རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་ས་ཁུལ་དུ་གཟིགས་སྐོར་གནང་བ་དང་བསྟུན་ཏེ། རྒྱ་གཞུང་གིས་བླ་བྲང་དགོན་པ་གཙོས་པའི་ས་གནས་ཁག་དམ་དྲག་བྱས་ཡོད་འདུག
རྒྱ་གཞུང་གིས་དེ་སྔོན་གསལ་བསྒྲགས་ཤིག་སྤེལ་ཏེ་ཕྱི་ཟླ་ ༨ ཚེས་ ༡༡ ཉིན་ནས་བཟུང་པཎ་ཆེན་རྒྱལ་མཚན་ནོར་བུ་མདོ་སྨད་བླ་བྲང་བཀྲ་ཤིས་འཁྱིལ་དང་གཙོས། རྨ་ཆུ། ཀླུ་ཆུ་སོགས་སུ་གཞུང་འབྲེལ་གཟིགས་སྐོར་གནང་རྒྱུ་ཡིན་སྐོར་བརྗོད་པ་ལྟར། རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་དུ་གཟིགས་སྐོར་ལ་ཕེབས་ཡོད་འདུག་ལ། ཉིན་འགའི་གོང་ནས་བླ་བྲང་དགོན་པ་གཙོས་པ་ས་གནས་ཁག་རྒྱ་དམག་སྟོང་ཕྲག་མང་པོས་དམ་དྲག་བྱས་ཡོད་པ་དང་། ཐེངས་འདིར་རྒྱལ་མཚན་ནོར་བུ་བླ་བྲང་དུ་འཁྲིད་པའི་དམིགས་ཡུལ་གཙོ་བོ། ཟླ་ཁ་ཤས་རིང་བླ་བྲང་བཀྲ་ཤིས་འཁྱིལ་དུ་སློབ་གཉེར་བྱེད་དུ་འཇུག་རྩིས་ཡོད་ཀྱང་། བླ་བྲང་དགོན་པའི་དགེ་འདུན་པ་དང་ས་གནས་བོད་རིགས་མི་མང་གིས་ཕེབས་བསུའི་སེར་འཕྲེང་བསྒྲིགས་མེད་པ་དང་། ཕྱོགས་འདྲ་མིན་ནས་འདོད་པ་མེད་པའི་རྣམ་འགྱུར་ཤུགས་ཆེན་བསྟན་ཡོད་སྟབས། བླ་བྲང་དགོན་པའི་གཟིགས་སྐོར་གྲུབ་མ་ཐག ཀླུ་ཆུ་དང་རྨ་ཆུ་རྫོང་སོགས་སུ་ཕེབས་དགོས་བྱུང་ཡོད་འདུག
གནས་ཚུལ་ཐོན་གསལ་ལྟར་ན། རྒྱ་ནག་གཞུང་གིས་ཐོག་མར་རྒྱལ་མཚན་ནོར་བུའི་གཟིགས་སྐོར་དེ་ཕྱི་ཟླ་ ༧ པའི་ཚེས་མགོར་གྲ་སྒྲིག་ཞུས་ཡོད་ཀྱང་། དགོན་པའི་དགེ་འདུན་པ་དང་ས་གནས་མི་མང་ལ་འདོད་མོས་མེད་པའི་རྣམ་འགྱུར་སྣ་ཚོགས་ཐོན་པ་དང་། ལྷག་པར་དུ་ཉེ་ལམ་རྨ་ཆུ་ས་ཁུལ་ནས་སྦྱར་ཡིག་བཀྲམས་ཏེ་ངོ་རྒོལ་བྱས་པ་སོགས་ལ་བརྟེན་ཏེ་ད་བར་ཕྱིར་འགྱངས་བྱ་དགོས་བྱུང་ཡོད་འདུག
