ལོ་འགའི་གོང་ནས་གདན་ས་ཁག་གཙོས་པའི་རྒྱ་བལ་འབྲུག་གསུམ་གྱི་བཙན་བྱོལ་བོད་མིའི་གནས་ཡུལ་ཁག་ཏུ། རྒྱ་ནག་གཞུང་ཚབ་ཀྱིས་སྤྲད་པའི་འགྲུལ་བསྐྱོད་ལག་འཁྱེར་བརྒྱུད་བོད་ནང་གཉེན་འཕྲད་དུ་འགྲོ་མཁན་ཇེ་མང་དུ་འགྲོ་བཞིན་ཡོད་ཅིང་། གནད་དོན་འདིའི་ཐད་དབུས་བོད་མིའི་སྒྲིག་འཛུགས་ཀྱི་ངོས་ནས་དོ་སྣང་ཆེན་པོ་བྱེད་ཀྱི་ཡོད་ཟེར།
འདས་པའི་ལོ་ངོ་ལྔ་བཅུའི་རིང་རྒྱ་བལ་འབྲུག་གསུམ་གྱི་བཙན་བྱོལ་བོད་མི་མང་པོ་ཞིག་གིས་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཁག་ཏུ་འགྲོ་རྒྱུ་ནི་དམིགས་ཡུལ་མཐར་ཐུག་ཏུ་བཟུང་སྟེ། ཁྲིམས་མཐུན་ཁྲིམས་འགལ་ཅི་རིགས་ཐོག་འཛམ་གླིང་གི་རྒྱལ་ཁབ་ ༤༥ ཙམ་ནང་བོད་མི་དྲུག་ཁྲི་ལ་ཉེ་བ་ཞིག་ཕྱིན་ཡོད། འོན་ཀྱང་ལོ་ཤས་གོང་ནས་རྒྱ་གཞུང་གིས་ཕྱི་སྡོད་བོད་རིགས་ཚོ་ཕྱིར་རྒྱལ་ནང་དུ་ལོག་རྒྱུའི་སྲིད་བྱུས་གསར་པ་ཞིག་བཏང་སྟེ། བོད་ནང་ལོག་མཁན་ཚོར་རྣམ་འགྱུར་ཡག་པོ་བཟུང་བ་བཅས་ལ་བརྟེན་ཏེ། སྐྱབས་བཅོལ་བོད་མི་མང་དག་ཅིག་གིས་ཕྱི་རྒྱལ་དུ་འགྲོ་རྒྱུའི་ཚབ་ལ་ཕྱིར་བོད་ནང་ལོག་རྒྱུར་བློ་ཁ་ཕྱོགས་མགོ་བརྩམས་ཡོད།
ལྡི་ལི་རྒྱ་ནག་གཞུང་ཚབ་ཁང་གིས་རེས་གཟའ་མིག་དམར་དང་ཕུར་བུའི་ཞོགས་པ་ནས་ཉིན་གུང་བར་བོད་ནང་ལོག་མཁན་ཚོར་ཐོ་འགོད་བྱེད་ཀྱི་ཡོད་འདུག་ལ། ཉིན་དེ་གཉིས་ལ་བོད་མི་ཧ་ཅང་མང་པོ་ཞིག་ལྡི་ལི་རྒྱ་ནག་གཞུང་ཚབ་མདུན་དུ་བང་བསྒྲིགས་ཏེ་ཐོ་འགོད་བྱེད་ཀྱི་ཡོད་པ་དང་། དེ་དག་མང་ཆེ་བ་གདན་ས་ཁག་གི་དགེ་འདུན་པ་དང་བོད་ནས་ཕེབས་པའི་གཞོན་སྐྱེས་ལས་མེད་དག་ཡིན་འདུག དེ་སྔོན་རྒྱ་ནག་གཞུང་ཚབ་ཀྱིས་བོད་ནང་སྐྱོད་མཁན་ཚོར་ཡིག་ཆ་དུས་ཐོག་ཏུ་སྤྲོད་ཀྱི་མེད་ནའང་། ན་ནིང་ལོ་མགོ་ཙམ་ནས་བོད་ནང་ལོ་ ༢ རིང་སྡོད་ཆོག་པའི་ཡིག་ཆ་༼འགྲུལ་བསྐྱོད་ཡིག་ཆ་༽ (Travel Document) ཟེར་བ་ཞིག་སྤྲོད་མགོ་བརྩམས་ཡོད་འདུག ད་ཆར་རྒྱ་གཞུང་གིས་ཕྱི་ཕྱོགས་ཀྱི་བོད་རིགས་ནང་འགུག་བྱ་ཆེད་བོད་ཀྱི་ས་གནས་ཆེ་ཁག་ཏུ་སྣེ་ལེན་ཁང་གསར་རྒྱག་གིས་ལས་བྱེད་བསྐོ་བཞག་བྱས་ཡོད་པ་དང་། བོད་ནང་ལོག་མཁན་ཚོ་ངེས་པར་དུ་བལ་བོད་ས་མཚམས་འགྲམ་དང་ལྷ་ས། ཁུངས་སོ་སོའི་ཞིང་ཆེན་དང་ཁུལ། རྫོང་བཅས་ཀྱི་སྣེ་ལེན་ཁང་བརྒྱུད་དགོས་ཀྱི་ཡོད་འདུག
