རྒྱ་ནག་གཞུང་གིས་ཕྱི་སྡོད་བོད་རིགས་རྣམས་ཕྱིར་རྒྱལ་ནང་དུ་འགུག་པའི་སྲིད་ཇུས་ལག་བསྟར་དང་བྱི་ཞི་རྒོལ་ཆེན་མོ་བཅས་ལ་བརྟེན་ཏེ། བོད་ནས་ཕྱི་ཕྱོགས་སུ་སྐྱབས་བཅོལ་དུ་ཡོང་མཁན་ཇེ་ཉུང་དུ་སོང་ཞིང་། རྒྱ་བལ་གཉིས་ཀྱི་བོད་མི་མང་པོ་ཞིག་ཕྱིར་བོད་ནང་དུ་ལོག་མགོ་བརྩམས་ཡོད་སྟབས། ཤེས་རབ་དགའ་ཚལ་སློབ་གླིང་གི་སློབ་ཕྲུག་ཉུང་དུ་ཕྱིན་ཏེ། ད་ཆར་སུ་ཇ་དང་གྲྭ་ས་ཁག་ནས་ཡོང་མཁན་ཚོ་ཡང་སློབ་འཇུག་བྱེད་བཞིན་ཡོད་འདུག
བཞུགས་སྒར་ཉེ་འཁྲིས་ཀྱི་ཤེས་རབ་དགའ་ཚལ་སློབ་གླིང་ནི་བོད་ཕྱི་ནང་བར་གྱི་ཟམ་པ་ལྟ་བུ་ཞིག་ཆགས་ཡོད་སྟབས། ཉེ་ཆར་འདི་གའི་གསར་འགོད་པ་ཆེད་དུ་ཤེས་རབ་དགའ་ཚལ་སློབ་གླིང་དུ་བསྐྱོད་དེ་གནས་ཚུལ་རྒྱུས་ལོན་བྱས། ཤེས་རབ་དགའ་ཚལ་སློབ་གླིབ་དུ་སློབ་ཕྲུག་ཆེས་མང་སྐབས་ ༢༠༠༧ ལོ་ཡིན་ཞིང་། སྐབས་དེར་སློབ་ཕྲུག་ ༨༠༠ ལས་བརྒལ་ཡོད་ཀྱང་འདས་པའི་ལོ་བཞིའི་ནང་སློབ་མ་ ༤༠༠ སྟེ་ལྡབ་གཅིག་གིས་ཇེ་ཉུང་དུ་ཕྱིན་ཏེ། དེང་སྐབས་སློབ་ཕྲུག་སུམ་བརྒྱ་ལྷག་ལས་མེད། སློབ་ཕྲུག་ཇེ་ཉུང་དུ་སོང་བ་དང་བསྟུན་ཏེ། ལྷོ་ཕྱོགས་གདན་ས་ཁག་ནས་བསྐྱར་དུ་སློབ་གྲྭར་ཞུགས་འདོད་མཁན་དང་། སུ་ཇཱ་སློབ་གྲྭ་སོགས་ནས་ཁུངས་མ་འཁྱོལ་བའི་རིགས། དེ་བཞིན། སློབ་ལོ་ཡོལ་ཟིན་པའི་ཆབ་སྲིད་བཙོན་པ་ཁག་ཅིག་བཅས་ཀྱང་ཤེས་རབ་དགའ་ཚལ་སློབ་གླིང་དུ་སློབ་འཇུག་གི་གོ་སྐབས་སྤྲད་ཡོད་འདུག
སློབ་གྲྭ་འདི་ཐོག་མར་ ༡༩༩༣ ལོར་༧གོང་ས་མཆོག་གི་དགོངས་གཞི་ལྟར་བོད་ནས་གསར་དུ་འབྱོར་བའི་རང་ལོ་ ༡༨ ནས་ ༣༠ བར་གྱི་སློབ་མ་ཚོར་དམིགས་ཏེ་བཙུགས་པ་ཞིག་ཡིན་ཞིང་། བོད་གཞུང་སྣེ་ལེན་ཁང་གི་འཛིན་སྐྱོང་འོག་སློབ་མ་ ༡༠༧ ཙལ་ལ་གུར་ཕུབ་སྟེ་སློབ་སྦྱོང་བྱེད་ཀྱི་ཡོད་པས་ན་གསོག་སྒར་སློབ་གྲྭ་ཞེས་འབོད། ༡༩༩༤ ལོར་སློབ་ཡུན་ལོ་གཅིག་ནས་གཉིས་སུ་སྤར་བ་དང་། ༡༩༩༨ ལོར་༸གོང་ས་མཆོག་ཆེད་ཕེབས་ཀྱིས་༼ ཤེས་རབ་དགའ་ཚལ་སློབ་གླིང་༽ ཞེས་མཚན་གསོལ། སློབ་གྲྭའི་ནང་ལག་ཤེས་དང་ཤེས་ཡོན་བཅས་སྡེ་ཚན་གཉིས་སུ་དབྱེ་སྟེ། ལག་ཤེས་ནང་འཚེམ་བཟོ་དང་ལྷ་བྲིས་གཉིས་དང་། ཤེས་ཡོན་ནང་བོད་དབྱིན་གཉིས་དང་གློག་ཀླད་བཅས་ཡོད། སློབ་མ་མཐར་ཕྱིན་གྱི་གནས་ཚད་བོད་ཡིག་འཛིན་རིམ་བཅུ་གཉིས་དང་། དབྱིན་ཡིག་འཛིན་རིམ་བརྒྱད་པ། འཚེམ་བཟོ་དང་ལྷ་བྲིས་ལོ་གསུམ་རེ་བཅས་ཡིན། ༡༩༩༣ ལོ་ནས་ད་ལྟ་སློབ་གྲྭ་འདིར་སློབ་མ་ ༦༥༦༧ བསླེབས་ཡོད་པ་ལས། སློབ་མཐར་མ་ཕྱིན་པར་རྩ་དགོངས་སུ་ཕྱིན་པ་ ༥༣༤༨ དང་། ཤེས་ཡོན་སྡེ་ཚན་དང་སློབ་ལོ་ཡོངས་སུ་ཚང་སྟེ་མཐར་ཕྱིན་མཁན་ ༧༡༧ དང་། འཚེམ་བཟོ་སློབ་མ་ ༧༥ ། ལྷ་བྲིས་སློབ་མ་ ༢༡ བཅས་ཁྱོན་སྡོམ་སློབ་མ་ ༨༡༣ སློབ་མཐར་ཕྱིན་ཡོད་འདུག
ས་བྱི་ཞི་རྒོལ་ཆེན་མོའི་རྗེས་ནས་སློབ་མ་ཉུང་དུ་ཕྱིན་ཏེ། ༢༠༠༨ ལོར་སློབ་མ་ ༡༥༣ ། ༢༠༠༩ ལོར་ ༡༧༨། ༢༠༡༠ ལོར་ ༡༣༥བཅས་ཡིན། སློབ་མ་ཉུང་དུ་ཕྱིན་པ་དང་བསྟུན་ཏེ་འཛིན་རིམ་གསུམ་པའི་བར་༼ ཀ་བ ༽ དང་༼ ཁ་པ ༽ཡོད་པ་ལས། འཛིན་རིམ་གཞན་དག་ཡོངས་ལ་འཛིན་གྲྭ་གཅིག་རེ་ལས་མེད། ཕོ་ལ་ཉལ་ཁང་ ༣༦ ཡོད་པ་དང་། ཉལ་ཁང་རེར་ཆ་སྙོམ་མི་ ༧ རེ་དང་། བུ་མོར་ཉལ་ཁང་ ༦ ཡོད་པ་ལ་ཆ་སྙོམ་མི་ ༢༥ རེ། རྨང་གཞི་འཛིན་གྲྭ་གཅིག་དང་ཟུར་གསོག་འཛིན་གྲྭ་གཉིས་བཅས་ཆགས་ཡོད་འདུག
གོང་གསལ་གྱི་གནས་ཚུལ་འདི་ཐད་གསར་འགོད་པས་སློབ་སྤྱི་བུ་དྲུག་ཤཱིསྟི་ལགས་སུ་གནས་སྟངས་དེའི་ཐད་བཅར་འདྲི་བྱས་པར་ཁོང་གིས། ༢༠༠༨ ལོར་བོད་ནང་ཞི་རྒོལ་བྱུང་རྗེས་ང་ཚོའི་སློབ་གྲྭར་སློབ་མ་རྦད་དེ་ཉུང་དུ་ཕྱིན་སོང་། དེ་ཡང་གཙོ་བོ། རྒྱ་ནག་གཞུང་གིས་བོད་ནས་རྒྱ་གར་ནང་གནས་མཇལ་དུ་ཡོང་མཁན་ལ་ཕྱི་བསྐྱོད་ལག་འཁྱེར་ཐོག་དམ་དྲག་དང་། བལ་བོད་ས་མཐའ་མཚམས་བརྟན་སྲུང་བྱས་ཏེ་བོད་ནས་མི་མང་པོ་ཞིག་ཡོང་མ་ཐུབ་པའི་རྐྱེན་གྱིས་རེད། ༢༠༠༨ ལོའི་གོང་དུ་ལོ་རེར་སློབ་མ་ ༥༠༠ ལྷག་ཆད་མེད་དུ་ཡོང་གི་ཡོད། དེའི་རྗེས་ནས་བཟུང་ལོ་རེར་སློབ་མ་ ༢༠༠ མ་ཟིིན་ཙམ་ལས་ཡོང་གི་མི་འདུག