བོད་ཡིག་ནང་རྩིས་རིག་གི་རྩ་ཚིག་བཟོས།

བོད་རིགས་མཐོ་རིམ་སློབ་མ་ཞིག་གིས་༼ རྒྱུན་མཁོའི་ཨང་རྩིས་རིག་གསལ་རྩ་བ༽ ཞེས་པ་ཞིག་གསར་རྩོམ་གནང་སྟེ། ཁ་སང་གངས་སྐྱིད་བོད་ཀྱི་དཔེ་མཛོད་ཁང་དུ་ངོ་སྤྲོད་དང་འབྲེལ་ཆེད་མཁས་པ་ཚོར་དགོངས་འཆར་བསྡུས་སོང་།

ཁ་སང་ཕྱི་ཚེས་ ༡༦ ཉིན་གྱི་ཞོགས་པའི་ཆུ་ཚོད་ ༡༡ སྟེང་། སྐུ་ཞབས་ཟླ་བ་ལགས་ཀྱིས་བོད་རིགས་སློབ་མ་ཚོའི་ཆེད་དུ་བོད་ཡིག་ནང་ཨང་རྩིས་རྣམ་བཞག་གི་རྩ་ཚིག་ཤོག་ངོས་ ༣༠ ཡོད་པ་ཞིག་གསར་རྩོམ་གནང་ཡོད་པ་དེ་ངོ་སྤྲོད་དང་། འབྲེལ་ཡོད་མཁས་དབང་ཁག་ནས་རྩ་བ་དེའི་ཐད་ལེགས་སྤེལ་ཉེ་འགོག་གི་དགོངས་ཚུལ་བསྡུ་ལེན་བྱས་ཡོད། ཨང་རྩིས་རིག་པའི་རྩ་བ་དེ་ནི་བོད་ཀྱི་སུམ་རྟགས་དག་གསུམ་གྱི་རྩ་བ་ལྟར། བོད་ཡིག་གི་ཚིག་བཅད་ཀྱི་སྒོ་ནས་རྩིས་རིག་གི་གྲངས་ཀྱི་རྣམ་བཞག་གི་བྱུང་རབས་དང་ངོས་འཛིན། དབྱེ་བ། ཐོབ་ཐང་སོགས་ཁ་གསལ་ལ་བློར་འཛིན་བདེ་པ་ཞིག་བཟོས་འདུག

སྐབས་དེར་སྐུ་ཞབས་ཟླ་བ་ལགས་ཀྱིས་བརྗོད་ན། ད་སྔའི་བོད་ཀྱི་བརྡ་སྤྲོད་སོགས་ཐུན་མོང་མ་ཡིན་པའི་བོད་པའི་རིག་གནས་རྣམས་སྔོན་བྱོན་མཁས་པ་དག་གིས་བརྩམས་པ་ལ་བརྟེན་ནས་དེང་སང་རྩ་བ་བརྟན་པོ་ཞིག་ཚུགས་ཡོད་ནའང་། དེང་གི་རིག་གསར་གྱི་རྣམ་གྲངས་མང་པོ་ཞིག་བོད་པའི་སྤྱི་ཚོགས་ཁྲོད་བསླེབས་ཡོང་སྐབས། དེ་དག་ཚང་མ་ཕྱིའི་སྐད་ཡིག་ནས་བོད་སྒྱུར་བྱས་པ་རྐྱང་ཆགས་ཡོད་སྟབས། ཉིན་ཞིག་རྒྱལ་སྤྱིའི་སྡིངས་ཆའི་སྟེང་ཚན་རིག་དང་རྩིས་རིག་གི་མཁས་པའི་བགྲོ་གླེང་ཞིག་གི་སྐབས་བོད་པར་གོ་སྐབས་ཤིག་སྤྲད་ཚེ་བོད་པར་སོ་སོའི་ཁྱད་ཆོས་དང་གསར་གཏོད་རང་བཞིན་གྱི་ཚན་རིག་དང་རྩིས་རིག་གི་གླེང་བྱ་ཞིག་དཀོན་ཞིང་། བཙན་བྱོལ་སློབ་གྲྭ་ཁག་གི་རྩིས་རིག་སློབ་ཚན་ཡོངས་ཕྱིའི་སྐད་ཡིག་ནས་ཕབ་བསྒྱུར་བྱས་པ་རྐྱང་ཆགས་ཡོད་ཟེར།

