སྤྲུལ་སྐུའི་ཡང་སྲིད་ལམ་ལུགས་མཇུག་སྒྲིལ་བ།

བོད་རེ་བ་ཅན་གྱིས་བཤད་པ་དེ་བདེན་པ་རེད། དེང་སང་ཚེ་མཆོག་གླིང་གི་སྤྲུལ་སྐུ་ལྟ་བུ་བསྟན་དགྲ་དར་བའི་དུས་ཡིན་པས། བསྟན་པ་དང་མི་རིགས་རྩ་མེད་བཏང་དང་གཏོང་མཁན་གྱི་གཏེ་བོ་གཙོ་ཆེ་བ་འདི་དག་རེད་འདོད་ཀྱིན། མི་མང་གིས་ཀྱང་དགེ་སློང་ཉམ་ཆུང་དང་གྲྭ་སའི་མཁས་པ་ཚད་ལྡན་ཚོར་དད་པ་མི་བྱ་བར་ཚུལ་མིན་གྱི་རིགས་འདི་དག་ལ་རྨོངས་དད་བྱ་སྟངས་ལ་གཞིག་ན་ཡིག་རྨོངས་ཙམ་སེལ་མེད་པའི་མི་རིགས་འདི་ཚར་རྒྱུ་ལས་མེད་པར་སྣང་། འདྲེ་སྣ་ནག་ལྷ་ཐོད་དཀར་ལས་མང་དྲག་པས།

བོད་ཀྱི་སྤྲུལ་སྐུའི་ལུགས་སྲོལ་གྱི་འཚང་ད་རེས་ཚེ་མཆོག་གླིང་སྤྲུལ་སྐྲུའི་ཕྱི་ལ་མངོན་བྱུང་། བོད་པ་ཚང་ནམ་ཡང་རྨོངས་དད་ཀྱི་འོག་ལ་ཚུད་མི་རུང་།།།།

ཡར་རྒྱས་དང་གསར་བཏོད་སྣ་གཅིག་ཀྱང་མེད་པར། སྔར་ཡོད་ཀྱི་ལམ་ལུགས་ཀུན་གཏོར་བཤིག་དང་མཇུག་སྒྲིལ་བར་རྩོམ་པ་ནི། དེང་སང་བོད་མིའི་གཤིས་ཀར་གྲུབ་འདུག་པས། སྔ་ལྟས་བཟང་པོ་ཞིག་རེད་ལ། བོད་པ་ཚང་ལྔ་ལམ་དུ་ཕེབས་པའི་སྔ་ལྟས་ཡིན་སྟབས། རྣམ་པ་ཚོས་ད་དུང་ཡང་འབད་བརྩོན་ཆེན་པོས་བོད་ཀྱི་སྲོལ་རྒྱུན་ཐམས་ཅད་མཇུག་སྒྲིལ་གྱིས་དང་། ཁ་གནམ་ལ་གདངས་ནས་སྡོད་པའི་དུས་ཤིག་འོང་།

སྤྲུལ་སྐུའི་ལམ་ལུགས་དགོས་དང་མི་དགོས་ཀྱི་སྐད་ཆ་མ་རེད་བསམ་གྱི་ཡོད། ཁ་བྱང་དུ་བོད་ཀྱི་སྤྲུལ་སྐུའི་ཡང་སྲིད་ལམ་ལུགས་་མཇུག་སྒྲིལ་བ་ཞེས་བཀོད་ཡོད་ཀྱང་། ནང་དོན་གྱི་ཆ་ནས་ད་དུང་སྤྲུལ་སྐུའི་ལམ་ལུགས་གསར་བ་རེ་བོད་མི་རིགས་ལ་ཕན་མིན་གྱི་ཆ་ནས་གྲོས་འདྲ་བོ་ཞིག་བཏོན་འདུག འདི་ཧ་ཅང་གིས་གྲོས་གཞི་ཡག་པོ་ཞིག་རེད་འདུག
དེང་སྐབས་ཀྱི་སྤྲུ་སྐུའི་ལམ་ལུགས་འདིར་བཅོས་བསྒྱུར་ཆེན་པོ་ཞིག་བྱེད་དགོས་པ་ཤ་སྟག་ཡིན་པས་ན། དེ་ལ་ཐབས་ལམ་ཡོད་མེད་ཀྱི་སྐད་ཆ་མ་བཤད་པར་ངེས་པར་དུ་ཐབས་ལམ་གསར་བ་ཞིག་བཙལ་རྒྱུ་དེ་གལ་ཆེན་པོ་རེད་བསམ་བྱུང་། ཚང་མས་འདིར་བློ་གཟུ་བོར་གནས་ཏེ་དོ་སྣ་ཆེན་པོ་སྤྲོད་ཐུན་ན་ཐབས་ཤེས་ནི་ཏན་ཏན་ཡོད་སྲིད་པ་ཞིག་རེད།

སྤྲུལ་སྐུའི་ཡང་སྲིད་ལམ་ལུགས་མཇུག་སྒྲིལ་དགོས་ཞེས་ལབ་ན་ཅུང་ཐལ་ཆ་ཆེ་བར་སྙམ། དེ་འདྲ་མ་ཡིན་པར་གུས་པས་བསམ་ཚུལ་ལ། སྤྲུལ་སྐུའི་ལམ་ལུག་མཇུག་སྒྲིལ་མི་དགོས་པར་སྤྲུལ་སྐུའི་ལམ་ལུགས་ནི་ངེས་པར་དུ་དགོས། མཇུག་སྒྲིལ་དགོས་རྒྱུ་ནི། ཕ་སྤྲུལ་སྐུ་ལ་བུ་སྤྲུལ་སྐུ། ཕ་དཔོན་པོ་ལ་བུ་སྤྲུལ་སྐུ། ཕ་འབྱོར་ལྡན་ལ་བུ་སྤྲུལ་སྐུ། ཕ་མ་ཁ་བདེས་བུ་སྤྲུལ་སྐུ་རྫུན་མ་བཟོ་བ། དེས་འཁྲབ་སྟོན་བཤམ་ནས། བསམ་རྒྱུ་དཔལ་འབྱོར་ལས་གཞན་མེད་པར་མི་སེར་དད་ཅན་མགོ་བསྐོར་བསླུ་བྲིད་ཁོ་ན་བྱེད། སྐྱེ་བོ་ཕལ་པ་ལས་སྡུག་པའི་བྱ་སྤྱོད་སྣ་མང་སྤེལ། བསྟན་པའི་རྐང་འདྲེན། དགེ་འདུན་པའི་ཞབས་འདྲེན་པ། ཁས་སྙན་པོ་བཤད་དོན་བུད་མེད་དང་དཔལ་འབྱོར་ཁོ་ན་སྒྲུབ་པ་བསྟན་པའི་གཤིག་པའི་ཇག་དཔོན་འདི་ཚོ་ངོ་མ་མཇུག་སྒྲིལ་མ་ཐུབ་ན་ངེད་ཚོ་གངས་ཅན་པའི་ནང་བསྟན་ཟབ་མོ་འདི། འཛམ་གླིང་འདིའི་སྒང་ལ་སུ་གི་ཡང་ལྟ་ཀློག་བྱེད་ཉན་མི་བྲོ་བ་ཞིག་ཡོང་བར་ཐག་ཆོད་ཀྱི་འདུག་པར་སེམས། འདི་དྲའི་རྫུན་མ་བྱེད་པའི་བླ་སྤྲུལ་མིང་ཅན་ཁྱོད་ཚོ་ཁྲི་གང་ལ་སྡོད་པ་ལས་འཇིག་རྟེན་ཚུལ་ལུགས་དང་མཐུན་པའི་འཚོ་བ་ཞིག་སྐྱོལ་དང་། དགེ་མཚན་དེ་མི་ཆེའམ། ངོ་མ་དེ་ཚོ་མཇུག་སྒྲིལ་ན་ཤིན་ཏུ་བཟང་། འདི་མུར་གླེང་སློང་མེད་པར་ག་ཚོད་སྡོད་ན་མགོ་བསྐོར་ཇེ་བཏང་དང་། རྫུན་མ་ཇེ་འཁྲབ་ལས་དུས་གཏན་དུ་བཟང་པོ་ཞིག་མི་འབྱུང་བར་ཐག་ཆོད་ཀྱི་འདུག་པར་སེམས། སྤྲུལ་སྐུ་རྫུན་མ་བླ་ལོག་དེ་ཚོ་གི་མཇུག་སྒྲིལ་དགོས། རྒྱབ་སྐྱོར་ཡོད་ལ། མོས་མཐུན་ཡང་ཡོད།