ད་ལྟ་ཆར་གྲྭ་ས་ཁག་དང་སུ་ཇཱ་བོད་ཁྱིམ་སོགས་སུ་ཕྱིན་སྟེ་སློབ་སྦྱོང་གི་གོ་སྐབས་རག་ཡོད་ཀྱང་། ཡང་བསྐྱར་བལ་ཡུལ་ནས་ཐོ་འགོད་བྱས་ཏེ་ཕྱིར་ཡོང་མཁན་དག་ཀྱང་སློབ་འཇུག་བྱེད་ཀྱི་ཡོད། དེ་བཞིན། བོད་གཞུང་བདེ་སྲུང་ལས་ཁུངས་ཀྱིས་ངོས་སྦྱོར་བྱས་པའི་ཆབ་སྲིད་བཙོན་པ་ཁག་ཅིག་ཀྱང་བསླེབས་སོང་། སུ་ཇཱ་དང་གྲྭ་ས་ཁག་ནས་ཡོང་མཁན་དེ་ཚོར་སྔར་སློབ་སྦྱོང་གི་གོ་སྐབས་ཡག་ཡོད་སྟབས། ཡང་བསྐྱར་ཡོང་གི་ཡོད་པ་དེ་དག་གང་འདྲ་ཡིན་ནམ་བསམ་གྱི་འདུག དེ་དག་གིས་སློབ་གྲྭའི་འཛིན་སྐྱོང་དང་སློབ་མའི་སློབ་སྦྱོང་གི་ཐད་ལ་གནོད་པ་ཡོང་གི་འདུག ཅེས་དང་། ཡང་ཁོང་གིས། སྔོན་མར་རྩ་དགོངས་དུ་འགྲོ་བའི་རིགས་མང་པོ་ཡོད་ཀྱང་། ད་ལྟའི་ཆར་སྔར་ལས་ཉུང་དུ་ཕྱིན་འདུག ཡིན་ནའང་། རྩ་དགོངས་ཞུ་མཁན་མང་པོ་ཞིག་བོད་དུ་ལོག་མཁན་དང་རེ་ཟུང་ཕྱི་རྒྱལ་དུ་འགྲོ་མཁན་ཆགས་འདུག སྤྱི་ཡོངས་ཀྱི་ཐོག་ནས་སློབ་མ་ཉུང་དུ་ཕྱིན་པ་དེ་དཀའ་ངལ་ཞིག་ཆགས་ཡོད་ཀྱང་། སློབ་གྲྭའི་འཛིན་སྐྱོང་གི་ངོས་ནས་སྔར་ལས་སྟབས་ཇེ་བདེ་དང་ཚགས་ཇེ་ཚུད་དུ་ཡོང་གི་འདུག་ལ། འཕྲོད་བསྟེན་དང་ཟ་མ་བཅས་ཕྱོགས་ཡོངས་ནས་ཡག་ཏུ་འགྲོ་བཞིིན་འདུག ཅེས་བརྗོད་བྱུང་།
འདི་ལོ་ཕྱི་ཟླ་ ༤ པའི་ཚེས་ ༡ ཉིན་ཤེས་རབ་དགའ་ཚལ་སློབ་གླིང་དངོས་སུ་སམ་བྷོ་ཊའི་ཁྱབ་ཁོངས་སུ་ཟླ་སྒྲིལ་བཏང་ཞིང་། སྐབས་དེའི་མཛད་སྒོའི་སྟེང་ཤེས་རིག་བཀའ་བློན་དང་སམ་བྷོ་ཊའི་སྤྱི་ཁྱབ་འགན་འཛིན་བཅས་ཀྱིས། མ་འོངས་པར་སྔར་ལས་ལྷག་པར་འཛིན་སྐྱོང་གིས་ལྟ་རྟོག་སློབ་སྦྱོང་གཙིགས་སུ་འཛིན་རྒྱུའི་གཏམ་བཤད་གནང་ཡོད། གསར་འགོད་པས་སློབ་ཕྲུག་གི་སྤྱི་ཁྱབ་འགན་བདག་ཕུར་བུ་ཉི་མ་ལགས་སུ། ད་ལྟ་སློབ་གྲྭའི་འཛིན་སྐྱོང་དང་ཤེས་ཡོན་གྱི་ཁོར་ཡུག དགེ་ལས་ཚོའི་གནས་ཚད་བཅས་ཀྱི་ཐད་ཡར་རྒྱས་ཀྱི་རྣམ་པ་གང་འདྲ་བྱུང་ཡོད་མེད་བཅར་འདྲི་ཞུས་པར། ཤེས་རབ་དགའ་ཚལ་སློབ་གླིང་སམ་བྷོ་ཊ་དང་ཟླ་སྒྲིལ་བཏང་རྗེས། སློབ་གྲྭའི་སྒྲིག་གཞི་དང་སློབ་སྦྱོང་གི་མཐུན་རྐྱེན། སྨན་བཅོས་འཕྲོད་བསྟེན། སློབ་མའི་ཞལ་ལག་བཅས་ཕྱོགས་ཡོངས་ནས་ཡར་རྒྱས་ཆེན་