ཐེངས་འདིར་གཞུང་ཕྱོགས་ནས་དགོན་པའི་དགེ་འདུན་པ་དང་སློབ་ཕྲུག ས་གནས་མི་མང་བཅས་ལ་ཕེབས་བསུ་གཟབ་རྒྱས་ཞུ་དགོས་ཚུལ་བརྗོད་ཡོད་པ་དང་། ལས་ཁུངས་སོ་སོའི་བོད་རིགས་ལས་བྱེད་ཡོངས་ཀྱིས་བོད་ལྭ་གྱོན་ཏེ། དགའ་བསུའི་རྣམ་པ་ཤུགས་ཆེན་སྟོན་དགོས་པ་དང་ཕྱག་འཚལ་དགོས་པ་སོགས་ཀྱི་བཀའ་བཏང་ཡོད་པ་མ་ཟད། གལ་སྲིད་ཕེབས་བསུར་མི་བཅར་མཁན་ཡོད་ན་ཟླ་ཕོགས་གཅོག་པ་དང་། ལས་ཁུངས་ནས་གནས་དབྱུང་གཏོང་རྒྱུ་ཡིན་སྐོར་གྱི་ཉེན་བརྡ་ཡང་བཏང་ཡོད་འདུག དེ་བཞིན། བླ་བྲང་དགོན་པའི་མཐའ་འཁོར་དང་། རྒྱལ་མཚན་ནོར་བུ་ཕེབས་ཡུལ་གྱི་མགྲོན་ཁང་དག་གིས་ཕྱི་ཚེས་ ༡༧ བར་ཕྱི་རྒྱལ་གྱི་མགྲོན་པོ་གཅིག་ཀྱང་སྣེ་ལེན་བྱས་མི་ཆོག་ཚུལ་བརྗོད་ཡོད་འདུག
གནས་ཚུལ་དབྱེ་ཞིབ་པ་ཚོས་བརྗོད་ན། ཐེངས་འདིར་རྒྱ་ནག་གཞུང་གིས་རྒྱལ་མཚན་ནོར་བུ་བླ་བྲང་དགོན་པར་སློབ་གཉེར་གཙོས་པའི་ས་ཁུལ་ཁག་ཅིག་ནང་གཟིགས་སྐོར་དུ་འཁྲིད་ཀྱི་ཡོད་པ་དེ་ནི། རྒྱལ་མཚན་ནོར་བུ་ལ་བོད་མི་མང་གིས་ཆོས་ཀྱི་སློབ་གཉེར་མཐར་སོན་པའི་བླ་ཆེན་ཞིག་གི་ངོས་འཛིན་ཐོབ་ཐབས་ཡིན་པ་དང་། ཁོང་གིས་བླ་བྲང་བཀྲ་ཤིས་འཁྱིལ་ནས་སློབ་གཉེར་བྱས་པ་ཡིན་ན། བོད་མི་ཚོས་ཁོང་ལ་སྔར་ལས་ལྷག་པའི་ཆེ་མཐོང་དང་བརྩི་འཇོག་ཡོང་བའི་རེ་བ་རྒྱག་གི་ཡོད་སྐོར་བརྗོད་འདུག
རྒྱལ་མཚན་ནོར་བུ་བླ་བྲང་བཀྲ་ཤིས་འཁྱིལ་དུ་ཕེབས་ཐེངས་གཉིས་པ་དེ་ཆགས་ཡོ་པ་དང་། ཕྱི་ཚེས་ ༡༧ ཉིན་བླ་བྲང་གི་གཟིགས་སྐོར་གྲུབ་ཏེ་ཀླུ་ཆུ་རྫོང་ཤིས་ཚང་དགོན་པར་ཕེབས་ཡོད་འདུག
གསར་འགོད་པ། དོན་གོ
ནད་པ་ནི་ངོ་མ་འགོས་ནད་མང་པོར་འགོས་པའི་ནད་པ་ངོ་མ་ཞིག་ཡིན་པ་འདྲ། ཁོས་པཎ་ཆེན་སྐུ་གོང་མས་ལོ་རྒྱུས་བཤད་སྟངས་དང་བོད་མི་ཞིག་ཡིན་ཕྱིན་སུ་པཎ་ཆེན་བྱེད་ན་སུ་པཎ་ཆེན་ལ་བསྐོ་ན་འགྲིག་གི་རེད་ཟེར་བ་ནི་གནས་ལུགས་མི་ཤེས་པའི་སྐད་ཆ་རང་རེད། དེ་ཡིན་ན་བོད་ཀྱི