སྤྲུལ་སྐུ་བརྫུན་མའི་ནང་ནས་གོང་ས་མཆོག་འདྲ་འདྲ་རྙེད་རྒྱུ་ཡོད་ན་སྤྲུལ་སྐུ་ངན་པ་ས་ཡ་དྲུག་བཙལ་དགོས་ཐུག་ནའང་གྱོང་མེད་ཀ ཕྱི་རྒྱལ་ནས་ཕ་ཡུལ་གྱི་ཕ་མ་ལ་སྒྲོ་ལོར་བརྒྱ་བསྐུར་བ་ལས་ཕ་ཡུལ་ལུང་ཁུག་གི་བླ་ལོག་ཚོས་ཕ་མའི་ལག་ནས་མར་རྒྱ་མ་འགའ་བླང་བ་དེས་ཕ་མ་ལ་སྤྲོ་བ་མང་ཙམ་སྤྲོད་ཐུབ། ཕ་མ་ལ་མཚོན་ནའང་བུ་བུ་མོ་ལྡོམ་པོ་ཞིག་ལས་སྤྲུལ་སྐུ་བརྫུན་མ་ཞིག་གི་འཚོ་བཞུགས་གལ་ཆེ། བླ་ལོག་དེ་ཚོས་འཁྱེར་བའི་བསྔོ་རྟ་བསྔོ་ལུག་ལ་ཕངས་སེམས་ཆེ་བ་ཁག་མེད་མོད། དེ་ནི་ཕ་མས་བཙལ་བ་ལས་ང་ཚོའི་རྔུལ་ཆུས་གྲུབ་པ་མ་རེད་བ། དེས་ན་སྤྲུལ་སྐུའི་ལམ་ལུགས་ལ་མཇུག་སྡོམ་རེ་འབྲི་ཁུལ་བྱེད་པ་ལས་རང་གི་བུ་བུ་མོ་ལ་སྤྲུལ་སྐུའི་སྤྱི་ཚོགས་ཀྱི་ཤན་ཤུགས་གཏན་ནས་མི་ཐེབས་པའི་སྨོན་ལམ་དུས་ཀུན་ཏུ་འདེབས་པ་གལ་ཆེ་བར་སྣང་།

མཆོག་སྤྲུལ་ཐུབ་པས་དམ་ཆོས་གསུངས།
འགྲོ་འདྲེན་སྤྲུལ་པས་དམ་ཆོས་སྤེལ།
ཐུན་མིན་སྤྲུལ་སྐུའི་ལམ་ལུགས་ལ།
ཐུན་མོང་ཐག་གཅོད་བྱེད་པ་མཚང།

“སྙིགས་མའི་དུས་ཀྱི་སྤྲུལ་སྐུ་རྣམས།
སྦྱང་བའི་དུས་ན་གཞན་ལས་རྟུལ།”
གསུངས་པའི་གནད་ཉིད་ངོས་ཟིན་ན།
བསྟན་འགྲོར་ཕན་པའི་ལས་རེ་སྲིད།

ལུས་སེམས་གཉི་གར་མནར་གཅོད་ཐེབས་བདེན་ན།
སྤྲུལ་སྐུ་ཕལ་ཆེར་གོང་དུ་འཕགས་དོན་ཅི།
སྤྲུལ་སྐུ་རྫུན་མས་འཚང་ཁ་བྱེད་དོན་ཅི།

ཡ་ངས་འདིར་བོད་ནང་ནས་བརྩམས་པའི་བོད་རེ་བ་ཅན་ཞེས་པའི་ནང་ནས་སྤྲུལ་སྐུའི་དཔྱད་རྩོམ་ཞིག་འདུག དེ་འདིར་དྲངས་ཡོད་པས་དཔྱད་པ་ཞིག་གནང་དང་།