མདོ་སྨད་མང་རའི་གྲྭ་ཐོས་བསམ་ལགས་ནི་ལྡི་ལི་རྒྱ་ནག་གཞུང་ཚབ་ནས་བོད་ནང་སྐྱོད་པའི་ཡིག་ཆ་རག་སྟེ། འདི་ལོའི་ཕྱི་ཟླ་ ༡ ཚེས་ ༡༠ ཉིན་བོད་ནང་བསྐྱོད་ཅིང་། ཕྱི་ཟླ་ ༤ ཚེས་མགོར་ཕྱིར་རྒྱ་གར་དུ་ལོག་སྟེ་ད་ཆར་བཞུགས་སྒར་ངྷ་རམ་ས་ལར་བཞུགས་ཡོད་པ་ཞིག་ཡིན། འདི་གའི་གསར་འགོད་པ་ཁོང་ལ་ཐུག་འཕྲད་ཀྱིས་བོད་ནང་སྐྱོད་པའི་བརྒྱུད་རིམ་སྐོར་ལ་གླེང་མོལ་བྱས་པ་ལྟར་ན། བོད་དུ་ལོག་མཁན་མང་ཆེ་བ་གདན་ས་ཁག་གི་དགེ་འདུན་པ་དང་། ངྷ་རམ་ས་ལ་ཁུལ་གྱི་གཞོན་སྐྱེས་ལས་མེད་དག་ཡིན་པ་དང་། གཞིས་ཆགས་ཁག་ནས་གཉེན་འཕྲད་དུ་བསྐྱོད་དེ་ཕྱིར་ལོག་མཁན་ཡང་མང་དག་ཅིག་ཡོད་འདུག ན་ནིང་དང་གཞེ་ནིང་གཉིས་ལ་ལྡི་ལི་རྒྱ་ནག་གཞུང་ཚབ་ཁང་དུ་ཐོ་འགོད་བྱེད་མཁན་ཧ་ཅང་མང་ཞིང་། གཟའ་མིག་དམར་དང་ཕུར་བུ་གཉིས་ལ་མཚན་གུང་ནས་བང་བསྒྲིགས་པ་དང་། དགོང་མོ་རྒྱ་ནག་གཞུང་ཚབ་སྒོ་དྲུང་ནས་ཞག་སྡོད་བྱེད་མཁན་ཡང་མི་ཉུང་བ་ཞིག་ཡོད་ཅིང་། འདི་ལོར་མདོ་སྨད་རྔ་པ་དང་དཀར་མཛེས་ཕྱོགས་སུ་ངོ་རྒོལ་གྱི་ལས་འགུལ་བྱུང་སྐབས། རེ་ཞིག་ལྡི་ལི་རྒྱ་ནག་གཞུང་ཚབ་ཀྱིས་བོད་ནང་སྐྱོད་མཁན་ལ་ཡིག་ཆ་སྤྲོད་མཚམས་བཞག་ཡོད་འདུག ད་ཆར་བསྐྱར་དུ་སྒོ་འབྱེད་བྱས་ཏེ་བདུན་ཕྲག་རེར་ཆ་སྙོམས་བོད་མི་ ༡༢༠ ཙམ་གྱིས་ཐོ་འགོད་བྱེད་ཀྱི་ཡོད་འདུག
སྔར་བོད་ནང་ཆབ་སྲིད་ཀྱི་ནག་ཉེས་ཡོད་མཁན་དང་། ལྷ་ས་དང་ཆབ་མདོ་གཙོས་པའི་བོད་རང་ལྗོངས་འོག་གི་བོད་མི་ཚོར་ཡིག་ཆ་རག་རྒྱུར་ཅུང་དཀའ་ངལ་འཕྲད་བཞིན་ཡོད་འདུག རྒྱ་གར་ནས་བོད་ནང་ལོག་མཁན་མང་ཆེ་བ་བོད་ནང་གཏན་སྡོད་བྱེད་མཁན་ཡིན་པ་དང་། ཁག་ཅིག་ཕྱིར་རྒྱ་གར་དུ་ལོག་རྩིས་ཡོད་ཀྱང་ནང་མིས་མ་བཏང་བ་དང་། ཁག་ཅིག་བོད་ནང་སྡོད་འདོད་ཡོད་ཀྱང་ལྟ་བ་མཐུན་མི་དང་ཆབ་སྲིད་ཀྱི་དཀའ་ངལ་འོག་ཕྱིར་རྒྱ་གར་ནང་ཡོང་མཁན་ཡང་ཡོད་འདུག བོད་དུ་སྐྱོད་སྐབས་ས་མཚམས་འགྲམ་དུ་ལས་ཁུངས་རིམ་པ་གསུམ་གྱིས་དྲི་བ་བཏང་རྗེས་བོད་ནང་དུ་འཛུལ་ཆོག་གི་ཡོད་ཀྱང་། གཉའ་ལམ་ནས་ལྷ་ས་བར་རྒྱ་དམག་གིས་བརྟག་དཔྱད་རིམ་པ་ ༤ བྱེད་ཀྱི་ཡོད་པ་དང་། ལྷ་སར་འབྱོར་སྐབས་གཉེན་ཉེ་སོགས་ངོས་ལེན་བྱེད་མཁན་མེད་ཚེ་སྣེ་ལེན་ཁང་དུ་སྡོད་དགོས་ཀྱི་ཡོད་འདུག ལྷ་ས་ནས་ས་གནས་རྫོང་བར་དམིགས་བསལ་དཀའ་ངལ་མེད་ཀྱང་། ཁྱིམ་དུ་བསླེབས་རྗེས་རྒྱ་ནག་གི་འབྲེལ་ཡོད་ཚན་པས་འདྲི་བརྩད་ཡང་ཡང་བྱེད་ཀྱི་ཡོད་པ་དང་། ས་གནས་གཞན་ལ་འགྲོ་དགོས་ཚེ་ཁ་པར་བརྒྱུད་སྙན་སེང་ཞུ་དགོས་ཀྱི་ཡོད་འདུག མི་རེ་ཟུང་གིས་བརྗོད་ན་རྒྱ་གར་ནས་བོད་དུ་ལོག་མཁན་མང་ཆེ་བ་རྒྱ་ནག་གཞུང་གི་༼ མིང་ཐོ་ནག་པོ ༽ཟེར་བ་ཞིག་གི་ནང་བཅུག་ཡོད་སྟབས། རྒྱ་ནག་གི་༼ རྒྱ་ནག་གི་མི་སེར་ཐོབ་ཐང་ལག་འཁྱེར ༽རག་རྒྱུར་དཀའ་ངལ་འཕྲད་ཀྱིན་ཡོད་འདུག