་ནག་རྫི་མོ་ཡང་པཎ་ཆེན་གྱི་ཡང་སྲིད་དུ་བསྐོས་ན་འགྲིག་གམ། རྒྱལ་བ་པན་ཆེན་གཉིས་བར་ལ་གནའ་སྔ་མོ་ནས་རྒྱ་མའི་འདྲེ་ལག་མང་པོ་བརྐྱངས་སྐབས་སྐུ་འཁོར་འགའ་ཤས་ཞིག་གིས་དེར་མགོ་འཁོར་ནས་རྒྱལ་བ་པཎ་ཆེན་གཉིས་གོ་ས་འདྲ་མཉམ་དགོས། ཁྲི་མཐོ་མཉམ་གཅིག་པ་དགོས་སོགས་ཀྱི་རྙོག་གླེང་མང་པོ་བཤད་མཐར་ཚུལ་མིན་གྱི་གནས་ཚུལ་ཁག་ཅིག་བྱུང་བ་རེད། ཁྱོད་བསམ་བློ་ཡག་པོ་ཐོངས་དང་། རྒྱལ་བ་རིན་པོ་ཆེ་ནི་བོད་ཀྱི་ཆོས་སྲིད་གཉིས་ཀྱི་བདག་པོ་རེད། ལྡོག་ལྡོག་བཤད་ན་བོད་ཀྱི་རྒྱལ་བོ་རེད། དེ་དང་གོ་ས་གཅིག་པ་དགོས་ལབ་ན་རྩ་བ་ཉིད་མ་འགྲིག་པ་ཞིག་རེད། གལ་སྲིད་དེ་ལྟར་ཁས་ལེན་ན་རྒྱ་མའི་དགོས་འདུན་སྒྲུབ་པ་ཞིག་ཀྱང་རེད། གང་ཡིན་ཟེར་ན་རྒྱ་མིས་ག་དུས་ཡིན་ཡང་རྒྱལ་བ་རིན་པོ་ཆེ་བོད་ཀྱི་རྒྱལ་བོར་ཁས་མི་ལེན་པ་དེར་ཐུག་ཡོད། རྒྱ་མིས་བོད་མི་མང་གིས་རྒྱལ་བ་རིན་པོ་ཆེ་བོད་ཀྱི་རྒྱལ་བོར་ཁས་ལེན་པ་དེ་གཏོར་ཡའི་ཆེད་གནའ་སྔ་མོ་ནས་འདྲེ་ལག་ག་སར་བརྐྱངས་པ་རེད། ང་རང་གི་ངོས་ནས་པཎ་ཆེན་རིན་པོ་ཆེ་ནི་ངའི་རྩ་བའི་བླ་མ་ཡིན་ལ་སྙིང་ཁུང་རུས་པའི་གཏིང་ནས་དད་པ་ཡང་ཡོད། འོན་ཀྱང་སྲིད་ཕྱོགས་ནས་བསམ་ན་རྒྱལ་བ་པཎ་ཆེན་གཉིས་གོ་ས་འདྲ་མཉམ་བཤད་ན་མི་འགྲིག། ཆོས་ཕྱོགས་ནས། གང་གི་མོས་པ་གཙོར་བྱེད་པ།།དེ་ཡི་མདུན་ན་ཐུབ་པ་བཞུགས།། ཞེས་གསུངས་པ་ལྟར་རང་གི་མདུན་དུ་ཡོད་པའི་རྡོ་ལྡོག་ལྡོག་དེ་ཡང་པཎ་ཆེན་རིན་པོ་ཆེ་དངོས་ཡིན་པར་བསམ་ནས་ཕྱག་མཆོད་སོགས་བྱེད་ན་འགྲིག་པ་མ་ཟད་ཕན་ཡོན་ཡང་འབྱུང་ངེས་ཡིན་ནོ།།
གྲྭ་རྒྱལ་མཚན་ནོར་བུ་ནི་པན་ཆེན་རྗུན་མ་ཡིན་པས་བོད་པ་སས་ཀྱང་དད་པ་བྱེད་རྒྱུ་མ་རེད་ལ་ངས་ཀྱང་དད་པ་ག་ལ་བྱེད་
ནད་པས་ལོ་རྒྱུས་རྒྱབ་ལྗོངས་དང་བཅས་ཡག་པོ་བཤད་འདུག ངས་ལོ་རྒྱུས་དེ་ཚོར་བལྟ་སྙིང་འདོད་ཀྱི་འདུག གང་དུ་གསལ་ཡོད་དམ།