༣༦ སྤྲུལ་སྐུ་ལ་དགའ་བའི་ང་ཚོ།
ང་ཚོ་ནི་སྤྲུལ་སྐུ་ལ་ཤིན་ཏུ་དགའ། བོད་དུ་སྤྲུལ་སྐུའི་ལམ་ལུགས་དར་ནས་ཡུན་རིང་སོང་ཡོད། འདི་ནི་ཕྱོགས་གཅིག་ནས་ནང་བསྟན་གྱི་སྐྱེ་བ་སྔ་ཕྱིའི་དགོངས་པ་ལྟར་སྐྱེས་བུ་དམ་པའི་ཡང་སྲིད་ངོས་བཟུང་བ་ཞིག་ཡིན་ལ། བསྟན་དར་སྤེལ་བྱེད་པར་ཡང་ཕན་ཐོགས་ཆེན་པོ་བྱུང་ཡོད། ཕྱོགས་གཅིག་ནས་སྐབས་དེའི་གྲུབ་མཐའ་སོ་སོ་སྟོབས་ཤུགས་འགྲན་པའི་ཆབ་སྲིད་ཀྱི་དགོས་མཁོར་བརྟེན་ནས་དར་བ་ཞིག་ཀྱང་རེད། མང་ཚོགས་ཚོས་ཆབ་སྲིད་ཀྱི་དགོས་པའི་རྒྱབ་ལྗོངས་ད་དུང་ཤེས་ཀྱི་མེད།
བོད་མི་ཚོས་མདོ་སྔགས་སྤྱི་དང་བྱེ་བྲག་ལ་མཁས་ཤིང་གྲུབ་པ་ཐོབ་པའི་ཆོས་པ་ཉམ་ཆུང་ལས། སྐྱབས་འགྲོ་ཙམ་མི་ཤེས་པའི་མི་བུ་ཆུང་ངུ་སྤྲུལ་སྐུའི་མིང་ལྡན་པར་དགའ། སྤྲུལ་སྐུ་ནི་སངས་རྒྱས་དང་ཁྱད་མེད་དུ་བརྩི། ད་ལྟ་མི་རིགས་གཞན་ལའང་བག་ཆགས་དེ་བསླབ་ཡོད་པ་རེད། མ་ཟད་རྒྱ་སྐད་ནང་ཧོའོ་ཧྥོའོ་དང་། དབྱིན་སྐད་ནང་ལིའི་ཝིའན་བུདྡྷ་ཞེས་སངས་རྒྱས་དངོས་བཞུགས་དང་། སངས་རྒྱས་གསོན་པོའི་གོ་དོན་གྱི་ཐ་སྙད་སྦྱར་ཡོད། དོན་དངོས་ཐོག་ཚང་མ་དོན་མཐུན་དེ་འདྲ་ཡིན་མོན་དབྱེ་ཞིབ་གཏན་ནས་བྱས་མེད་ལ། བོད་རིགས་ཚོས་སྤྲུལ་སྐུ་ཡིན་ཚད་ཡང་དག་ཏུ་བརྩི་གི་ཡོད། ཁོང་རྣམས་ནི་རྒྱུ་འབྲས་བརྩི་མི་དགོས་པའི་དམིགས་གསལ་གྱི་ཐོབ་ཐང་ཡོད་པར་ངོས་འཛིན་བྱེད་ཀྱི་ཡོད། ད་ལྟ་བོད་ཀྱི་ནང་བསྟན་གྲུབ་མཐའ་ཀུན་ལ་སྤྲུལ་སྐུ་ཡོད་པས་མ་ཚད་གྲངས་འབོར་ཡང་སྟོང་ཕྲག་ཁ་ཤས་ལོན་ཡོད།
འོན་ཀྱང་ཐབས་སྐྱོ་ཤོས་ནི་ང་ཚོས་བླ་མ་དང་སྤྲུལ་སྐུའི་དབྱེ་བ་ཕྱེ་ཤེས་ཀྱི་མེད་ལ། སྤྲུལ་སྐུ་ངོ་མ་དང་རྫུན་མའི་དབྱེ་བ་ཕྱེ་ཤེས་ཀྱི་མེད། མང་ཚོགས་ཕག་ཆེ་བས་སྤྲུལ་སྐུ་ལ་བླ་མ་ཟེར་གྱི་ཡོད། ཨ་ལགས་ཡིན་ན་བླ་མ་ཡིན་ཤག་རེད། དོན་དུ་བླ་མ་དང་སྤྲུལ་སྐུ་ཐ་དད་རེད། ང་ཚོའི་མང་ཚོགས་ནི་གྲགས་པའི་རྗེས་འབྲངས་ཤ་སྟག་རེད། ཁག་ཅི་ཡོད། ཁོང་ཚོ་ནི་རྨོངས་པ་ཤ་སྟག་རེད། དེར་བརྟེན་ཁོང་ཚོས་དབྱེ་བ་ཕྱེ་ག་ལ་ཤེས། ལུང་རིགས་ལ་རྩོད་པའི་གྲྭ་ས་ཆེན་པོ་རྣམས་ཀྱི་ནང་དུ་ཡང་དབྱེ་གསལ་མེད། ནང་རིག་ནི་རྒྱུ་འབྲས་ཁོ་ན་སྨྲ་བའི་རིང་ལུགས་ཞིག་ཡིན་ལ། བླ་མ་དང་སྤྲུལ་སྐུ་ནི་རྒྱུ་འབྲས་ཀྱི་བླང་དོར་བྱེད་མཁན་གྱི་མིག་དཔེ་ཡིན་དགོས་པ་ལས། རྒྱུ་འབྲས་ལ་སྣང་མེད་དང་རྡོག་རོལ་གཏོང་མཁན་ཞིག་རྩ་བ་ནས་མ་རེད། སྤྲུལ་སྐུ་འཇིག་རྟེན་དུ་བྱོན་པ་དང་། ངོས་འཛིན་བྱེད་པའི་དམིགས་ཡུལ་ནི་ནང་བསྟན་གྱི་དགངོས་པ་དྲི་མ་མེད་པ་ལག་བསྟར་བྱེད་པའི་སྣེ་ཁྲིད་པའམ། མིག་དཔེ་འདོན་མཁན་ཡག་པོ་ཞིག་དང་། བསྟན་འཛིན་སྐྱེས་བུ་མིང་དོན་མཚུངས་པ་ཞིག་ཡིན་དགོས། ཐོས་བསམ་སྒོམ་གསུམ་དང་འཆད་རྩོད་རྩོམ་གསུམ་གྱི་ལག་རྗེས་བཞག་དགོས། དེ་ནི་དམིགས་ཡུལ་ངོ་མ་དེ་རེད། གལ་ཏེ་སྤྲུལ་སྐུའི་མིང་ཅན་གྱིས་རྒྱུ་འབྲས་ལ་མཐོང་ཆུང་དང་། སྣང་མེད་བཏང་ན་དེ་ནི་ནང་བསྟན་གྱི་དགྲ་བོ་དང་། ནང་བསྟན་གྱི་དབུ་ཁྲིད་ཀྱི་མིང་འཛིན་ནས་ནང་བསྟན་དྲི་མ་ཅན་དུ་བཟོ་མཁན་གྱི་བསྟན་དགྲ་དངོས་ཡིན་པས་སྤྲུལ་སྐུ་རྫུན་མ་ཡིན་པ་ལས། ཡང་དག་པའི་སྤྲུལ་སྐུ་ཞིག་ག་ལ་ཡིན། རྒྱུ་འབྲས་ཀྱི་མདུན་དུ་མང་ཚོགས་དང་སྤྲུལ་སྐུ་འདྲ་མཉམ་ཡིན་པ་ལས་སྤྲུལ་སྐུ་ཡིན་ན་རྒྱུ་འབྲས་བརྩི་མི་དགོས་པའི་དམིགས་གསལ་གང་ཡང་མེད་པ་ཤེས་དགོས། ང་ཚོས་ངེས་པར་དུ་ཤེས་དགོས་པ་ནི་བླ་མ་དང་སྤྲུལ་སྐུའི་ཁྱད་པར་དེ་རེད། བླ་མ་ཞེས་པ་ནི་ཡོན་ཏན་གྱི་སྒོ་ནས་བཞག་པ་དང་། སྤྲུལ་སྐུ་ཞེས་པ་ནི་སྐྱེ་བ་ལ་བཏགས་པ་ཞིག་རེད། སྤྲུལ་རྫུན་ཚོར་བལྟས་ན་སྤྱིར་མི་རྣམས་ལ་བདག་གམ་ང་གཅིག་ལས་མེད་ཀྱང་སྤྲུལ་རྫུན་
ཚོར་བདག་གཉིས་ཡོད་པ་རེད། གཅིག་ནི་མི་ཀུན་དང་ཐུན་མོང་གི་ངར་འཛིན་ལྷན་སྐྱེས་ཀྱི་བདག་དང་། གཅིག་ནི་ང་དེ་དང་དེའི་སྤྲུལ་སྐུ་འམ་སྐྱེ་བ་ཡིན་སྙམ་པའི་ཀུན་བཏགས་སམ་སྒྲོ་བཏགས་ཀྱི་བདག་རེད།
ལ་ལའི་བྱ་སྤྱོད་ལ་བལྟས་ན་ང་དེ་ལ་བརྟེན་ནས་མགོ་འཕང་བཏེགས་ནས་སྤོབས་པ་བྱེད་ཅིང་ང་དང་ངའི་གོང་མའི་ཐོབ་ཐང་ལ་རྩོད་པ་བརྒྱབ་ཀྱི་ཡོད། ཁོང་ཚོ་སྐྱེ་བ་ལེན་པ་དང་ངོས་འཛིན་བྱས་པ་ནི་ཐོབ་ཐང་གི་ཆེད་དུ་ཡིན་པ་རེད་འདུག ངོས་འཛིན་མཁན་གྱི་མི་ངོ་དང་། རྒྱུ་ངོ་། དཔོན་ངོ་དང་། དབང་ངོ་ཁོ་ན་ལ་བསྟུན་པ་ལས། སངས་རྒྱས་ཀྱི་དགོངས་པ་དང་མ་བསྟུན་པས། རང་ཉིད་སངས་རྒྱས་བསྟན་པ་ལག་རྩེད་རྩེ་མཁན་ཞིག་དང་། ངོས་བཟུང་ནས་མིང་བཏགས་པའི་བུ་དེ་ཡང་བསྟན་པ་མི་ཤེས་པའི་བསྟན་འཛིན། བསྟན་པ་བཤིག་པའི་གཏེ་བོ་ཞིག་སྐྱེད་བསྲིང་བྱས་ཡོད། དེར་བརྟེན་སྤྲུལ་སྐུའི་ལམ་ལུགས་ལ་ཞིབ་བཤེར་བྱེད་དགོས་ལ། ཐེར་འདོན་ཡང་བྱ་དགོས་པའི་དུས་ལ་སླེབས་ཡོད། རྒྱུ་མཚན་ནི་ལོ་རྒྱུས་ཐོག་དང་། ད་ལྟའི་དུས་སུའང་སྤྲུལ་སྐུ་ནི་བདེན་རྫུན་འཐབ་རྩོད་ཀྱི་གཞིར་གྱུར་ཡོད་པ་རེད། དཔེར་ན་རྨུ་ཐག་ཐོག་ ༢༠༠༦ ལོར་མདོ་སྨད་དུ་སྤྲུལ་སྐུའི་ཁྲི་འཕྲོག་རེས་ཀྱི་དོན་རྐྱེན་ཞིག་ཐོན་འདུག ཕྱོགས་ཀ་པ་དང་ཕྱོགས་ཁ་པའི་བར་བདེན་རྫུན་གྱི་འཐབ་རྩོད་བྱས་མཐར་རྒྱུ་ནོར་གྱི་རྒྱབ་དཔུང་ཞན་པ་ཀ་པ་ཁྲི་ལས་ཕབ་ནས། འབྱོར་པའི་དཔུང་ལྡན་ཁ་པར་ཁྲིར་འཁོད། དེ་ཡང་ཀ་པ་ཆང་དུག་གིས་དཀྲོང་རྗེས་ཁ་པ་ཁྲིར་འཁོད་པའི་གནས་ཚུལ་བཀོད་པ་ལྟ་བུ་རེད།
