ད་ལྟའི་ཆར་བཙན་བྱོལ་བོད་མིའི་ས་གནས་ཁག་ཏུ་སྤེལ་བཞིན་པའི་སྙན་ངག་སྒྲོག་སྦྱང་འགྲན་བསྡུར་བྱ་འགུལ་དང་འབྲེལ་བའི་ཐོག་ནས། བྱ་འགུལ་གོ་སྒྲིག་པ་ཤིན་བཟའ་རིན་པོ་ཆེ་མཆོག་ལ་བཅར་འདྲི་ཞུས་ཡོད།
དྲི་བ། ཐོག་མར་རིན་པོ་ཆེ་མཆོག་གིས་གོ་སྒྲིག་འོག་ཉེ་ཆར་མགོ་འཛུགས་གནང་ཟིན་པའི་སྙན་ངག་སྒྲོག་སྦྱོང་གི་འགྲན་བསྡུར་དེ་ད་ལྟ་རིམ་པ་ག་འདྲ་ཞིག་ལ་སླེབས་ཡོད་མེད་ངོ་སྤྲོད་ཅིག་གནང་རོགས།
ལན། ད་ལྟ་སྙན་ངག་སྒྲོག་སྦྱོང་གི་སྔོན་འགྲོའི་རིམ་པ་དེ་སོང་ཚར་བ་རེད། འགྲན་བསྡུར་ས་ཁུལ་ཁག་ ༨ ནས་ཁྱོན་བསྡོམས་འགྲན་ཞུགས་པ་མི་ ༢༡༣ བྱུང་བའི་ནང་དངོས་གཞིའི་འགྲན་ཞུགས་ཁྲོད་མི་ ༩༨ འདེམས་ཐོན་བྱུང་ཡོད། དངོས་གཞིའི་འགྲན་བསྡུར་རིམ་པ་དེ་ཕྱི་ཟླ་ ༩ པའི་ནང་ལྷོ་ཕྱོགས་ནས་མགོ་བཙུགས་ཏེ་འགྲན་བསྡུར་གནང་གཏན་ཁེལ་ཡོད། ཚེས་ ༡༣ ཉིན་ལྷོ་ཕྱོགས་མོན་གྷོ་དང་སྤེལ་ཀོབ་གཉིས་ཀྱི་འགྲན་ཞུགས་པ་རྣམས་མཉམ་དུ་སྦེལ་ཀོབ་ས་གནས་སུ་འགྲན་བསྡུར་དང་། ཚེས་ ༡༨ ཉིན་མཱ་སུ་རི་བོད་ཁྱིམ་སློབ་གྲྭ་དང་བོད་གཞུང་གཏན་སློབ། ར་ཇི་པུར་སློབ་གྲྭ། ས་སྐྱ་མཐོ་སློབ་བཅས་ཀྱི་འགྲན་ཞུགས་པ་རྣམས་མ་སུ་རི་འཛོམས་ཏེ་འགྲན་བསྡུར་གནང་རྒྱུ་དང་། ཚེས་ ༢༡ ཉིན་ཝར་ཎ་མཐོ་སློབ་ཀྱི་འགྲན་ཞུགས་པ་རྣམས་སློབ་གྲྭ་རང་དུ་འགྲན་བསྡུར་གནང་རྒྱུ། ཚེས་ ༢༥ ཉིན་ངྷ་རམ་ས་ལའི་ཉེ་འཁོར་སློབ་གྲྭ་ཁག་དང་། ས་རཱ་མཐོ་སློབ། གྷོ་པ་པུར། སུ་ཇཱ་སློབ་གྲྭ་བཅས་ཀྱི་འགྲན་ཞུགས་པ་རྣམས་ངྷ་སར་བསྡུས་ཏེ་འགྲན་བསྡུར་གནང་གཏན་འཁེལ་ཡོད།
དྲི་བ། བཙན་བྱོལ་སྤྱི་ཚོགས་ནང་གཞི་རྒྱ་ཆེ་བའི་སྙན་ངག་སྒྲོག་སྦྱོང་འགྲན་བསྡུར་འདི་འདྲ་ཞིག་སྤེལ་དགོས་པའི་རྒྱུ་མཚན་དང་དམིགས་ཡུལ་གཙོ་བོ་གང་ཡིན་ནམ།
