དགའ་ལྡན་ཕོ་བྲང་སྐབས་ཀྱི་སྲིད་འབྱོར་རིག་གསུམ་ལ་དྲན་སྐུལ།

སཱ་ར་གཞོན་ནུའི་རུ་ཁག་གིས་གོ་སྒྲིག་གནང་བའི་བོད་ཀྱི་རིག་གནས་བགྲོ་གླེང་ཐེངས་ལྔ་པའི་སྟེང་མཐོ་སློབ་ ༡༣ ལྷག་གི་འཐུས་ཚབ་ཀྱིས་ཉིན་བཞིའི་རིང་ ༼གཞུང་ས་དགའ་ལྡན་ཕོ་བྲང་གི་སྲིད་དབང་བསྐྱངས་རིང་བོད་ཀྱི་ཆབ་དཔལ་རིག་གསུམ་གྱི་འཕེལ་རིམ་གླེང་བ། ༽ ཞེས་པ་དེ་དབུ་འཛུགས་གནང་སོང་།  

དེ་རིང་ཕྱི་ཚེས་ ༢༤ ཉིན་གྱི་ཞོགས་པའི་ཆུ་ཚོད་ ༩ སྟེང་སཱ་ར་མཐོ་སློབ་ཀྱི་སྐབས་བརྒྱད་པའི་གཞོན་ནུའི་རུ་ཁག་གི་གོ་སྒྲིག་འོག་བོད་ཀྱི་རིག་གནས་བགྲོ་གླེང་ཐེངས་ལྔ་པ་སཱ་ར་བོད་ཀྱི་མཐོ་རིམ་སློབ་གཉེར་ཁང་དུ་དབུ་འཛུགས་གནང་ཡོད་ཅིང་། མཛད་སྒོའི་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གཙོས་པའི་སཱ་ར་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་དང་མདོ་སྨད་སྤྱི་འཐུས་དང་སཱ་ར་མཐོ་སློབ་ཀྱི་དགེ་རྒན་བསོད་ནམས་རྒྱན་མཚན་ལགས། ངྷ་ས་ས་གནས་གཞོན་ནུའི་ཚོགས་གཞོན་ཚེ་རིང་དབྱངས་ཅན་ལགས་བཅས་ཕེབས་འདུག་ལ། བགྲོ་གླེང་ཚོགས་ཞུགས་པའི་ཁྲོད་ཝར་ན་མཐོ་སློབ་དང་སཱ་ར་མཐོ་སློབ། ནོར་གླིང་མཐོ་སློབ། སྨན་རྩིས་ཁང་མཐོ་སློབ། རྫོང་གསར་བཤད་གྲྭ སྒྲོལ་མ་གླིང་། རྣམ་རྒྱལ་གྲྭ་ཚང་། ཀིརྟི་གྲྭ་ཚང་། འབྲི་གུང་མཐོ་སློབ། རིག་ལམ་སློབ་གཉེར་ཁང་བཅས་མཐོ་སློབ་ཁག་ ༡༣ དང་། ཤེས་རབ་དགའ་ཚལ་སློབ་གླིང་གི་སྐུ་ཚབ་བཅས་ཚོགས་ཞུགས་པ་ ༥༠ མ་ཟིན་ཙམ་ཚོགས་ཞུགས་གནང་ཡོད།