གཞན་ཡང་ཁ་ཤས་ལ་བལྟས་ན་གཡག་ལུག་ར་ཕག་གི་གཏམ་རྒྱུད་ལས། ལར་དེང་སང་ཡར་འགྲོ་བའི་འདྲེན་པར་རློམ་པ། སྟེང་ན་བླ་བྲེས་ཕུབ། འོག་ན་འབོལ་གདན་བརྩེགས། བར་སྐུ་གོས་དར་གྱིས་བཀླུབས་པའི་བླ་མ་ཆེ་ཆེ་མོ་དང་། གོ་ས་མཐོ་མཐོ་མོ་རྣམས་དང་། སྐྱེ་བ་རེ་བླངས་གིན་ཇེ་སྡུག་ཇེ་ངན་དུ་འགྲོ་བའི་སྤྲུལ་བའི་སྐུ་དང་། མར་ལུང་ལྕོག་རེ་ན་དགོན་ཆུང་རེ་བདག་བྱས། ཚེ་མ་ཕྱིད་པ་རྡོག་པོ་ཁ་ཤས་ཀྱི་མཐའ་བརྟེན། ངན་དཔང་ཅུང་ཟད་རེ་ཡོད་པའི་བླ་ཟོབ་ཁོག་ཆོས་བརྒྱད་ཀྱི་གང་བ་འདི། ཕལ་མོ་ཆེ་འབྱོར་ལྡན་གྱི་མི་ནག་བླུན་པོ་དག་གིས་མདུན་ནས་པུས་མོ་བཙུགས། ཐལ་མོ་སྦྱར། སངས་རྒྱས་ལྟ་བུའི་ཆོས་མཐོང་བྱས་པས་ལང་ལ་ཤོར། རྒྱུ་ནོིར་དངོས་གཙང་ཕྲན་བུ་རེ་འབུལ་བ་ལ་ཐུགས་གཏིང་ནས་དགྱེས་པའི་འཛུམ་ཞལ་ལྷུག་པར་སྟོན་ཞིང་། ལྟོ་སྐྱ་གོས་ཧྲུལ་གྱི་ཆོས་པ་མཁས་བཙུན་བཟང་གསུམ་འཛོམས་པ་ཞིག་གིས་མདུན་ནས། ཕྱག་གྱང་འགྱེལ་བ་ལྟར་འཚལ་གྱིན་འདུག་ཀྱང་། ལྟས་རྒྱུས་སྒྲེང་སྦྲེང་། མགོ་བོ་སྒྱེད་སྒྱེད། འགྱིང་སྟབས་ཡོར་ཡོར་བྱེད། ཕྱག་དབང་མི་ཡོང་བ། སྤྱན་ཟུར་མི་གཟིགས་པ། གསུང་ལན་མི་ཁུག་པ་ཞིག་ལ། ཀུན་གྱིས་བཟང་བཟང་མོར་བསྒོམ། སྨོན་སྨོན་མོ་བྱེད། ཅེས་གསུངས་པ་ལྟར་ཆགས་མི་འདུག་གམ།
བོད་དབུས་གཙང་ཁུལ་སོགས་བོད་ལྗོངས་སྲིད་འཛིན་གྱི་ཁོངས་སུ་སྤྲུལ་སྐུ་ངོས་འཛིན་སྲིད་ཇུས་གུ་དོག་པས། སྤྲུལ་སྐུ་ཅུང་ཉུང་བ་ལས། གཞན་མཚོ་སྔོན། ཟི་ཁྲོན། ཀན་སུའུ་སོགས་སུ་སྤྲུལ་སྐུ་ཧ་ཅང་མང་ལ་ཕྱི་རྒྱལ་ལ་ཡང་ཧ་ཅང་མང་བས་ཉིས་ཟློས། གསུམ་ཟློས། བཞིས་ཟློས་སོགས་མང་བས་བདེན་རྫུན་གྱི་རྣམ་གཞག་ཀྱང་དར་ཡོད་ལ། རྩོད་གླེང་ཀྱང་ཧ་ཅང་ཆེ། དེར་བརྟེན། དམུ་ཐག་དུས་དེབ་ལས། སྟོད་ཀྱི་སྡེ་དགེར་བླ་སྤྲུལ་རྫུན་མས་གང་། མདོ་ཁམས་བླ་རྫུན་རྣམ་ཤེས་རྒྱ་མོས་འཕྲོག ཅེས་པ་ལྟར་ད་ལྟ་རྒྱལ་ཁབ་ཕྱི་ནང་གང་སར་དངུལ་གྱི་ཆེད་དུ་རང་ཉིད་དྲིལ་བསྒྲག་བྱེད་བཞིན་པའི་སྤྲུལ་སྐུ་རྫུན་མ་ཚོ་དང་། རྒྱལ་ཁབ་ཕྱི་ནང་དུ་གྲོང་དང་གྲོང་ཁྱེར་གྱི་རྒྱ་སྲང་ཉུལ་ཞིང་སྦྱིན་བདག་ལ་ངོ་དགའ་དང་མགོ་བསྐོར་གཏོང་བར་དགའ་བ་དང་། ཆོས་ལ་དད་ཀྱང་ཡག་ཉེས་མི་ཤེས་པའི་འབྲོག་ཁུལ་ལ་འཁྱམས་ནས་འཆལ་རྒྱུག་སོགས་གང་བྱུང་ཅི་དྲན་བྱས་ནས་སངས་རྒྱས་ཀྱི་བསྟན་པའི་ཞབས་འདྲེན་དང་། ནང་བསྟན་ལོག་ལམ་ལ་འདྲེན་མཁན་དུ་གྱུར་མི་འདུག་གམ། ང་ཚོས་སངས་རྒྱས་བསྟན་པ་དང་བོད་མི་རིགས་ལ་དངོས་ཤུགས་རྒྱུད་གསུམ་ནས་ཕན་ཐོགས་མཁན་གྱི་སྤྲུལ་སྐུ་དང་། བསྟན་པ་དང་བོད་མི་རིགས་ལ་དངོས་ཤུགས་བརྒྱུུད་གསུམ་ནས་གནོད་སྐྱེལ་མཁན་གྱི་སྤྲུལ་རྫུན་གྱི་བྱ་སྤྱོད་ཀྱི་དབྱེ་བ་ཤེས་དགོས།
སྤྱིར་བླ་མ་མི་ལས་གྲུབ་པ་དང་གཏོར་མ་སྤག་ལས་གྲུབ་པའི་དཔེར་ཡིན་པས། མང་ཚོགས་ཚོས་རིག་པ་དྭངས་གསལ་གྱིས་ཟོག་རྫུན་དང་། སྤྲུལ་རྫུན་གྱི་དབང་དུ་མི་འགྲོ་བ་དང་། སྤྲུལ་སྐུར་ལྡན་དགོས་པའི་མཚན་ཉིད་དང་། ལྡན་མི་དགོས་པའི་མཚན་ཉིད་ཤེས་པ་དང་། བསྟན་པའི་དགོངས་ངོ་མ་ངོ་ཤེས་པའི་སྒོ་ནས་ཡིན་མིན་དབྱེ་འབྱེད་དང་། དེ་མཚུངས་ང་ཚོས་སྤྲུལ་སྐུའི་ལམ་ལུགས་ཀྱི་དྲང་ཕྱོགས་ཀྱི་དགེ་མཚན་དང་། ལྡོག་ཕྱོགས་ཀྱི་སྐྱོན་ཆ་ལ་ངོས་འཛིན་ཐོབ་པས་དབྱེ་འབྱེད་དང་ཞིབ་འཇུག་ཏན་ཏིག་བྱེད་དགོས། རྒྱུ་མཚན་སྤྲུལ་སྐུའི་ལམ་ལུགས་ནི་གང་བྱུང་དེ་དྲན་ཞིག་མ་ཡིན་པར་ཐུན་མིན་གྱི་རིག་གནས་ཤིག་ཡིན་པས་རེད། ལོ་རྒྱུས་ནས་ད་ལྟའི་འཚོ་བའི་བར་བལྟས་ན་སྤྲུལ་སྐུ་ཇེ་མང་དང་ཇེ་མང་རེད། ནང་བསྟན་ལ་ཕན་ཐོགས་མཁན་དང་། སྐྱེ་འགྲོར་ལམ་སྟོན་བྱེད་མཁན་ཇེ་ཉུང་དང་ཇེ་ཉུང་རེད། བསྟན་ཤིག་ཇེ་མང་དང་ཇེ་མང་རེད། དེར་བརྟེན་གྲགས་པའི་རྗེས་སུ་མ་འབྲངས་པར་བརྟག་དཔྱད་བྱེད་དགོས། ང་ཚོར་ཡང་དག་པའི་ལམ་སྟོན་ཞིག་དགོས་པ་ལས། མགོ་སྐོར་བསླུ་བྲིད་མི་བུ་སངས་རྒྱས་སུ་བརྫུས་མ་ཞིག་གཏན་ནས་མི་དགོས་པ་རེད། ང་ཚོར་ཡང་དག་པ་ཞིག་དགོས་པ་ལས་མི་ངོ་རྒྱུ་ངོ་དབང་ངོ་ལས་བྱུང་བའི་རྫུན་མ་མགོ་བསྐོར་མཁན་ཞབས་འདྲེན་པ་ཞིག་མི་དགོས་པས་རེད། ལ་ལས་བོད་ཀྱི་སྤྲུལ་སྐུའི་ལམ་ལུགས་རྩ་མེད་གཏོང་དགོས་ཞེས་སེར་སྐྱ་གཉིས་ཀ་ནས་སྐད་འབོད་བྱེད་ཀྱིན་ཡོད་ལ། ཤར་ཕྱོགས་རྒྱ་བརྒྱུད་ནང་པ་དང་། ལྷོ་བརྒྱུད་ནང་པར་སྤྲུལ་སྐུ་མེད་ཀྱང་ནང་ཆོས་རྒྱུན་འཛིན་ཐུབ་ཡོད་ཚུལ་དང་། ང་ཚོང་ཡང་དེ་ལྟར་ཡོང་ཐུབ་ལུགས་ཀྱི་གཏན་ཚིགས་ཀྱང་གླེང་ཡོད། འོན་ཀྱང་ཤར་ལྷོའི་བརྒྱུད་པ་དེ་གཉིས་དང་ང་ཚོ་ནང་བསྟན་ཡིན་པ་འདྲ་ནའང་། མི་རིགས་ཀྱི་གནས་སྟངས་སྤྱི་དང་། ད་ལྟའི་ང་ཚོའི་ཕྱི་ནང་གི་གནས་སྟངས་གཉིས་གནམ་ས་ལྟར་ཁྱད་ཡོད་པ་ཤེས་དགོས། ང་ཚོས་ངེས་པར་དུ་ཡང་དག་དང་ཡང་དག་མ་ཡིན་པ་དང་ཚད་ལྡན་དང་རྫུན་མའི་དབྱེ་བ་ཕྱེ་དགོས་ལ། ཡང་དག་ཚད་ལྡན་ལ་བརྩི་བཀུར་དང་། རྫུན་མ་ཞབས་འདྲེན་རིགས་ལ་དགག་རྒྱག་བྱ་དགོས། རིམ་པས་རྫུན་མའི་རིགས་གཏན་ནས་མི་འབྱུང་བའི་ཐབས་ལམ་འཚོལ་དགོས། ཆེ་ཕྲ་སུ་ཡིན་རུང་མི་ངོ་རྒྱུ་ངོ་དབང་ངོ་བལྟས་པའི་སྐྱུག་བྲོ་བའི་བྱ་སྤྱོད་ལ་ཐེར་འདོན་སོགས་དགག་སྒྲུབ་ཏན་ཏིག་བྱ་དགོས་ལ། འདི་ནི་ནང་བསྟན་ཡུན་གནས་དང་དྭངས་གཙང་གི་ཐབས་ཡིན་པ་ཤེས་དགོས།། །།