པཎ་ཆེན་སྐུ་འཕྲེང་དགུ་པར་བོད་དབུས་གཙང་སྡེ་པ་གཞུང་གིས་བཀའ་ཉེན་ཕོག་ནས་བཙན་བཟུང་ཆེད་དམག་མི་གཙང་བཀྲིས་ལྷུན་དགོན་པར་ཆེད་གཏོང་བྱས་པ་རེད། དེ་བོད་སྡེ་པ་གཞུང་གི་མདའ་དཔོན་ཚོས་ཁོག་གིས་པཎ་ཆེན་སྐུ་འཁོར་ཚང་མ་སྨད་ཕྱོགས་སུ་བྲོས་བྱོལ་སྐབས་རྗེས་ཟིན་མ་ཐུབ་ཁུལ་བྱས་ཏེ་བྲོས་མཐར་བཏང་ཡོད།
དེའི་སྐབས་སུ་བོད་དབུས་གཙང་གི་མི་རྣམས་ཀྱིས་དམངས་ཁྲོད་དུ། པཎ་ཆེན་ཐང་དཀར་ཡིན་ཟེར། །ནམ་འཕངས་བཅད་ནས་འཕུར་སོང་། །ཚོས་ཁོག་ཤ་ཁྱི་ཡིན་ཟེར། །རི་ལུང་བསྐོར་ནས་སླེབས་སོང་། །ཞེས་པའི་གཞས་ཀྱང་གཏོང་སྲོལ་བྱུང་བ་རེད།
དེ་རྗེས་པཎ་ཆེན་སྐུ་ཕྲེང་དགུ་པ་དགོངས་པ་མདོ་སྨད་དུ་རྫོགས་སྟབས་དེ་བས་པཎ་ཆེན་གྱི་སྐུ་འཁོར་རྣམས་འཁོན་འཛིན་ཇེ་ཆེར་སོང་། མཐར་སྐུ་འཕྲེང་བཅུ་པའི་ཡང་སྲིད་ཐོག་བོད་སྡེ་པ་གཞུང་གིས་འབྲས་སྤུངས་ནས་ཡིན་པཎ་ཆེན་འོས་སྤྲུལ་ཟེར་བ་ཞིག་ཐོན་པ་རེད།
དེའི་སྐབས་པཎ་ཆེན་སྐུ་འཕྲེང་དགུ་པའི་སྐུ་འཁོར་དང་བཅས་པའི་བཀྲིས་ལྷུན་པོའི་ཕྱོགས་ཀྱིས་ཁས་ལེན་བྱེད་རྒྱུ་ཕར་བཞག་ཐ་ན་སྐབས་དེའི་རྒྱ་ནག་རྙིང་སྲིད་གཞུང་ལ་མགོ་བཏགས་ཞུས་ཏེ་ཡིན་མིན་ཟེར་ས་མེད་པར་རྒྱ་ནག་དང་མདོ་སྨད་ནས་ཡར་འཁྲིད་ཡོང་བའི་པཎ་ཆེན་རིན་པོ་ཆེ་དེ་གཙང་བཀྲས་ལྷུན་དགོན་པར་རྒྱ་དམག་བརྒྱ་ཕྲག་གིས་དཔུང་རོགས་འཁྲིད་ནས་བསྐྱལ་བ་རེད།
དེར་བརྟེན་བོད་དབུས་ཕྱོགས་ཀྱི་མི་རྣམས་ཀྱི་པཎ་ཆེན་སྐུ་འཕྲེང་བཅུ་པ་དེར་རྒྱ་མིའི་པཎ་ཆེན་སྣ་ཁུང་ཆེན་པོ་ཟེར་བ་དང་། ཡང་མི་འགས་ཤས་ཀྱིས་མའོ་ཀྲུའི་ཞིའི་ཕྲུ་གུ་ཡིན་པའི་རྒྱ་མིའི་པཎ་ཆེན་ཡང་ཟེར་བ་རེད།
དེའི་སྐབས་སུ་མཐའ་མ་བོད་སྡེ་པ་གཞུང་གི་པཎ་ཆེན་འོས་སྤྲུལ་དེ་ཕམ་ཉེས་སུ་བཏང་ནས་མཐར་༸གོང་ས་་མཆོག་གིས་སྐུ་ན་ཕྲ་ན་སྐབས་སུ་པཎ་ཆེན་གྱི་ཡང་སྲིད་ཡིན་པའི་ཁས་ལེན་མ་ཞུས་ཀ་མེད་ཐུག་ཡོད།