མཛད་སྒོའི་ཐོག་མར་སྐུ་མགྲོན་གཙོ་བོ་མཆོག་དང་ཚོགས་ཞུགས་པ་ཡོངས་སྐུ་བཞེངས་ཐོག་བོད་རྒྱལ་ཁབ་ཆེན་མོའི་རྒྱལ་གླུ་གྱེར་འདོན་དང་འབྲེལ་ས་གནས་གཞོན་ནུའི་ཚོགས་གཙོ་བསྟན་འཛིན་བསོད་ནམས་ལགས་ཀྱིས་བོད་ཀྱི་རིག་གནས་བགྲོ་གླེང་གི་དམིགས་ཡུལ་ངོ་སྤྲོད་གནང་བའི་ནང་། ཐེངས་འདིའི་བགྲོ་གླེང་འདི་ནི། འདས་པའི་གཞུང་ས་དགའ་ལྡན་ཕོ་བྲང་གི་སྲིད་དབང་འོག་བོད་ཀྱི་མི་རབས་རྙིང་དག་གི་རྒྱུན་འཛིན་བྱས་པའི་རིག་གནས་མི་རབས་གསར་པར་བརྒྱུད་སྤྲོད་དང་། མི་རབས་གསར་བ་རྣམས་ཀྱིས་ཀྱང་དེང་དུས་ཀྱི་རིག་གནས་ཁོ་ན་དང་། རང་ལྟ་ཆོག་འཛིན་མི་བྱ་བར་བོད་ཀྱི་རིག་གནས་སྲུང་སྐྱོབ་རྒྱུན་འཛིན་ཆེད་ཕན་ཚུན་བསམ་བློ་བརྗེ་རེས་བྱས་ཏེ། མ་འོངས་བོད་ཀྱི་མགོ་ཁྲིད་དང་སྤྱི་ཚོགས་ཀྱི་སྣེ་འཁྲིད་པ་ཚད་ལྡན་ཞིག་ཡོང་ཆེད་ཡིན་སྐོར་དང་། འདས་པའི་གཞུང་ས་དགའ་ལྡན་ཕོ་བྲང་གི་སྲིད་འབྱོར་རིག་གསུམ་གྱི་འཕེལ་རིམ་ལ་གཞིགས་ཏེ། མ་འོངས་པའི་སློབ་ཆེན་པ་དག་གིས་བོད་ཀྱི་རིག་གཞུང་དང་ཆབ་སྲིད། དཔལ་འབྱོར་སོགས་ཀྱི་ཐད་ལ་ལག་རྗེས་འཇོག་པར་སྐུལ་སློང་བཅས་ཀྱི་ཆེད་ཡིན་སྐོར་བརྗོད་བྱུང་།

སྐབས་དེར་སཱ་ར་མཐོ་སློབ་ཀྱི་དགེ་རྒན་དང་མདོ་སྨད་སྤྱི་འཐུས་བསོད་ནམས་རྒྱལ་མཚན་ལགས་ཀྱིས་གཏན་བཤད་གནང་སྟེ། ཕྱི་ལོ་ ༡༦༤༢ ལོར་༧གོང་ས་ལྔ་པ་ཆེན་པོས་སྲོལ་བཏོད་པའི་གཞུང་ས་དགའ་ལྡན་ཕོ་བྲང་དེ་ ༢༠༡༡ ལོའི་བར་རྒྱལ་དབང་སྐུ་ཕྲེང་རིམ་བྱོན་གྱིས་བསྐྱངས་ཤིང་། སྐུ་ཕྲེང་བཅུ་བཞི་པའི་དུས་སུ་སྲིད་དབང་སྐྱོང་མཚམས་བཞག་ཡོད་སྟབས། ལོ་རྒྱུས་ཀྱི་སྟེང་ནས་དཀྱོགས་མཚམས་གལ་ཆེན་ཞིག་ཆགས་པ་དང་། ད་ལྟའི་བར་བོད་མི་ཚོ་རྒྱ་གར་དང་ཕྱི་རྒྱལ་ཡུལ་གྲུ་ཁག  བོད་ནང་བཅས་དུམ་བུ་གསུམ་དུ་ཆགས་ཏེ་དུས་རབས་ཕྱེད་ཀ་ཕྱིན་ཡོད་ཀྱང་། ད་དུང་ཡང་བོད་མིའི་བསམ་བློ་དང་འདུ་ཤེས་དང་རེ་བ་ཡོངས་རྫོགས་༧གོང་ས་བཅུ་བཞིོ་བ་གཅིག་པུའི་སྟེང་བཅོལ་བསྡད་ཡོད་པ་དེ་ཧ་ཅང་ཐབས་སྐྱོ་བོའི་གནས་སྟངས་ཤིག་ཡིན་སྐོར་གསུངས་སོང་ལ། གཞུང་ས་དགའ་ལྡན་ཕོ་བྲང་གི་དངོས་བྱུང་ལོ་རྒྱུས་ལ་བསྐྱར་ཞིབ་ཡང་དག་བྱས་ཏེ། མ་འོངས་པའི་གནས་བབ་ལ་ཚོད་དཔག་བྱ་དགོས་པའི་སྐོར་བརྗོད་བྱུང་བར་མ་ཟད། ཁོང་གིས་ཐེངས་འདིའི་བགྲོ་གླེང་གི་བརྗོད་གཞིར་བསྟོད་བསྔགས་དང་། བགྲོ་གླེང་པ་རྣམས་ཀྱིས་ཕན་ཚུན་གུ་ཡངས་པོའི་ཐོག་ནས་བསམ་ཚུལ་བརྗེ་རེས་ཡོང་བའི་འབོད་སྐུལ་བཅས་གནང་སོང་།    