ངའི་གོ་བ་དང་ཤེས་ཚད་སྐྱོ་བོ་ཡིན་ཤས་ཆེ། ཆབ་བྲག་ལྷ་མོ་སྐྱབས་ཟེར་བའི་སྐད་གྲགས་ཅན་དེས་ཅི་ཞིག་བཤད་ཀྱི་ཡོད་པ། ངས་ཐེངས་ཤས་བཀླགས་ཀྱང་དོན་གོ་མ་སོང་། ཕལ་ཆེར་ཁོང་གིས་ཧྥ་རིན་སིའི་སྐད་གསུང་གི་ཡོད་ས་རེད།

རིག་པ་འདོན་པ་ལགས། སྐུ་ཞབས་ཞོགས་དུང་ལགས་ཀྱིས་བོད་ཡར་ལངས་དགོས་ན་རྒྱ་དང་བླ་མའི་འོག་ལས་ཐར་དགོས་ཞེས་བཤད་ཡོད དེ་ལ་ཡང་རྒྱུ་མཚན་ཆེན་པོ་འདུག
དེ་འདྲའི་བླ་མ་ཞེས་པ་དེ་དེང་སང་གི་སྤྲུལ་སྐུ་རྣམས་ལ་གོ་དགོས
དེང་སང་སྤྲུལ་སྐུ་ཕལ་མོ་ཆེས་མཛད་སྤྱོད་རེ་གཟིགས་དང་བོད་ཀྱི་སྤྱི་ཚོགས་ལ་ཕན་གནོད་ག་རེ་འདུག བོད་ནང་གྲྭ་རྐྱངས་དང་མི་སེར་དཀྱུས་མ་རྣམས་ཀྱིས་བསྟན་སྲིད་དོན་རང་སྲོག་འབེན་ལ་གཙུགས་ནས་མི་རིགས་ཀྱི་འཐབ་རྩོད་བྱེད་བཞིན་ཡོད་ བལྟོས་དང་བླ་ཆེན་རྣམས་ཀྱི་མིང་ཐོགས་རྣམས་ཕལ་ཆེར་རྒྱ་དགའ་ཡིན ཕལ་ཆེར་རྒྱ་དཔོན་ཡིན ཕལ་ཆེར་རྒྱ་མའི་ལས་བྱེད་ཡིན ཁོང་རྣམས་ནི་སྤྱི་དོན་ལས་རང་དོན་གལ་ཆེ བདེན་མིན་གཟིགས་པར་ཞུ།།།།།

