མདང་ནུབ་ཀྱི་ས་ཡོམ་སྐབས་སྒང་ཐོག་༼ སམ་བྷོ་ཊ་གཏན་སློབ ༽ ཀྱི་བོད་ཡིག་དགེ་རྒན་ཞིག་གི་མགོ་ལ་ཁང་པའི་སྟེང་གི་སོ་ཕག་ལྷུང་ཡོང་བ་ཕོག་སྟེ་རྨས་སྐྱོན་བཟོས་ཡོད་སྟབས། དེ་རིང་ཕྱི་དྲོར་སྒང་ཐོག་རྒྱ་གར་སྨན་ཁང་ནས་མྱུར་སྐྱོབ་མ་ཐུབ་པར་སྐུ་གྲོངས་ཡོད་འདུག
ད་ལྟ་རང་གནས་ཚུལ་འབྱོར་གསལ་ལྟར་ན། མདང་ནུབ་རྒྱ་གར་བྱང་ཤར་འབྲས་ལྗོངས་ཁུལ་དུ་ས་ཡོམ་ཤུགས་ཆེན་རྒྱག་སྐབས། གསར་དུ་གནས་སྤོར་བྱས་ཏེ་ཉིན་ ༡ ལས་འཛིན་གྲྭར་ཕེབས་ཐུབ་མེད་པའི་བོད་ཡིག་དགེ་རྒན་བློ་བཟང་སྤྱིན་པ་ཞུ་བ་ཞིག་གི་མགོ་ལ་ཁང་པའི་སྟེང་གི་སོ་ཕག་ལྷུང་ཡོང་བ་འཁེལ་ཏེ་རྨས་སྐྱོན་ཚབས་ཆེན་བཟོས་ཡོད་པ་དང་། སློབ་གྲྭའི་ལས་སྣེ་ཚོས་དེ་མ་ཐག་སྨན་ཁང་དུ་བསྐྱལ་ཡོད་ཀྱང་། ཀླད་པའི་ནང་དུ་ཁྲག་མང་པོ་ཤོར་བའི་དབང་གིས་སྨན་ཁང་གིས་མྱུར་སྐྱོབ་མ་ཐུབ་པར། དེ་རིང་ཉིན་རྒྱབ་ཆུ་ཚོད་ ༣ དང་ཕྱེད་ཀ་ཙམ་ལ་སྒང་ཐོག་རྒྱ་གར་སྨན་ཁང་ཞིག་ཏུ་སྐུ་གྲོངས་ཡོད་འདུག
གོང་གསལ་གནས་ཚུལ་སྐོར་སློབ་གྲྭ་དེ་གའི་དགེ་རྒན་བསོད་ནམས་རིན་ཆེན་ལགས་ཀྱིས་ངོ་སྤྲོད་གནང་བ་ལྟར་ན། སློབ་གྲྭར་ལས་ཤག་གི་མཐུན་རྐྱེན་འདང་མིན་གྱིས་དགེ་རྒན་ཚོ་ཕྱི་ལོགས་སུ་ཁང་པ་གླས་ཏེ་བསྡད་ཡོད་པ་དང་། མདང་ནུབ་ས་ཡོམ་བརྒྱབ་མ་ཐག་དགེ་བློ་བཟང་སྤྱིན་ལགས་ནང་ནས་ཕྱིར་འབྲོ་སྐབས། ཁང་བརྩེགས་བཞི་ཐོག་ནས་སོ་ཕག་ལྷུང་ཡོང་སྟེ་མགོ་ལ་ཕོག་ཡོད་པ་དང་། གནས་ཚུལ་དེ་ཐོས་མ་ཐག་སློབ་གྲྭའི་དགེ་ལས་ཚོས་རྒྱ་གར་སྨན་ཁང་དུ་བསྐྱལ་ཡང་ཀླད་པའི་ནང་ཁྲག་མང་པོ་ཤོར་ཏེ་སྐྱོབ་ཐུབ་མ་སོང་། འདས་པོ་ཁོང་ཉེ་ཆར་ཝ་ན་མཐོ་སློབ་ནས་ཨཅྱ་ཐོན་མཁན་ཞིག་ཡིན་ཞིང་། ནང་མི་མོན་རྟ་དབང་ཁུལ་དུ་ཡོད་འདུག ད་ཆར་ཁོང་གི་ནང་མི་ཚོར་ལན་བསྐྱལ་ཚར་ཡིན་ཟེར།