གྲྭ་ཐོས་བསམ་ལགས་ཀྱིས་བརྗོད་དོན། “ ང་རང་ཕྱིར་རྒྱ་གར་དུ་ལོག་སྐབས་ཟི་ལིང་ནས་མཚོ་སྔོན་ཞིང་ཆེན་ཆོས་ལུགས་ཚན་པའི་མགོ་གཙོ་དང་ཞིང་ཆེན་སྤྱི་བདེ་ཚན་པའི་མགོ་གཙོ། དེ་བཞིན། མཚོ་ལྷོ་ཁུལ་བདེ་འཇགས་ཚན་པའི་མགོ་གཙོ་དང་དྲུང་ཡིག་བཅས་ཁྱོན་བོད་པ་ ༤ ང་རང་ཡོད་སར་ཡོང་སྟེ། ཁྱོད་ལ་སྐད་ཆ་འགའ་འདྲི་རྒྱུ་ཡོད་ཟེར་ནས་རླངས་འཁོར་ཆུང་ཆུང་ཞིག་ཏུ་བཅུག་ཏེ། གྲོང་ཁྱེར་མཐའ་མཚམས་ཀྱི་མགྲོན་ཁང་ཞིག་ཏུ་ཁྲིད་སོང་། སྐབས་དེར་ཁོང་ཚོས “ཏཱ་ལའི་བླ་མས་བགྲེས་ཡོལ་གནང་རྩིས་ཡོད་པ་དེར་བསམ་ཚུལ་ག་རེ་ཡོད། ཁོང་བགྲེས་ཡོལ་གནང་ན་བཀའ་ཁྲི་སུ་ཐོབ་ཀྱི་རེད། བློ་བཟང་སེང་གེ་ལ་བཀའ་ཁྲི་ཐོབ་ན། ཁོང་གི་ལངས་ཕྱོགས་དེ་རང་བཙན་དང་ལམ་དབུ་མ་གང་ལ་འགྲོ་རྒྱུ་རེད” ཅེས་སོགས་དྲིས་སོང་། ངས་༧གོང་ས་མཆོག་གིས་བཙན་བྱོལ་བོད་གཞུང་གི་དབུ་ཁྲིད་ལས་བགྲེས་ཡོལ་མ་གནང་ཚེ། བོད་ཀྱི་གནད་དོན་ཐག་གཅོད་རྒྱུར་ཕན་ཐོགས་ཡོང་གི་རེད་ཅེས་ལན་བཏབས་སྐབས། དེའི་ནང་གི་ལས་བྱེད་རྒན་གྲས་ཤིག་གིས་དེ་ངོ་མ་རེད་ཅེས་བཤད་སོང་། ཡང་ལས་བྱེད་གཞན་ཞིག་གིས “ཁྱོད་རྒྱ་གར་ལ་སོང་ན་དགེ་མཚན་གང་ཡང་ཡོད་པ་མ་རེད། ང་རང་ཡང་རྒྱ་གར་དང་བལ་ཡུལ་དུ་སོང་མྱོང་ཡོད། རྒྱལ་ཁབ་དེ་གཉིས་ཀྱི་ས་ཆ་གང་དུ་སོང་ནའང་གད་སྙིགས་དང་དྲི་ངན་ཁེངས་འདུག དེ་ལས་ཕ་ཡུལ་དུ་ནང་མིའི་མཉམ་བསྡད་ན་ཡག་གི་རེད། ཕ་ཡལ་དུ་བསྡད་ན་གཙོ་བོ་སོ་སོས་ཁ་ལ་བདག་པོ་རྒྱག་དགོས་པ་རེད། ད་ལྟ་ཕ་ཡུལ་གྱི་དཔལ་འབྱོར་ཡར་རྒྱས་ཕྱིན་ཡོད་པ་རེད། དཀའ་ལས་དེ་འདྲ་རྒྱག་དོན་ཡོད་པ་མ་རེད” ཅེས་བརྗོད་བྱུང་།
ཡང་ལྡི་ལི་རྒྱ་ནག་གཞུང་ཚབ་ནས་བོད་ནང་སྐྱོད་ཆོག་པའི་ལག་འཁྱེར་རག་སྟེ། ད་ཆར་བོད་ནང་ལོག་རྒྱུར་གྲ་སྒྲིག་བྱེད་བཞིན་པའི་སྐུ་ཞབས་བརྩོན་འགྲུས་ལགས་ཀྱིས་བོད་དུ་ཕྱིར་ལོག་དགོས་པའི་རྒྱུ་མཚན་སྐོར་བརྗོད་དོན། “ གཅིག་ནས་ངའི་ཨ་མ་ལགས་ལོ་ན་ཆེན་པོ་ཡིན་པ་དང་། གཉིས་ནས་ལོ་འདི་དག་རིང་ཕྱི་རྒྱལ་དུ་འགྲོ་རྒྱུར་འབད་བརྩོན་ཐེངས་མང་ཞུས་ཀྱང་ཐོངས་མཆན་རག་མ་སོང་། རྒྱ་གར་དུ་བསྡད་ན་རང་དབང་ཙམ་འདུག་ཀྱང་། དགོན་སྡེ་ཁག་དང་ཚོགས་པ་སྒྲིག་འཛུགས་གང་རུང་གི་ཁོངས་སུ་མེད་ན། རང་གི་འཚོ་བར་དཀའ་ངལ་འཕྲད་ཀྱི་འདུག དེ་བཞིན་རྒྱ་གར་ནང་སྐད་དང་ལག་འཁྱེར་མེད་ན། རང་ཁ་རང་གསོ་བྱ་ཐབས་མེད་སྟབས། ཨ་མ་དང་ནང་མིའི་རེ་བ་ལྟར་ཕ་ཡུལ་དུ་ལོག་རྒྱུར་ཐག་བཅད་པ་ཡིན། ཕ་ཡུལ་ལ་སོང་ན་རང་ས་རང་བདག་གི་ས་ཆ་ཡོད་དུས་རྒྱ་གར་ལས་ཅུང་ཡག་གི་རེད་བསམ་གྱི་འདུག