ཨ་རིའི་སློབ་ཡོན་སྐོར་ལ་གྲོས་བསྡུར་གནང་རྩིས་ཡོད།

དེ་རིང་སྔ་དྲོར་བོད་མི་མང་སྤྱི་འཐུས་གྲོས་ཚོགས་ནང་སྤྱི་འཐུས་སྐལ་བཟང་དགྲ་འདུལ་ལགས་ཀྱིས་བཀའ་བློན་ཁྲི་པ་མཆོག་ལ་ཐུགས་སྣང་གཞེན་སྐུལ་གྱི་གྲོས་འཆར་ཞིག་བཏོན་ཏེ། ཉེ་ཆར་ཨ་རིའི་སློབ་ཡོན་ལས་གཞིའི་འོག་གི་སློབ་ཕྲུག་ཁག་ཅིག་ལ། ལྡི་ལི་ཨ་རིའི་གཞུང་ཚབ་ཀྱིས་ཐོེངས་ཆེན་སྤྲད་མེད་པར་བཀའ་ཤག་གིས་ཨ་རིའི་གཞུང་དང་འབྲེལ་བ་གནང་སྟེ་སློབ་ཕྲུག་དེ་དག་ལ་ཐོངས་མཆན་རེག་ཐབས་དང་། སྔོན་མ་ཕྱིར་མ་ལོག་པའི་སློབ་ཕྲུག་དེ་དག་ཕྱིར་ལོག་ཐབས་ཀྱི་ལམ་ཁ་འཚོལ་གལ་ཆེ་སྐོར་བཀོད་འདུག་ལ། དེ་ལ་བཀའ་ཁྲི་བློ་བཟང་སེང་གེ་མཆོག་གིས་གསལ་བཤད་ལན་འདེབས་ཀྱང་གནང་སོང་།

ཐུགས་སྣང་གཞེན་སྐུལ་གྲོས་འཆར་ནང་། དེ་སྔ་ཨ་རིར་སློབ་སྦྱོང་དུ་ཕྱིན་པའི་བོད་མི་ཁག་ཅིག་ལུགས་མཐུན་ཕྱིར་ལོག་མ་བྱས་པའི་དབང་གིས། འདི་ལོར་ཨ་རིའི་གཞུང་ཚབ་ཀྱིས་བོད་པའི་སློབ་ཕྲུག་ཁག་ཅིག་ལ་ཐོངས་མ་མཆན་ (visa)སྤྲད་མེད་སྟབས། བཀའ་ཁྲི་མཆོག་དང་འབྲེལ་ཡོད་ལས་ཁུངས་ཀྱིས་ཨ་རིའི་གཞུང་ལ་འབྲེལ་བ་གནང་སྟེ། སློབ་ཕྲུག་དེ་དག་ལ་ཐོངས་མཆན་རག་ཐབས་བྱ་དགོས་སྐོར་བཀོད་འདུག་ལ། དེ་མིན། རྒྱ་གར་ནང་ཕྱི་ལུགས་སྨན་པའི་ལས་རིགས་དང་སྨན་ཞབས་པ་སོགས་ཀྱི་ས་མིག་ཐོབ་རྒྱུར་ཞལ་འདེབས་ཕོན་ཆེན་སྤྲོད་དགོས་པ་དང་། མཐོ་སློབ་ཁག་ཅིག་ནང་རྒྱ་གར་གྱི་མི་སེར་ཡིན་དགོས་པའི་ཆ་རྐྱེན་སོགས་ཀྱིས་བོད་ཕྲུག་མང་པོ་ཞིག་རང་ཉིད་ཀྱི་དམིགས་ཡུལ་ལྟར། ལས་རིགས་དེ་དག་ནང་འཛུལ་མ་ཐུབ་པའི་དཀའ་ངལ་འཕྲད་བཞིན་ཡོད་སྟབས། ད་ཡོད་ཀྱི་རིགས་གཅིག་རྐང་འཛིན་གྱི་སློབ་ཡོན་ཐེབས་རྩའི་ཐོག་ད་དུང་ཐབས་འཚོལ་བྱ་རྒྱུ་དང་། རྒྱ་གར་ནང་གི་ཕྱི་ལུགས་གསོ་རིག་མཐོ་སློབ་ཁག་དང་ (IIT) མཐོ་སློབ་ཁག  ཁྱད་ལས་པའི་ལྟེ་གནས་ཁག་མང་པོར་འབྲེལ་ལམ་བཙུགས་ཏེ་དམིགས་བསལ་ས་མིག་ཡོང་ཐབས་དང་། སློབ་ཡོན་ཆག་ཡང་ཡོང་ཐབས་སོགས་ལ་ཐབས་ཤེས་ཡོད་དགུ་གནང་དགོས། ཞེས་བཀོད་འདུག

