དེ་རིང་བོད་ཀྱི་བདེ་རྩ་ཚོགས་པས་རྒྱལ་སྤྱིའི་རེབྷིས (Rabies day) ཉིན་མོ་སྲུང་གཙི་དང་འབྲེལ། ངྷ་སའི་བོད་མིའི་སྒོ་ཁྱི་སྐོར་ཞིག་ལ་རིན་མེད་ཐོག་སྔོན་འགོག་སྨན་ཁབ་རྒྱག་རྒྱུ་ཡིན་ཟེར།
ཕྱི་ཟླ་ ༩ པའི་ཚེས་ ༢༨ ཉིན་ནི་རྒྱལ་སྤྱིའི་རེབྷིས (Rabies day) ཉིན་མོའམ་ཁྱི་སྨྱོན་ནད་གཞིའི་ཉིན་མོ་ཆགས་ཡོད་པ་བཞིན། དེ་རིང་ཞོགས་པའི་ཆུ་ཚོད་ ༡༠ དང་ཕྱེད་ཀའི་སྟེང་ངྷ་སར་རྟེན་གཞི་བྱས་པའི་བོད་ཀྱི་བདེ་རྩ་ཚོགས་པ (Tibet charity)རུ། ངྷ་སར་གནས་སྡོད་བོད་རིགས་སེར་སྐྱ་མང་ཚོགས་ ༥༠ ཙམ་འདུ་འཛོམས་ཐོག འཛམ་གླིང་ཁྱི་སྨྱོན་ནད་གཞིའི་ཉིན་མོ་དེ་སྲུང་གཙི་བྱས་ཡོད་ཅིང་། མཛད་སྒོའི་སྐུ་མགྲོན་དུ་བཀའ་བློན་ཁྲི་ཟུར་བསོད་ནམས་སྟོབས་རྒྱལ་མཆོག་དང་། བོད་གཞུང་བདེ་ལེགས་སྨན་ཁང་གི་སྨན་པ་ཚེ་བརྟན་རྡོ་རྗེ། དེ་བཞིན་ངྷ་ས་ཁུལ་གྱི་རྒྱ་གར་ཡུལ་མིའི་སྨན་པ་ཁག་ཅིག་བཅས་གདན་ཞུ་གནང་འདུག
མཛད་སྒོའི་ཐོག་བོད་ཀྱི་བདེ་རྩ་ཚོགས་པའི་འགན་འཛིན་ཚེ་རིང་དོན་གྲུབ་ལགས་ཀྱིས། ཚོགས་པ་འདི་ཐོག་མར་ གསར་འཛུགས་གནང་དགོས་དོན་དང་བར་དུ་འཛུགས་སྟངས་ཀྱི་བརྒྱུད་རིམ་ངོ་སྤྲོད་གནང་སྟེ། ཚོགས་པ་འདིས་ད་བར་བཙན་བྱོལ་བོད་མིའི་སྤྱི་ཚོགས་ཀྱི་ཤེས་ཡོན་སློབ་སྦྱོང་དང་འཕྲོད་བསྟེན་ལྟ་སྐྱོང་། སྤྱི་ཚོགས་ཞབས་ཞུའི་ལས་དོན་བཅས་སྒྲུབ་བཞིན་པའི་ཁྲོད་ནས། ཁྱི་སྨྱོན་ནད་གཞིའི་ཐོག་དམིགས་བསལ་རྐང་འགན་འཁུར་ཏེ། འདས་པའི་ལོ་ ༣ ཙམ་རིང་ལོ་རེར་ངྷ་སའི་ཉེ་འཁོར་གྱི་ཁྱི་ ༨༠༠ ཙམ་རེ་ལ་འགོག་སྨན་དང་གཤག་བཅོས་བྱས་ཡོད་སྐོར་དང་། མཛད་སྒོ་འདི་དང་བསྟུན་ཏེ་མ་འོངས་པའི་ཉིན་བཅུའི་ནང་ངྷ་ས་དང་ཧི་མ་ཅལ་མངའ་སྡེའི་ས་གནས་གཞན་ཁག་ཏུ་ཁྱི་ ༡༠༠༠ ཙམ་ལ་སྔོན་འགོག་སྨན་ཁབ་རྒྱག་རྒྱུ་ཡིན་ཚུལ་བརྗོད་སོང་།
