ཕྱག་མཛོད་དང་གྲྭ་མང་གནས་སྐབས་རིང་འདུམ་སྒྲིག་བྱུང་ཡོད་ཟེར།

ཉེ་ཆར་ངྷ་ས་ཚེ་མཆོག་གླིང་དགོན་པའི་ཕྱག་མཛོད་དང་གྲྭ་མང་བར་རྙོག་གླེང་ཞིག་བྱུང་སྟེ། རྒྱ་གར་ཉེན་རྟོག་པས་ཚེ་མཆོག་གླིང་གི་གྲྭ་བ་དྲུག་བཀག་ཉར་བྱས་པའི་གནས་ཚུལ་བྱུང་ཡོད་ཀྱང༌། ཟླ་སྔོན་མའི་ཕྱི་ཚེས་ ༢༥ ཉིན་ངྷ་ས་ས་གནས་མགོ་འཛིན་ལས་ཚབ་ཀྱིས་བར་འདུམ་འོག་ཕྱོགས་གཉིས་གནས་སྐབས་རིང་འགྲིག་འཇགས་བྱུང་ཡོད་འདུག

ཉེ་ལམ་ཕྱི་ཟླ་བདུན་པའི་ནང་ངྷ་ས་ཚེ་མཆོག་གླིང་གི་གྲྭ་བ་ཁག་ཅིག་གིས་མེག་ལོར་སྲང་ལམ་དང་གངས་སྐྱིད་ཁུལ་དུ། ཚེ་མཆོག་གླིང་གི་ཕྱག་མཛོད་ཐུབ་བསྟན་སྙན་གྲགས་ཀྱིས་དགོན་པའི་རྩིས་ཁྲ་གཙང་སེལ་བཟོས་མེད་སྐོར་དང༌། ཁོ་སྐྱ་སར་བབས་ཏེ་རྒྱུན་རིང་ཕྱིན་ཡོད་ཀྱང་དགོན་པའི་བདག་དབང་སྒེར་སྡོམ་བྱས་ཡོད་ཚུལ། དགོན་པའི་ནང་བུད་མེད་འདྲ་མིན་འཁྲིད་ཡོང་སྟེ་ཞག་སྡོད་བྱས་སྐོར་སོགས་ཀྱི་སྦྱར་ཡིག་མང་པོ་ཞིག་བཀྲམས་ཡོད་སྟབས། ཕྱག་མཛོད་ཐུབ་བསྟན་སྙན་གྲགས་ཀྱིས་ངྷ་ས་རྒྱ་གར་ཉེན་རྟོག་ལས་ཁུངས་ལ་ཞུ་གཏུག་བྱས་ཏེ། ཕྱི་ཚེས་ ༢༠ ཉིན་ཉེན་རྟོག་སྐོར་ཞིག་ཚེ་མཆོག་གླིང་དུ་ཡོང་སྟེ་མཁན་རིན་པོ་ཆེ་བསྟན་འཛིན་ཐོན་བཟང་གཙོས་པའི་དགེ་འདུན་པ་ ༦ འཛིན་བཟུང་གིས་ཉིན་ཕྱེད་རིང་བཀག་ཉར་འདྲི་བརྩད་བྱས་ཡོད། 