མདང་ནུབ་ས་ཡོམ་བརྒྱབ་རྗེས་སློབ་གྲྭའི་སློབ་ཕྲུག་ཡོང་ཕྱི་ལ་ཐོན་ཏེ་ཉེན་གཡོལ་བྱས་ཡོད་པ་དང་། ད་ཆར་སློབ་གྲྭའི་མདུན་ཐང་ཞིག་ཡོད་པ་དེར་གུར་བརྒྱབ་སྟེ་བསྡད་ཡོད་འདུག་ལ། སློབ་གྲྭའི་དགེ་ལས་གཞན་དང་སློབ་གྲྭའི་ཁང་པ་སོགས་ལ་གནོད་སྐྱོན་ཚབས་ཆེན་གང་ཡང་བྱུང་མི་འདུག་ཟེར།
གཞན། བོད་དང་རྒྱ་གར་གྱི་ས་མཚམས་ལ་ཆེན་ལ་ཆུང་དང་། རུམ་བཏེག་དགོན་པ་སོགས་སུ་གནོད་སྐྱོན་གང་འཚམ་ཕོག་ཏེ་མི་རེ་ཟུང་སྨན་ཁང་དུ་བསྐྱལ་འདུག་མོད། གནས་ཚུལ་ཞིབ་ཕྲ་ཤེས་མ་སོང་ཟེར།
༧༢༽ རྨིག་སྒྲ་ནས།
སྤྱི་ལོ་ ༢༠༡༡ ཟླ་ ༩ ཚེས་ ༡༧ གི་ཆུ་ཚོད་ ༥ སྐར་མ་ ༤༨
བོད་གཞུང་དགའ་ལྡན་ཕོ་བྲང་སྐབས་ཀྱི་མདོ་སྤྱི་ས་དབང་ཆེན་མོ་ལྷ་ཀླུ་ཚེ་དབང་རྡོ་རྗེ་མཆོག་དགོངས་པ་རྫོགས་ཡོད་པའི་གནས་ཚུལ།
༄༅༎བོད་གཞུང་དགའ་ལྡན་ཕོ་བྲང་སྐབས་ཀྱི་མདོ་སྤྱི་ས་དབང་ཆེན་མོ་ལྷ་ཀླུ་ཚེ་དབང་རྡོ་རྗེ་མཆོག་ཟླ་བ་འདི་ཕྱི་ཚེས་༡༤ རེས་གཟའ་ལྷག་པའི་ཉིན་དགུང་གྲངས་༩༧ ལ་ལྷ་ལྡན་དུ་དགོངས་པ་རྫོགས་ཡོད་པ་རེད།
ལྷ་ཀླུ་གཟིམ་ཤག་ཞེས་པ་ནི། རྒྱལ་བ་སྐུ་ཕྲེང་བརྒྱད་པ་འཁྲུངས་གཞིས་དང༌། རྒྱལ་བ་སྐུ་ཕྲེང་༡༢ པའི་ཡབ་གཞིས་ཟླ་སྒྲིལ་བཏང་བའི་སྐུ་ཕྲེང་གཉིས་ཀྱི་ཡབ་གཞིས་ཡིན་ཞིང༌། ལྷ་ཀླུ་ཚེ་དབང་རྡོ་རྗེ་མཆོག་གི་ཡབ་ནི་བོད་ཀྱི་ལོ་རྒྱུས་ནང་མཚན་སྙན་ཆེ་བའི་ལུང་ཤར་རྡོ་རྗེ་ཚེ་རྒྱལ་ཞུ་བ་དང་ཡུམ་བཤད་སྒྲའི་བོུ་དབྱངས་འཛོམས་ཚེ་རིང་ལགས་གཉིས་སུ་བོད་རང་བྱུང་༡༥ པའི་ཤིང་སྟག་༡༩༡༤ ལོའི་ཟླ་བ་༡༠ པའི་ཚེས་༡༥ ཉིན་རྒྱ་གར་རྡོ་རྗེ་གླིང་དུ་ལུང་ཤར་ཁྱིམ་རྒྱུད་དུ་འཁྲུངས་ཡོད་པ་རེད། བོད་རྒྱ་ནག་གཞུང་གིས་བཙན་འཛུལ་མ་བྱས་པ་བར་དུ་བོད་གཞུང་དགའ་ལྡན་ཕོ་བྲང་གི་ཞབས་རྗེ་ཞུས་ཡོད་པ་ནི། ཕྱི་༡༩༢༧ ལོར་དགུང་གྲངས་༡༤ ཕེབས་པའི་སྐབས། རྩིས་ཁང་དུ་གཞུང་ཞབས་ཞུས་ཏེ། གཞུང་ཞབས་ནང་ཐོག་མར་འགོ་བཙུགས་གནང་ཡོད་པ་དང༌། དེ་རྗེས། ༡༩༣༧ ལོར་དགུང་གྲངས་༢༤ ཕེབས་པའི་སྐབས། བཀའ་གྲོན་དང༌། ༡༩༤༡ ལོར་དགུང་གྲངས་༢༨ སྐབས་རྩིས་དཔོན་གནང་བ། དེ་རྗེས་༡༩༤༦ ལོར་དགུང་གྲངས་༣༣ སྐབས་བཀའ་བློན་གྱི་མཛད་འཁུར་བཞེས་ཏེ། བོད་ཀྱི་མདོ་སྨད་སྤྱི་ཁྱབ་གནང་བ་ཕེབས་ཡོད་པ་རེད། བོད་གཞུང་གིས་ལྷ་ཀླུ་ཚེ་དབང་རྡོ་རྗེ་མཚོག་བོད་ཤར་ཕྱོགས་ཆམ་མདོར་མདོ་སྨད་སྤྱི་ཁྱབ་ཏུ་བསྐོ་བཞག་གནང་བའི་རྗེས། རྒྱ་ནག་མི་དམངས་བཅིང་བགྲོལ་དམག་དཔུང་གིས། བོད་ཤར་ཕྱོགས་བརྒྱུད་ནས་བོད་ཐོག་བཙན་འཛུལ་མ་བྱས་བར་གྱི་༡༩༥༡ བར་དུ་མདོ་སྤྱི་གནང་ཡོད་ཅིང། ༡༩༥༥ ལོར་བོད་གཞུང་གི་སྐུ་ཚབ་ཚོགས་པའི་ལྷན་དུ་པེ་ཅིང་ཕེབས་པ་དང༌། ༡༩༥༩ ལོའི་བོད་མིའི་སྒེར་ལངས་སྐབས། རྒྱ་ནག་གུང་ཁྲན་ཏང་གིས་བོད་ལ་བཙན་འཛུལ་བྱེད་པར་ཁ་གཏད་གདོང་ལེན་གནང་བར་བརྟེན་ནས། རྒྱ་ནག་གཞུང་གིས་འཛིན་བཟུང་བྱས་ཏེ། འཐབ་འཛིངས་བཏང་བ་དང༌། གྲ་བཞི་བཙོན་ཁང་དུ་བཙོན་འཇུག་བྱས་པ། མཐར་སྤྱི་ཚོགས་ཐོག་གློད་བཀྲོལ་བཏང་ཡོད་ཀྱང་ཞྭ་མོ་ཡོད་པའི་གྲལ་རིམ་དུ་ངོས་འཛིན་བྱས་ཏེ། འཐབ་འཛིངས་བཏང་བ་དང་གླ་མེད་ཀྱི་ལས་ཀ་སྐུལ་དེད་བྱས་པ་སོགས་དཀའ་ངལ་ཆེན་པོ་བྱུང་ཡོད་པ་རེད།།
ཨོ་་་་བདེ་ཅན་ཞིང་དུ་སྐྱེ་བར་ཤོག སྐྱེ་མཐའ་འཆི་དང་འདུས་མཐའ་བྲལ། །བསགས་འཛད་མཐོ་ལྷུང་མཐའ་བཞིའོ། ཞེས་དྲངས་རྒྱུ་ཙམ་ལས་མ་འདས་སོ།
དགེ་རྒན་ཁོང་ལ་མྱ་ངན་གུས་འདུད་ཞུ་རྒྱུ་མ་ཟད། གཙང་ཕྲུག་སྟོབས་ལགས་ཀྱི་གསུང་པ་ལྟར་ལྷ་ཀླུ་ཚེ་དབང་རྡོ་རྗེ་མཆོག་ལ་མྱ་ངན་གུས་འདུད་དང་དེ་སྔ་ཁོང་གི་བོད་མི་རིགས་ཆེད་སྐུ་ལས་མང་པོ་སྐྱོན་པ་རྣམས་ལ་བཀའ་འདྲིན་རྗེས་དྲན་ཀྱང་ཞུ་དགོས་ངེས་ཡིན།