དེའི་རྗེས་སཱ་ར་མཐོ་སློབ་ཀྱི་སློབ་སྤྱི་འཇམ་དཔལ་གྲགས་པ་ལགས་ཀྱིས་ཀྱང་། ཐེངས་འདིའི་༸རྒྱལ་དབང་སྐུ་ཕྲེང་ལྔ་པ་ནས་བཅུ་བཞི་བའི་བར་སྲིད་འབྱོར་རིག་གསུམ་དང་འབྲེལ་བའི་བགྲོ་གླེང་ཞིག་ཆགས་ཡོད་སྟབས། སྐབས་དེའི་ཕྱི་ནང་གི་གནས་སྟངས་ལ་གཞིགས་ཏེ་བགྲོ་གླེང་གནང་རྒྱུ་ལས། དེའི་རྗེས་ཀྱི་སྤྱི་ཚོགས་ཀྱི་གནས་སྟངས་སྐོར་ལ་བགྲོ་གླེང་མི་དགོས་པའི་རེ་སྐུལ་དང་། མ་འོངས་པར་༸གོང་ས་མཆོག་སྐུ་བཞུགས་མིན་ལ་མ་ལྟོས་པར་བོད་མི་རང་ངོས་ནས་བོད་པའི་བདེན་དོན་འཐབ་རྩོད་དང་རིག་གཞུང་རྒྱུན་འཛིན་ཐད་ནུས་པ་ཡོད་དགུ་འདོན་རྒྱུ་དང་། ༸གོང་ས་མཆོག་ལ་བོད་མི་རིགས་ཀྱི་རིག་གཞུང་མི་ཉམས་རྒྱུན་འཛིན་གྱི་དགོངས་གཞི་ཟབ་མོ་ཡོད་པ་དང་ལྷག་པར་དུ་གཞོན་སྐྱེས་ཚོར་རེ་བ་དང་ཡིད་ཆེས་ཆེན་པོ་བྱེད་ཀྱིན་པ་སྙིང་ལ་བཅིངས་ཏེ་ཧུར་སྐྱེད་བྱ་དགོས་ཚུལ་སོགས་གསུངས་སོང་།  

མཐར་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་གིས་བོད་པ་ཚོས་རིག་གནས་ཟེར་དུས་རིག་པའི་གནས་ཆེ་ཆུང་བཅུ་ཁོ་ནར་གོ་བ་ལས་གཞན་ལ་བསམ་བློ་མི་འཁོར་བ་དང་། སྤྱིར་རིག་གནས་ཞེས་པར་གཞུང་ལུགས་ཡོད་པའི་རིག་གནས་ཤིག་དང་། སྤྱི་ཚོགས་ནང་རྒྱུན་སྲོལ་ལྟ་བུར་གྱུར་ཡོད་པའི་མི་སོ་སོའི་བསམ་བློའི་ཉམས་མྱོང་། སྤྱི་ཚོགས་ཀྱི་དགོས་མཁོར་བསྟུན་ཏེ་གསར་གཏོད་བྱས་པའི་རིགས་བཅས་རིག་གནས་མང་པོ་ཡོད་ཚུལ་གསུངས་སོང་། དེ་བཞིན་བོད་མི་ཚོར་ཡང་ནང་བསམ་བློའི་རིག་གནས་སོགས་མི་རིགས་དང་རྒྱལ་ཁབ་གཞན་ལ་མེད་པའི་རིག་གནས་ཕུན་སུམ་ཚོགས་པ་མང་པོ་ཞིག་ཡོད་པ་དེ་དག་ཕྱི་ཕྱོགས་སུ་མངོན་ཐུབ་པ་དང་། མི་རབས་ནས་མི་རབས་སུ་བརྒྱུད་སྤྲོད་བྱ་ཐུབ་པ་གནང་དགོས་སྐོར། སཱ་ར་གཙོས་པའི་སློབ་ཆེན་གང་ཡིན་ཡང་ཕྱིའི་རིག་གནས་ཚུར་ལེན་བྱ་རྒྱུ་གལ་ཆེན་ཡིན་ཚུལ་བཅས་གསུངས་སོང་། བོད་ཀྱི་ཆབ་སྲིད་ཀྱི་འགྱུར་འགྲོས་ཆེན་པོ་འདིའི་སྐབས་ལ་འཛིན་སྐྱོང་དང་ཁྲིམས་བཟོ་ལྷན་ཚོགས། ཁྲིམས་ལུགས་བཅས་ཀྱི་ཐོག་ལ་གནས་སྟངས་གང་འདྲ་ཆགས་ཡོད་མེད་དང་། ལྷག་པར་དུ་༸རྒྱལ་དབང་སྐུ་ཕྲེང་བཅུ་གསུམ་པའི་སྐབས་སུ་བོད་ཀྱི་སྤྲགས་དང་ཕྱི་སྐྱོད་ལག་འཁྱེར་སོགས་ཀྱི་རིགས་གསར་གཏོད་བྱས་ཚུལ་བཅས་ལ་གཏམ་བཤད་གནང་སོང་།