ལན། སྙན་ངག་གྱེར་འདོན་གྱི་བྱ་འགུལ་འདི་སྤེལ་དགོས་པར་རྒྱུ་མཚན་ཁ་ཤས་ཤིག་ཡོད། རྒྱུ་མཚན་གཙོ་བོ་དེ་ཕྱི་ལོ་ ༢༠༡༠ ལོར་བོད་ནང་སློབ་མས་ཡར་ལངས་བྱུང་པ་ནས་བཟུང་། བཙན་བྱོལ་སྤྱི་ཚོགས་ནང་དུའང་སོ་སོའི་སྐད་ཡིག་དང་རིག་གཞུང་དེ་གལ་ཆེན་ཡིན་པའི་ངོས་འཛིན་ཞིག་དང་། དེ་བཞིན་གཞུང་དང་མི་མང་། གཞུང་འབྲེལ་མ་ཡིན་པའི་ཚོགས་པ་ཚང་མའི་ངོས་ནས་དོ་སྣང་ཞིག་བསླེབས་ཏེ་གཡོ་འགུལ་ཤུགས་ཆེན་པོ་ཞིག་སླེབས་མགོ་བརྩམས་ཡོད་པ་རེད། རྒྱུ་མཚན་གཉིས་པ་དེ་ཀུ་ཤུ་རྟགས་ཅན་གྱི་ལག་འཁྱེར་ཁ་པར་དང་། རྩིས་འཁོར་སོགས་ཀྱི་ནང་ལ་ཐད་ཀར་བོད་ཡིག་བཞག་ཡོད་པ་དེ་ཡིས་ཕན་ཚུན་ལ་འཕྲིན་ཐུང་གཏོང་བ་དང་། ལྷག་པར་དུ་ངོ་དེབ་དང་བོད་ཡིག་གི་དྲ་རྒྱ་མང་པོ་ཞིག་རིམ་པས་ཐོན་ཡོང་དུས། གཞོན་སྐྱེས་མང་པོ་ཞིག་གིས་བོད་ཡིག་ལ་དང་དོད་བྱ་རྒྱུའི་འདུན་པ་གསར་བ་ཞིག་སླེབ་བཞིན་འདུག དེ་ལྟའི་དུས་སྐབས་འདིར་སོ་སོའི་སྐད་ཡིག་དང་རིག་གནས་སྲུང་སྐྱོབ་ཀྱི་ལས་འགུལ་སྤེལ་ན། སྤྱི་ཚོགས་ཀྱི་གནས་བབ་ཐད་ནས་ཀྱང་འཕྱི་མ་དྲག་པ་དང་སྔ་མེད་པའི་དུས་ཚོད་ཏག་ཏག་ཅིག་མཐོང་གི་འདུག དེར་བརྟེན། སྡིངས་ཆ་རང་བཞིན་གྱི་སྙན་ངག་སྒྲོག་སྦྱོང་གི་ལས་འགུལ་འདི་སྤེལ་བ་ཡིན་ན། སོ་སོའི་འཇོན་ཚོད་ཀྱི་ངོས་ནས་ཀྱང་ཏག་ཏག་ཅིག་ཡོང་ཐུབ་ཀྱིན་འདུག་བསམ་སྟེ་ལས་འགུལ་འདི་སྤེལ་མགོ་བརྩམས་པ་ཡིན།
དྲི་བ། སྙན་ངག་གྱེར་འདོན་མཚོན་པའི་སྒྱུ་རྩལ་རྩོམ་རིག་གི་བྱ་འགུལ་རིགས་ནི། སྐུ་ཉིད་ཀྱི་ངོས་ནས་མི་རིགས་ཀྱི་འཐབ་བརྩོད་ལས་དོན་ཁྲོད་གལ་འགངས་ཆེ་ཆུང་ག་ཚོད་ཅིག་གཟིགས་ཀྱི་ཡོད་དམ།
ལན། ད་ལྟའི་ཆ་ལ་ང་ཚོའི་ངོས་ནས་སྙན་ངག་གྱེར་འདོན་གྱི་ལས་འགུལ་འདི་འདྲ་ཞིག་སྤེལ་བ་རེད། མ་གཞི་སོ་སོའི་སྐད་ཡིག་སྲུང་སྐྱོབ་ཐད་ད་དུང་སྒྱུ་རྩལ་རང་བཞིན་གྱི་ལས་འགུལ་སྤེལ་རྒྱུ་མང་པོ་ཞིག་ཡོད་པ་རེད་བསམ་གྱི་འདུག ཡིན་ནའང་། གོང་དུ་ཞུས་པ་བཞིན་ལས་འགུལ་འདི་འདྲ་ཞིག་སྤེལ་བ་ཡིན་ན་འགྲོ་སོང་དང་གང་ཅིའི་ཐད་ནས་ཡོང་ས་རེད་བསམ་སྟེ་ང་ཚོས་ངོས་ནས་སོ་སོའི་གང་འཇོན་པ་དེ་བདམས་པ་རེད། སྤྱིར་འཛམ་གླིང་སྤྱིའི་འགྲོ་སྟངས་ལ་བལྟས་པ་ཡིན་ནའང་། རྒྱལ་ཁབ་མང་པོ་ཞིག་གི་འཐབ་རྩོད་ལས་འགུལ་ཁྲོད་དུའང་སྙན་ངག་གྱེར་འདོན་གྱི་ལམ་ནས། རྩོམ་པ་པོའི་སེམས་ཁམས་དེ་མི་མང་གི་ཁྲོད་དུ་བརྒྱུད་སྒྲོག་བྱེད་པ་སོགས་མང་པོ་བྱུང་ཡོད་པ་རེད། ལས་འགུལ་འདི་རིགས་ཧ་ཅང་གལ་ཆེན་པོར་མཐོང་གི་འདུག