འདས་པོ་ཁོང་ངའི་སློབ་གྲོགས་ཡིན་པས་ངོ་མ་བློ་འགྱོད་ཆེ། ཁོང་ནི་གཞུང་དྲང་ཞིང་ཡ་རབས་ཚུལ་ལྡན་གྱི་ཕུལ་གི་མི་སྣ་ཞིག་ཡིན།།
མདང་དགོང་དུས་བབ་གསར་འགོད་པས་གུས་པར་ཁ་པར་བརྒྱུད་ནས་གནས་ཚུལ་རྣམས་དྲིས་པར་དངོས་ཡོད་ཁག་ཞུས་པ་ཡིན་མོད། ད་དུང་དེའི་ཁ་སྣོན་ལྟ་བུར་འདས་པོ་བློ་བཟང་སྦྱིན་པ་ནང་ནས་ཕྱི་ལ་འབྲོ་སྐབས་མཉམ་དུ་དགེ་རྒན་འཆི་མེད་ཚེ་རིང་ཡང་ཡོད་ལ། ཁོང་རང་མགོ་དང་རྐང་པ་སོགས་ལ་རྨས་སྐྱོན་བྱུང་ཡོད་ན་ཡང་ཚབས་ཆེན་དེ་འདྲ་རེད་མི་འདུག ད་ལན་གྱི་དོན་རྐྱེན་དེའི་ཐད་སྒང་ཏོག་ས་གནས་འགོ་འཛིན་དང་ལས་བྱེད་རྣམ་པ་སོགས་ནས་སློབ་གྲྭའི་དགེ་ལས་དང་མཉམ་རུབ་ཀྱིས་གཟིགས་རྟོགས་རོགས་རམ་གནང་དང་གནང་མུས་རེད།
བཙན་བྱོལ་ནང་གི་བོད་ཡིག་དགེ་རྒན་ཞིག་གྲོངས་པ་ནི། དབྱིན་ཡིག་དགེ་རྒན་འགའ་གྲོངས་པའི་རིན་ཐང་ལས་ཀྱང་ཆེ་བ་ཡོད་དེ། བོད་སྐད་དང་བོད་ཡིག་ནི་ང་ཚོའི་རྩ་དོན་རྩོད་བྱེད་ཀྱི་ལག་ཆ་གལ་ཆེན་དེ་ཡིན་པས་སོ། །བརྩེ་མེད་གདུག་རྩུབ་ཅན་གྱི་ས་འགུལ་དེ་ཡོང་སྐབས། ཁོ་བོ་བལ་ཡུལ་མཆོད་རྟེན་འགྲམ་གྱི་མཆོད་རྟེན་འགྲམ་གྱི་ཇ་ཁང་ཞིག་ཏུ་ཡོད། ས་འགུལ་དེས་མི་ཚོགས་རྦད་དེ་ཁ་གཏོར་ཞིང་། དེ་མ་ཐག་ཆོ་ངེ་དང་ཀུ་ཅོས་ཁོར་ཡུག་ཧྲིལ་པོ་ཡོངས་སུ་ཁེངས་སོང་བར་གཞིགས་ན། མི་ཚང་མས་གཤིན་རྗེའི་ཞགས་པ་རང་མགོར་བསྐོན་བཞིན་པའི་ཚོར་བ་ཞིག་གསོན་པོར་མྱང་ཡོད་པ་ལྟ་བུའི་འདུ་ཤེས་ཤིག་ཀྱང་བྱུང་སོང་།