ཟིན་བྲིས་རིན་ཐང་ཅན་འདི་ལ་རྒྱབ་སྐྱོར་དང་ཡི་རངས་ཡོད།
གལ་སྲིད་སྤྲུལ་སྐུའི་ལམ་ལུགས་དེར་འགྱུར་བ་ཞིག་མ་གཏང་བ་ཡིན་ན་མ་འོངས་བར་སངས་རྒྱས་ཀྱི་བསྟན་པ་ཡུན་རིང་དུ་གནས་མི་ཐུབ་པ་མིག་མཐོང་ལག་ཟིན་དུ་མཐོང་གི་འདུག་ལ། ནང་བསྟན་ཆོས་ལུགས་ཀྱི་སྦྱངས་འབྲས་མེད་པའི་སྤྲུལ་མིང་སྐམ་པོ་དག་བསྟན་པ་དང་འགྲོ་བ་མིའི་དགྲ་བོ་ལས་གྲོགས་སུ་མཐོང་གི་མི་འདུག

གསལ་ལེ་རྒྱལ་གྱིས་བཤད་བྱུང་ངོ་མ་དགོད་སྦྱད་རེད ། རྣམ་ཤེས་ཡོད་པའི་མི་ཞིག་ཡིན་ཕྱིན་ཡང་སྲིད་མེད་མཁན་གཅིག་ཀྱང་ཡོད་ནི་མ་རེད ། ཁྱོད་ཀྱི་ཨ་མ་ཡང་སྲིད་ཡིན་པ་མ་ཟད་གསལ་ལེ་རྒྱལ་ཁྱེད་ཀྱང་སྐྱེ་བ་སྔ་མའི་ཡང་སྲིད ། མདོར་བསྡུས་ན་ཡང་སྲིད་ཡོད་ན་བླ་མ་ཡིན་པའི་མ་ཁྱབ་པ་བཞིན་ཡང་སྲིད་དུ་འོས་ན་འང་བླ་མ་ཡིན་པའི་མ་ཁྱབ་པ་ཡིན་ནོ །

སྤྲུལ་སྐུའི་ལམ་ལུགས་ཀྱིས་སྐྱེ་བ་སྔ་ཕྱི་ཡོད་པར་སྒྲུབ་པ་ལ་ཕན་ཐོགས་མི་འདུག་གེ སྐྱེ་བ་སྔ་ཕྱི་མི་འདོད་མཁན་ཅིག་གིས་སྤྲུལ་སྐོར་ལ་བྱུས་གཏོགས་མ་བྱས་ན་མི་མཛེས་སམ། དགེའོ། །

༄༅།།དམ་པའི་རྣམ་ཐར་ཕལ་པའི་ཡུལ་མིན་ཞིང། །མཁས་པ་དགྱེས་པའི་ཚིག་སྦྱོར་མི་ཤེས་ཀྱང་། །དེང་དུས་ཕལ་ཆེར་བླ་མའི་སྐྱོན་གླེང་སྐབས། །ཡོན་ཏན་གང་ཤེས་བརྗོད་པའང་སྐལ་བ་བཟང། །རྗེ་བཙུན་ངག་དབང་བྱམས་པའི་གསུང།

རྒྱ་གར་པཎ་གྲུབ་ཚོ་ནས་འོངས་བའི་ནང་བསྟན་གཤའ་མ་ཞིག་ཡིན་ན། སྤྲུལ་སྐུའི་ལམ་ལུགས་འདི་གཏན་གཅོད་བྱ་དགོས།