ད་ལྟའི་ཆར་ང་ཚོའི་སྤྱི་ཚོགས་འདི་རྒྱལ་ཁབ་མེད་པ་དང་ལུང་པ་མེད་པ་ཞིག་ཆགས་བསྡད་ཡོད་དུས། སོ་སོའི་ལུང་པའི་འཐབ་རྩོད་དེ་གལ་ཆེ་ཤོས་ཆགས་བསྡད་ཡོད་པ་རེད། དེར་བརྟེན་རིག་གཞུང་སྲུང་སྐྱོབ་དང་མཉམ་དུ་སོ་སོའི་འཐབ་བརྩོད་ཀྱི་བརྒྱུད་རིམ་ལའང་ཕན་ཐོག་ལྡན་པའི་ཐབས་ཤེས་རིགས་འདེམས་དགོས་པ་རེད། དེ་ལྟར་བྱས་ན་ང་ཚོའི་སྤྱི་ཚོགས་ཀྱི་འཐབ་རྩོད་རང་བཞིན་ལའང་སྔར་ལས་ལྷག་པའི་ཕན་ནུས་ཤིག་ཏན་ཏན་ཡོང་གི་རེད་བསམ། ལྷག་པར་དུ་སོ་སོའི་སེམས་ཤུགས་འཕེལ་བ་དང་། མི་རིགས་ཀྱི་ལ་རྒྱ་དང་ཞེན་ཁོག་ཡོང་ཐབས་ཀྱི་རྩོམ་ཡིག་མང་པོ་ཞིག་མདོ་དབུས་ཁམས་གསུམ་གྱི་སྐད་གདངས་ཐོག་མི་མང་ཁྲོད་བརྒྱུད་བསྒྲགས་བྱ་ཐུབ་པ་ཡིན་ན། ཚང་མ་མཉམ་རུབ་ཡོང་ཐབས་སོགས་ཕྱོགས་མང་པོ་ཞིག་ལ་ཕན་ཐོག་ཡོང་གི་རེད།
དྲི་བ། སྐུ་ཉིད་ཀྱི་གཟིགས་ཚུལ་ལ་བཙན་བྱོལ་བོད་མིའི་སྤྱི་ཚོགས་ཁྲོད་སྒྱུ་རྩལ་རྩོམ་རིག་གི་གནས་བབ་དེ་ད་ལྟའི་ཆར་གནས་སྟངས་ག་འདྲ་ཞིག་ལ་མཐོང་གི་ཡོད་དམ།
ལན། ཚད་འདི་འདྲ་ཞིག་རེད་ཟེར་ནས་བཤད་ཡ་ཁག་པོ་རེད། ཡིན་ནའང་། ད་ལྟ་ང་ཚོས་སྤེལ་བཞིན་པའི་བྱ་འགུལ་འདི་བརྒྱུད་དེ་བལྟས་བ་ཡིན་ན། གཞོན་སྐྱེས་མང་པོ་ཞིག་གི་སེམས་ནང་དུ་རང་ཚོད་ཀྱི་ལས་དོན་ཞིག་སྒྲུབ་དགོས་ཀྱི་འདུག་བསམ་པའི་འདུན་པ་ཡོད་བསྡད་པ་དེ་ཐག་ཆོད་རེད། རང་གི་སྐད་ཡིག་དང་འབྲེལ་བའི་ལས་འགུལ་གང་འདྲ་ཞིག་གོ་སྒྲིག་བྱས་པ་ཡིན་ནའང་། ད་ལྟ་གཞོན་སྐྱེས་མང་པོ་འཛུལ་ཞུགས་ཡོང་མིན་ཐད་སེམས་ཁྲལ་ཆེན་པོ་མི་འདུག སྔོན་མ་ཡིན་ན་སྡིངས་ཆ་ག་འདྲ་ཞིག་བསྐྲུན་པ་ཡིན་ནའང་མདུན་ལ་འཐོན་རྒྱུའི་བློ་ཁོག་ཡོད་པ་མ་རེད། ད་ལྟ་དུས་རབས་ཀྱི་འགྱུར་འགྲོས་དང་ཕྱོགས་མང་པོ་ཞིག་གི་དབང་གིས་མི་མང་བྱ་འགུལ་ཁྲོད་རང་མོས་འཛུལ་ཞུགས་གནང་གི་འདུག