ཟླ་གཉིས་གོང་ངའི་རོགས་པ་གཉིས་ཕྱིར་བོད་དུ་ལོག་པ་རེད། ཁོང་ཚོས་བཤད་ན། ད་ལྟ་ཕ་ཡུལ་དུ་ཆབ་སྲིད་ལ་བྱུས་གཏོགས་མ་བྱས་ན་དཔལ་འབྱོར་འཚོལ་སྒྲུབ་ཀྱི་གོ་སྐབས་ཧ་ཅང་མང་པོ་འདུག་ཟེར། སློབ་སྦྱོང་ཡོད་མཁན་ཞིག་ཡིན་ན། འདི་གར་༧གོང་ས་མཆོག་དང་བོད་གཞུང་ལ་སྲི་ཞུ་བསྒྲུབ་ན་ཡག་པོ་འདུག དེ་མིན། སོ་སོར་སློབ་སྦྱོང་གང་ཡང་མེད་མཁན་ཞིག་ཡིན་ན། ངྷ་སའི་གཡས་གཡོན་དུ་འཁྱམ་བསྡད་ན་མི་ཚེ་འཕྲོ་བརླག་རེད ” ཅེས་བརྗོད་བྱུང་།
ལོ་འདི་འགར་ཕྱི་ཕྱོགས་ཀྱི་བོད་མི་མང་པོ་ཞིག་ཕྱིར་བོད་ནང་ལོག་བཞིན་པ་དེར། བདེ་སྲུང་དྲུང་ཆེ་དངོས་གྲུབ་རྡོ་རྗེ་མཆོག་ལ་གནས་ཚུལ་འདིའི་སྐོར་ལ་རྒྱུས་མངའ་ག་ཚོད་ཡོད་མེད་དང་། གཞུང་གི་གཟིགས་ཕྱོགས་གང་འདྲ་ཡོད་མེད་ཐད་བཀའ་འདྲི་ཞུས་པར། “ ད་ལྟ་བོད་མི་མང་པོ་ཞིག་བོད་དུ་ཕྱིར་ལོག་བྱེད་བཞིན་པ་དེ་དངོས་ཡོད་གནས་ཚུལ་རེད། དེར་བཙན་བྱོལ་གཞུང་གི་ངོས་ནས་ཀྱང་དོ་སྣང་ཆེན་པོ་བྱེད་ཀྱི་ཡོད། ད་ལྟ་བོད་དུ་ལོག་མཁན་མང་ཆེ་བ་གདན་ས་ཁག་གི་དགེ་འདུན་པ་ཆགས་ཡོད། ཁོང་ཚོའི་མ་དགོན་བོད་ལ་ཡོད་དུས་བོད་ལ་ཕེབས་ཐུབ་ན་ཡག་པོ་ཡོང་གི་རེད། མ་གཞི་ང་ཚོར་གཉེན་འཕྲད་ལ་འགྲོ་རྒྱུའི་ལམ་ཁ་དེ་སྔོན་མ་ནས་ཡོད་ཀྱང་། རྒྱ་ནག་གི་ཆབ་སྲིད་ཀྱི་རྐྱེན་པས་བོད་རང་སྐྱོང་ལྗོངས་ཀྱི་ས་ཁུལ་ཁག་ལ་ཡིག་ཆ་དེ་ཙམ་སྤྲོད་ཀྱི་མི་འདུག སྤྱིར་བོད་དུ་ལོག་ན་གཞིས་ཆགས་ཁག་གི་གཞིས་མགོར་འབྲེལ་བ་བྱས་ཏེ། བོད་དུ་ལོག་དགོས་དོན་སྐོར་གྱི་འགེངས་ཤོག་བསྐང་རྒྱུ་དང་། ངྷ་ས་ལྟ་བུར་ས་གནས་མགོ་འཛིན་ལས་ཁུངས་ནས་འགེངས་ཤོག་བསྐང་དགོས་ཀྱང་། ད་བར་བོད་མི་ཉུང་ཤས་ཤིག་ལས་ལས་གཞི་དེར་དོ་སྣང་བྱེད་མཁན་བྱུང་ཡོད་པ་མ་རེད། དེར་མང་ཚོགས་ཀྱིས་ངེས་པར་དུ་དོ་སྣང་བྱ་དགོས་པ་རེད། བོད་དུ་ལོག་མཁན་དག་ལ་གཞུང་གི་ངོས་ནས་བཀག་འགོག་གནང་འདོད་ཡོད་པ་མ་རེད། ཡིན་ནའང་། གཙོ་བོ་རང་ཉིད་རྒྱ་ནག་གི་དྲིལ་བསྒྲགས་རྫུན་མའི་འོག་མགོ་མི་འཁོར་བ་ཞིག་གནང་དགོས་པ་རེད། རྒྱ་གཞུང་གིས་ལོ་རབས་ ༨༠ ནང་ཚུར་རྒྱ་གར་ལ་ཕེབས་མཁན་ཚོར་དམིགས་བསལ་སྣེ་ལེན་བྱེད་ཀྱི་ཡོད་པ་རེད། དེའི་སྔོན་ལ་ཡོང་མཁན་ཚོར་སྤུན་མཆེད་ཀྱི་འབྲེལ་བ་རིང་དུ་ཕྱིན་ཡོད་སྟབས་དེ་ཙམ་གལ་ཆེར་བརྩི་ཡི་ཡོད་པ་མ་རེད། དེ་མིན། སློབ་གྲྭ་ཁག་ནས་བོད་དུ་ལོག་མཁན་མང་པོ་ཡོང་གི་འདུག དེ་དག་ཁག་ཅིག་སློབ་ཕྲུག་གི་ཕ་མར་གནོན་ཤུགས་སྤྲད་དེ་ཕྱིར་ལོག་དགོས་པ་ཞིག་ཆགས་འདུག ” ཅེས་བརྗོད་སོང་།