ཁོང་གིས་མུ་མཐུད། “རང་ཉིད་ཀྱི་ངོས་ནས་གང་བསྒྲུབས་པ་འདི་མཁས་ཉམས་དང་ཡང་ན་ད་སྔ་མ་བྱུང་པའི་ཚད་ལྡན་གྱི་གསར་གཏོད་ཅིག་ནམ་ཡང་བསམ་གྱི་མེད། རིག་གནས་ནི་མིའི་སྤྱི་ཚོགས་ཐུན་མོང་གི་ཡིན་ཞིང་། མིའི་དཔལ་ཡོན་དར་བའི་བརྒྱུད་རིམ་ཁྲོད་རིག་གནས་གང་ཤིག་སྤྱི་ཚོགས་བྱེ་བྲག་པ་དེའི་འཚོ་གནས་དང་བསམ་བློའི་དཔལ་ཡོན་དང་ཐག་ཉེ་བ་ཆགས་ཚེ་རིག་ཚན་བྱེ་བྲག་པ་དེ་ཡང་མི་རིགས་དེའི་རིག་གནས་ཀྱི་ངོ་བོར་གྲུབ་ཡོང་ངེས་ཡིན་པ་ལྟར། རྩིས་རིག་ལ་ཉམས་ཞིབ་བྱས་པ་བརྒྱུད་བོད་ཡིག་ནང་རྩིས་རིག་གི་རྩ་བ་ཞིག་བྲིས་པ་ཡིན་ལ། རྩ་བ་འདིར་མཁས་པ་རྣམས་ཀྱིས་དགོངས་འཆར་འདོན་རྒྱུ་དང་། མ་འོངས་པར་རྩིས་ཀྱི་རིག་གནས་འདིར་བོད་རང་རྩ་བ་ཡོད་པའི་རིག་གནས་ཤིག་ཏུ་འགྱུར་ཐུབ་པར་གླེང་གཞི་སྐྲུན་ཐབས་བཅས་ལ་དམིགས་པ་ཡིན། རང་ཉིད་ཀྱིས་བྲིས་བའི་རྩ་བ་འདི་བོད་པའི་སྤྱི་ཚོགས་དང་རྒྱལ་ཁབ། སོ་སོ་དགའ་མོས་ཡོད་པའི་སློབ་ཚན་བཅས་ལ་ཕུལ་བའི་ཞབས་འདེགས་ཙམ་ཡིན”ཞེས་བརྗོད་བྱུང་།

སྐུ་ཞབས་ཟླ་བ་ལགས་ཀྱིས་བོད་ནས་དམའ་རིམ་སློབ་སྦྱོང་བྱས་ཞིང་། རྒྱ་གར་དུ་འབྱོར་འཕྲལ་སུ་ཇཱ་བོད་ཁྱིམ་སློབ་གྲྭར་ཞུགས། རྗེས་སུ་མ་ཌི་རཱ་སི་མཐོ་སློབ་( Madras University )ནས་རྩིས་རིག་ཐོག་མཐོ་རིམ་རིག་གནས་རབ་འབྱམ་པ་(Masters of science in mathematics)ཐོན་ཏེ། ལྷོ་ཕྱོགས་སུ་སློབ་ཕྲུག་ཚོར་སྒྲིག་ཞུགས་མ་ཡིན་པའི་ཟུར་སྦྱོང་ཚན་རིག་སློབ་ཚན་དང་ཨང་རྩིས་ཁྲིད་བཞིན་ཡོད་འདུག

གསར་འགོད་པ། བནྡེ་སྐྱབས།