ཡིན་ནའང་པཎ་ཆེན་སྐུ་འཕྲེང་བཅུ་པ་ཨིར་ཏི་ནི་ཆོས་ཀྱི་རྒྱལ་མཚན་དེས་རྒྱ་ནག་གི་སྲིད་ཇུས་ལ་མི་འདོད་པའི་ཡིག་འབྲུ་ཁྲི་བདུན་གྱི་སྙན་ཞུ་ཕུལ་ནས་གང་ཉིད་མི་ལོ་ ༩ ལྷག་ཙམ་རིང་བཙོན་ཁང་དུ་བཅུག་ཡོད།
དེ་ནས་བཟུང་པཎ་ཆེན་གྱི་མཛད་འཕྲིན་རྒྱས་ཏེ་བོད་འབངས་བདེ་སྡུག་དང་། ཆོས་དང་། རིག་གཞུང་། སྐད་ཡིག་དང་ཅསས་པར་མི་ཉམས་རྒྱུན་འཛིན་གྱི་རྒྱལ་གཅེས་ཀྱི་བསམ་པའི་དར་ཆ་ཐོན་པོར་བསྒྲེངས་སྟབས་མཐར་རྒྱ་ནག་གིས་ཡ་ང་བག་ཙམ་མེད་པར་ཡང་སྐྱར་པཎ་ཆེན་གྱི་ཚེ་སྲོག་མཇུག་སྡུད་པ་རེད།
དེ་རྗེས་བཙན་བྱོལ་ནས་༸ གོང་ས་མཆོག་གིས་དགེ་འདུན་ཆོས་ཀྱིག་ཉི་མ་པཎ་ཆེན་གྱི་འོས་སྤྲུལ་འཁྲུལ་མེད་དུ་ངོས་འཛིན་བྱས་སྟབས། རྒྱ་ནག་གིས་ཆོས་ལུགས་བེད་སྤྱད་དེ་རྒྱལ་མཚན་ནོར་བུ་པཎ་ཆེན་ཆོས་ཀྱི་རྒྱལ་པོར་མངའ་གསོལ་བྱས་པ་རེད།
ད་ལྟའི་ཆར་པན་ཆེན་དགེ་འདུན་ཆོས་ཀྱི་ཉི་མ་དེ་དོན་གྱི་ངོ་བོ་ཙམ་སྟོན་པའི་རྣམ་དབྱེ་དང་པོའི་པཎ་་ཆེན་ཞིག་ཏུ་གྱུར་པར་བརྟེན་བོད་མི་རིགས་ཀྱི་ལས་དབང་ལྕི་མོ་དེར་མཚོན་ན་ཕན་ནུས་ཅི་ཡང་མེད་པའི་པཎ་ཆེན་མིང་ཙམ་འཛིན་པ་ཞིག་ཏུ་གྱུར་ཡོད།
རྒྱ་ནག་གི་འོས་སྤྲུལ་པཎ་ཆེན་ཆོས་ཀྱི་རྒྱལ་པོ་དེར་བོད་རིགས་མི་དམངས་ཁྲོད་བཀྲས་ལྷུན་དགོན་པ་དང་། ཁྲི་སྟན་མཐོ་ཤོས། ནང་བསྟན་ཆོས་ལུགས་ཀྱི་བདག་དབང་ཡོང་རྫོགས་ཐོབ་ཡོད་སྟབས། ད་ལྟའི་བོད་མི་རིགས་འདིའི་ལས་དབང་ལ་ཞིབ་ཏུ་བསམས་ན་པཎ་ཆེན་རྒྱལ་མཚན་ནོར་བུ་དེ་བོད་མི་རིགས་ཀྱི་ཆོས་ལུགས་དང་། རིག་གཞུང་། སྐད་ཡིག ཞིང་འབྲོག ཚན་རྩལ། འཛུགས་སྐྲུན། ཁོར་ཡུག་སོགས་ཕྱོགས་གང་ས་ནས་བསམས་ན་རྒྱ་ནག་གི་པཎ་ཆེན་འདི་པ་བོད་འདིར་ཕན་འབྲས་ཆེ་བའི་པཎ་ཆེན་གཅིག་ཏུ་གྱུར་པ་དེ་ཡང་བོད་མི་རིགས་འདིའི་ལས་བསྐལ་ཞིག་ཡིན་སྲིད།