གོང་བཀོད་གསར་འགྱུར་འདིའི་ཞིབ་འཇུག་རྒྱུ་ཆ་སོགས་ཞིབ་ཕྲའི་གནས་ཚུལ་ཁག་བོད་ཀྱི་དུས་བབ་ཚགས་ཤོག་སྤྱིའི་འདོན་
གསར་འགོད་པ། དཔལ་ལྡན།
![A large crowd walks in a market area outside Dadar station in Mumbai, India, Friday, March 17, 2023. [AP Photo/Rajanish Kakade]](https://tibettimes.net/wp-content/uploads/2026/04/Screen-Shot-2026-04-02-at-5.36.58-PM-360x180.png)
བྱེས་འབྱོར་གདན་སའི་གྲྭ་བཙུན་དང་། །ལོ་མང་ཤེས་བརྩོན་གཞོན་སྐྱེས་རྣམས། །བྱེས་གཞུང་བདག་མེད་སྲང་ལ་ཉུལ། །རང་རྐང་མི་ཚུགས་དཀའ་ངལ་འཕྲད། །ཕ་སར་མི་ལོག་ཐབས་ལམ་མེད། བཙན་བྱོལ་བོད་གཞུང་བདག་རྩིས་མེད། །གང་ལ་ཕྱིན་ཀྱང་རང་དབང་བྲལ། །ཤེས་ཡོན་ཡོད་ཀྱང་བདག་པོ་མེད། །མི་རིགས་ཡོད་ཀྱང་མཐུན་འབྲེལ་མེད། །མི་ཚེ་མདུན་ལམ་བརླག་ལ་ཉེ། །མུན་ནག་ནང་དུ་ཞུགས་ན་ཡང་། །རང་རེའི་ཕ་ས་ཡིན་ནས་འགྲོ། །སྲིད་ཆབ་ལས་དོན་མ་བསྐྱོད་ན། །བྱེས་འབྱོར་ལས་ཀྱང་མདུན་ལམ་ཆེ། །རང་སྐད་གཙང་མས་བསྐྱོད་ནས་འགྲོ། །གསར་རྙིང་བསྙེས་བཅོས་མིང་ཡང་མེད། །ཀ་ཅའི་མདུན་ལམ་ཨ་ཐང་ཆད། །གཞིས་ལུས་བོད་རིགས་མཐུན་འབྲེལ་ཆེ། །དམར་པོའི་བཙན་འོག་ལུས་ན་ཡང་། །བྱེས་འབྱོར་གསར་རྙིང་བསྙེས་བཅོས་དང། །རྒྱ་གར་པ་ཡིས་མཐོང་ཆུང་སོགས། །རང་སྡུག་ལས་ཀྱང་ཡང་སྡུག་ཡོད། །དེ་ལས་ཕ་སར་འགྲོ་ན་སྐྱིད། ། དེ་འདྲ་བསམ་བློ་ཡོངས་འཁོར་ནས། །དེང་སང་བོད་ལ་འགྲོ་མཁན་མང་། །དབུས་གཞུས་བོད་མའི་ཆིག་སྒྲིག་ཁང་། །ལས་མེད་གཞོན་སྐྱེས་ར་བས་བསྐོར། །མིག་ཟུང་འཛུམ་པའི་སྐུ་དྲག་ཚོ། །མིག་ཕྱེས་གཞོན་ནུའི་མདུན་ལམ་གཟིགས། །གཞིས་བྱེས་ལྷན་འཛོམས་ཡོངས་འདོད་ན། །ལས་མེད་གཞོན་ནུ་བདག་སྐྱོང་བྱོས། །ཁོང་རྣམས་མ་འོངས་མདུན་ལམ་དང་། །ཆོལ་གསུམ་བདེ་སྡུག་སེལ་ངེས་ཡིན། །མ་འོངས་ཕུག་རྒྱངས་རིང་ཞིག་བརྩོན། །སྐྲ་ལོ་དཀར་བའི་སྐུ་དྲག་རྣམས། །དུས་རབས་ཉེར་གཅིག་གོམ་ཁར་གཟིགས། །ཞི་བདེའི་དེད་དཔོན་ལམ་སྟོན་ཉོན། །རང་དབང་དང་ནི་ན་གཞོན་སོགས། །རང་སྲོག་ལས་ཀྱང་གཅེས་འཛིན་ཞིག །གདོང་དམར་བོད་ཀྱི་ལ་རྒྱ་དགོས། །དངུལ་ལོ་སྒེར་དོན་མ་བསྙེགས་རོགས། །