པོ་ཕྱིན་ཡོད་པར་མ་ཟད། ལྷག་པར་དུ་སམ་བྷོ་ཊ་སྤྱི་ཁྱབ་ཡིག་ཚང་གིས་བཀོད་མངགས་ལྟར། ལས་བྱེད་ཁག་ཅིག་དུས་ཚོད་ངེས་མེད་དུ་ཡོང་སྟེ་ཡིག་ཚང་ལས་བྱེད་ཚོའི་ལས་ཀ་བྱེད་སྟངས་དང་དགེ་རྒན་གྱི་སློབ་ཁྲིད་སོགས་ལ་ཞིབ་འཇུག་བྱེད་ཀྱིན་ཡོད་འདུག་ལ། སློབ་མའི་བསམ་ཚུལ་གཙིགས་སུ་བཟུང་སྟེ་ཆེད་མཁས་པ་གདན་ཞུའི་ཐོག་དགེ་རྒན་རྣམས་ལ་དབྱིན་སྐད་ཀྱི་སྒྲ་གདངས་དང་བོད་ཡིག་སློབ་ཁྲིད་བྱེད་ཐབས་སོགས་ཀྱི་ཟབ་སྦྱོང་རིམ་པ་གོ་སྒྲིག་གནང་ཡོད་འདུག དེ་བཞིན་སློབ་གྲྭའི་དཔེ་མཛོད་དང་གློག་ཀླད་སོགས་མཐུན་རྐྱེན་ཇེ་བཟང་དུ་བཏང་ཡོད་པ་དང་། སློབ་སྦྱོང་ལ་དོ་ཕོག་འགྲོ་གཞིའི་སྒྲིག་གཞི་ད་ཉེས་ཆད་མང་པོ་ཞིག་མེད་པར་བཟོས་ཏེ། མཐར་ཕྱིན་སློབ་མར་དམིགས་ཏེ་ལག་ཤེས་སློབ་སྦྱོང་དང་། མ་འོངས་པར་(openschool)ཡིག་ཚད་གཏོང་ཐབས་བཅས་གྲ་སྒྲིག་ཞུ་བཞིན་ཡོད་འདུག
མཐའ་མར་གསར་འགོད་པས་འཛིན་གྲྭ་མཐོ་བའི་སློབ་མ་ཁག་ཅིག་དང་། བོད་ནང་ལོག་མཁན་གྱི་སློབ་མ་ཁག་ཅིག་ལ་བཅར་འདྲི་ཞུས་པར། སློབ་གྲྭའི་ནང་གི་དཀའ་ངལ་གཙོ་བོ། ད་ལྟའི་འཛིན་སྐྱོང་བྱེད་མཁན་ཚོར་ཤེས་ཡོན་སློབ་གསོའི་ཉམས་མྱོང་ཞན་པའི་དབང་གིས་ཕྱོགས་འགའ་རེར་འདང་གི་མེད་པའི་ཆ་ཡོད་པ་དང་། དབྱིན་ཡིག་དགེ་རྒན་ཚོར་བོད་ཡིག་གི་གནས་ཚད་སྐྱོ་དྲགས་ཏེ་བོད་སྐད་ཀྱི་འདང་གི་མེད་སྟབས་དགེ་སློབ་བར་གོ་བརྡ་འཕྲོད་དཀའ་བའི་གནས་སྟངས་ཡོད་པ་དང་། ཡང་སློབ་མའི་ཕྱོགས་ཀྱི་ཞན་ཆ་ཞིག་ལ། དེང་སྐབས་བོད་ནས་གསར་དུ་འབྱོར་མཁན་མང་པོ་ཞིག་ཡིག་རྨོངས་པ་ཡིན་པའི་ཁར་ཕྱི་རྒྱལ་དུ་འགྲོ་རྒྱུ་ཁོ་ན་དམིགས་ཡུལ་དུ་བཟང་སྟེ། ཀུན་སྤྱོད་ཡག་པོ་མེད་པ་དང་ཤེས་ཡོན་གྱི་ར་བ་ནས་དཔལ་འབྱོར་གྱི་འགྲན་བསྡུར་བྱས་ཏེ་སློབ་གཉེར་གྱི་ཁོར་ཡུག་ལ་གཏོར་བཅོམ་གཏོང་བ། སློབ་སྦྱོང་ལ་འདུན་པ་ཆེ་བའི་སློབ་མ་ཚོར་ཤུགས་རྐྱེན་ངན་པ་འཇོག་པ་བཅས་ཀྱི་གནས་སྟངས་ཡོང་གི་ཡོད་སྟབས། མ་འོངས་པར་སློབ་གྲྭའི་ངོས་ནས་སློབ་སྦྱོང་ཡོད་མེད་གཉིས་སོ་སོར་དབྱེ་དགོས་པའི་བསམ་ཚུལ་ཡང་འདུག
