ཐུགས་སྨོན་འདུ་འཛོམས།

དེ་རིང་སེ་ར་ཐེག་ཆེན་གླིང་གི་དགེ་འདུན་འདུས་མང་གིས་རང་ལུས་མེར་བསྲེག་གཏོང་མཁན་གྲྭ་ཚེ་དབང་ནོར་བུ་ལགས་ཀྱི་ཆེད་དུ་སྨོན་ལམ་འདུ་ཚོགས་ཆེན་པོ་ཞིག་བསྐངས་ཡོད་འདུག

གནས་ཚུལ་བཏང་འབྱོར་ལ། དེ་རིང་ཞོགས་པའི་ཆུ་ཚོད་ ༨ ཀྱི་སྟེང་རྒྱ་གར་ལྷོ་ཕྱོགས་དབུས་གངས་ལྗོངས་རང་བདེན་རྩོད་ལེན་མཐུན་ཚོགས་དང་། སྦེལ་ཀོབ་ས་གནས་གཞོན་ནུ་དང་བུད་མེད་བཅས་ཀྱིས་སེ་ར་ཐེག་ཆེན་གླིང་གི་སྐྱབས་རྗེ་མཁན་རིན་པོ་ཆེ་རྣམ་པ་གཉིས་དང་དགེ་བསྐོས་རྣམས་གཉིས། དབུ་མཛད་རྣམ་གཉིས་གཙོས་པའི་བླ་སྤྲུལ་དགེ་བཤེས་དང་། དགེ་འདུན་པ་སྟོང་ཕྲག་གཉིས་ལྷག་གི་སྨོན་ལམ་འདུ་འཛོམས་གཞི་རྒྱ་ཆེ་བ་ཞིག་བསྐངས་ཏེ་ཐུགས་སྨོན་གང་ལེགས་གནང་ཡོད་འདུག

སྐབས་དེར་གསུངས་བཤད་གནང་མཁན་དང་པོ་དབུས་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་བློ་བཟང་དཔལ་ལྡན་གྱིས་རྒྱལ་གཅེས་དཔའ་བོ་གྲྭ་ཚེ་དབང་ནོར་བུ་ལགས་ཀྱིས་བོད་གངས་ཅན་ལྗོངས་ཀྱི་བདེན་མཐའ་གསལ་ཆེད་གཅེས་པའི་རང་ལས་མེར་བསྲེག་ནས་རྐྱེན་འདས་སུ་སོང་བར་ང་ཚོ་ཚང་མས་ཁོང་གི་ཉེ་འབྲེལ་རྣམས་ལ་གདུང་སེམས་མཉམ་སྐྱེད་ཆེད་འདུ་འཛོམས་འདི་གོ་སྒྲིག་བྱས་ཚུལ་དང་། རྒྱལ་གཅེས་དཔའ་བོ་ཁོང་གི་ཆོད་སེམས་ལ་བསྔགས་བརྗོད་སོགས་ཀྱི་གཏམ་བཤད་གནང་རྗེས། སེར་སྨད་མཁན་རིན་པོ་ཆེ་ངག་དབང་འབྱོར་ལྡན་མཆོག་གིས་ཀྱང་། རྒྱལ་གཅེས་དཔའ་བོ་ཁོང་གིས་རང་གི་ལུས་ལ་མེད་བསྒྲོན་པ་འདི་ནི། རྒྱ་གཞུང་ལ་ཚུལ་མཐུན་བསམ་ཚུལ་བཤད་ས་མེད་པས་ལམ་ཁ་འདི་འདེམས་པ་རེད་སོགས་ཀྱི་གསུངས་གནང་། དེ་རྗེས་སེར་བྱེས་མཁན་རིན་པོ་ཆེ་བློ་བཟང་དཔལ་ལྡན་མཆོག་གིས་རྒྱལ་གཅེས་དཔའ་བོ་ཚེ་དབང་ནོར་བུ་ཁོང་རྒྱུན་དུ་དམར་ཟས་རིགས་ཉུང་ཉུང་བྱེད་དགོས་ཚུལ་གྱི་ལས་འགུལ་སྤེལ་མཁན་ཞིག་ཡིན་ཚུལ་གྱི་ལོ་རྒྱས་དང་འབྲེལ་བའི་གསུངས་བཤད་གནང་སོང་།

མཐར་དབུ་མཛད་ལགས་ཀྱིས་བྱང་ཆུང་སེམས་མཆོག་དབྱངས་རྟ་བཏང་བ་དང་དགེ་འདུན་མང་གིས་བྱང་ཆུབ་སེམས་མཆོག་དབྱངས་རྟ་གཏོང་བཞིན་སྨོན་ལམ་འདུ་ཚོགས་གྲོལ་ཡོད་འདུག