གང་ལྟར་ཡང་བོད་རིགས་ཞིག་ཡིན་ཕྱིན་སུ་པཎ་ཆེན་བྱས་ནའང་འགྲིག་ལ་སུ་འཇོན་ནའང་འགྲིག པནཆེན་གྱི་མཚན་གནས་ཡོད་པ་ལྟར་བོད་མི་རིགས་འདིའི་ལས་དབང་ལ་ཕན་ནུས་ཞིག་ཐོན་ཐུབ་ཚེ་ད་གཟོད་པཎ་ཆེན་དེ་པཎ་ཆེན་ངོ་མ་ཡིན་ཡིན་པ་རེད།
ད་དུང་གནད་དོན་མང་དག་གཅིག་ཡོད་ཀྱང་དེ་ཙམ་ཞིགཡིན།
༄༅། །རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུས་བོད་ཀྱི་ནང་ཆོས་མཐར་གསོན་པ་ཞིག་སློབ་སྦྱོང་བྱས་ན་མ་འོངས་པར་ཆོས་ཀྱི་ནུས་ཤུགས་ཀྱིས་དྲང་བདེན་གྱི་ལམ་ལ་འཇུག་ཐུབ་རྒྱུའི་རེ་བ་དང་པཎ་ཆེན་སྐུ་དངོས་མིན་ཀྱང་བོད་ཀྱི་ཆོས་དང་རིག་གཞུང་བསྲུང་སྐྱོབ་བྱེད་པར་ཐུགས་ཕན་གསོས་ངེས་རེད།
རྒྱལ་མཚན་ནོར་ལ་
ཁག་མེད་ཁོང་ལ་གུང་ཕྲན་གྱིས་པཎ་ཆེན་གྱི་མཚན་གནས་བརྕན་བཀལ་བྱས་པ་
རེད་ཁོང་ང་ཚོའི་རང་ཕྱོགས་སུ་འགུག་ཐབས་བྱ་རྒྱུ་དེ་ཡིན་པ
བོད་ཀྱི་ཆོས་དང་རིགས་གནས་འཆད་ཉན་བྱེད་ཡུལ་གྱི་ལྟེ་གནས་ཤིག ད་ལྟ་རྒྱ་ནག་གིས་འཛམ་གླིང་མི་མང་ལ་དབུ་སྐོར་གཏོང་ཡུལ་གྱི་ཆབ་སྲིད་སྟེགས་བུ་ཞིག་ཏུ་ཇི་ལྟར་འགྱུར་སོང་བ་རེད། བླ་བྲང་བཀྲ་ཤིས་འཁྱིལ་དོན་ངོ་མར་སྐབས་དེའི་དགོན་པའི་དགེ་འདུན་ཚོ་དང་ས་གནས་མི་མང་གི་སེམས་ཀྱི་སྡུག་བསྔལ་དེ་སུ་ལ་ཞུ་དགོས་སམ། རྒྱ་གཞུང་གིས་བྱེད་སྟངས་ནག་པ་ལ།
བདག་ལ་དུས་ནམས་ཡང་ཡིན་ཡང་སྤྲུལ་སྐུ་རྫིན་མ་ལ་ངོས་ལེན་བྱེད་གྱི་མེད་ལགས། བླ་བྲང་དགོན་པ་རྒྱ་ལ་དགའ་བོ་བྱེད་ནས་ཁོང་གདན་འདྲེན་ཞུ་བ་དེ་ཐུགས་རྗེ་ཆེའོ།