སློབ་མཐར་ཕྱིན་ཏེ་བོད་ནང་ལོག་མཁན་ཞིག་གིས་བརྗོད་ན། ཁོང་ཐོག་མར་བཙན་བྱོལ་དུ་འབྱོར་སྐབས་སློབ་སྦྱོང་ཡག་པོ་ཞིག་བྱས་ཏེ། བོད་མི་རིགས་དང་རྒྱལ་ཁབ་ལ་ཕན་པའི་བྱ་བ་ཞིག་བསྒྲུབ་དགོས་སྙམ་པའི་དམ་བཅའ་ཡོད་ཀྱང་། སློབ་གྲྭའི་ནང་ལོ་གཅིག་ལྷག་བསྡད་པའི་རིང་ཁོར་ཡུག་དང་རྒྱུ་རྐྱེན་མང་པོ་ཞིག་གིས་སེམས་ཤུགས་དང་སྤོབས་པ་བརླག་འགྲོ་བཞིན་ཡོད་པ་དང་། ཤེས་རབ་དགའ་ཚལ་སློབ་གླིང་ནས་སློབ་མཐར་ཕྱིན་ཡང་། མ་འོངས་པར་རེ་བ་བརྒྱབ་ཆོག་པའི་ལམ་ཁ་གང་ཡང་མེད་སྟབས། ཕྱིར་ཕ་ཡུལ་དུ་ལོག་སྟེ་ནང་མི་སྤུན་མཆེད་དང་ལྷན་དུ། རང་ཉིད་ཀྱིས་གང་ཤེས་པ་དང་གང་འཇོན་པ་དེ་ཕ་ས་ཕ་ཡུལ་ནས་ལག་ལེན་བསྟར་ཐུབ་པ་ཡིན་ན་ཅུང་ཕན་ཐོགས་ཆེ་བ་མེད་འགྲོ་སྙམ་སྟེ། ཕྱིར་ཕ་ཡུལ་དུ་ལོག་རྒྱུར་སེམས་ཐག་བཅད་པ་ཡིན་ཟེར།
གསར་འགོད་པ། དོན་གོ
༼ གོང་བཀོད་གསར་འགྱུར་འདི་བོད་ཀྱི་དུས་བབ་ཚགས་ཤོག་སྤྱིའི་འདོན་ཐེངས་ ༥༢༨ སྟེང་བཀོད་འགྲེམ་བྱས་ཟིན་ཡོད། ༽
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ཤེས་རབ་དགའ་ཚལ་སློབ་གླིང་དུ་གྲྭ་བ་ཚོར་ཞུགས་ཆོགས་ན་་་་་་ཐོགས་མ་ཆ་རྐྱེན་ཇི་ལྟར་དགོས་ཀྱི་རེད།
གསར་འགྱུར་དེ་ངོ་མ་བཟང་པོ་རེད་གང་ཡིན་ཟེར་ན་དགོན་སྡེ་ཁག་ནས་ཡོང་བའི་གྲྭ་པ་དང་དེ་བཞིན་བོད་ཡིག་གི་གནས་ཚད་གང་ཚམ་ཡོད་ན་ཡང་ས་རྭ་སོགས་ལ་མ་ཚུད་པའི་རིང་སློབ་གྲ་དེ་འདྲ་ཞིག་ནས་ཡར་རྒྱས་གཏོང་ཐུབ་ན་མ་འོངས་པར་བོད་མི་རིགས་ལ་ཕན་པའི་ན་གཞོན་མང་པོ་ཞིག་བཟོ་ཐུབ་ཀྱི་རེད་།
ད་ཡིན་ན་གསོག་སྒར་དུ་འགྲོ་འདོད་པ་ཚང་མ་ཕེབས་རྐྱང་བྱོས། ཡིན་ན་ཡང་དགེ་རྒན་ལྟས་ངན་རྐྱང་རྐྱང་རེད་ཟེར་ཚོད་ཐོས། ཡོན་ཏན་ཞིག་མི་རེག་ཐག་ཆོད་ཡིན།ཉི་མ་འདྲ་གཏོང་ཐབས་ལ་འགྲིག་ས་རེད།
སློབ་ཕྲུག་ཡོད་ཚེ་བདག་པོ་མ་བརྒྱབ ད་ངེས་འབྱུང་སྐྱེས་འདུག་འ། སྤྱིར་བདག་པོ་མ་བརྒྱབ་ཀྱང་མི་གསོད་ཁྲག་སྦྱོར་ལ་མ་བསྲེས་ན་བཟང་་་།
གསར་འགྱུར་དེ་དུས་བབ་ཚགས་པར་ནས་ཀློག་ཟིན་པ་ཡིན།