གཞི་ཆགས་སྲ་བརྟན་མ་ཏོགས་གསར་འབྱོར་སྲ་བརྟན་གྱི་གྲོས་ཆོད་དུས་ནམ་ཡང་གོ་མ་མྱོང།ཨོསི་ཀྲོ་ལི་ཡ་འགྲོ་མཁན་ཚོས་ཁ་ཤས་ནི་བོད་ནང་དངོས་གནས་དཀའ་ལས་བརྒྱབ་མྱོང་མཁན་ཡོད།ཁ་ཤས་ནི་བོད་ནང་མོ་ཊ་ཨ་ལོག་རྒྱག་ནས་རྒྱ་གར་ནང་སླེབས་ཚར་དུས་ཆབ་སྲིད་བརྩོན་པ་ཡིན་ཟེར།ཁ་ཤས་ནི་སྐབས་འཚོལ་རིང་ལུགས་ཐོག་བརྩོན་པ་ཆགས་ནས་ཨོ་སི་ཀྲོ་ལི་ཡ་རྒྱན་རྒྱག་ག་ཡང་འགྲོ་གི་ཡོད།་དངོས་གནས་བྱེད་ན་བདེ་སྲུང་ལས་ཁུངས་སོགས་འབྲེལ་ཡོད་ལ་བརྟག་དཔྱད་ཡག་པོ་བྱེད་དགོས།ཁ་ཤས་དངོས་ཡོད་དཀའ་ལས་རྒྱག་ཡོད་ན་སླེབས་དགོས་ས་སླེབས་ཀྱི་ཡོག་མ་རེད།
མེགྷན་དུ་གསར་འབྱོར་དག་ལས་ཀ་རག་མཁན་ནི་ཉུང་ཉུང་རེད།ལོ་ནས་ལོ་ཁང་གླ་ལ་སོགས་འགྲོ་སོང་བཏང་ཐུབ་ཀྱི་མ་རེད།
གཞུང་ངོས་ནས་བཟོ་གྲྭ་རམ་ཟ་ཁང་མང་ཙམ་བཙུགས་ཐབས་ཀྱི་ཁོ་ཚོས་ལ་ལས་ཀ་ཞིག་སྤྲད་ཐབས།ཡང་ན་གཞི་ཆགས་གསར་པ་ཞིག་བཙུགས་ཐབས་བྱེད་ན་ལེགས།
ཁ་ཏགས་དཀར་པོ་ལགས། ངས་ཀྱང་བོད་དུ་རང་གི་ལུས་ཐོག་ཏུ་སྡུག་སྦྱོང་མྱངས་མྱོང་བའི་ཆབ་སྲིད་བཙོན་པའམ་དེ་དང་འབྲེལ་ཡོད་ཞིག་གིས་རྒྱ་དམར་གཞུང་ཚབ་ཆེན་པོར་དགའ་བསུ་ཞུ་མི་སྲིད་པའི་རེ་བ་བྱེད་བཞིན་ཡོད་ འོན་ཀྱང་སྟབས་མ་ལེགས་པ་ཞིག་ལ་དེ་ནི་ཆབ་སྲིད་འབྲེལ་ཡོད་ཞིག་དང་བོད་གཞུང་ནས་ཨའོ་སི་ཁྲོ་ལི་ཡར་གཏང་བའི་མི་ཞིག་ཡིན་འདུགལ་དེ་དང་འབྲེལ་ཡོད་ཀྱི་པར་རིས་ཀྱང་དུས་དེབ་ཐོག་ཐོན་ཡོད་འདུག།
ཆོལ་ཁ་དང་ཆོས་ལུགས་ཀྱི་འཐེན་འཁྱེར་དང་ཕྱོགས་རིས་ཀྱིས་དུས་ནམ་ཀུན་ཏུ་བཟི་བསྡད་ཡོད་པའི་བྱེས་ཀྱི་བོད་ཚོགས། ལྷག་པར་དུ་རྡ་སའི་རི་རྐེད་བར་གསུམ། བླ་དཔོན་ཆེ་ཆུང་། མི་འཁྱམས་ཕོ་མོ། མདོར་ན་བོད་པ་ཚང་གི་ལས་དབང་ཞིག་ཡིན་ནམ་ཆོལ་ཁ་དང་ཆོས་ལུགས་ཀྱིས་ཕྱོགས་ཞེན་ཁོ་ནར་དམིགས་པ་ལས་ཅི་འཇོན་ཡོད།
ད་བོད་དུ་ཕེབས་མཁན་ཚོ་ཡང་ཕལ་ཆེར་ཨར་ཐུག་པ་རེད། ལྷག་པར་གསར་འབྱོར་ཚོ་རེད། བརྙས་བཅོས་དང་སྡིགས་དམོད་ཀྱི་ཁྲོད་ནས་ཕྱིར་མི་ལོག་ཀ་མེད་ཐུག་རེད། གསར་འབྱོར་དང་གཞིས་ཆགས་ཀྱི་ཕྱོགས་འཁྱེར་དེ་ཡང་རྡ་ས་ཁག་ནས་ཐོལ་དུ་བྱུང་བའི་ལྟ་བ་ཞིག་ཞེད་སྣང་བ་ཞིག་རེད་ཚོད་བཤད། དེ་ཁག་ལ་གཞིགས་ན་དངོས་གནས་སེམས་བཟོད་བྲལ་བ་ཞིག་རེད།
མི་མང་ན་རོ་མང་ཟེར་མོད། མི་འབོར་མང་ཕྱོགས་དེས་ཁེ་བཟང་རེག་འགྲོ་བ་ཡང་ཆོས་ཉིད་ལྟ་བུ་ཞིག་རེད།
ཤུ་་་་་་་་་་་་་་་་་་
ཡག་པོ་འདུག་ཚང་མ་བོད་ལ་ལོག་གྱུག་
བོད་དུ་ཕེབས་ཐུབ་ན་ཡག་པོ་རེད། ཡང་རྡ་ས་ཁུག་ཀྱོག་དེ་ནས་ཅིག་ཅིག་མུག་མུག་ཅིག་ཟེར་བཞིན་ཡོད་པ་འདྲ། སྐབས་འཚོལ་རང་ལུགས་པ་དེ་ཚོ་ཁ་བཙུམ་ན་དགའ། ཐོས་བསམ་ཟེར་བའི་སྐད་ཆ་དེ་ཚོར་ཡིད་ཆེས་མེད། སྐབས་འཙོལ་རང་ལུགས་པ་རང་རེད།
སྐུ་ཞབས་བརྩོན་འགྲུས་ལགས་ཀྱིས་བོད་དུ་ཕྱིར་ལོག་དགོས་པའི་རྒྱུ་མཚན་སྐོར་བརྗོད་དོན་དེ་དངོས་གནས་བདེན་པ་རེད།