ད་ལྟའི་ཆར་ང་ཚོས་སྒྲུབ་ཐུབ་པའི་སྒྱུ་རྩལ་རང་བཞིན་གྱི་ལས་འགུལ་རིགས་མང་པོ་ཡོད་པ་རེད། བོད་རང་གི་སྐད་ཡིག་གི་ཐོག་ནས་སྙན་ངག་གྱེར་འདོན་དང་བཞད་གར། ཁ་ཤགས། མཚར་གཏམ། དེ་བཞིན་གླུ་དང་གཞས་སོགས་འཁྲབ་སྟོན་གྱི་རིགས་མང་པོ་ཡོད་པ་རེད། འདི་དག་ཡོད་ཚད་ང་ཚོས་སྒྲུབ་ཐུབ་པ་ཡིན་ན། མི་མང་གི་ངོས་ནས་སྔར་ལས་ལྷག་པའི་དོ་སྣང་དང་མཉམ་ཞུགས་ཡོང་གི་རེད།
དྲི་བ། བོད་ཀྱི་སྐད་ཡིག་སྲུང་སྐྱོབ་དང་འབྲེལ་བའི་ལས་དོན་ཐད་མི་སྒེར་སོ་སོའི་ལས་འགུལ་ཙམ་མ་ཡིན་པར། བཙན་བྱོལ་བོད་མིའི་དབུས་སྒྲིག་འཛུགས་ཀྱི་ངོས་ནས་སྒྲུབ་དགོས་པའི་ལས་དོན་གང་དག་མཐོང་གི་ཡོད།
ལན། ང་ཚོ་བཙན་བྱོལ་སློབ་གྲྭ་ཁག་ནང་སོ་སོའི་སྐད་ཡིག་གི་གནས་བབ་ཐད་ངེས་པར་བསྒྱུར་བཅོས་ཤིག་གཏོང་དགོས་ཀྱི་འདུག འདིའི་ཐད་ཉམས་མྱོང་ཡོད་མཁན་གྱི་དགེ་རྒན་མང་པོར་གོ་བསྡུར་དང་། ལྷག་པར་དུ་བོད་ནང་གི་བསླབ་དེབ་མང་པོ་ཞིག་ལ་ཟུར་ལྟ་བྱས་ཏེ་སློབ་ཕྲུག་ཚོས་སོ་སོའི་སྐད་ཡིག་ལ་དོ་སྣང་ཡོང་ཐུབ་པ་ཞིག་བཟོ་དགོས་ཀྱི་འདུག ད་ལྟ་ང་ཚོས་སྐད་ཡིག་ཡར་རྒྱས་ཆེད་ཁོར་ཡུག་བསྐྲུན་ཡོད་ལབ་ཀྱི་ཡོད་པ་རེད། ཡིན་ནའང་། ཁ་ནས་ཁོར་ཡུག་སྐྲུན་ཡོད་ལབ་པ་ཙམ་མ་ཡིན་པར་བྱིས་པ་ཚོས་སོ་སོའི་སྐད་ཡིག་སྒང་ལ་ཕྱོགས་གང་དག་ནས་དོ་སྣང་ཡོང་གི་ཡོད་མེད་ངེས་པར་དུ་ཚོར་དགོས་ཀྱི་འདུག དཔེར་ན་རི་མོ་ཡོད་པའི་བྱིས་པའི་ཀློག་དེབ་མང་པོ་དང་། དེ་བཞིན་བསླབ་དེབ་ཀྱི་རིགས་ཡིན་ནའང་བྱིས་པ་ཚོས་གོ་བདེ་བ་དང་སེམས་ལ་འཇགས་ཐུབ་པ་ཞིག དེ་བཞིན་སློབ་མ་རྣམས་ལ་ནང་ཆོས་ཀྱི་སྐད་ཆ་མཐོན་པོའི་རིགས་མ་ཡིན་པར་གོ་སླ་བའི་གནས་ལུགས་བཤད་དེ་བསླབ་བྱ་རྒྱག་དགོས་ཀྱི་འདུག