ཉེན་རྟོག་ལས་ཁུངས་ཀྱིས་ཞིབ་འཇུག་བྱས་པ་ལྟར་ན། ཚེ་མཆོག་གླིང་དགོན་པའི་དངུལ་ཡོངས་རྫོགས་ཕྱག་མཛོད་ཐུབ་བསྟན་སྙན་གྲགས་ཀྱི་མིང་ཐོག་དུ་ཡོད་པ་དང་། ཕྱི་ཟླ་ ༥ ཚེས་ ༣ ཉིན་དགོན་པ་ནང་ཁུལ་ཚོགས་འདུ་ཞིག་གི་སྟེང་དུ་དགོན་པའི་སྐྱེད་བཅོལ་དངུལ་དང་དངུལ་རྐྱང་འབུམ་ ༧༣ ལྷག་དགོན་པའི་མཁན་རིན་པོ་ཆེ་སོགས་གྲྭ་མང་གིས་རྩིས་ལེན་བྱས་པ་དེ་ཁྲིམས་འགལ་ཆགས་ཡོད་པའི་ངོས་འཛིན་ཐོག དངུལ་དང་དངུལ་འཛིན་ཡོངས་རྫོགས་ཉེན་རྟོག་པས་རྩིས་ལེན་གྱིས་ཕྱིར་ཕྱག་མཛོད་ཐུབ་བསྟན་སྙན་གྲགས་ལ་སྤྲད་ཡོད་འདུག་ལ། དགེ་འདུན་པ་ཚོར་ཁྲིམས་མཐུན་ཡིག་ཆ་མེད་པར་ཕྱི་ཟླ་ ༥ ཚེས་ ༣ ནས་ཟླ་ ༧ ཚེས་ ༢༠ བར་དངུལ་ཕོན་ཆེན་ཉར་བ་དེ་ནག་ཉེས་ཚབས་ཆེན་ཡིན་སྟབས། གནས་ཚུལ་དེ་ཉེན་རྟོག་ལས་ཁུངས་ཀྱིས་ཐག་གཅོད་བྱས་ཚེ། དགེ་འདུན་པ་དེ་དག་མུ་མཐུད་འཛིན་བཟུང་གིས་ཁྲིམས་ཐག་ལྕི་མོ་གཅོད་སྲིད་པའི་ཉེན་ཁ་ཡོད་པས་དགོན་པ་ནང་ཁུལ་ནས་འགྲིག་འཇགས་ཡོང་ཐབས་བྱས་ན་ལེགས་ཚུལ་བརྗོད་ཡོད་འདུག

དེའི་རྗེས་ངྷ་ས་ས་གནས་མགོ་འཛིན་ལས་ཚབ་རྡོ་རྗེ་སྒྲོལ་མ་ལགས་ཀྱིས་བར་འདུམ་གནང་སྟེ། ཐུབ་བསྟན་སྙན་གྲགས་ཀྱིས་རྒྱ་གར་ཉེན་རྟོག་ལས་ཁུངས་སུ་ཕུལ་བའི་ཞུ་ཡིག་དེ་ཕྱིར་འཐེན་བྱ་དགོས་པའི་འབོད་སྐུལ་ཞུས་ཡོད་པ་བཞིན། ཟླ་སྔོན་མའི་ཕྱི་ཚེས་ ༢༥ ཉིན་ཆ་རྐྱེན་དོན་ཚན་ཁག་ཅིག་ལ་ཕྱོགས་གཉིས་ངོས་ནས་མོས་མཐུན་མཚན་རྟགས་བསྐྱོན་ཡོད་འདུག ཆ་རྐྱེན་དེ་དག་ནི། མ་འོངས་པར་དགོན་པའི་གྲྭ་བ་སུ་གང་གིས་ཀྱང་ཐུབ་བསྟན་སྙན་གྲགས་ལ་རྣམ་འགྱུར་མི་ལེགས་པ་སྟོན་པ་དང༌། གྲྭ་ལོག་དམ་ཉམས་ཟེར་བ་སོགས་ཀྱི་སྐྱོན་བརྗོད་མི་བྱ་རྒྱུའི་ཁས་ལེན་བྱ་དགོས་པ་དང༌། ཐུབ་བསྟན་སྙན་གྲགས་ཀྱིས་དེ་སྔ་རྒྱ་གར་ཉེན་རྟོག་ལས་ཁུངས་སུ་ཕུལ་བའི་ཞུ་གཏུག་ཡི་གེ་ནང༌། མཁན་རིན་པོ་ཆེ་དང་བཀྲ་ཤིས་རྒྱལ་མཚན་གཉིས་དགོན་པ་ནས་ཕྱིར་འཕུད་གཏོང་དགོས་ཚུལ་བཀོད་ཡོད་པ་དེ་ལ་བཅོས་བསྒྱུར་གཏོང་དགོས་པ། དགོན་པའི་ལས་ཁུངས་ཀྱི་ལྡེ་མིག་ཕྱིར་ཐུབ་བསྟན་སྙན་གྲགས་ལ་རྩིས་འབུལ་བྱ་དགོས་པ། ཐུབ་བསྟན་སྙན་གྲགས་ཀྱིས་དངུལ་ཡོངས་རྫོགས་དགོན་པའི་དངུལ་བྱང་ཐོག་བཞག་ཟིན་པའི་འཛིན་ཡིག་གྲྭ་མང་ལ་སྟོན་དགོས་པ། ཚེ་མཆོག་གླིང་རིན་པོ་ཆེ་ཕེབས་མ་ཐག་དགོན་པའི་འགན་འཛིན་ལྷན་ཚོགས་ཀྱི་ཚོགས་མི་ ༧ ཁ་སྐོང་འོས་འདེམས་བྱ་དགོས་པ། ཐུབ་བསྟན་སྙན་གྲགས་ཀྱིས་མ་འོངས་པར་དགོན་པའི་ནང་བུད་མེད་ཞག་སྡོད་བྱེད་བཅུག་མི་ཆོག་པ་བཅས་རེད།

