གཟའ་ལྷག་པའི་ཉིན་ལཱེ་བྷེ་ཡའི་གྱེན་ལངས་ཤོག་ཁག་གིས་བརྗོད་པ་ལྟར་ན། ལཱེ་བྷེ་ཡའི་སྲིད་དབང་སྒེར་གཅོད་པ་གྷ་ཌ་ཧྥེ་ཡི་རྒྱལ་ཊི་རེ་པོ་ལེར་གྱེན་ལངས་པས་འཐབ་འཛིང་བྱས་ཏེ། མི་ ༤༠༠ ཙམ་ལ་སྲོག་སྐྱེན་དང་གཞན་མི་ ༢༠༠༠ བརྒལ་པར་རྨས་སྐྱོན་ཕོག་ཡོད་འདུག
དེ་རིང་ཞོགས་པར་གྷ་ཌ་ཧྥེ་ཡིས་རླུང་འཕྲིན་བརྒྱུད་ “འཆི་ན་རྒྱལ་གཅེས་པ་ཞིག་དང་གསོན་ན་རྒྱལ་ཁ་ལེན་མཁན་ཞིག་གི་སྟེང་ནས་ཤི་གསོན་དྲག་འཛིང་མུ་མཐུད་བྱ་རྒྱུ་ཡིན”ཞེས་དང་། “གྲོང་ཁྱེར་མི་མང་ཚོས་རང་ཉིད་སོ་སོའི་ས་ནས་གྱེན་ལོག་པ་མཐར་བསྒྲོལ་བྱ་རྒྱུར་ཁྱོན་ཡོངས་ནས་ཕར་རྒོལ་བྱོས།” ཞེས་བསྒྲགས་ཡོད་འདུག ད་ལྟ་གྷ་ཌ་ཧྥེ་གྲོང་ཁྱེར་ཕྱི་ནང་གང་དུ་ཡོད་མེད་གསལ་ཁ་བྱུང་མེད་པ་དང་། མང་པོ་ཞིག་གིས་གྷ་ཌ་ཧྥེ་ཡིས་ས་འོག་བགྲོད་ལམ་མང་པོ་བརྐོས་ཡོད་པར་ཚོད་དཔག་བྱེད་ཀྱི་ཡོད་འདུག
ད་ལྟ་གྱེན་ལངས་ཤོག་ཁག་གིས་ཏི་རེ་པོ་གྲོང་ཁྱེར་གྱི་ས་ཁུལ་གང་འཚམ་བཙན་བཟུང་བྱས་ཡོད་པ་མ་ཟད། གྷ་ཌ་ཧྥེའི་སྡོད་གནས་བྷབ་ཨལ་ཨ་ཛེ་ཛེ་ཡཱ་(Bab al- Aziziya)ས་གནས་ལའང་དཔུང་འཇུག་བྱས་ཡོད་འདུག རེའུ་ཊར་(Reuter)ས་གནས་གསར་འགོད་པས། “ཁ་སང་ཉིན་ཧྲིལ་བོར་རྒྱལ་ས་ཏི་རེ་པོ་ལེ་གྲོང་ཁྱེར་གང་སར་འཐབ་འཁྲུག་གི་མེ་མདའི་སྐད་སྒྲ་མཚམས་ཆད་མེད་ཅིང་། ས་རུབ་མཚམས་ནས་གྷ་ཌ་ཧྥེ་ཡི་རྒྱུ་དངོས་འཕྲོག་བཅོམ་བྱེད་མགོ་བརྩམས་སོང” ཞེས་བརྗོད་འདུག
གྱེན་ལོག་ཤོག་ཁག་གི་མགོ་ཁྲིད་ཇཱ་ལེ་ལཱ་(Mustafa Abdel Jalil) ཡིས། “དུས་ཚོད་ཀྱི་སྔ་ཕྱི་ཙམ་ལས་གྷ་ཌ་ཧྥེ་འཛིན་བཟུང་བྱ་ཐུབ་རྒྱུ་དང་། ཁོང་འཛིན་བཟུང་ཐུབ་ཚེ་དྲང་བདེན་ཐོག་ཞིབ་བཤེར་བྱ་ངེས་ཡིན”ཞེས་བརྗོད་ཡོད་འདུག ད་ལྟ་གྱེན་ལངས་པ་ཚོས་གྲོང་ཁྱེར་གྱི་ས་གནས་གང་ས་ན་རྒྱལ་ཁ་ཐོབ་ཡོད་པའི་དགའ་སྟོན་བྱེད་བཞིན་ཡོད་འདུག
དེ་རིང་ཞོགས་པ་སྔ་བོ་ནས་གྱེན་ལངས་པས་རྒྱལ་ས་ཏི་རེ་པོ་ལེའི་གྲོང་ཁྱེར་ཕྱི་ནང་དུ་ཁོང་ཚོར་རྒྱལ་ཁ་ཐོབ་ཡོད་པའི་དགའ་སྟོན་བྱེད་མགོ་ཚུགས་འཕྲད་ནེ་ཇི་རེ་ཡཱ་(Nigeria) གཙོས་པའི་ཨ་ཧྥི་རི་ཀ་དང་རྒྱལ་སྤྱིའི་སྲིད་གཞུང་ཁག་ཅིག་གིས་ལཱེ་བྷེ་ཡའི་གྱེན་ལངས་ཤོག་ཁག་གི་གཞུང་(Transtional National Council) དེ་ཁྲིམས་མཐུན་ཡིན་པར་ངོས་ལེན་བྱས་ཡོད་པ་རེད།
གསར་འགོད་པ། བནྡེ་སྐྱབས།
རྒད་པོ་དེས་རང་གི་མི་མང་མང་བོ་གསད་རྗེས་སུ། ད་གང་དུ་ཡོད་མེད་མ་ཤེས་པར་བསྡད་འདུག ད་དུང་། གྱེན་བླངས་མི་མང་གིས་གསལ་བསྒྲགས་ཤིག་དུ་མི་སུས་རྒད་པོ་ལས་ངན་དེ་ངོ་སྤྲོད་བྱེད་མཁན་ཡོད་ན་ཨ་སྒོར་ས་ཡ་གཉིས་སྤྲོད་ཀྱི་ཡིན་ཟེར་གྱི་འདུག གྱེན་བླངས་མི་མང་གིས་མེ་མདའི་སྐད་ཤུགས་དང་མི་མང་ཁྲོད་ན་གསར་རྒོད་ཅིག་གིས། ཁྱོད་གང་ན་ཡོད། ད་ཤོག་ཡ་ཟེར་གྱི་འདུག