གྲྭ་པ་གཉིས་ལ་ཁྲིམས་ཐག་བཅད།

ཁ་སང་འབར་ཁམས་འབྲིང་རིམ་མི་དམངས་ཁྲིམས་ཁང་གིས་རྔ་པ་ཀིརྟི་དགོན་པའི་གྲྭ་ཚེ་རིང་བསྟན་འཛིན་ལ་ལོ་ ༡༣ དང་གྲྭ་ཚེ་འཇམ་ལ་ལོ་ ༡༠ ཡི་ཁྲིམས་ཐག་བཅད་འདུག

ཁ་སང་ཕྱི་ཚེས་ ༣༠ ཉིན་ཡང་བསྐྱར་རྔ་པ་རང་སྐྱོང་ཁུལ་འབར་ཁམས་འབྲིང་རིམ་མི་དམངས་ཁྲིམས་ཁང་གིས་རྔ་པ་ཀིརྟི་དགོན་པའི་གྲྭ་བློ་བཟང་བསྟན་འཛིན་ནམ་མིང་གཞན་ལ (བསྟན་འཛིན་རྒྱ་མོ་ཁ)ལགས་ལ་གྲྭ་ཕུན་ཚོགས་ལགས་ཀྱི་གསོད་མཁན་གྱི་ལག་རོགས་ཡིན་པའི་ཉེས་མིང་བཀལ་ཏེ་ལོ་ ༡༣ གྱི་དུས་བཀག་བཙོན་འཇུག་དང་། ལོ་ ༣ གྱི་ཆབ་སྲིད་དབང་ཆ་འཕྲོག་ཡོད་པ་དང་། ཀིརྟི་དགོན་པའི་གྲྭ་བློ་བཟང་བསྟན་འཛིན་ནམ་མིང་གཞན་ལ་(ནག་བསྟན) ལགས་སུ་ལོ་ ༡༠ བཙོན་འཇུག་དང་ཆབ་སྲིད་ཁེ་དབང་ལོ་ ༢ བཅས་ཀྱི་ཁྲིམས་ཐག་བཅད་ཡོད་འདུག

ཐེངས་འདིར་ཁྲིམས་ཐག་བཅད་ཟིན་པའི་རྔ་པ་ཀིརྟི་དགོན་པའི་རང་ལོ་ ༢༢ ཡིན་པའི་གྲྭ་བློ་བཟང་བསྟན་འཛིན་ནམ་(བསྟན་འཛིན་རྒྱ་མོ་ཁ)ལགས་ནི། རྔ་པ་རྫོང་གཅའ་ཞང་ཕྱུགས་ལས་འགབ་མའི་བློ་བཀྲ་ཚང་གི་ཡིན་འདུག་ལ།  རང་ལོ་ ༢༡ ཡིན་པའི་གྲྭ་བློ་བཟང་བསྟན་འཛིན་ནམ་མིང་གཞན་ལ་(ནག་བསྟན་) ལགས་ནི། རྔ་པ་རྫོང་གཅའ་ཞང་ནག་ཚང་མའི་པདྨ་ཚང་གི་ཡིན་འདུག  ཁ་སང་འབར་ཁམས་རྫོང་མི་དམངས་ཁྲིམས་ཁང་གིས་ཁོང་གཉིས་ལ་ཁྲིམས་གཅོད་སྐབས་གཞུང་ཕྱོགས་ཀྱི་གོ་སྒྲིག་བྱས་པའི་ཁྲིམས་རྩོད་པ་ལས་ནང་མིར་ཁྲིམས་རྩོད་གླ་རྒྱུའི་ཐོབ་ཐང་སྤྲད་མེད་སྟབས། ཁོང་གིས་ཐེངས་འདིར་རྒྱ་ནག་གཞུང་གིས་ཁོང་ལ་བཀལ་བའི་ནག་ཉེས་ལ་ངོས་ལེན་རྩ་བ་ནས་བྱེད་ཐབས་མེད་སྐོར་བརྗོད་ཡོད་འདུག  

གནས་ཚུལ་མཁོ་གཏོང་བ། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་།