ཐོག་མར་རྒྱལ་མཚན་ནོར་བུའི་གཟིཊ་སྐོར་གནང་ཡོད་པ་དང་བཤད་ཡོད་མོད། རྗེས་སུ་རྒྱ་གཞུང་གིས་དེ་སྔོན་གསལ་བསྒྲགས་ཤིག་སྤེལ་ཏེ་ཕྱི་ཟླ་ ༨ ཚེས་ ༡༡ ཉིན་ནས་བཟུང་པཎ་ཆེན་རྒྱལ་མཚན་ནོར་བུ་མདོ་སྨད་བླ་བྲང་བཀྲ་ཤིས་འཁྱིལ་དང་གཙོས། རྨ་ཆུ། ཀླུ་ཆུ་སོགས་སུ་གཞུང་འབྲེལ་གཟིགས་སྐོར་གནང་རྒྱུ་ཡིན་སྐོར་བརྗོད་པ་ལྟར། རྒྱ་གཞུང་གིས་ངོས་འཛིན་བྱས་པའི་པཎ་ཆེན་རྒྱལ་མཚན་ནོར་བུ་བླ་བྲང་དུ་གཟིགས་སྐོར་ལ་ཕེབས་ཡོད་འདུག་ལ།
ཟེར་བ་སོགས་ལ་བལྟས་ལ་པཎ་ཆེན་རྫིན་མ་ཁ་ནས་མ་སྤཽབ་པའི་བཟོ་འདྲ་ཞིག་འདུག
ཁོང་བོད་པ་ཞིག་ཡིན་པ་དང་བོད་ཀྱི་གྲྭ་བ་ཡིན་པ་ཙམ་གྱི་རྒྱ་ནག་གི་འདོད་པ་ལྟར་ང་ཚོའི་པཎ་ཆེན་རྒྱལ་མཚན་ནོར་བུ་ཟེར་དགོས་འདོད་རྩ་བ་ནས་མེད།
གང་ཡིན་ཟེར་ན། སྤྱི་ཚོགས་ནང་ནས་གྲྭ་བ་དཀྱིལ་མ་ལས་ཅུང་ཡན་ཁག་ཤས་རྒྱ་ནང་ལ་གྲོང་ཆོག་ལ་འགྲོ་མཁན་ཚོར་རྒྱ་བླ་དང་། རྒྱ་ཟན་ཟེར་ནས་མི་དགའ་བའི་ཚིག་གིེས་མདའ་མོ་འཕེན་དགོས་ན་ཁོས་བོད་ཀྱི་ཉི་ཟླ་གཉིས་གང་རུང་མཚན་གནས་རྩ་ཆེན་དེ་ཁུར་ནས་རྫིག་མདོག་བལྟན་པ་ལས་བོད་ལ་སྲིད་ཞུ་སྣེ་གཅིག་བསྒྲུབ་མི་ཐུབ་ན་ཁོ་ལ་ངོ་རྒོལ་བྱེད་མ་ཐུབ་ན་ངོས་དགའ་བྱེད་དགོས་དོན་རྩ་བ་ནས་མེད་པ་མ་ཟད།
ང་ཚོ་བོད་ཕྱི་ནང་གཉིས་ནས་རྒྱལ་གཅེས་དཔའ་བོ་དཔའ་མོ་དེ་ཚོའི་རང་ཉིད་གི་གཅེས་པས་ལུས་སྲོག་ལོངས་སྤྱོད་ལ་མི་ལྟ་བར་༧གོང་ས་ཐམས་ཅད་མཁྱེན་པ་བོད་ལ་ཕེབས་ཐུབ་དགོས་པ་དང་། ༧པཎ་ཆེན་མཆོག་སྤྲུལ་རིན་པོ་ཆེ་གློད་ཀྲོལ་བཏང་དགོས། བོད་ལ་རང་དབང་དགོས་ཟེར་མཁན་དེ་ཚོའི་སེམས་ཤུགས་བཅགས་པ་མ་རེད་དམ།།
རྒྱ་ནག་གིས་བྱེད་ཕྱོགས་འདི་ནི་རྒྱ་ནག་ངོས་ནས་ཡང་དག་པར་བརྩི་ཆོག་ལ། ཆབ་སྲིད་ཀྱི་ལྟ་གྲུབ་ཐོག་ནས་བལྟས་ནའང་ཡང་དག་པར་བརྩི་ཆོག