དངོས་གནས་མ་འདས་སྤྲུལ་སྐུ་ངོས་འཛིན་ཐུབ་ན་ཡག་པོ་ཡོང་ས་རེད།

རྩོམ་པ་པོ་ལ་གསལ་བཤད་བྱ་རྒྱུ་ཞིག་ལ།ཁྱོད་ནང་བཞིན་བོད་མི་མང་པོ་ཞིག་གིས་བོད་ཀྱི་སྤྲུལ་སྐུ་ལམ་ལུགས་དེ་ནི་ཐོག་མར་ཀརྨ་པཀྵི་ནས་འགོ་བརྩམས་པར་འདོད་མོད།ཞིབ་ཏུ་ལོ་རྒྱུས་ལ་དཔྱད་ཚེ།སྤྲུལ་སྐུ་ལམ་ལུགས་དེ་ནི་བཀའ་གདམས་པའི་ཁྲོད་དུ་ཐོག་མར་དར་བ་ཞིག་ཡིན།དཔལ་ལྡན་ཨ་ཏི་ཤ་བོད་དུ་ཕེབས་དུས་སྤྱན་རས་གཟིགས་སྐོར་གྱི་ཆོ་ག་སྣ་ཚོགས་སྤེལ་ཅིང་རང་གི་སྲས་འབྲོམ་སྟོན་གང་དེའི་སྤྲུལ་བར་ངོས་བཟུང་ཡོད།དེར་མ་ཟད།ཁྲོ་ཕུ་ལོ་ཙྭ་བ་བྱམས་པའི་དཔལ་(1172-1236)གྱི་རང་རྣམ་ཁྲོད་དུའང་སྤྲུལ་སྐུ་མེ་ཏྲི་རྣལ་འབྱོར་དང་སྤྲུལ་སྐུ་བེ་ཁ་ཡ་དེ་ཝ་ཞེས་བརྗོད་འདུགང་ཚོས་གདེང་ཚོད་ཡོད་པའི་སྒོ་ནས་བཤད་ཆོག་པ་ཞིག་ནི་འཁོན་བུ་ཆོས་ཀྱི་རྒྱ་མཚོས་(1069-1144)རང་ཉིད་ནི་ནག་ཚོའི་སྤྲུལ་བ་ཡིན་པར་བཞེད་པ་དང་།གཞན་ཡང་བཀའ་གདམས་ཁྲོད་དུ་སྒྱེར་གཞོན་ནུ་འབྱུང་གནས་ནི་བྱང་ཆུབ་སེམས་དཔའི་རྣམ་སྤྲུལ་དང་བྱ་ཡུལ་པ་ཆེན་པོའི་(1075-1138)སྤྲུལ་བར་ངོས་བཟུང་ཡོད།

ངོས་འཛིན་ལམ་ལུགས་ཡང་དག་པའི་སྤྲུལ་སྐུའི་རྒྱུན་ད་དུང་དགོས་ངེས་རེད། གང་ཡིན་ཞེ་ན་བོད་ཀྱི་སྤྲུལ་སྐུའི་ལམ་ལུགས་ཡང་དག་པའི་འོག་ཁ་བ་གངས་ཅན་པའི་ཆོས་སྲིད་རིག་གསུམ་ལ་བྱས་རྗེས་རབ་དང་རིམ་པ་ཡོད་ལ། མ་ཟད་སྤྱི་ཚོགས་ཀྱི་རྒྱན་ཏུའང་གྲུབ་མྱོང་། ཡིན་ན་ཡང་ངོས་འཛིན་ལམ་ལུགས་ལ་ངེས་པར་བསྒྱུར་བཅོས་དགོས་ངེས་རེད། དེང་དུས་ཚད་ལྡན་གྱི་བླ་མ་རེ་ངོས་འཛིན་བྱས་རྗེ་དེ་ལ་ཁ་གཏོད་ཀྱི་སྤྲུལ་འཛིན་རེ་བརྫུས་ནས་རྒྱལ་བསྟན་ལ་གནོས་གཞི་ཚད་ལ་བརྒལ་བ་ཐེབས་ཀྱིན་ཡོད་པ་རེད། སྔོན་མ་ཡིན་ན་བླ་མ་གཅིག་ལ་སྐུ་གསུང་ཐུགས་གསུམ་སོགས་ཀྱིས་སྤྲུལ་སྐུ་མང་པོ་བྱོན་པ་དང་། དེ་དག་གིས་ཀྱང་གཅིག་གྱུར་དང་མཉམ་ལས་ཀྱིས་རྒྱལ་བསྟན་ལ་ཞབས་ཞུ་སྤེས་ལེགས་བྱེད་ཡོད་པ་རེད། དེང་དུས་སུ་གཅིག་སྤྲུལ་སྐུ་དང་གཅིག་ཏེ་ལ་ཁ་གཏོད་གཅོག་བྱེད་ཀྱི་ལག་ཆ་རུ་འགྱུར་གྱིན་ཡོད་ལ། མ་འོང་པ་དེ་རིགས་ཀྱིས་རྒྱལ་བསྟན་ལ་གང་བྱེད་ཚོད་དཔགས་ཐུབ་ངེས་རེད། དེས་ན་ངོས་འཛིན་བྱེད་མཁན་བླ་མ་རྣམས་ཀྱིས་ཐུགས་གཟབ་གནང་དགོས་ཀྱི་དེ་བས་ཀྱང་གལ་ཆེན་རེད། དཔེར་ན་དེང་སྐབས་སྤྲུལ་སྐུ་གཅིག་ལ་ཀརྨ་པས་གཅིག་ངོས་འཛིན་བྱས། ས་སྐྱ་གོང་མས་གཅིག་ངོས་འཛིན་བྱས། སྟག་ལུང་རྩེ་སྤྲུལ་གྱིས་གཅིག་ངོས་འཛིན་བྱས་རྗེས་གོང་མ་གཅིག་ལ་ཡང་སྤྲུལ་གསུམ་ཏུ་གྱུར་ནས་ དེ་གསུམ་ལ་སྐུ་སྒེར་ཡིག་ཚང་ནས་སོགས་ནས་ལག་ཁྱེར་གང་རྫིགས་རེ་སྤྲད་ངེས་པ་དང་། གསུམ་པོ་ང་ཆེ་ང་བཙན་གྱིས་གཅིག་གཅིག་ལ་འདྲན་སེམས་དང་ཕྲག་ཐོག་ཁོ་ནས་ཉིན་མཚན་དུས་འདའ་བར་བྱེད་པ་ཆོས་ཉིད་དུ་གྲུབ་འདུག་པས་ངོས་འཛིན་མཁན་རྣམས་ཀྱིས་བསམ་གཞིག་གནང་གལ། ཡིན་ན་ཡང་ངོས་འཛིན་མཁན་རྣམས་ཀྱིས་དྲ་བ་འདི་རིགས་གཟིགས་ཀྱིན་ཡོད་མེད་མི་ཤེས།