སྐབས་དེར་བཀའ་ཁྲི་མཆོག་གིས།  “ ཨ་རིའི་བོད་ཀྱི་ཐེབས་རྩ་བརྒྱུད་དེ་བོད་པའི་སློབ་མ་ཚོར་སློབ་ཡོན་ཐོབ་བཞིན་པའི་ཁྲོད་ཉེ་ལམ་སློབ་ཕྲུག་ ༧ ལ་ཐོངས་མཆན་སྤྲད་མེད་པ་གོ་སོང་། དེ་ཡང་གཙོ་བོ།  སྔོན་མ་ང་ཚོའི་སློབ་ཕྲུག་ ༧ ཨ་རིའི་ནང་སློབ་སྦྱོང་དུ་ཕྱིན་སྟེ་ཕྱིར་ལོག་མེད་སྟབས། ཐེངས་འདིར་ཨ་རིའི་གཞུང་ཚབ་ཀྱིས་ཐོངས་མཆན་མ་སྤྲད་པ་ཞིག་ཆགས་འདུག གལ་སྲིད་ཁོང་ཚོ་ཕྱིར་ལོག་པ་ཡིན་ན། འདི་ལོའི་སློབ་ཕྲུག་ཚོར་ཐོངས་མཆན་སྤྲོད་རྒྱུ་ཡིན། ཞེས་བཤད་ཀྱི་འདུག འདི་ལ་བལྟས་ཡོང་ན་ནོར་འཁྲུལ་ང་ཚོའི་ཕྱོགས་ནས་བཟོས་པ་ཞིག་རེད། སྐབས་དེར་ང་རང་ཝ་ཤིན་ཊོན་དུ་ཡོད། ཨ་རིའི་འབྲེལ་ཡོད་ལས་བྱེད་དང་མཉམ་དུ་བཀའ་མོལ་གནང་བ་ཡིན། ཕྱིས་སུ་ཨ་རིའི་དམིགས་བསལ་སྐུ་ཚབ་ཀྱིས་ང་ལ་ཞལ་པར་དང་གློག་འཕྲིན་སོགས་བརྒྱུད་དེ་འབྲེལ་བ་གནང་སོང་ལ། ཨ་རིའི་འབྲེལ་ཡོད་ལས་ཁུངས་མང་པོས་གང་ཐུབ་ཅི་ཐུབ་གནང་སོང་། ཐོངས་མཆན་སྤྲོད་སའི་སྡེ་ཚན་དེ་ཨ་རིའི་གཞུང་ཚབ་ཀྱི་ཁྱབ་ཁོངས་ཡིན་ཡང་། མཐའ་མའི་ཐག་གཅོད་དེ་ཐོངས་མཆན་སྡེ་ཚན་གྱི་ལག་ཏུ་ཡོད་སྟབས། གོང་རིམ་ནས་དམིགས་བསལ་དབང་ཆ་བཀོལ་བ་ལས་ཐབས་ཤེས་མེད་སྐོར་གསུངས་བྱུང ” ཅེས་དང་།  

ཁོང་གིས་མུ་མཐུད་དུ་ “ ང་ཚོའི་ངོས་ནས་ལྡི་ལི་དོན་གཅོད་བརྒྱུད་ཕྱིར་མ་ལོག་པའི་སློབ་མ་ ༧ གྱི་མིང་དང་ཁ་བྱང་ཐོངས་མཆན་སྤྲོད་མཁན་གྱི་སྡེ་ཚན་ལ་ཕུལ་ཏེ། བོད་ཀྱི་ཐེབས་རྩ་ཚོགས་པ་བརྒྱུད་དེ་མིང་ཐོ་དེ་དག་ཨ་རིའི་ནང་སྲིད་དང་བདེ་སྲུང་ལས་ཁུངས་ལ་ ( Home and security )སྤྲོད་རྒྱུའི་གནས་ཚུལ་འདུག ཉེ་ཆར་ཨ་རིའི་གཞུང་ཚབ་མི་སྣར་མཇལ་སྐབས་ཨ་རིའི་ནང་ཡོད་པའི་སློབ་ཕྲུག་དེ་དག་ཕྱིར་གཏོང་དགོས་པའི་སྐོར་བཤད་ཀྱང་། ཁོང་ཚོའི་ངོས་ནས་དང་པོ་སློབ་ཕྲུག་རྩེ་ཕུད་བདམས་པ་ནས་ཕྱིར་ལོག་རྒྱུ་ཡིན་པའི་ཁས་ལེན་བར་གྱི་ལས་ཀ་ཆ་ཚང་ཁྱེད་ཚོས་བསྒྲུབ་ཡོད་སྟབས། ལས་ཀའི་མཇུག་འབྲས་དེ་ལྟ་བུ་ཞིག་བྱུང་བ་དེ་ང་ཚོ་ཡིན་ཚུལ་བརྗོད་ཀྱི་འདུག གཙོ་བོ་ང་ཚོའི་ངོས་ནས་ནོར་འཁྲུལ་མི་འབྱུང་བ་བྱ་རྒྱུ་གལ་ཆེན་པོ་རེད། མ་འོངས་པར་བཀའ་ཤག་གི་ངོས་ནས་སློབ་མ་ཕར་གཏོང་སྟངས་དང་དོ་དམ་བྱེད་ཕྱོགས་ལ་གང་ཐུབ་ཅི་ཐུབ་བྱ་འཆར་ཡོད། བཀའ་ཤག་ལྷན་རྒྱས་གྲོས་བསྡུར་བྱས་ཏེ་གནད་དོན་དེའི་ཐོག་བསམ་ཞིབ་བྱ་རྒྱུ་ཡིན ” ཞེས་གསལ་བཤད་གནང་སོང་།  

གསར་འགོད་པ། དོན་གོ