རྩིས་དཔོན་ལུང་ཤར་ཟེར་བའི་མྱི་སྐད་གྲགས་ཅན་དེ་གོ་མྱོང་ཡོད་ཀྱང་ཁོང་གི་སྲས་ལྷ་ཀླུ་ཚེ་དབང་རྡོ་རྗེ་ཟེར་བ་བོད་ཀྱི་ལུང་པའི་ནང་དུ་ཕྱག་ལས་གནང་མྱོང་བ་སྔར་གོ་མ་མྱོང་། འོན་ཀྱང་། ཉེ་འཆར་ཁ་བརྡ་དྲ་རྒྱའི་མཆན་ཞིག་གི་ནང་དུ་ཁོང་གི་ལོ་རྒྱུས་མདོར་བསྡུས་ཞིག་བཀོད་པ་མཐོང་སོང་། གལ་སྲིད་ཁོང་ལྟ་བུས་བོད་ལ་བྱས་རྗེས་འཇོག་གནང་མྱོང་མཁན་ཞིག་ཡིན་ན་བོད་ཡིག་གི་དྲ་ཚིགས་སོགས་སུ་མྱ་ངན་གུས་འདུད་ཀྱི་གནས་ཚུལ་ཞིག་མ་བཀོད་ན་ཡང་སྐུ་གཤེགས་པའི་གནས་ཚུལ་ཞིག་ཏ་བཀོད་དགོས་ངེས་རེད། ཡིན་ན་ཡང་ཚིག་གཅིག་ཀྱང་མིན་འདུག
བོད་ཀྱི་སྐད་ཡིག་རིག་གནས་གྱི་གར་སྟེགས་ཁྲོད་ཕྱག་ལས་གནང་བཞིན་པའི་དགེ་བའི་བཤེས་གཉེན་བློ་བཟང་སྦྱིན་པ་ལགས་ས་འགུལ་གནོད་འཚེའི་འོག་འདས་གྲོངས་སུ་ཕྱིན་པར་བློ་ཕམ་དང་། ཤུལ་ལུས་ནང་མི་སྤུན་མཆེད་ཚང་མར་གདུང་སེམས་མཉམ་སྐྱེད་ཞུ།
དེ་དང་ཆབས་ཅིག་བོད་ལ་མང་གཙོའི་ལྟ་གྲུབ་འདྲེན་པའི་ཕོ་ཉ་མིང་དུ་གྲགས་པའི་རྩིས་དཔོན་ལུང་ཤར་གྱི་སྲས། བོད་རང་བཙན་སྐབས་ཀྱི་བཀའ་བློན་དང་མདོ་སྤྱི་གནང་མྱོང་བའི་ལྷ་ཀླུ་ཚེ་དབང་རྡོ་རྗེ་སྐུ་ཚེ་མ་ཟིན་པ་བློ་ཕམ་དང་། ཤུལ་ལུས་ལྷ་ལྕམ་དང་སྲས་སྲོས་རྣམས་ལ་གདུང་སེམས་མཉམ་སྐྱེད་ཞུ། ལྷ་རབས་བྱུང་ནས་གནས་ཚུལ་དེའི་སྐོར་བོད་མིའི་སྒྲིག་འཛུགས་ཀྱི་དྲ་རྒྱ་དང་། དུས་བབ། བང་ཆེན་སོགས་ཀྱི་གསར་སྤེལ་ཡོང་བའི་རེ་བ་ཆེ།
ཁོང་ནི་བོད་ས་མ་ཤོར་གོང་གི་བོད་གཞུང་དགའ་ལྡན་ཕོ་བྲང་གི་བཀའ་བློན་རྣམས་ཀྱི་ནང་ནས་ཆེས་མཐའ་མཇུག་ཏུ་བཞུགས་མཁན་གྱི་བཀའ་བློན་གཅིག་པུ་དེ་ཡིན་པས། དམིགས་བསལ་གྱི་གནས་ཚུལ་ཞིག་རེད།
༸རྒྱལ་བ་བྱམས་པའི་ཞབས་དྲུང་དུ་སྐྱེས་་བར་ཞོག
དགེ་རྒན་བློ་བཟང་སྦྱིན་པ་ཁོང་བདེ་ལྡན་ཞིང་དུ་སྐྱེ་བར་ཤོག
ནང་མི་ལ་གདུང་སེམས་མཉམ་སྐྱེད་དང་གུས་འདུད་ཞུ།
དཀོན་མཆོག་མཁྱེན་ང་ཚོ་བོད་པ་རྣམས་ཇི་འདྲ་ལས་ཨང་་་་་བློ་ཕམ་བྱུང་།