ཉེ་སྔོན་སྟན་འཛིན་སྒང་བོད་མིའི་གཞིས་ཆགས་ནང་བུད་མེད་ཅིག་ལ་དམའ་འབེབས་ཉེས་རྡུང་བཏང་བའི་དོན་རྐྱེན་དང་འབྲེལ་བའི། སྤྱི་འཐུས་སྒེར་གྱི་གྲོས་ཆོད་གྲོས་འཆར་དེར་གྲོས་ཚོགས་ནང་སྤྱི་མོས་རྒྱབ་སྐྱོར་གནང་སོང་།
སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་མཇུག་སྒྲིལ་ལ་ཉེ་བའི་མཐའ་མའི་ཉིན་གཉིས་པ་སྟེ། དེ་རིང་སྔ་དྲོའི་སྤྱི་འཐུས་སྒེར་གྱི་གྲོས་ཆོད་གྲོས་འཆར་གྱི་ལས་རིམ་སྐབས། སྤྱི་འཐུས་ཀིརྟི་ལྷ་མོ་ལགས་ཀྱིས་གྲོས་འཆར་བཏོན་ཞིང་། སྤྱི་འཐུས་ཤར་གླིང་ཟླ་སྒྲོན་ལགས་ཀྱིས་རྒྱབ་སྐྱོར་གནང་སྟེ། ཉེ་སྔོན་ཕྱི་ཟླ་ ༧ ཚེས་ ༡༦ ཉིན་བསྟན་འཛིན་སྒང་བོད་མིའི་གཞིས་ཆགས་ནང་བུ་མོ་རིག་འཛིན་ལ་མི་སྤྱོད་ལས་འདས་པའི་ཉེས་རྡུང་དམའ་འབེབས་བཏང་པའི་དོན་རྐྱེན་དང་འབྲེལ་བའི་ཐོག་ནས། མ་འོངས་པར་བཙན་བྱོལ་སྤྱི་ཚོགས་ནང་བོད་མིའི་སྒྲིག་འཛུགས་ཀྱི་སྲིད་ཇུས་དང་འགལ་བའི་བྱ་སྤྱོད་དེ་རིགས་སྔོན་འགོག་ཡོང་ཐབས་སུ། སྤྱི་འཐུས་སྒེར་གྱི་གྲོས་ཆོད་གྲོས་འཆར་དོན་ཚན་གསུམ་ཅན་ཞིག་བཏོན་པ་དེར་གྲོས་ཚོགས་ནང་སྤྱི་མོས་རྒྱབ་སྐྱོར་གྱིས་གཏན་འབེབས་གནང་སོང་།
སྤྱི་མོས་གཏན་འབེབས་བྱུང་བའི་གྲོས་ཆོད་དོན་ཚན་གསུམ་ནི། ༡༽ བོད་ཀྱི་ཐུན་མོང་མ་ཡིན་པའི་ཡ་རབས་བཟང་སྤྱོད་དང་འགལ་ཞིང་། གནས་ཡུལ་རྒྱལ་ཁབ་སོ་སོའི་ཡུལ་ཁྲིམས་དང་འགལ་བའི་ཚུལ་མིན་གྱི་བྱ་སྤྱོད་་་བསྟན་འཛིན་སྒང་ལ་བྱུང་བ་དེ་རིགས་ལ་བོད་མི་མང་སྤྱི་འཐུས་ལྷན་ཚོགས་ནས་མཐའ་གཅིག་ཏུ་ངོ་རྒོལ་དང་། བྱ་སྤྱོད་དེ་དག་ཆེས་ཐ་ཤལ་ཅན་ལ་ངོས་འཛིན་བྱ་རྒྱུ། ༢༽ བོད་མིའི་སྒྲིག་འཛུགས་ཁྱབ་ཁོངས་ཕྱི་རྒྱལ་དོན་གཅོད་ཁག་དང་། བཙན་བྱོལ་བོད་མི་གནས་ཚུལ་ས་གནས་འགོ་འཛིན་བཅས་ལ་འཛིན་སྐྱོང་བཀའ་ཤག་ནས་ཐུགས་འགན་རྐང་བཞེས་ཀྱི་གནས་ཡུལ་རྒྱལ་ཁབ་དང་ས་གནས་སོ་སོར་མ་འོངས་པར་དེ་ལྟར་མི་ཡོང་བའི་བཀོད་ཁྱབ་གཏོང་དགོས། བོད་ཀྱི་བུད་མེད་ཚོས་ཀྱང་བུད་མེད་ལ་ཐབས་སྐྱོའི་གནས་ཚུལ་དེ་རིགས་བྱུང་སྐབས་ལམ་སེང་ཡུལ་ཁྲིམས་དང་མཐུན་པའི་ཐོག་ཁྲིམས་གཏུགས་དགོས་པའི་ལམ་སྟོན་སློབ་གསོ་བྱེད་དགོས། ༣༽ འཛིན་སྐྱོང་བཀའ་ཤག་ནས་ས་གནས་སོ་སོར་བཀོད་ཁྱབ་ལམ་སྟོན་དང་ལས་དོན་ཇི་གནང་གི་སྙན་ཐོ་ཞིག་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གསུམ་པར་ངེས་འབུལ་དགོས་རྒྱུའི་སྤྱི་མོས་སམ་མང་མོས་ཀྱི་གྲོས་ཆོད་བཅས་ཡིན་འདུག
གོང་བཀོད་སྤྱི་འཐུས་སྒེར་གྱི་གྲོས་ཆོད་གྲོས་འཆར་ཡིག་ཆ་ཨང་ ༡༢༩ པར་རྒྱབ་སྐྱོར་དང་འབྲེལ་ཏེ། སྤྱི་འཐུས་ཤར་གླིང་ཟླ་སྒྲོན་ལགས་ཀྱིས་རྒྱལ་སྤྱིའི་སྒང་བུད་མེད་ཀྱི་དཀའ་ངལ་ཤུགས་ཆེ་ཤོས་ཤིག་ནི། བོད་ནང་དུ་རྒྱ་གཞུང་གིས་བོད་པའི་བུད་མེད་ཚོའི་སྐྱེ་སྒོ་ཚུན་ཆད་བཙན་དབང་འགོག་སྡོམ་བྱེད་བཞིན་པའི་དཀའ་ངལ་དེ་ཆགས་ཡོད་པ་དེ་ནི་ཀུན་གྱིས་ཤེས་གསལ་ཡིན་སྟབས། ང་ཚོ་བཙན་བྱོལ་བོད་མིའི་སྤྱི་ཚོགས་ནང་བུད་མེད་ཚོར་སྔར་ལྷག་གཟིགས་སྐྱོར་གནང་དགོས་པའི་འབོད་སྐུལ་གནང་སོང་། དེ་བསྟུན་ནས་སྤྱི་འཐུས་མང་པོ་ཞིག་གིས་བསྟན་འཛིན་སྒང་དུ་བྱུང་བའི་ཐབས་སྡུག་ཡིད་སྐྱོའི་གནས་ཚུལ་དེར་སྐྱོན་བརྗོད་དང་། ཉེས་རྡུང་ཕོག་མཁན་ལ་གདུང་སེམས་རྒྱབ་སྐྱོར་ཤུགས་ཆེན་པོ་གནང་བར་མ་ཟད། མ་འོངས་པར་བཙན་བྱོལ་སྤྱི་ཚོགས་ཁྲོད་ཁྲིམས་ཀྱི་གོ་རྟོགས་སྤེལ་དགོས་པ་དང་། བཟའ་ཚང་ནང་ཁུལ་དུའང་བུད་མེད་ཚོར་ལྟ་རྟོག་དང་གཟིགས་སྐྱོང་སྔར་ལྷག་གནང་དགོས་པའི་བསམ་ཚུལ་ཤུགས་ཆེན་པོ་བཏོན་སོང་།