ད་རེས་འདིར་བསམ་ཚུལ་ཁ་ཤས་ཞུས་ན། སློབ་གྲྭྭར་སློབ་འཇུག་བྱེད་པའི་ཆ་རྐྱེན་ཡོད་ན། སུ་ཇ་སློབ་གྲྭ་ལྟ་བུ་མུ་འཐུད་སློབ་སྦྱོང་བྱ་འདོད་ཡོད་ཀྱང་། ཡིག་ཚད་གཅིག་གཉིས་མ་ལོན་ནས། སློབ་གྲྭའི་གོ་སྐབས་ཤོར་བ་དེ་ཚོར་གནང་བ་དེ་ཧ་ཅང་ཡག་པོ་རེད། དེའི་སྐོར་སློབ་ཕྲུག་ཚོས་དཀའ་ངལ་ཁག་ཅིག་གྲོས་ཚོགས་དང་སྲིད་ཇུས་ཉམས་ཞིབ་ཁང་ནས་གཉེར་བའི་དགུན་དུས་ཟབ་སྦྱོང་སྐབས་གླེང་ཡོང་གི་འདུག
གཞན་ཡང་དེང་དུས་གཞན་དབང་སྟབས་བསྟུན་དང་རྒྱུ་རྐྱེན་ཁ་ཤས་ལ་བརྟེན་ནས། གཏན་སློབ་ལྟ་བུར་སློབ་མ་སློབ་སྦྱོང་ཁུངས་མ་འཁྱོལ་བ་གང་ཙམ་ཡོང་གི་འདུག གཙོ་བོ་དེ་འཚར་ལོངས་ཀྱི་མྱུར་ཚད་མགྱོགས་ཤོས་ཏེ། འཛིན་རིམ་དྲུག་པ་ནས་དགུ་པ་བཅུ་པ་བར་གྱི་སློབ་མ་མི་ཉུང་ཞིག་ཕྱིའི་འཚར་ལོངས་དང་ནང་སེམས་ཀྱི་འཚར་ལོངས་དེ་གཉིས་ཆ་མི་མཐུན་པའམ་སྟོང་བསམ་དང་། འཆར་ཡན་ནང་འགྲོ་ཐལ་ཆེ་བའི་བརྒྱུད་རིམ་ཞིག་ལ་འཁེལ་བར་བརྟེན། དུས་ཚོད་དེའི་ནང་ཕ་མ་དང་། དགེ་རྒན།འཛིན་སྐྱོང་གི་སྟངས་འཛིན་འཚམས་པོ་མ་བྱུང་བའི་དབང་གིས་སློབ་ཁུངས་མ་འཁྱོལ་བར་སློབ་གྲྭ་ནས་བུད་འགྲོ་མཁན་མི་ཉུང་བ་ཞིག་ཡོང་གི་འདུག ཁོང་ཚོའི་ནང་རེ་གཉིས་མ་གཏོགས་མང་ཆེ་བར་སློབ་མ་ཚོར་ཁག་མེད་པ་རྐྱང་ཡིན་པའི་མྱོང་འཚོར་ཡོད། དེའི་ཐད་གུས་མོས་ཤེས་རིག་དྲུང་ཆེ་སྐུ་ངོ་གཡུ་ཐོག་ཀརྨ་དགེ་ལེགས་ལགས་སུ་དངོས་སུ་ཞུ་རྒྱུ་བྱུང་། སྟབས་ལེགས་ནས་བཙན་བྱོལ་ནང་དང་ཞབས་ནང་དུ་འགྲོ་ས་ཞིག་ཡོད་སྟབས་སྤྱི་ཚོགས་སྟེང་འཁྱམས་སྡོད་མཁན་དེ་ཙམ་མང་པོ་མེད། གལ་སྲིད་ཕྲུ་གུ་དེ་ཚོའི་རིགས་ལ་དེ་གའི་སློབ་གྲྭ་ནས་གོ་སྐབས་གསར་པ་ཞིག་སྤྲད་ནའང་གང་ལྟར་བོད་པའི་སྤྱི་ཚོགས་ལ་ཕན་མི་ཡོང་ངམ་སྙམ།
དཔལ་ལྡན་བོད་མི་མང་སྤྱི་འཐུས་སྐུ་ངོ་རྨོག་རུ་བསྟན་པ་ལགས་མཆོག་གིས་གནས་ཚུལ་འདིའི་སྐོར་སྐབས་བཅོ་ལྔ་པའི་གྲོས་ཚོགས་ཚོགས་ཐེངས་གཉིས་པའི་ཐོག་ཐུགས་སྣང་གཞེན་སྐུལ་གནང་རྒྱའི་བསམ་ཚུལ་གསུངས་པར་ཐུགས་རྗེ་ཆེ་ཞུ་རྒྱུ་ཡིན། སྐུ་ངོས་རྨོག་རུ་བསྟན་པ་ལགས་འདྲ་བའི་སྤྱི་འཐུས་གང་མང་གྲོས་ཚོགས་ཀྱི་རྭ་བའི་སླེབས་རྒྱུའི་འདུན་པ་ཆེ།