ཟླ་འདིའི་ཕྱི་ཚེས་ ༩ ཉིན་ཕྱག་མཛོད་ཐུབ་བསྟན་སྙན་གྲགས་ཀྱིས་འདི་གའི་གསར་འགོད་པར་བརྗོད་ན། ཟླ་སྔོན་མའི་ཕྱི་ཚེས་ ༢༠ ཉིན་ཁོང་གིས་མཁན་རིན་པོ་ཆེ་དང་དགེ་བསྐོས་གཙོས་པའི་གྲྭ་བ་དྲུག་རྒྱ་གར་ཉེན་རྟོག་ལས་ཁུངས་སུ་རྩིས་སྤྲོད་བྱས་དོན་ནི། དགོན་པའི་གྲྭ་བ་ཚོས་ཁོང་གི་སྲོག་ལ་ཉེན་ཁ་ཡོད་པའི་བྱ་སྤྱོད་སྤེལ་ཡོད་སྟབས་གྲྭ་བ་དེ་དག་གི་མིང་ཐོ་རྒྱ་གར་ཉེན་རྟོག་ལས་ཁུངས་སུ་སྤྲད་རྗེས། ཉེན་རྟོག་པ་ཚེ་མཆོག་གླིང་ལ་འདྲི་བརྩད་དུ་འབྱོར་སྐབས་གྲྭ་བ་ཚོས་རྣམ་འགྱུར་མི་ལེགས་པ་བསྟན་པ་དང༌། གྲྭ་བ་ཚོར་ཁྲིམས་མཐུན་ཡིག་ཆ་མེད་བཞིན་དུ་ཁོང་གི་ལག་ནས་དངུལ་ཕོན་ཆེན་རྩིས་ལེན་བྱས་པ་བཅས་ལ་བརྟེན་ཁོང་ཅག་འཛིན་བཟུང་བྱས་པ་ཡིན་སྐོར་བརྗོད་བྱུང༌།

ཕྱི་ཚེས་ ༡༡ ཉིན་གསར་འགོད་པས་ཚེ་མཆོག་གླིང་གི་མཁན་རིན་པོ་ཆེ་བསྟན་འཛིན་ཐོན་བཟང་མཆོག་ལ་བཅར་འདྲི་ཞུས་པར། དེ་སྔོན་དགོན་པའི་གྲྭ་བ་ ༦ རྒྱ་གར་ཉེན་རྟོག་པས་འཛིན་བྱས་དོན་ནི། ཐུབ་བསྟན་སྙན་གྲགས་ཀྱིས་ཚེ་མཆོག་གླིང་གི་མཁན་རིན་པོ་ཆེས་གཙོས་པའི་གྲྭ་བ་ ༦ གི་མིང་ཐོ་རྒྱ་གར་ཉེན་རྟོག་ལས་ཁུངས་སུ་ཕུལ་ཏེ། མཁན་རིན་པོ་ཆེ་དང་བཀྲ་ཤིས་རྒྱལ་མཚན་གཉིས་ངེས་པར་དུ་དགོན་པ་ནས་ཕྱིར་འཕུད་གཏོང་དགོས་ཚུལ་དང༌། དགོན་པའི་མ་དངུལ་འབུམ་ ༧༣ ལྷག་ཡོད་པ་དེ་མཁན་པོ་དང་གྲྭ་བ་ཚོས་ཕྱག་མཛོད་ཀྱི་ལག་ནས་འཕྲོག་བཅོམ་བྱས་སྐོར་བཀོད་པ་བཅས་ལ་བརྟེན་གནས་ཚུལ་དེ་བྱུང་སྐོར་བརྗོད་བྱུང༌། 