ནང་སྲིད་བཀའ་བློན་རྒྱ་རི་སྒྲོལ་མ་མཆོག་གིས་ཀྱང་། ཉེ་སྔོན་བསྟན་འཛིན་སྒང་བྱུང་བའི་ལུགས་མཐུན་མིན་པའི་གནད་དོན་དེའི་ཐད་བློ་འཚབ་དང་དོ་སྣང་ཆེན་པོ་གནང་གི་ཡོད་པར་མ་ཟད། ཉེ་སྔོན་བཀའ་ཤག་ལྷན་རྒྱས་ཀྱི་ལྷན་འཛོམས་དང་པོའི་ཐོག་ལའང་གནས་ཚུལ་དེའི་ཐད་བཀའ་མོལ་རིམ་པ་བྱུང་ཡོད་སྐོར་དང་། གྲོས་ཆོད་ཀྱི་དགོངས་དོན་ལྟར་བཀའ་ཤག་གིས་ལག་ལེན་བསྟར་རྒྱུ་ཡིན་པ་གསུངས་སོང་།
གསར་འགོད་པ། ཚེ་རིང་རྒྱལ།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
མངའ་རིས་བུ་ལགས་ ཁྱེད་ཀྱིས་སྐུ་རྩེད་ལྟ་བུས་བུད་མེད་རྣམས་ལ་འཇོན་ཐང་མེད་རབས་གསུང་འདུག་པས་དེ་ནི་ཁྱེད་རང་ནས་འཛམ་གླིང་ནང་འཇོན་ཐང་ཅན་གྱི་བུད་མེད་གྲངས་ལས་འདས་པ་རྣམས་མ་གཟིགས་དང་མཐོང་རྒྱ་ཆུང་དྲག་པ་མིན་ནམ་མཉམ་དེ་དང་སྐྱེ་དམན་ཞེས་པའི་གོ་དོན་གང་ཡང་མ་འཇོན་པར་དགོངས་པ་བཞེས་ན་སངས་རྒྱས་བཅོམ་ལྡན་འདས་ཀྱི་ད་ལྟའི་བུད་མེད་འཇོན་ཐང་ཅན་རྣམས་མ་གཟིགས་པ་ག་རེ་ཡིན་ནམ་། ཁྱེད་ལ་བཀའ་དྲི་ཞིག་བཞུ་ན་ཁྱེད་ལ་ད་ལྟའི་ལས་ཐོག་བཀའ་བློན་བུད་མེད་རྣམས་ཀྱི་འཇོན་ཐང་དེ་འདྲ་ཡོད་དམ་།
བོད་ཀྱི་བུད་མེད་ཚོ་ཁྱེད་རང་འཇོན་སྟངས་ཡོད་ན།
བོད་ཀྱི་ཆོས་ལུགས་ཀྱི་ནང་དུ་གསལ་བའི་བུད་མེད་ལ་་་་སྐྱེས་དམན་་་་ཞེས་དེ་ཕྱིར་འདོན་བྱེད་དགོས་པ་རེད་དེ་མ་བྱུང་བའི་བར་དུ་བོད་ཀྱི་བུ་དེ་ཚོས་ཁྱེད་རང་སྐྱེ་དམན་ཡིན་པ་ལུང་གིས་བསྟན་པས་ང་ཚོས་དེ་ལ་གུས་འདུད་ཞུ་གི་རེད། དེ་སངས་རྒྱས་ཀྱིས་གསུངས་པ་རེད། ཡིད་ཆེས་ཡོད་ཅེས་བཤད་ན་ཁྱེད་ཚོས་ཅི་ཞིག་བཤད་རྒྱུ་ཡིན་ནམ།
ཁྱེད་ཚོའི་འཇོན་སྟངས་ལ་ལྟས་ན་གང་ཡང་འཇོན་གྱི་མ་རེད། སྔར་མུས་ལྟར་མུན་ནག་དུ་བཞུགས་རོགས།
