རྒྱ་ནག་གཞུང་གིས་མདོ་སྨད་ཀན་ལྷོ་གཙོས་གྲོང་ཁྱེར་མངའ་ཁོངས་སུ་ཡོད་པའི་རྒྱལ་མོ་དགོན་དགེ་ལྡན་དར་རྒྱས་གླིང་གི་གྲྭ་པ་ ༤ འཛིན་བཟུང་བྱས་འདུག
འབྲེལ་ཡོད་མི་སྣས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་འདིའི་ཕྱི་ཚེས་ ༢ ཉིན་གྱི་བོད་ནང་གི་མཚན་ཆུ་ཚོད་ ༣ པ་ཡས་མས་སུ་རྒྱ་ནག་ཉེན་རྟོག་མི་སྣ་བཅུ་ལྷག་ཀན་ལྷོ་བོད་རིགས་རང་སྐྱོང་ཁུལ་གཙོས་གྲོང་ཁྱེར་མངའ་ཁོངས་སུ་ཡོད་པའི་རྒྱལ་མོ་དགོན་དགེ་ལྡན་དར་རྒྱས་གླིང་དུ་ཡོང་སྟེ། གསང་བའི་སྒོ་ནས་དགེ་འདུན་པ་བསྟན་འཛིན་རྒྱ་མཚོ་དང་འཇིགས་མེད་བསམ་གཏན། སྐལ་རྒྱམ། ཡོན་ཏན་བཅས་གྲྭ་པ་བཞི་གྲྭ་ཤག་ནས་འཛིན་བཟུང་བཙན་འཁྲིད་བྱས་འདུག
ཕྱིས་སུ་ཉེན་རྟོག་མི་སྣས་གྲྭ་བ་ཚོར་འདྲི་རྩད་བྱས་རྗེས་གྲྭ་ཡོན་ཏན་དང་སྐལ་རྒྱམ་གཉིས་ཀྱིས་གནས་ཚུལ་གཞན་ལ་མི་བཤད་པའི་ཁས་ལེན་འོག་ཀློད་གྲོལ་ཐོབ་ཡོད་ཀྱང༌། གྲྭ་བསྟན་འཛིན་རྒྱ་མཚོ་དང་འཇིགས་མེད་བསམ་གཏན་གཉིས་ད་ལྟའི་ཆར་ཡང་བཀག་ཉར་བྱས་ཡོད་འདུག དེ་ནི། རྒྱ་ནག་གཞུང་གིས་ཁོང་གཉིས་ ༢༠༠༨ ལོར་བླ་བྲང་ས་ཁུལ་གྱི་ཞི་བའི་སྐད་འབོད་དང་འབྲེལ་བ་ཡོད་པའི་དོགས་གཞིའི་འོག་འཛིན་བཟུང་གི་ཉེན་བརྡ་དང་ཡིག་ཆ་སྤྲད་པའི་གྲས་སུ་ཚུད་ཡོད་པའི་དབང་གིས་ཡིན་པ་དང༌། ཐེངས་འདིར་རྒྱ་ནག་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་དགོན་པ་དང་དེའི་ཉེ་ཁུལ་གྱི་ས་གནས་མང་པོ་ཞིག་ལ་གཟིགས་སྐོར་དུ་འགྲོ་འཆར་ཡོད་སྟབས། སྐབས་དེར་ངོ་རྒོལ་སྐད་འབོད་ཀྱི་ལས་འགུལ་སྤེལ་སྲིད་པའི་དོགས་གཞིའི་འོག་འཛིན་བཟུང་བྱས་པ་ཞིག་ཡིན་འདུག
རྒྱལ་མོ་དགོན་དགེ་ལྡན་དར་རྒྱས་གླིང་དགོན་པ་ནི། ཀན་ལྷོ་བོད་རིགས་རང་སྐྱོང་ཁུལ་གཙོས་གྲོང་ཁྱེར་གྱི་ཁོངས་སུ་ཡོད་ཅིང༌། ད་ལྟའི་ཆར་དགོན་པའི་ནང་གྲྭ་པ་ ༤༠༠ ལྷག་ཡོད་འདུག ༢༠༠༨ ལོའི་ས་བྱི་ཞི་རྒོལ་ཆེན་མོའི་སྐབས་སུ་དགོན་པའི་གྲྭ་པ་དང་ས་གནས་མི་མང་གིས་རྒྱ་ནག་གཞུང་ལ་ངོ་རྒོལ་སྐད་འབོད་ཀྱི་ལས་འགུལ་སྤེལ་སྟབས་གྲྭ་པ་ ༢༠ ལྷག་འཛིན་བཟུང་བྱས་ཡོད་འདུག
གསར་འགོད་པ། དོན་གོ
རྒྱལ་མོ་དགོན་དགེ་ལྡན་དར་རྒྱས་གླིང་དགོན་པའི་གྲྭ་ཡོན་ཏན་དང་སྐལ་རྒྱམ་གཉིས་ཀྱིས་ག་རེ་ཁས་ལེན་བྱེད་ཡོད་རེ་ལགས། རྗེས་སུ་བོད་གྱི་ལས་འགུལ་ག་རེ་སྤེལ་ན་རྒྱ་མི་ལ་རྩིས་སྤྲོད་བྱེད་རྒྱུ་ཁས་བླངས་བ་རེད་དམ། ཁོང་གཉིས་ག་རེ་ཅེས་གློད་གྲོལ་བཏང་རེད་ལགས། གཞན་གྲྭ་བ་བསྟན་འཛིན་རྒྱ་མཚོ་དང་འཇིག་མེད་རྒྱ་མཚོ་གཉིས་ག་རེ་ཅེས་གློད་གྲོལ་མ་བཏང་བ་རེད་ལགས་། ཁོང་གཉིས་རྒྱལ་གཅེས་དཔའ་པོ་རེད་བསམ། གཞན་གཉིས་བོད་པའི་ཞབས་འདྲེན་རེད། ཁོང་གཉིས་ག་རེ་ཁས་ལེན་བྱེད་ཡོད་དམ། གཞན་གཉིས་མྱུར་ཏུ་གློད་གྲོལ་ཡོངས་བའི་གུས་འདུད་ཞུ་བཞིན་ཡོད།