དེང་སྐབས་བོད་ནས་གསར་དུ་འབྱོར་མཁན་མང་པོ་ཞིག་ཡིག་རྨོངས་པ་ཡིན་པའི་ཁར་ཕྱི་རྒྱལ་དུ་འགྲོ་རྒྱུ་ཁོ་ན་དམིགས་ཡུལ་དུ་བཟང་སྟེ། ཀུན་སྤྱོད་ཡག་པོ་མེད་པ་དང་ཤེས་ཡོན་གྱི་ར་བ་ནས་དཔལ་འབྱོར་གྱི་འགྲན་བསྡུར་བྱས་ཏེ་སློབ་གཉེར་གྱི་ཁོར་ཡུག་ལ་གཏོར་བཅོམ་གཏོང་བ། གོང་དུ་སློབ་མའི་དྲི་ལན་ཞིག་ལས་འདི་ལྟར་བཤད་འདུག འདི་དངོས་གནས་ཚུལ་རེད། ང་ཚོའི་བཙལ་བྱོལ་སྤྱི་ཚོགས་ནང་དུ་ཤུགས་རྐྱེན་ངན་པ་འདིས་སློབ་སྦྱོང་གི་ཁོར་ཡུག་ལ་གནོད་སྐྱོན་ཆེན་པོ་ཞིག་བཟོ་བཞིན་འདུག གདན་སར་མཚོན་ན་ཡང་ཤུགས་རྐྱེན་དང་ལུགས་སྲོལ་ངན་འདིས་གདན་ས་ཁག་གི་སློབ་གཉེར་ལ་གཏོར་བཅོམ་ཆེན་པོ་གཏོང་གིས་འདུག སྤྱིར་བཏང་ནས་བཤད་ན་དེང་སྐབས་དཔལ་འབྱོར་འགྲན་བསྡུར་གྱི་སྤྱི་ཚོགས་ཤིག་ཡིན་པས་དཔལ་འབྱོར་འགྲན་བསྡུར་དང་ཡར་རྒྱས་གོང་འཕེལ་གྱི་ཐབས་ལ་འབད་དགོས་པ་ཞིག་རེད། འོན་ཀྱང་ ཤེས་ཡོན་པའི་སྡེ་མཚན་དང་སློབ་སྦྱོང་བྱེད་སའི་ཁོརགཡུ་ནང་དེ་ལྟར་བྱས་ན་ངོ་མ་ཐབས་རྡུགས་རེད། འདི་ལ་སྒྲིག་འཛུགས་དང་ཁྲིམས་བཟོས་ནས་ཁག་པོ་རེད། སློབ་གྲྭའི་སློབ་གསོ་དང་བསམ་བློའི་ཀུན་སྤྱོད་ཀྱི་སློབ་གསོས་མ་འདང་བ་ཞིག་རེད་སྙམ། འདི་ལ་སློབ་གྲྭ་དང་དགོན་པ་ཁག་གི་སློབ་གཙོ་དང་སློབ་དགེ་འགན་ཡོད་མི་སྣ་རྣམ་ཀྱིས་ཐབས་ཤེས་དང་བསམ་གཞིག་ཞིག་་ངེས་པར་དུ་གཏོང་ དགོས་ཀྱི་འདུག
གནད་དོན་འདིའི་ཐད་སྔོན་མ་ནས་སེམས་ཚོར་ཆེན་པོ་ཡོད་པ་དང་།གསར་འབྱོར་དང་གྲྭ་ས་ནས་ཐོན་པ་མང་པོ་ཞིག་ལ་སློབ་སྦྱོང་གི་གོ་སྐབས་མ་རེག་པའི་དཀའ་ངལ་ཡོད་པ་དངོས་འབྲེལ་ལགས།
སྐབས་བཅོ་ལྔ་བའི་གྲོས་ཚོགས་ཚོགས་འདུ་གཉིས་པར་འདིའི་ཐད་ཐུགས་སྣང་གཞེན་སྐུལ་ཞིག་ཞུ་དགོས་བསམ་ཡོད།
འོན་ཀྱང་སློབ་སྤྱི་མཆོག་དང་འགན་ཡོད་ཚང་མས་གུ་ཡངས་ཀྱི་དགོངས་པ་ཆེར་གཞེས་གནང་བར་བཀའ་དྲིན་ཆེ་ཞུ་རྒྱུ་ཡིན།