ཐེངས་འདིའི་བགྲོ་གླེང་གི་ནང་དོན་གཙོ་བོ་༼གཞུང་ས་དགའ་ལྡན་ཕོ་བྲང་གི་སྲིད་དབང་བསྐྱངས་རིང་བོད་ཀྱི་ཆབ་དཔལ་རིག་གསུམ་གྱི་འཕེལ་རིམ་གླེང་བ། ༽ཞེས་པ་འདི་ཡིན་ཞིང་། དེ་རིང་ཕྱི་དྲོར་རྒན་བསོད་ནམས་རྒྱལ་མཚན་ལགས་ཀྱིས་༼གཞུང་ས་དགའ་ལྡན་ཕོ་བྲང་གི་སྲིད་དབང་བསྐྱངས་རིང་བོད་ཀྱི་དོན་དངོས་ལོ་རྒྱུས་ལ་དཔྱད་ཞིབ།༽ཞེས་པའི་ཐོག་གཏམ་བཤད་དང་། ཕྱི་ཚེས་ ༢༥ ཉིན་བོད་གཞུང་ཤེས་རིག་ལས་ཁུངས་ཀྱི་ཉམས་ཞིབ་པ་ཆུང་ཚེ་རིང་ལགས་ཀྱིས་༼གཞུང་ས་དགའ་ལྡན་ཕོ་བྲང་གིས་སྲིད་དབང་བསྐྱངས་རིང་བོད་ཀྱི་རྩོམ་རིག་ཁ་ཕྱོགས་དང་འཕེལ་རིམ། ངོ་བོ།༽བཅས་ཀྱི་སྐོར་ལ་གཏམ་བཤད། ཕྱི་ཚེས་ ༢༦ བཀའ་བློན་ཁྲི་པ་བློ་བཟང་སེང་གེ་མཆོག་གིས་༼བཙན་བྱོལ་བོད་མིའི་མང་གཙོའི་འཕེལ་རིམ་དང་ངོ་བོ། འབྱུང་འགྱུར་རྒྱལ་སྤྱིའི་གནས་བབ་དང་མཐུན་པའི་ཁ་ཕྱོགས།༽ཞེས་པའི་ཐོག་གཏམ་བཤད། ཕྱི་ཚེས་ ༢༧ ཉིན་བོད་ཀྱི་དཔེ་མཛོད་ཁང་གི་རྒན་ན་གཱ་སངས་རྒྱས་བསྟན་དར་ལགས་ཀྱིས། ༼གཞུང་ས་དགའ་ལྡན་ཕོ་བྲང་གི་སྲིད་དབང་བསྐྱངས་པའི་རིང་བོད་ཀྱི་བརྡ་སྤྲོད་རིག་པའི་འཕེལ་རིམ༽ བཅས་ཀྱི་ཐོག་གཏམ་བཤད་གནང་རྒྱུ་ཡིན་འདུག 

གསར་འགོད་པ། དོན་གོ