ད་དུང་ཁྱེད་ཚོས་བོད་ཀྱི་བུད་མེད་ལ་ཐོབ་ཐང་དགོས། ཞེས་འཛམ་གླིང་ལ་སྐད་འབོད་རྒྱབ་ག་འདྲ་བྱེད། སྐད་འབོད་ཕྱིར་མ་རྒྱབ་པར་ནང་དུ་བོད་ཀྱི་བླ་ཆེན་མཁས་པ་དེ་ཚོའི་སྒོ་རུ་སོང་ལ་སྐད་འབོད་རྒྱོབ་དང་ག་འདྲ་བཤད་ཀྱི་འདུག་ཧ་གོ་ཡོང། ཁྱེད་ཚོ་ལ་འཇོན་སྟངས་ནུས་པ་ཡོད་མེད་ཀྱི་ཚོད་ལྟའི་ཆེད་དུ་ངས་འདི་བྲིས་པ་ཡིན། ཁྱེད་ཚོ་ལ་ཤེས་བྱ་ཡོན་ཏན་ཡོད་ན་ང་ལ་དགག་ཡིག་བྲིས་དང་ངས་ཁྱེད་ཚོར་མཐོལ་བཤགས་ཕུལ་ཆོག ཡང་སྐྱེས་དམན་གྱི་མིང་རྐུས་ནས་རླིག་ཆེན་དེ་ཚོས་བྲིས་པ་ལ་ངས་ཁས་ལེན་བྱེད་ཀྱི་མེད།
སྐྱེས་དམན་མ་ཡིན་་་སྐྱེས་སྨན་ཡིན་ན་ལན་ཅིག་ཐོབ་ཤོག
བུད་མེད་གཟིགས་སྐྱོང་གི་གྲོས་ཆོད་ཡག་པོ་འདུག དེ་ག་ནང་བཞིན་སློབ་ཕྲུག་གཟིགས་སྐྱོང་གི་གྲོས་ཆོད་ཅིག་ཀྱང་དགོས་ཀྱི་ཡོད་པ་ཤེས་གསལ་རེད། གལ་སྲིད་གྲོས་ཆོད་ཅིག་མེད་པ་ཡིན་ན། སུ་ཇ་སློབ་གྲྭ་ནས་སློབ་ཕྲུག་བསད་པའི་དོན་རྐྱེན་དེ་བཞིན་སློབ་གྲྭ་ཁག་ལ་ཁྱབ་བརྡལ་དུ་མི་འགྲོ་བའི་ངེས་པའང་མི་འདུག གཅིག་ནས་མི་བསད་ཀྱང་ལག་དམར་ཁྲིམས་ལ་འགྲོ་མི་དགོས་པའི་ཁར། སློབ་གྲྭ་རུ་རང་འཇགས་སུ་བསྡད་ཆོག་པ་ལྟུས་མཚོན་གྱི་ཡོད།
གྲོས་ཆོད་འཇོགས་པ་ཙམ་མིན་པར་ངེས་པར་ཏུ་ལག་ལེན་སྟར་ཐུབ་དགོས
དེ་ནས་གྲོས་ཆོད་ལ་ཆ་འཇོགས་ཡོང་སྲིད་
གྲོས་ཆོད་དེ་ལྟ་བུ་འཇོག་ཐུབ་པ་ཡག་པོ་རེད། སྤྱི་མཐུས་གསར་པ་ཤར་གླིང་ཟླ་སྒྲོན་གྱིས་ང་ཚོའི་སྤྱི་ཚོགས་ནང་དུ་ལས་འགུལ་སྣ་མང་སྤེལ་ནས་ཧུར་བརྩོན་གནང་གིན་འདུག་པ་ལེགས་གསོལ་ཞུ་རྒྱུ། མུ་མཐུད་སྤེལ་རོགས། གོ་མེད་ཚོར་མེད་སྡོད་ནས་ཕན་ཐོགས་མེད། དམིགས་བསལ་ཁོང་དང་བསྟན་འཛིན་བརྩོན་འགྲུས། ཤིང་ཟ་རིན་པོ་ཆེ་སོགས་ཀྱིས་ལས་འགུལ་གང་སྤེལ་སྐབས་རང་རང་གི་ངོ་དེབ་ནང་དུ་སྤེལ་ནས་འཛམ་གླིང་གང་སར་ཡོད་པས་རྟོགས་ཐུབ་པ་བཟོས་པ་ནི་དུས་རབས་དང་མཐུན་པའི་ཐབས་ལམ་ཞིག་ཏུ་འཁུམས།
ཨོ་ཙམ་རེད། ཅིག་ལབ་པ་འདི་ཡང་འགྲིག་ཙམ་རེད།