ཨོ་དེ་གནས་ཚུལ་བཟང་པོ་ཅིག་རེད་འདུག་ཧ་དངོས་གནས་དྷ་སར་ཡོད་མཁན་དཀའ་ངལ་ཅན་མི་ཉུང་བ་ཞིག་ལ་ཕན་ཐོག་ཆེན་པོ་ཡོང་ངེས་ཡིན་ནའང་སློབ་གྲྭའི་ཤེས་ཡོན་དང་འཛིན་སྐྱོང་ལམ་ལུག་ལ་འགྱུར་བ་ཞིག་གཏོང་དགོས་ངེས་རེད།་གཞན་མ་གཏོགས་མི་དེ་ཚོ་སློབ་གྲྭའི་བསྡོད་མཁན་ཁ་པོ་རེད།་བོད་མིའི་སྒྲིག་འཛུགས་ཀྱིས་གཟིགས་རྒྱང་དེ་དགའ་བསུ་དང་ཡིད་རང་ཞུ་འོས་པ་ཅིག་རེད།་ཐུགས་རྗེ་ཆེ།
གསར་འགྱུར་དེ་ནི་ཧ་ཀྱང་གལ་ཆེན་རེད་ད་སྐབས་བོད་ཕྲུག་གཞོན་སྐྱེས་མང་པོ་ཞིག་མེག་ལོར་འཁྱམ་ནས་བསྡད་ཡོད་པ་རེད། ཁོང་ཚོ་ཁག་གཅིག་གདན་ས་ཁག་ནས་ཡོང་པ་དང་ཁག་གཅིག་སློབ་གྲྭ་ཁང་ནས་ཡོང་པ་འདྲ་བོ་སོགས་གང་ལྟར་གཞོན་སྐྱེས་མང་པོ་ཞིག་ཡོད་པ་དངོས་ཡོད་རེད། དེ་འདྲ་ཡིན་དུས་འདི་འདྲའི་སློབ་སྤྱོང་སྤྲད་ཀྱི་ཡོད་པ་ཧ་ཀྱང་གལ་ཆེན་རེད། དེ་ནི་དངོས་ཡོད་ཕན་པའི་བྱ་བ་གལ་ཆེན་ཞིག་རེད།
༡)སློབ་མ་བསྡུ་སྟངས་ཐད་ལ་གུ་ཡངས་པོ་གནང་དགོས་པ་གལ་ཆེན་པོ་རེད། འོན་ཀྱང་སློབ་གླིང་འདི་བོད་ནས་ཡོང་མཁན་ཁོ་ནའི་ཆེད་དུ་ཡིན་པའི་ངོ་བོ་ལ་སྒྱུར་བཅོས་གཏོང་མི་འོས།
༢)སློབ་མ་ཚོའི་ནང་ན་སློབ་སྦྱོང་ཡོད་མེད་ཀྱི་བར་ཁྱད་ཆེན་པོ་ཡོད་ལ་གནས་སྟངས་དེའི་འོག་ནས་ཚང་མར་ཁྲིམས་སྒྲིག་གཅིག་གིས་སྟངས་འཛིན་བྱེད་པའི་རྣམ་པ་དེ་ཧ་ཅང་མི་འོས་པ་ཞིག་ཡིན་པ་བདེན།
༣)དེ་སྔོན་ཕྱིའི་མཐུན་རྐྱེན་ཧ་ཅང་སྐྱོ་ལ་དེང་སང་ཕྱིའི་མཐུན་རྐྱེན་བཟང། གཙོ་བོ་ནང་གི་མཐུན་རྐྱེན་དག་བཟང་དགོས་པས། དགེ་རྒན་དང་སློབ་དེབ། ལོ་རིམ་ཇེ་མཐོར་གཏོང་བ་སོགས་ཀྱི་རྣམ་པ་ཇེ་ལེགས་སུ་གཏོང་དགོས།
ད་བར་ལ་ལེགས་བཅོས་གང་འཚམ་རེ་བཏང་ཡོད་མོད། ད་དུང་སྔར་ལྷག་གིས་ཇེ་ལེགས་སུ་གཏོང་དགོས། འདིའི་ཐད་ལ་བཀའ་ཤག་གསར་པས་དམིགས་བཀར་ལས་དོན་སྒྲུབ་པའི་རེ་སྐུལ་ཞུ་འདོད་བྱུང།
གསར་འགྱུར་ཡག་པོ་རེད་་་་རབ་ཡིན་ན་མེག་ལོའི་ལས་མེད་འཁྱམ་པོ་ཚོའང་དེའི་ཁོངས་སུ་བསྡུ་ཐབས་བྱས་ན་ཡག་པོ་རེད ་་་གང་ལྟར་བོད་མི་ཚོར་སློབ་སྦྱོང་སྤྲོད་རྒྱུའི་ཆེད་དུ་བཙུགས་པ་ཞིག་ཡིན་དུས་ཕྱོགས་གང་ས་ནས་ཐབས་ཤེས་འཐེན་རྒྱུ་གལ་ཆེན་པོ་རེད།