ་མགོ་བཙུགས་ནས། ཕྱི་ཚེས་ ༧ ཉིན་ལ་དྭགས་ཞི་བའི་ཚལ་ཕོ་བྲང་དུ། ལ་དྭགས་ཀྱི་གནད་ཡོད་མི་སྣ་ཁག་ཅིག་དང་ས་གནས་ལམ་སྒྲོན་ཚོགས་པ། དེ་བཞིན་ཐའེ་ཝན་དང་། འབྲུག ཨ་རི། ཐའེ་ལན་ཌི་སོགས་ནས་ཕེབ་པའི་དད་ལྡན་ཆོས་ཞུ་བ་མི་གྲངས་ ༢༠༠ ལྷག་དང་། དེ་རིང་ཕྱི་ཚེས་ ༩ ཉིན་ལ་དྭགས་བྱང་ཐང་གི་འབྲོག་པ་ཁག་གཙོ་བྱས་པའི་སློབ་ཕྲུག་ཁག་ཅིག་དང་། ཐའེ་ཝན། ཨ་རི་སོགས་ནས་ཕེབས་པའི་དད་ལྡན་ཆོས་ཞུ་བ་་མི་གྲངས་ ༡༩༠ ལྷག་ལ་མཇལ་ཁ་སོགས་བསྩལ་འདུག 

གསར་འགོད་པ། དཔལ་ལྡན། རྩོམ་སྒྲིག་བྱེད་མཁན། སྐལ་བཟང་སྦྱིན་པ།