དེ་ལྟར་ཐབས་ཤེས་སྣ་མང་སྤྱད་དེ་བྱིས་པ་རྣམས་རང་གི་རྒྱལ་ཁབ་དང་མི་རིགས་ལ་ཤ་ཞེན་ཡོད་པ་ཞིག་བཟོ་དགོས་རྒྱུ་དེ་གལ་ཆེན་པོ་རེད། ང་ཚོའི་བཙན་བྱོལ་སྤྱི་ཚོགས་ནང་འདིའི་ཐད་ནས་འཇོན་མེད་པ་དེ་གསལ་བོ་རེད། ད་ལྟའི་ཆར་ང་ཚོའི་སློབ་གྲྭ་ཁག་ནང་བོད་ནས་སླེབས་མཁན་རྣམས་མ་གཏོགས། བཙན་བྱོལ་རང་དུ་འཚར་ལོངས་བྱུང་མཁན་བྱིས་པ་ཚོའི་ཁྲོད་བོད་རང་གི་སྐད་ཡིག་ལ་དོ་སྣང་ཡོད་མཁན་ཧ་ལམ་དཀོན་པོ་རེད། གནས་སྟངས་འདིས་ང་ཚོས་བྱིས་པར་ཁོར་ཡུག་བསྐྲུན་ཕྱོགས་ཐད་འཐུས་ཤོར་ཆེན་པོ་ཕྱིན་ཡོད་པ་གསལ་སྟོན་བྱས་ཡོད། གཞོན་སྐྱེས་ཚོར་སོ་སོའི་སྐད་ཡིག་གི་རྨང་གཞི་བརྟན་པོ་ཡོད་པའི་ཐོག་ནས། གཞན་པའི་སྐད་ཡིག་སྦྱང་པ་ཡིན་ན་རང་བཞིན་གྱིས་བསམ་བློའི་གོ་རྟོགས་དང་མི་རིགས་ཀྱི་བློ་སྟོབས་ཤིག་སླེབས་ཡོང་གི་རེད། བོད་ནང་གི་གཞོན་སྐྱེས་ཚོར་སྙིང་སྟོབས་དང་ལངས་ཕྱོགས་བརྟན་པོ་ཞིག་ཆགས་འདུག་པ་དེའང་སོ་སོའི་སྐད་ཡིག་གི་རྨང་གཞི་ཡོད་པས་རྐྱེན་གྱིས་རེད། ང་ཚོ་བཙན་བྱོལ་གཞོན་སྐྱེས་ཚོར་བོད་ཡིག་དང་དབྱིན་ཡིག་གཉིས་ཆར་ཏག་ཏག་ཅིག་ཡོང་ཐུབ་ཀྱི་མེད་པ་དེའང་། གཙོ་བོ་རང་གི་སྐད་ཡིག་ལ་རྨང་གཞི་བརྟན་པོ་མེད་པས་རེད།
དྲི་བ། ཐེངས་འདིར་སྙན་ངག་སྒྲོག་སྦྱོང་གི་ལས་འགུལ་འདི་སྤེལ་བའི་བརྒྱུད་རིམ་ཁྲོད་བློ་ཕམ་དང་དཀའ་ངལ་རིགས་གང་དག་འཕྲད་སོང་ངམ།
ལན། ང་ཚོའི་སྤྱི་ཚོགས་ནང་ཆབ་སྲིད་དང་རིག་གཞུང་གང་གི་སྒང་ལ་ཡིན་ནའང་མཉམ་རུབ་གནང་དགོས་རྒྱུ་དེ་གལ་ཆེན་པོ་རེད། ལས་འགུལ་འདིའི་ཐད་ཤེས་རིག་དང་ཆོས་རིག་ལས་ཁུངས་གཉིས་ཀྱི་ངོས་ནས་རྒྱབ་གཉེར་མཐུན་འགྱུར་དང་། དེ་བཞིན་མི་མང་གིས་ངོས་ནས་ཀྱང་ཁ་ཞེ་གཉིས་མེད་ཀྱི་རྒྱབ་སྐྱོར་ཆེན་པོ་གནང་སོང་། མ་འོངས་པར་ཡང་སྐད་ཡིག་གི་ལས་འགུལ་དང་གཞན་པའི་ལས་འགུལ་གང་ཡིན་ཡང་། མུ་མཐུད་མཉམ་རུབ་གནང་དགོས་པ་དེ་གལ་ཆེན་པོ་རེད། ཐེངས་འདིའི་བརྒྱུད་རིམ་ཁྲོད་དཀའ་ངལ་གཙོ་བོ་དེ་སློབ་གྲྭ་ཁག་དང་དགོན་སྡེ་ཁག་ནང་འཛུལ་ཞུགས་བྱེད་མཁན་མང་པོ་མ་རག་པ་དང་། དེ་བཞིན་སློབ་གྲྭ་ཁག་ཁ་ཤས་ནང་འགན་འཛིན་དང་དགེ་རྒན་རྣམས་ལ་དེ་འདྲའི་དོ་སྣང་ཆེན་པོ་མེད་པའི་ཚོར་སྣང་བྱུང་། འདིའི་ཐད་ང་རང་ལ་མཚོན་ན་བློ་ཕམ་བྱུང་། མ་གཞི་ང་ཚོ་བོད་པ་རང་གི་སྐད་ཡིག་གི་ཆེད་དུ་ལས་འགུལ་ག་རེ་སྤེལ་བཞིན་ཡོད་ན། དེར་སློབ་གྲྭའི་འགན་འཛིན་དང་དགེ་རྒན་རྣམས་མདུན་ལ་ཐོན་དེ་རྒྱབ་སྐྱོར་བྱ་དགོས་པ་ཞིག་ཆགས་ཡོད་པ་རེད་དྲན་གྱི་འདུག