ཨོ་སི་ཀྲི་ལི་ཡར་རྒྱ་དམར་གཞུང་ཚབ་ལ་དགའ་བསུ་ཞུ་མཁན་དེ་དག་ཕལ་ཆེར་བོད་ནང་རང་གི་ལུས་ཐོག་ལ་དངོས་སུ་སྡུག་སྦྱོང་མྱོང་བའི་ཆབ་བཙོན་ཞིག་ཡིན་མི་སྲིད་།
སྐྱབས་མེད་མགོན་མེད་གཅིག་ཡིན་ན། གང་དུ་ཕྱིན་ཀྱང་གཞན་གྱི་ལག་ཆ་རེད།
རྒྱ་མི་དངུལ་ལ་དགའ་མིན་གང་ལྟར་ཡང་། རྒྱ་མིའི་གཞུང་ཚབ་ཏུ་འགྲོ་སྐབས་འགེངས་ཤོག་ལ་དངུལ་སྤྲོད་དགོས་ཀྱི་མིན་འདུག འོན་ཏེ་བོད་གཞུང་ལས་ཁུངས་ཚང་མར་རྒྱབ་གཉེར་རམ་ངོས་སྦྱོར་ཐུང་ངུ་ཞིག་ལེན་པར་འགྲོ་སྐབས་དངོས་གནས་ཁག་སེ་འདུག་ལ་སྒོར་བཅུ་ ༿ཉི་ཤུ་དགོས་ཀྱི་འདུག་ག
སྐྱབས་མེད་མགོན་མེད་གཅིག་ཡིན་ན་གང་དུ་ཕྱིན་ཀྱང་མིའི་ལག་ཆ་ཙམ་རེད།
ཨའོ་སིི་ཁྲོ་ལི་ཡར་གནས་བསྡོད་བོད་རིགས་རྣམས་བོད་དུ་གཉེན་འཕྲད་འགྲོ་རྒྱུའི་མཐོངས་མཆན་ཞུ་སྐབས་ངེས་པར་དུ་རྒྱ་ནག་གཞུང་ཚབ་ཁང་གི་གནས་ཡོད་ལས་བྱེད་ཐུག་དགོས་ཀྱི་ཡོད་པ་རེད།་ད་བར་འདི་ག་ཨའི་སི་ཁྲོ་ལི་ཡར་ཡོད་པའི་བོད་རིགས་བོད་དུ་གཉེན་འཕྲད་དུ་འགྲོ་ཆེད་རྒྱ་གཞུང་གི་ལས་བྱེད་ཁྱིམ་དུ་མགྲོན་འབོད་བྱས་པ་དང་དེ་བཞིན་ལྐོག་དུ་གསོལ་བསྟོན་གཤམས་པ་སོགས་ཀྱི་ངོ་ལྐོག་གི་ཐབས་ཤེས་སྣ་ཚོགས་བྱས་ཏེ་བོད་དུ་འགྲོ་བཞིན་ཡོད། དེ་སྔོན་བོད་རིགས་ཁག་ཅིག་ནས་རྒྱ་ནག་གཞུང་ཚབ་ཁང་གི་གཞུང་ཚབ་ཆེན་པོར་དགའ་བསུའི་མཛད་སྒོར་ཕྱིན་ཡོད་པ་དང་དེ་རང་ངོས་ནས་བསམ་བློ་ཇི་ལྟར་གཏང་ཀྱང་རྒྱ་གཞུང་ནས་འགྲེལ་བཤད་ལོག་པ་རྒྱབ་སྟེ་ཆབ་སྲིད་ཀྱི་ལག་ཆར་བེད་སྤྱད་བྱེད་བཞིན་ཡོད། འདི་ལྟ་བུའི་འོག་ནས་བོད་དུ་འགྲོ་བཞིན་པ་དེ་ཆབ་སྲིད་བཙོན་པ་ཚོར་བོད་གཞུང་ནས་ཆེ་མཐོངས་གནང་བ་དེ་ཆུད་ཟོས་སུ་སོང་བ་མིན་ནམ།
ཕྱིར་བོད་དུ་ལོག་མཁན་ཚོར་རྒྱབ་སྐྱོར་ཡོད། འཐེན་འཁྱེར་དང་ཕྱོགས་རེས་ཀྱི་གཡུལ་ས་འདིར་དཀའ་ངལ་འཕར་མ་ཞིག་ཁུར་ནས་ཨུ་ཚུགས་བྱེད་པ་ལས། ཕྱིར་བོད་དུ་ལོག་ནས་ས་མཐོ་གང་མ་གཏོགས་མ་ལོན་ར་ན་དེ་བདག་པོ་རྒྱབ་ནས་སྡོད་རྒྱུ་གལ་ཆེན་པོ་རེད།
ད་དུང་མང་པོ་ཕྱིར་བོད་དུ་ལོག་ངེས་རེད། བཙན་བྱོལ་བོད་གཞུང་གིས་ཇོ་ནང་ཚང་ལ་ཆོས་བརྒྱུད་ཀྱི་ཐོབ་ཐང་མ་སྤྲད་ན། ཕྱིར་བོད་དུ་ལོག་རྒྱུ་ཡིན། བོད་ནང་དུ་བོད་སྤྱི་ལ་བསམ་བློ་བཏང་ན་དཀའ་ངལ་ཡོད་མོད། ཆོས་བརྒྱུད་ཀྱི་ཐད་ནས་ཇོ་ནང་ཚང་ལ་ཐོབ་ཐང་གཅིག་མཚུངས་ཡོད། གལ་ཏེ་བོད་གཞུང་གིས་ང་ཚོར་ཐོབ་ཐང་མ་སྤྲད་ན་ཕྱིར་ལོག་རྒྱུ་ཡིན་ཟེར་མཁན་གྱི་ཇོ་ནང་པ་མང་པོ་དང་ཐུག་བྱུང་།
