དེ་རིང་རྒྱ་གར་གྱི་སྤྱི་ཚོགས་ཞབས་ཞུ་བ་ཨ་ནཱ་ཧ་ཛ་རེ་ལགས་ཀྱིས་ལྡི་ལི་གསར་པའི་རམ་ལེ་ལཱ་ཐང་ཆེན་དུ་ལྐོག་ཟ་རུལ་སུངས་ལ་ཟས་བཅད་ངོ་རྒོལ་གྱི་ཉིན་ ༧ པ་ཆགས་ཡོད།
ཁ་སང་ཨ་ནཱ་ཧ་ཛ་རེ་ལགས་ཀྱིས་གཏམ་བཤད་ཅིག་གནང་བའི་ནང་། རྒྱ་གར་གཞུང་གིས་ལྐོག་ཟ་རུལ་སུངས་སྔོན་འགོག་གི་ཁྲིམས་གཞི་བསྐྱར་ཏུ་གཏན་འབེབས་ཀྱིས་དམིགས་བསལ་དབང་ཆ་ཡོད་པའི་ཚོགས་ཆུང་གསར་པ་ཞིག་འཛུགས་དགོས་པ་དང་། ཚོགས་ཆུང་དེས་རྒྱལ་ཁབ་ཀྱི་ཁྲིམས་ཁང་དང་། སྲིད་བློན་ལས་ཁུངས་ལའང་ཞིབ་འཇུག་གི་འགན་དབང་སྤྲོད་དགོས་པའི་དགོས་འདུན་བཏོན་ཡོད་འདུག
དེ་རིང་ཕྱི་ཚེས་ ༢༢ ཉིན་སྲིད་བློན་མན་མོ་ཧན་སིན་མཆོག་གིས། ཨ་ནཱ་ཧ་ཛ་རེ་ཡིས་ཟིན་བྲིས་ལྟར་གཞུང་གིས་ལཱོཀ་པལ་ཁྲིམས་གཞིར་(Lokpal Bill) བགྲོ་གླེང་བྱེད་མགོ་བརྩམས་ཡོད་ཀྱང་། ཁྲིམས་གཞི་འདི་གཅིག་པུས་ལྐོག་ཟ་རུལ་སུངས་ཀྱི་དཀའ་རྙོག་གཙང་སེལ་བྱ་རྒྱུ་ཁག་པོ་ཡིན་སྟབས། གཞུང་གི་མཛད་རིམ་ཁག་ཚང་མར་བསྐྱར་ཞིབ་བྱ་དགོས་པ་ཞིག་ཆགས་ཡོད་ཚུལ་བརྗོད་ཡོད་པ་དང་། རྒྱ་གར་རྒྱལ་ཡོངས་ནང་གི་ཁྲིམས་ཞིབ་བྱ་ཕྱོགས་ལའང་བསྐྱར་བཅོས་དགོས་སྐོར་བརྗོད་ཡོད་པ་རེད།
གཟའ་ཉི་མའི་ཉིན་ཨ་ནཱ་ཧ་ཛ་རེ་ལགས་ཀྱིས་འབོད་སྐུལ་ཞུས་པ་ལྟར། ཁོང་གི་རྒྱབ་སྐྱོར་བ་ཚོ་བློན་ཆེན་དག་གི་སྡོད་གནས་སུ་ཕྱིན་ཏེ། ཨ་ནཱ་ཧ་ཛ་རེ་ལགས་ཀྱི་དགོས་འདུན་ལག་བསྟར་བྱ་དགོས་པའི་ངོ་རྒོལ་སྐད་འབོད་བྱས་ཡོད་འདུག་ལ། དེ་བཞིན་ཨིན་ཌི་ཡ་གྷེ་ཊི་(India Gate) དང་རམ་ལེ་ལཱ་ཐང་ཆེན་སོགས་སུ་མི་མང་སྟོང་ཕྲག་མང་པོ་འཛོམས་ཏེ། ཨ་ནཱ་ཧ་ཛ་རེ་ལགས་ལ་རྒྱབ་སྐྱོར་ཡོད་ཀྱི་རྣམ་འགྱུར་ཤུགས་ཆེན་བསྟན་ཡོད་པ་མ་ཟད། རྒྱ་གར་གཞུང་དང་གྲོས་ཚོགས་ཀྱིས་ཉེ་ཆར་ཐག་གཅོད་བྱས་པའི་གྲོས་གཞི་དེ་འགྲིག་གི་མེད་པའི་སྐྱོན་བརྗོད་བྱས་ཡོད་འདུག