སློབ་གྲྭ་ཁག་གི་འགན་འཛིན་དང་དགེ་རྒན་རྣམས་ལ་སོ་སོའི་སྐད་ཡིག་སྲུང་སྐྱོབ་ཐད་འགན་ཆེན་པོ་ཡོད་སྟབས། སོ་སོའི་ཕྲག་སྟེང་ལ་བབ་ཡོད་པའི་འགན་དེར་བདག་པོ་རྒྱག་རོགས་ཞེས་ཞུ་འདོད་བྱུང་སོང་།
དྲི་བ། བཙན་བྱོལ་སྤྱི་ཚོགས་ནང་ཆབ་སྲིད་ཀྱི་ངོ་བོ་གསལ་བའི་ལས་འགུལ་མ་གཏོགས། སྒྱུ་རྩལ་དང་འབྲེལ་བའི་ལས་འགུལ་གྱི་རིགས་ནི་བོད་མིའི་འཐབ་རྩོད་དང་འབྲེལ་བ་མེད་པ་ཞིག་ལ་ངོས་འཛིན་གནང་གི་མི་འདུག དེའི་ཐད་རིན་པོ་ཆེར་དགོངས་ཚུལ་ཅི་ཞིག་ཡོད།
ལན། སྤྱིར་སོ་སོའི་སྐད་ཡིག་ཐད་ནས་འཐབ་རྩོད་གནང་ཡོང་དུས། རང་བཞིན་གྱིས་མི་རིགས་ཀྱི་འཐབ་རྩོད་ཆགས་ཡོང་གི་ཡོད་པ་རེད། ད་ལྟ་ང་ཚོ་བཙན་བྱོལ་སྤྱི་ཚོགས་ནང་སྐད་འབོད་བྱེད་པ་དང་། ཟས་བཅད་ངོ་རྒོལ་བྱེད་པ་སོགས་ཆབ་སྲིད་ཀྱི་རྣམ་པ་ཁོ་ནའི་ཐོག་ལས་འགུལ་སྤེལ་བ་ཡིན་ན། དེ་ནི་མི་རིགས་ཀྱི་འཐབ་རྩོད་རང་བཞིན་གྱི་ལས་འགུལ་ཞིག་ལ་བརྩི་བཞིན་པ་ལས། གཞན་པའི་སྒྱུ་རྩལ་དང་སྐད་ཡིག་གི་ལས་འགུལ་སྤེལ་བ་ཡིན་ན་དེ་ཕྱོགས་གཞན་ཞིག་འཇོག་པའི་གནས་སྟངས་ཤིག་མཐོང་གི་འདུག དེ་ནི་སྐད་ཡིག་གི་གོ་རྟོག་མེད་པ་དང་སོ་སོར་ཤེས་ཡོན་གྱིས་མ་འདང་པའི་གནད་དོན་ཞིག་རེད་དྲན་གྱི་འདུག འཐབ་རྩོད་ཀྱི་ནང་ནས་ཤུགས་ཆེ་ཤོས་དང་རྣོ་ངར་ལྡན་ཤོས་དེ་སྐད་ཡིག་དང་རིག་གནས་ཀྱི་འཐབ་རྩོད་ཆགས་ཀྱི་ཡོད་པ་རེད། མི་རིགས་རང་ཉིད་ལ་སོ་སོ་སྐད་ཡིག་གི་མ་རྩ་ཡོད་པའི་སྒང་ནས་ཤེས་ཡོན་གྱི་འཐབ་རྩོད་གནང་བ་ཡིན་ན། ང་ཚོའི་འཐབ་རྩོད་དེ་ཧ་ཅང་རྣོན་པོ་ཆགས་ཡོང་གི་རེད། ད་ལྟའི་ཆར་བོད་ནང་དུ་འཐབ་རྩོད་ག་རེ་གནང་བ་ཡིན་ནའང་ནུས་པ་ཐོན་པ་དང་། འཆར་གཞི་ལྡན་པ་ཞིག་གནང་ཐུབ་ཀྱིན་ཡོད་པ་དེའང་གཙོ་བོ་ཤེས