ང་ངོ་མ་ཧང་སངས་ཀྱིན་འདུག བཙན་བྱོལ་གཞུང་གིས་ཇོ་ནང་ཚང་ལ་ག་རེ་བྱས་ནས་ཆོས་བརྒྱུད་ཀྱི་ཐོབ་ཐང་མི་སྤྲོད་པ་རེད། ང་ཚོས་འདི་ལྟར་བྱེད་བཞིན་ཕར་རྒྱ་ནག་ལ་བོད་ལ་རང་དབང་སྤྲོད་དགོས་ཟེར་ཕོད་དམ།
རྒྱ་གཞུང་འདི་བརྣག་སའི་འདུག་ཐ། ང་ཚོ་བོད་པ་སོ་སོའི་ལུང་པ་ལ་གཉེན་འཕྲད་དུ་འགྲོ་བ་ལའང་། ཡུལ་སྐོར་སྤྲོ་འཆམ་པ་ནང་བཞིན་བསྐྱོད་དགོས་པ་བཟོས་བཞག ཁྱད་མཚར་པོ་ཨེ་མིན་འདུག
རྒྱ་ནག་གཞུང་འདི་དངུལ་ཁོ་རང་མ་གཏོགས་བསམ་ཡ་ཡོད་མ་རེད། སྤྱོད་ངན་མ་རབས་རང་རེད།
བོད་དུ་འགྲོ་མཁན་ཚོ་ཀྲུང་གོ་བོད་མི་ཕྱི་བསྡད་ལག་ཁྱེར་ཁུར་ནས་འགྲོ་ན་ངོ་ཚ་ངོ་ཚ་།
རང་ཡུལ་རང་གིས་བདག་པོ་རྒྱག་རྒྱུ་ངོ་མ་གལ་ཆེན་ཡིན་ངེས་འོན་ཀྱང་རིག་གཞུང་སྟི་གནས་གདན་ས་ཆེན་པོ་ཁག་སྟོང་ཚེ་གང་བྱེད་དགོས་སམ།
སྤྱིར་བཏང་བོད་ནས་རྒྱ་གར་དུ་བཙན་བྱོལ་ལ་འབྱོར་མཁན་ཆ་ཚང་ནི་སློབ་སྦྱོང་གི་རང་དབང་ངམ་སྤྱིར་རང་དབང་གིས་ཕོངས་ནས་ཡོང་མཁན་ཡིན་མིན་མི་ཤེས། མཐའ་གཅིག་ཏུ་ཡུལ་དེར་ཁྲིམས་མཐུན་གྱི་ཆབ་སྲིད་དང་འབྲེལ་བའི་དཀའ་ངལ་འཕྲད་ནས་ཡོང་བ་ཡིན་ན་རྒྱ་གར་དུ་སྡོད་ན་འགྲིག་ངེས་རེད། འོན་ཀྱང་། ཁྲིམས་འགལ་གྱི་བྱ་སྤྱོད་མི་གསོད་ཁྲག་སྦྱོར་རམ་རྐུ་ཇག་གི་ལས་ལ་ཞུགས་ནས་རྒྱ་གར་དུ་སྐྱབས་འབྱོར་ལ་འབྱོར་མཁན་ཡང་མང་དག་གཅིག་ཡོད། ཡིན་ན་ཡང་། ཉ་ཉུང་མཉམ་བསྲེས་ཀྱིས་བསྡད་ཡོད་ཙང་། དབྱེ་འབྱེད་བྱེད་པ་ཤིན་ཏུ་དཀའ།
ཁོ་བོས་བསམ་ན། བོད་དུ་ཕྱིར་རང་ཡུལ་ལ་ལོག་མཁན་གྱི་རིགས་རྣམས་ལ་ངོ་མ་དགའ་བསུ་ཞུ་དགོས་པ་ཡིན། ད་དུང་དེ་ལྟ་བུ་གང་མང་ཐོན་ཐུབ་པ་དགོས། གང་ཡིན་ཟེར་ན། སྐབས་གཅིག་ལ་ང་ཚོས་རང་ཡུལ་དུ་རང་མི་རིགས་གྲངས་ཉུང་དུ་འགྱུར་བཞིན་པར་བཤད་བཞིན་ཡོད། ཡང་ཕྱོགས་གཞན་ནས་བོད་མི་གྲངས་མང་ཞིག་རང་ཡུལ་ལ་སའི་ཐོབ་ཐང་ཡོད་བཞིན་དུ་དེ་དོར་ནས་རྒྱ་གར་ལ་དོན་མེད་ངང་སྡད་ན་ཆ་འཕྲོད་པོ་རང་མཐོང་གིན་མིན་འདུག དེ་བས་རང་ཡུལ་ལ་ལོག་ནས་རང་ས་རང་གིས་བདག་ན་ནམ་ཞིག་འུ་ཅག་ལ་རང་དབང་ཞིག་ཐོབ་མཚམས་ལ་དཀའ་རྙོགས་གང་ཡང་འཕྲད་མི་སྲིད།
བོད་དུ་འགྲོ་མཁན་ཚོར་འཚམས་འདྲི་དང་དགའ་བསུ་བྱེད་ཀྱིན་ཡོད།
དེ་ཧ་ཅང་གི་ཡག་པོ་རེད།
བོད་ནས་ཕེབས་མཁན་ཚོར་ཁག་མི་འདུག
ངོས་མི་མཉམ་པའི་རི་ཁུག་དེར་དཀའ་ངལ་གང་མང་འཕྲད་ཀྱི་ཡོད་པ་བདེན་པ་རེད།
དེ་ལས་ཕྱིར་རང་ཡུལ་དུ་ལོག་ནས་སོ་སའི་ས་ཆ་སོགས་བདག་པོ་རྒྱབ་རྒྱུ་དང་རིགས་གཞུང་མི་ཉམས་རྒྱུན་འདིན་བྱེད་རྒྱུ་གལ་ཆེ་བ་དང་།
མི་རིགས་ཀྱི་རྒྱ་ཡོད་ན་ངོ་བོ་འདྲ་མིན་གྱི་ཐོག་ནས་ལས་འགུལ་སྤེལ་ཆོག