རྩོམ་ཡིག་གང་འདྲ་ཆགས་ཡོད་མེད་མི་ཤེས་ཀྱང་། གསེར་བུམ་དཀྲུག་འདོན་སྐོར་རྒྱ་ནག་གི་ཡིག་ཆའི་འདྲ་བཤུས་ཇི་བཞིན་བཀོད་པ་ལྟར་དྲངས་འདུག་པ་རྩོམ་པ་པོར་མཁྱེན་པ་རྒྱས་དྲགས་ནས་ཡིན་ནམ། ཡང་ན་སྐར་ལྔའི་དར་དམར་འོག་དེ་གོམས་ལོབ་དུ་གྱུར་བས་ཡིན་མིན་གང་ལྟར་ཡང་།

མན་ཇུའི་གོང་མ་ཆན་ལུང་གིས་ ༡༧༩༣ ལོར་རང་གི་རྩ་བའི་བླ་མར་རྩ་ཚིག་དོན་ཚན་ཉེར་དགུ་ཡོད་པའི་བསམ་འཆར་ཕུལ་བར་བོད་གཞུང་གིས་སྙིགས་དོར་བཅུད་ལེན་བྱས་ཡོད་ཅིང༌། དེའི་ནང་གསེར་བུམ་དཀྲུགས་འདོན་གྱིས་ཡང་སྲིད་ངོས་འཛིན་ཐད། མཐའ་གཅིག་ཏུ་དེ་བརྒྱུད་ངོས་འཛིན་བྱེད་དགོས་པར་ངོས་ལེན་བྱས་མེད་པ་གསལ་བོ་ཡིན་ལ། དེ་ནི་རང་ཕྱོགས་ཀྱི་ལོ་རྒྱུས་བཞེད་ཕྱོགས་ཀྱང་ཡིན། སྐབས་དེར་གསེར་བུམ་མ་བརྒྱུད་པའི་དཔེ་མཚོན་གཅིག་ནི་ྋགོང་ས་བཅུ་བཞི་པ་ཆེན་པོ་མཆོག་ཡིན།

གང་ལྟར་འདི་འདྲའི་རིགས་འབྲི་དུས་གཟབ་ནན་བྱེད་གལ་ཆེ་བར་བསམས།

ལོ་ངོ་བརྒྱད་བརྒྱའི་རིང་ལ་མུ་མཐུད་ནས་བྱུང་ཡོང་བའི་ལམ་ལུགས་ཞིག་མཇུག་སྒྲིལ་རྒྱུ་ལས་སླ་བོ་ཞིག་ག་ལ་ཡིན། ལྷག་པར་དུ་རྩོམ་འདིའི་མཇུག་བསྐྱངས་མ་ཚར་གོང་ལྷབ་ལྷབ་བདེན་ཁ་སྤྲོད་མཁན་དག་ནི། མི་རིགས་འདིའི་སྤྱི་དོན་ལ་བསམ་གཞིགས་ཅི་ཙམ་བྱས་ཡོད་མེད་ཐད་ནས་ཚད་འཇལ་ཙམ་བྱས་རུང་ཧ་ཅང་ཡང་མོའི་གྲས་རེད། ནམ་རྒྱུན་དུ་ནས་འདི་འདྲའི་རྗེས་འདེད་མཁན་མི་རེ་གཉིས་ཞིག་མ་རེད། གང་མང་མང་འདུག་ན་མནོ་བསམ་ཅུང་ཙམ་རེ་བཏང་ནས་མཆན་འདེབས་པའི་རེ་བ་ཡོད། དང་པོ། གཅིག་གི་རྗེས་ཀྱི་གཉིས་དང་གསུམ་དེ་ལས་མང་བོ་ཡོངས་སུ་ཐོབ་གྲངས་མཚུངས་རྟགས་ཅན་གྱི་སྤྱི་འགྲོས་ཞིག་སྤྱད་ནས་རྩིས་བརྒྱབས་ཚེ། ཉི་མ་ནམ་ཤར་ལ་སྤྱི་སྡོམ་རྩིས་གཞི་ལས་ལོགས་སུ་འགྱུར་གཟུགས་ཞིག་ཐོབ་ཐབས་ཡོད་བ་མ་རེད། གཉིས་བ། བྱམས་དང་བརྩེ་བས་སྐྱོངས་མཁན་བླ་སྤྲུལ་གང་དེའི་རྗེས་ན་དད་པའི་སྤུ་ལོང་གཡོ་བའི་མང་མང་གི་སེམས་རྒྱུད་ལ་བྱམས་དང་སྙིང་རྗེ་ཡི་ས་བོན་བསྐུན་ཀྱིན་པ་ནི་ཅིས་ཀྱང་དགའ་འོས་བའི་ལས་དོན་རང་སྟེ། ནམ་ཡང་གངས་ཅན་བོད་ཀྱི་བདེ་སྡུག་ཆེད་སྐུ་ཚེ་ཡུན་ནས་རིང་དུ་བརྟན་ཅིང་བྱོན་པར་སྨོན། གསུམ་པ། རྩོམ་འདིའི་བརྗོད་གཞིའི་ཆ་ནས་དེ་སྔོན་སྤྲུལ་སྐུ་ངོས་འཛིན་བྱེད་ཐད་ནས་མན་ཇུའི་ལག་པ་གཡོ་ཐབས་ཀྱིས་བསྲིངས་ནས་སྲིད་དོན་ལ་འབྱར་བདེ་རུ་བཏང་བའི་གནས་སྟངས་འདི་རིགས་ཀྱི་རྒྱུད་ད་ལྟའི་དུས་སུ་ཡང་འབྱུང་དང་འབྱུང་ཀྱིན་ལྟར་བསམ་གཞིགས་ཡང་ནས་བསྐྱར་དུ་མི་བྱེད་ཐབས་མེད་རེད། ད་ཐེངས་འདི་ཙམ་བྱས་་་་་

སྤྲུལ་སྐུའི་ལམ་ལུགས་འདི་རྩ་གཅོད་བྱེད་ཐུབ་ན་ཆོས་རྨོངས་པ་ཚོས་བསམ་ཞིག་ཤེས་ན་ཐེངས། སྤྲུལ་སྐུ་འདི་མི་རིགས་ཀྱི་དཔལ་འབྱོར་གྱི་ཅུང་གཞི་ངོ་མ་ཞིག་རེད། ཚང་མའི་བསམ་ཤེས་རེ་བྱེད་ཐུབ་ན་ཅི་མ་རུང་། བསམ་ཚུལ་སྤེལ་བ་དགའ་བསུ་ལས་འོས་མེད།

ཏག་ཏག་རེད རྗེས་ཕྱོགས་སྤྲུལ་སྐུ་དངོས་རྫུན་གཉིས་ཀ་གཅིག་ཀྱང་འཁྲུངས་རྒྱུ་མེད་པའི་སྨོན་ལམ།
ཡིག་སྒྱུར་པས་དངོས་གནས་ཡག་པོ་བསྒྱུར་འདུག་་་་་དགའ་བསུ་དང་བསྔགས་བརྗོད་བྱེད་ཀྱིན་ཡོད།