་ཡོན་ལ་ཐུག་ཡོད་པ་རེད། ང་ཚོ་བཙན་བྱོལ་ནང་མི་མང་པོར་ཤེས་ཡོན་གྱི་ཐད་དོ་སྣང་ཆེན་པོ་མེད་སྟབས། དེ་དང་འབྲེལ་བའི་ལས་འགུལ་སྤེལ་སྐབས་འཛུལ་ཞུགས་བྱེད་མཁན་མེད་པར་ལས་འགུལ་ཏག་ཏག་ཅིག་འགྲོ་མ་ཐུབ་པ་དང་། དེ་བཞིན་ལས་འགུལ་གང་ཞིག་སྤེལ་བ་ཡིན་ན་དེ་སྤྱི་ཚོགས་ཐོག་ཁྱབ་མ་ཐུབ་པའི་དཀའ་ངལ་མང་པོ་ཞིག་ཡོང་གི་འདུག ང་ཚོས་འདི་ལྟར་སྐད་ཡིག་གི་ལས་འགུལ་སྤེལ་དགོས་པ་དེའང་གཙོ་བོ་གཞོན་སྐྱེས་ཚོས་རང་གི་སྐད་ཡིག་དང་རིག་གཞུང་ཡག་པོ་ཞིག་ངོ་ཤེས་པའི་ཐོག་ནས། མ་འོངས་པར་སོ་སོའི་མི་རིགས་ཀྱི་ལ་རྒྱ་མ་དོར་བ་ཞིག་ཡོང་ཐུབ་ཆེད་ཡིན།
དྲི་བ། ཐེངས་འདིའི་སྙན་ངག་སྒྲོག་སྦྱོང་འགྲན་བསྡུར་གྱི་སྔོན་འགྲོའི་བརྒྱུད་རིམ་ཁྲོད་ནས། སྐུ་ཉིད་ལ་དམིགས་བསལ་གྱི་སེམས་ཚོར་ག་རེ་བྱུང་སོང།
ལན། སྙན་ངག་སྒྲོག་སྦྱོང་འགྲན་བསྡུར་འདི་ཐོག་མར་མགོ་བརྩམས་སྐབས། ང་ཚོའི་འཆར་གཞིར་འགྲན་ཞུགས་པ་མི་ ༡༠༠ ཙམ་བྱུང་ན་ཧ་ཅང་ཡག་པོ་རེད་བསམ་ཡོད། ཡིན་ནའང་། དངོས་སུ་འགྲན་བསྡུར་གནང་ཡོང་དུས་ང་ཚོའི་འཆར་གཞི་ལས་བརྒལ་ནས་མི་ ༢༠༠ ལྷག་མཉམ་ཞུགས་གནང་བ་འདིས། བཙན་བྱོལ་སྤྱི་ཚོགས་ནང་གི་གཞོན་སྐྱེས་མང་པོ་ཞིག་གིས་སོ་སོའི་སྐད་ཡིག་ལ་དང་དོད་དང་སློབ་སྦྱོང་གི་འདུན་པ་ཡོད་པ་དེ་མཚོན་གྱི་འདུག དེ་བཞིན་ལོ་ཚོད་ཀྱི་ཆ་ནས་ཀྱང་ཕལ་ཆེ་བ་གཞོན་སྐྱེས་དང་། ལྷག་པར་དུ་ལོ་ན་ཆུང་བའི་སློབ་ཕྲུག་དང་བྱིས་པ་མང་པོ་ཞིག་འཛུགས་ཞུགས་གནང་འདུག་པ་དེས་སོ་སོར་ཧ་ཅང་སེམས་འགུལ་ཐེབས་སོང་། གཞན་ཡང་། སྙན་ངག་གྱེར་གྱི་འདོན་སྐབས་སུ་འགྲན་ཞུགས་པ་ཁ་ཤས་ཀྱིས་སོ་སོའི་བྲིས་པའི་སྙན་ངག་གྱེར་འདོན་སྐབས་ཧ་ཅང་སྐྱོ་གདུང་གི་ཚོར་བ་རྣོན་པོ་ཐོན་པ་ལ་བརྟེན་ནས། བརྒྱ་ཆ་སྤྲོད་མཁན་དག་ཀྱང་མིག་ཆུ་ཐོན་པའི་གནས་ཚུལ་ཡང་བྱུང་ཡོད་པ་རེད། སྤྱི་ཡོངས་ཀྱི་ཆ་ནས་འདི་འདྲའི་གོ་སྐབས་ཤིག་བསྐྲུན་པ་ཙམ་གྱིས་ཀྱང་། མང་ཚོགས་ཁྲོད་སྔར་ལས་ལྷག་པར་སོ་སོའི་སྐད་ཡིག་ལ་དོ་སྣང་དང་སེམས་ཁུར་ཡོང་གི་ཡོད་པའི་ཚོར་བ་ཤུགས་ཆེན་པོ་བསླེབས་སོང་།