ཆབ་སྲིད་ཟེར་བ་ནི་འདི་འདྲ་ཞིག་ལ་ཟེར་དགོས། ཆབ་སྲིད་ཀྱི་ཐད་ནས་ལས་རྒྱུ་འབྲས་དང་། ཡ་རབས། བཟང་སྤྱོད། དྲང་བདེན་སོགས་བཤད་ས་མེད། ཆ་སྲིད་ཅེས་པ་ནི་རང་ཉིད་ཀྱི་ངོ་གདོང་གི་ཁེ་ཕན་ཁོ་ན་བསྒྲུབ་ཐུབ་མིན་དེ་ཡིན། རྒྱ་ནག་གི་ཆབ་སྲིད་ནི་སྲིད་པའི་རྩེ་མོར་སོན་ཡོད། ང་ཚོས་ལྟ་བའི་དེ་འདྲ་ལས་སླ་པོ་ཞིག་མ་རེད། དེ་ལ་ལོ་ངོ་ལྔ་སྟོང་དྲུག་སྟོང་གི་ལོ་རྒྱུས་གཏིང་སྲབ་ཡོད་པ་ཞིག་རེད། དེའི་རྐྱེན་གྱིས་ད་ལྟའི་ཆར་ཨ་རི་གཙོས་པའི་རྒྱལ་ཁབ་མང་པོ་ཞིག་གིས་རྒྱ་ནག་གི་ཁ་གཏད་ཆོག་གི་མེད་པ་ནི་ཆབ་སྲིད་ཀྱི་གཏིང་མཐུག་པོས་ཡིན། ང་ཚོས་དེ་དག་ངོ་ཤེས་པའི་ཐོག་ནས་ངོ་ཐོག་གི་ཁེ་ཕན་དང་ཐོབ་སྐལ་ངོས་ཟིན་དགོས། དེ་འདྲ་མིན་པར་ལས་སླ་འདོག་ཁ་པོ་བཤད་བསྡད་པ་དེ་འདྲ་ཞིག་གཏན་ནས་མིན། ཡར་མར་ཚང་མ་ལ་བལྟ་དགོས།
སྤྱིར་རྒྱལ་མཚན་ནོར་བུ་ཟེར་པ་བོད་པ་ཞིག་འུ་རེད་ཟེར་ན་རེད། འོན་ཀྱང་ཁོང་ནི་བོད་ཀྱི་གྲྭ་པ་ཞིག་འུ་ཡིན་ཟེར་ན་ཡིན་པར་མ་ཟད་ཁོང་ལ་དད་པ་བྱས་ན་འགྲིག་འོན་ཀྱང་ཁོང་པན་ཆེན་སྐུ་འཕྲེང་བཅུའི་ཡང་སྲིད་འུ་ཡིན་ཟེར་དེ་ནི་རྩ་བ་ནས་མིན་གང་ཡིན་ཟེར་ན་པན་ཆེན་རིན་པོ་ཆེའི་ཡང་སྲིད་༧གོང་ས་མཆོག་གི་དངོས་འཛིན་གནང་ཡོད་པ་དེ་ལས་གཞན་ཞིག་མེད་འོན་ཀྱང་རྒྱ་ནག་དམར་ཕྱོགས་ཚང་གི་ཆོས་ཟེར་པ་དུག་རེད་ཟེར་མཁན་ཞིག་ཡིན་དུས་བོད་ཀྱི་སྤྲུལ་སྐུ་དངོས་འཛིན་བྱེད་ཀྱི་ཐོབ་ཐང་མེད་ཆོས་དུག་དུ་རྩི་མཁན་ཞིག་གི་སྤྲུལ་སྐུ་ཟེར་པ་ཇི་ལྟར་ཁས་ལེན་བྱེད་དེ་ནི་ཁོང་ཚོ་ལ་འོས་ཆོས་མི་ཚང་། བོད་མི་མང་པོ་ཞིག་གི་ད་དུང་༧གོང་ས་མཆོག་གི་དངོས་འཛིན་གནང་པའི་པན་ཆེན་དེ་དངོས་འཛིན་མཛད་དགོས་པ་ལས་རྒྱ་ནག་དམར་གཞུང་གི་དངོས་འཛིན་གནང་པ་དེ་ལ་པན་ཆེན་བཅུ་བའི་ཡང་སྲེད་ཀྱི་དངོས་འཛིན་བྱེད་མི་རུང་།དེ་གསལ་བོ་ཤེས་མཁན་ཚོས་ཕན་ཚུན་བཤད་ཐུབ་ན་དགེ་མཚན་ཆེ།
གསར་འགོད་པ་ལགས པཎ་ཆེན་རྒྱལ་མཚན་ནོར་བུ་ཞེས་ཚིག་བེད་སྤྱོད་གཏོང་སྟངས་དེ་ཅུང་མི་འགྲིག་གི་འདོད། བསམ་ཚུལ་ཡིན་ངོས་ལེན་ཡོད་ཚེ་རྗེས་ཕྱོགས་གཟབ་གཟབ་གནང་རོགས།