དེ་བཞིན། བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་ཁྱི་སྨྱོན་གནས་སྟངས་སྐོར་ལ་ཚེ་རིང་དོན་གྲུབ་ལགས་ཀྱིས་ “ ང་ཚོ་ཚང་མའི་འབད་བརྩོན་ལ་བརྟེན་ནས་ད་ཆར་བཙན་བྱོལ་སྤྱི་ཚོགས་ནང་ཁྱི་སྨོན་ཀྱི་ཉེན་ཁ་མེད་ལབ་ན་འགྲིག་གི་ཡོད་ ” ཅེས་བརྗོད་སོང་ལ། དེའི་ཐད་བདེ་ལེགས་སྨན་ཁང་གི་སྨན་པ་ཚེ་བརྟན་ལགས་ཀྱིས་ཀྱང་། “ འདས་པའི་ལོ་ཤས་ནས་བདེ་ལེགས་སྨན་ཁང་དུ་ཁྱི་སྨྱོན་གྱིས་སོ་བརྒྱབ་སྟེ་ཡོང་མཁན་དེ་འདྲ་གང་ཡང་བྱུང་མེད་སྟབས། ང་ཚོའི་སྤྱི་ཚོགས་ནང་ཁྱི་སྨྱོན་མེད་པ་ར་འཕྲོད་གསལ་པོ་ཆགས་པ་རེད ” ཅེས་བརྗོད་བྱུང་།
བོད་ཀྱི་བདེ་རྩ་ཚོགས་པ་འདི་ནི་ ༡༩༩༧ ལོར་ཡུ་རོབ་ཌན་མག་ཏུ་གསར་དུ་བཙུགས་ཤིང་། ༢༠༠༥ ལོར་རྒྱ་གར་དུ་གནས་སྤོར་བྱས་པ་ཞིག་རེད། ད་ཆར་ཚོགས་པ་འདིར་ཁྱོན་ལས་བྱེད་ ༡༤ ཙམ་ཡོད་པའི་ནང་མང་ཆེ་བ་ན་གཞོན་བུད་མེད་ཤ་སྟག་ཡིན་འདུག
གསར་འགོད་པ། དཔལ་ལྡན།
ཁྱི་སྨྱོན་གྱི་ཉིན་མོ་དེ་དང་སྟབས་སྟུན་ནས་ཝར་ཎའི་གྲྭ་བཙུན་དགའ་རོགས་སྒྲིག་མཁན་དེ་ཚོའི་རྐུབ་ལ་རྩ་སྨྱོན་གི་ཁབ་རེ་རྒྱབ་ཐུབ་ན་ཡག་པོ་འདུག
དེ་ཉིན་ང་ལ་གྲོགས་པོ་ཞིག་གིས་བྱེད་སྒོ་དེ་འདྲ་ཞིག་ཡོད་སྐོར་བརྗོད་བྱུང་ཡང་འགྲོ་ཁོམས་མ་བྱུང་། ད་ལྟ་བསམ་བློ་གཏང་དུས་དངོས་གནས་ཕམ་དགོས་པ་ཞིག་རེད་འདུག་གང་ཡིན་ཟེར་ན་ང་ནི་གྲ་པ་ཞིག་ཡིན་ཡང་ཁོང་རྣམས་པའི་བྱང་ཆུབ་སེམས་དཔའི་སྤྱོད་པ་མཛད་པ་དེ་ལྟ་བུར་ངས་རོགས་གང་ཡང་བྱས་མེད་ལ་ལྟ་རུ་ཡང་ཕྱིན་མེད་།
ཚེ་སྲོག་ལ་འདྲ་མཉམ་གྱི་ལྟ་ཚུལ་བཟུང་ན་ཤིན་ཏུ་ལེགས་པས། ཁྱི་སྨྱོན་དུས་དྲན་ལ་ཞུགས་མཁན་ཚོར་སྙིང་ནས་བཀའ་དྲིན་བླ་ལྷག་ཏུ་ཆེ་ཞུ་འདོད་བྱུང་།