དྲི་བ། སྐུ་ཉིད་ཀྱིས་དྲ་རྒྱ་དོ་དམ་གྱི་ཕྱག་ལས་གནང་བཞིན་པའི་ཐད་ནས་བཙན་བྱོལ་སྤྱི་ཚོགས་ཁྲོད། དྲ་རྒྱ་ཁག་ནང་བོད་ཡིག་ཐོག་རྩོམ་ཡིག་སྤེལ་མཁན་གྱི་རྩོམ་པ་པོ་དག་གི་སོ་སོའི་སྤྱི་ཚོགས་ལ་དོ་ཁུར་གནང་དགོས་པ་གང་དག་གཟིགས་སོང་།
ལན། བཙན་བྱོལ་ནང་སྤྱིར་བཏང་དྲ་ཐོག་ཏུ་བོད་ཡིག་གི་སྒང་ནས་རྩོམ་ཡིག་སྤེལ་བཞིན་པ་དེ་ཧ་ཅང་ཡག་པོ་འདུག ང་རང་ཉིད་ཀྱང་དྲ་ཐོག་ཏུ་རྩོམ་ཡིག་འབྲི་མཁན་ཞིག་ཡིན་པའི་ཆ་ནས་རྗེས་སུ་ཡི་རངས་ཡོད། ཡིན་ནའང་། གཅིག་ནས་ད་ལྟའི་ང་ཚོའི་གནས་བབ་ཀྱི་ཐད་ནས་དྲ་རྒྱའི་ལེགས་ཆ་ལེན་དགོས་པ་རེད་མ་གཏོགས་མི་ལེགས་པའི་ཆ་དེ་ལེན་པའི་དུས་ཚོད་མ་རེད། ད་ལྟ་ང་ཚོར་སོ་སོའི་ལུང་པ་མེད་པར་གཞན་གྱི་ལུང་པར་སྐྱབས་བཅོལ་དུ་བསྡད་ཡོད་སྟབས། རྒྱལ་ཁབ་ཡོད་མཁན་ནང་བཞིན་གྱི་བསམ་བློ་ཁྱེར་ཏེ་རྩོམ་ཡིག་གང་བྱུང་བྲིས་ན་མི་འོས་པ་དེ་ཧ་གོ་དགོས་པ་རེད། གཉིས་ནས་མི་སྒེར་གྱི་འཁོན་སེམས་དང་ན་ཚའི་རིགས་ཀྱི་རྩོམ་ཡིག་མང་པོ་དྲ་རྒྱའི་སྟེང་སྤེལ་ཏེ། སྤྱི་ཚོགས་ལ་བརྡབ་གསིག་གཏོང་བཞིན་པའི་རིགས་དེ་ཡག་པོ་མི་འདུག ད་ལྟའི་ཆར་སྤྱི་ཚོགས་ནང་ང་ཚོ་མཉམ་རུབ་དང་མཐུན་སྒྲིལ་བྱེད་དགོས་པ་དེ་གལ་ཆེན་པོ་རེད། རྩོམ་ཡིག་སྤེལ་སྐབས་ཀྱང་སོ་སོའི་སྐད་ཡིག་དང་མི་རིགས་ཀྱི་ལ་རྒྱ་སོགས་ད་ལྟའི་གནས་བབ་དང་འཚམ་པའི་རྩོམ་ཡིག་མང་ཙམ་འབྲི་དགོས་ཀྱི་འདུག་བསམ་སོང་། གསུམ་ནས་གཞུང་ལ་སྐྱོན་བརྗོད་བྱེད་པ་དང་། དེ་བཞིན་ཕན་ཚུན་ལངས་ཕྱོགས་མ་མཐུན་པ་ཡིན་ན་རེད། གནས་ལུགས་རྒྱུ་མཚན་གསལ་བོ་ལབ་དགོས་ཀྱི་འདུག གསལ་ལ་མི་གསལ་བ་ཞིག་བྲིས་པ་ཡིན་ན་ཆབ་སྲིད་པ་རེ་འགས་ལག་ཆར་སྤྱད་དེ་སྤྱི་ཚོགས་ལ་བརྡབ་གསིག་གཏོང་ཉེན་འདུག སྤྱིར་ཆབ་སྲིད་ཀྱི་ཐོག་ནས་ལངས་ཕྱོགས་མ་མཐུན་པ་ཡོད་ནའང་སོ་སོའི་གཞུང་ལ་གུས་ཞབས་གནང་དགོས་པ་དེ་གལ་ཆེན་པོ་རེད།
གསར་འགོད་པ། ཚེ་རིང་རྒྱལ།
