༢༠༡༡ ལོའི་འཇིག་རྟེན་མཛེས་མ།

ཟླ་འདིའི་ཕྱི་ཚེས་ ༡༢ ཉིན་བྷར་ཛལ་ནང་ཚོགས་པའི་འཇིག་རྟེན་མཛེས་མའི་འགྲན་བསྡུར་ཐེངས་ ༦༠ པ་དེ་ཨན་གྷོ་ལཱ་རྒྱལ་ཁབ་ཀྱི་རང་ལོ་ ༢༥ སོན་པ་བུ་མོ་ལོ་པེས་(Leila Lopes) ཞེས་པར་ཐོབ་འདུག

༢༠༡༡ ལོའི་འཇིག་རྟེན་མཛེས་མའི་(Miss Universe)འགྲན་བསྡུར་ཐེངས་ ༦༠ པ་བྷར་ཛལ་གྱི་སན་པའོ་ལོ་(San Paolo)གྲོང་ཁྱེར་དུ་ཕྱི་ཟླ་ ༨ ནས་མགོ་འཛུགས་བྱས་ཡོད་ཅིང་། ཐེངས་འདིའི་འཇིག་རྟེན་མཛེས་མའི་འགྲན་བསྡུར་ཁྲོད་གླིང་ཆེན་བདུན་གྱི་རྒྱལ་ཁབ་ ༨༩ ཙམ་གྱི་མཛེས་མ་འཛུལ་ཞུགས་བྱས་ཡོད་འདུག་ལ། འགྲན་བསྡུར་གྱི་ཉིན་མཐའ་མའི་རྟིང་རྩོད་འགྲན་བསྡུར་ཐོག ཕྱི་ལོ་ ༢༠༡༡ ལོའི་འཇིག་རྟེན་མཛེས་མའི་དབུ་རྒྱན་དེ་ཨན་གྷོ་ལཱ་ཡི་བུ་མོ་ལོ་པེས་ལགས་ལ་ཐོབ་འདུག

མཛེས་མ་ལོ་པེས་ལགས་ཀྱིས་ “ངས་བྱིས་པ་ཉམ་ཐག་དང་རྒན་རྒོན། ཨེ་ཆི་ཨཡེ་ཝེ་(HIV) ནད་རིགས་སྔོན་འགོད་སོགས་ཚུད་པའི་སྤྱི་ཚོགས་ཀྱི་གནད་དོན་འདྲ་མིན་ཐོག་ལས་ཀ་བྱས་མྱོང་ཡོད་ལ། སོ་སོའི་རྒྱལ་ཁབ་ལ་ཕན་ཕྱིར་ལས་དོན་གང་ཡིན་ཡང་བསྒྲུབ་དགོས། འབྱུང་འགྱུར་འཇིག་རྟེན་མཛེས་མའི་མཚན་བྱང་ཐོག་སྔར་ལས་ལྷག་པའི་ལས་དོན་བསྒྲུབ་ཐུབ་ངེས་རེད་བསམ་གྱི་ཡོད། དམིགས་བསལ་ཨེ་ཆི་ཨཡེ་ཝེ་གནད་རིགས་ཀྱི་གནད་དོན་ཐད་ནུས་པ་འདོན་ཐུབ་པར་རེ་བ་འཛིན་གྱི་ཡོད། ”ཅེས་མཛེས་མའི་རྟིང་རྩོད་འགྲན་བསྡུར་སྐབས་སུ་བརྗོད་ཡོད་འདུག

མཛེས་མ་ལོ་པེས་ནི་ཨན་གྷོ་ལཱ་རྒྱལ་ཁབ་ཀྱི་འཇིག་རྟེན་མཛེས་མའི་རྒྱལ་ཁ་ཐོབ་མཁན་ཐོག་མ་དེ་ཆགས་ཡོད་འདུག ཨང་གཉིས་པ་ཐོབ་མཁན་ཡུཀ་རཱ་ནེ་(Ukraine) རྒྱལ་ཁབ་ཀྱི་རང་ལོ་ ༢༣ ཡིན་པ་མུ་བོ་ཨོ་ལེ་སེ་ལ་ཐོབ་ཡོད་པ་དང་།  ཨང་གསུམ་པ་བྷར་ཛལ་གྱི་པི་རེས་ཟེ་ལཱ་བཅས་ལ་ཐོབ་འདུག

ལྷོ་ཨ་ཧྥི་རི་ཀའི་མཚོ་ཁུལ་རྒྱལ་ཁབ་ཨན་གྷོ་ལཱ་ནི་མི་གྲངས་ས་ཡ་ ༡༨ ཙམ་ལས་གྲུབ་པའི་བརྒྱ་ཆ་ ༣༨ དབུལ་ཕོངས་ཡིན་ཞིང་། ཆ་སྙོམས་ཡུལ་མིའི་ཚེའི་རིང་ཚད་ཕོ་ལོ་ ༥༠ དང་མོ་ལོ་ ༥༣ ཡིན་འདུག ༢༠༠༢ ལོའི་གོང་དུ་མི་ལོ་ ༢༧ རིང་གི་རྒྱལ་ཁོངས་ཟིང་འཁྲུག་ཁྲོད་མི་ས་ཡ་གཅིག་མ་ཟིན་ཙམ་རྐྱེན་ལམ་དུ་ཕྱིན་ཡོད་འདུག

གསར་འགོད་པ། བནྡེ་སྐྱབས།