ཉེ་ཆར་རྒྱ་གར་གྲོས་ཚོགས་ནང་ལྐོག་ཟ་རུལ་སུངས་འགོག་ཐབས་ཀྱི་གྲོས་ཆོད་ཅིག་བཞག་ཡོད་པ་དེ་ཨ་ནཱ་ཧ་ཛ་རེ་དང་ཆོས་དཔོན་རམ་ཌེ་ཝ་གཉིས་གཙོས་རྒྱ་གར་ཡུལ་མི་ཁྲི་ཕྲག་མང་པོས་རྒྱ་གར་གྱི་ལྐོག་ཟ་རུལ་སུངས་ལ་ངོ་རྒོལ་དང་། དེ་ལ་ཁྲིམས་ལུགས་གཏན་འབེབ་བྱ་རྒྱུར་དགོས་འདུན་གྱི་ཟིན་བྲིས་ཤིག་ཕུལ་ཡོད་པར། གཞུང་གིས་ཁས་ལེན་བྱས་པ་ལྟར་བཟོས་པ་ཞིག་ཆགས་ཡོད་ཀྱང་། ཁྲིམས་གཞི་གཏན་འབེབས་དེར་གོང་གི་ཟིན་བྲིས་བཞིན་བྱུང་མེད་པ་དང་། སྲིད་བློན་དང་ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་སོགས་གནད་ཡོད་དཔོན་རིགས་ཁག་ཅིག་ལ་དོགས་གཞི་བྱུང་ཚེ་ཁྲིམས་བཤེར་བྱ་ཆོག་པའི་རིགས་ཁ་གསལ་བཟོས་མེད་སྟབས། གལ་ཏེ་མི་སྣ་དེ་དག་གིས་ལྐོག་ཟ་རུལ་སུངས་བྱས་པ་ཡིན་ན། གསར་དུ་བཟོས་པའི་ཁྲིམས་གཞི་དེས་ནུས་པ་འདོན་ཐུབ་ཀྱི་མེད་སྟབས། ཟླ་འདིའི་ཕྱི་ ༡༦ ཉིན་བསྐྱར་དུ་ཨ་ནཱ་ཧ་ཛ་རེ་དང་ཁོང་གི་རྒྱབ་སྐྱོར་པ་ཚོས་གཏན་འབེབས་ཟིན་པའི་ཁྲིམས་གཞི་དེར་བཅོས་སྒྱུར་བྱ་དགོས་ཞེས་དུས་ཚོད་ངེས་མེད་ཀྱི་ཟས་བཅད་ངོ་རྒོལ་བྱས་ཡོད།
ཕྱི་ཚེས་ ༡༦ ཉིན་གྱི་ཟས་བཅད་ངོ་རྒོལ་མགོ་འཛུགས་སྐབས་གྲོང་ཁྱེར་ཉེན་རྟོག་པས་ཁོང་ཚོ་འཛིན་བཟུང་གིས་ཊེ་ཧར་བཙན་ཁང་(Tihar Jail) དུ་བཀག་ཉར་བྱས་ཡོད་ཀྱང་། མི་མང་སྟོང་ཕྲག་མང་པོས་ངོ་རྒོལ་སྐད་འབོད་བྱས་མཐར་ཀློད་གྲོལ་གཏོང་རྒྱུའི་ཐག་གཅོད་བྱུང་ཡོད་ཀྱང་། ཨ་ནཱ་ཧ་ཛ་རེ་ཡིས་ཁོང་ཚོར་ཆ་རྐྱེན་གང་ཡང་མེད་པའི་ཐོག་ཟས་བཅད་ངོ་རྒོལ་བྱེད་དུ་མ་བཅུག་ཚེ་བཙོན་ཁང་ནས་ཕྱིར་ཐོན་རྒྱུ་མིན་ཞེས་བརྗོད་མུ་མཐུད་ཟས་བཅད་ངོ་རྒོལ་བྱས་ཡོད་པ་དང་། ཕྱི་ཚེས་ ༡༩ ཉིན་བཙོན་ཁང་ནས་ཕྱེར་ཐོན་རྗེས་ལྡི་ལི་གསར་པའི་རམ་ལེ་ལཱ་ཐང་ཆེན་(Ramlila ground) དུ་བསྡད་དེ་དུས་ཚོད་ངེས་མེད་དུ་ཟས་བཅད་ངོ་རྒོལ་བྱེད་མགོ་བརྩམས་ཡོད།
སྤྱི་ཚོགས་ཞབས་ཞུ་བ་དང་ལྐོག་ཟ་རུལ་སུངས་འགོག་རྒོལ་བ་ཨ་ནཱ་ཧ་ཛ་ལགས་ནི་ད་ཆར་དགོངས་ལོ་ ༧༤ ཡིན་པ་དང་། ཐེངས་འདིའི་ཟས་བཅད་ངོ་རྒོལ་རིང་ཁོང་གི་ལྗིད་ཚད་སྤྱི་རྒྱ་ ༥ ཙམ་མར་ཆག་ཡོད་འདུག
གསར་འགོད་པ། བནྡེ་སྐྱབས།