ཁོང་གིས་མུ་མཐུད་དུ་ངོ་སྤྲོད་གནང་བ་ལྟར་ན། ཁོང་ཅག་གིས་ཕྱག་མཛོད་ཀྱི་ལག་ནས་དངུལ་འཕྲོག་བཅོམ་བྱས་པའི་གནས་ཚུལ་དེ་བདེན་པ་མིན་པ་དང༌། དགོན་པར་རྩིས་སྤྲོད་རྩིས་ལེན་གྱི་ལམ་སྲོལ་དགོས་པའི་ཡིག་ཆ་ཞིག་ལ་གྲྭ་མང་ཚོས་མཚན་རྟགས་འཁོད་པར་མ་ཟད། ཕྱི་ཟླ་ ༥ བའི་ཚེས་ ༣ ཉིན་དགོན་པའི་ལས་ཀྱི་སྣེ་མོ་བ་ ༡༦ འདུ་འཛོམས་ཐོག་ཐུབ་བསྟན་སྙན་གྲགས་ཀྱིས་དངུལ་རྩིས་སྤྲོད་བྱས་ཡོད་ཚུལ་སོགས་ཉེན་རྟོག་པར་གསལ་བཤད་བྱས་མཐར། ཉེན་རྟོག་པ་དང་ས་གནས་མགོ་འཛིན་བཅས་ཀྱིས་གནས་ཚུལ་འདི་དགོན་པའི་ནང་ཁུལ་ནས་ཐག་གཅོད་བྱ་དགོས་པའི་རེ་སྐུལ་ལྟར། ཕྱག་མཛོད་ཁོང་གིས་ཀྱང་ནང་འགྲིག་མཚན་ཉིད་ཚང་བ་ཞིག་བྱ་རྒྱུ་ཡིན་པའི་ཁས་ལེན་དང་གྲྭ་མང་ཚོས་ཀྱང་དེ་ལ་མོས་མཐུན་བྱུང་བ་ཞིག་ཡིན་འདུག 

མཁན་རིན་པོ་ཆེ་མཆོག་གིས “ཕན་ཚུན་ལ་སྐྱོན་བརྗོད་རིགས་མི་གནང་བར་ནང་འགྲིག་ཐོག་དགོན་བདག་བླ་མ་དང་ཕྱག་མཛོད། གྲྭ་ཚང་བཅས་ཚང་མར་མཛད་དཀའ་མེད་པ་ཞིག་བཟོ་རྒྱུ་གལ་ཆེན་པོ་རེད། ད་ལྟའི་བར་ཕྱག་མཛོད་དང་གྲྭ་མང་གིས་ལས་ཀ་གང་བྱས་པ་དེ་གྲྭ་ཚང་རང་གི་ཆེད་དུ་ཡིན་སྟབས། དགོན་བདག་བླ་མ་མཆོག་མྱུར་དུ་ཕེབས་ཏེ་དགོན་པའི་ལས་ཀྱི་སྣེ་མོ་བ་གསར་དུ་བསྐོ་བཞག་དང༌། དགོན་པའི་དངུལ་རྐྱང་དང་དངུལ་འཛིན། རྒན་ཕོགས། ས་ཁང་དང་དགོན་པའི་ཡིག་ཆ་རྩིས་སྤྲོད་རྩིས་ལེན་གཙང་མ་ཞིག་ཡོང་རྒྱུའི་རེ་བ་ཡོད” ཅེས་བརྗོད་བྱུང༌།

ཡང་གསར་འགོད་པས་ངྷ་ས་ས་གནས་མགོ་འཛིན་ལས་ཚབ་རྡོ་རྗེ་སྒྲོལ་མ་ལགས་སུ་བཅར་འདྲི་ཞུས་པར། “ཕྱི་ཚེས་ ༢༥ ཉིན་ང་དགོན་པར་སོང་སྟེ་གནས་ཚུལ་གསལ་བཤད་དང་ཞི་འགྲིག་ཡོང་ཐབས་སུ་འབོད་སྐུལ་ཞུས་པ་ཡིན། མཐའ་མར་ཕྱོགས་གཉིས་ངོས་ནས་དགོན་པའི་འགན་འཛིན་ལྷན་ཚོགས་གསར་འདེམས་དང༌། དགོན་བདག་བླ་མ་མ་ཕེབས་པར་དགོན་པའི་ནང་ཚུལ་མིན་གྱི་བྱ་སྤྱོད་རིགས་མི་སྤེལ་བར་ཞི་འགྲིག་གནང་རྒྱུར་ཚང་མས་མོས་མཐུན་མཚན་རྟགས་བཀོད་སོང” ཞེས་བརྗོད་བྱུང༌།

གསར་འགོད་པ། དོན་གོ