གནས་ཚུལ་འབྱར་གསལ་ལ། ཁ་སང་ཕྱི་ཚེས་ ༢ ཉིན་བྱང་ཨ་རིའི་མངའ་སྡེ་མེ་སེ་ཅུ་སེཊ་ཡི་རྒྱལ་ས་བྷོསི་ཊོན་དུ་ (Amnesty International)དང་བོད་རིགས་གཞོན་སྐྱེས་ཁ་ཤས་ཀྱི་གོ་སྒྲིག་འོག་(Honk Fest)ཟེར་བའི་ལས་འགུལ་ཞིག་གོ་སྒྲིག་གནང་ཡོད་འདུག
སྤྱིར་ལས་འགུལ་དེ་( Amnesty International )ཞེས་པའི་ཚོགས་པས་ལོ་ལྟར་གོ་སྒྲིག་ཞུ་བཞིན་ཡོད་ཀྱང་། བོད་མི་ཚོས་ཆ་ཤས་བླངས་པ་ད་རེབ་ཐེངས་གཉིས་པ་ཆགས་ཀྱི་ཡོད་འདུག ཐེངས་དང་པོའི་སྐབས་ཆབ་སྲིད་བཙོན་པ་དོན་གྲུབ་དབང་ཆེན་མཆོག་རྒྱའི་བཙོན་འོག་ནས་འཕྲལ་དུ་ཀློད་གྲོལ་ཡོང་བའི་འབོད་སྐུལ་གྱི་ཕྲེད་དར་འཕྱར་ཏེ་སྐད་འབོད་གནང་ཡོད་འདུག་ལ། ཐེངས་འདིར་རྒྱ་གཞུང་གིས་བོད་ནང་གི་འབྲོག་པ་རྣམས་བཙན་ཤེད་ཀྱིས་གནས་སྤོ་བྱེད་དུ་འཇུག་གི་ཡོད་པ་དེ་འཕྲལ་དུ་མཚམས་འཇོག་ཡོང་དགོས་པའི་འབོད་ཚིག་བཀོད་པའི་ཕྲེད་དར་བསྣམས་ཡོད་འདུག
ལས་འགུལ་དེར་བོད་མི་བརྒྱ་སྐོར་ཞིག་དང་ལྷན་དུ་རྒྱལ་ཁབ་འདྲ་མིན་གྱི་མི་གྲངས་སྟོང་ཕྲག་བརྒལ་བ་མཉམ་ཞུགས་ཀྱིས་ལུང་པ་མི་རིགས་སོ་སོའི་དཀའ་རྙོག་སྐོར་གྱི་འབོད་ཚིག་སྒྲོག་བཞིན་ཌེབི་སུ་ཀེར་( Davis Square)ནས་ཧར་ཝཊ་གཙུག་ལག་སློབ་གྲྭ་ (Harvard University)བར་སྤྱི་ལེ་ ༢ དང་ཕྱེད་ཙམ་གྱི་སར་གོམ་བགྲོད་ཡོད་པ་དང་། བོད་པ་ཚོས་ལམ་བར་དུ་བཀྲ་ཤིས་ཞོལ་པ་དང་གཡག་སོགས་འཁྲབ་བཞིན་བོད་ལ་རང་དབང་དགོས། རྒྱ་དམར་བོད་ནས་ཕར་རྒྱུག་ཤིག བོད་ཀྱི་བདག་པོ་བོད་མི་ཡིན། ༧གོང་ས་མཆོག་སྐུ་ཚེ་ཁྲི་ལོ་བརྟེན་ཤོག་སོགས་སྐད་འབོད་གནང་ཡོད་འདུག
ལས་འགུལ་གྱི་ནང་དོན་རྒྱ་ཆེ་ཐོག་ངོ་རྒོལ་གྱི་རྣམ་པ་ཡང་མི་རིགས་ཁག་གི་སྐྱིད་སྡུག་མཉམ་མྱོང་གི་རྣམ་འགྱུར་ཐོན་པས་དགེ་མཚན་ཆེ། རྒྱལ་ཁོངས་སོ་སོ་ནས་ལས་འགུལ་འདི་རིགས་རྒྱུན་མར་སྤེལ་རྒྱུ་ནི་ང་ཚོའི་དོན་སྙིང་ཅན་གྱི་འོས་འགན་ཞིག་ཡིན་པས་སྒོ་ཀུན་ནས་འབད་པར་རིགས་སོ། “བདེན་པ་ཉིད་རྣམ་པར་རྒྱལ་གྱུར་ཅིག”
ལས་འགུལ་གྱི་ནང་དོན་རྒྱ་ཆེ་ཞིང་ངོ་རྒོལ་གྱི་རྣམ་པ་ཡང་མིའི་རིགས་ཀྱི་སྐྱིད་སྡུག་མཉམ་མྱོང་ཡིན་པས་དོན་སྙིང་ཆེ། རྒྱལ་ཁོངས་སོ་སོ་ནས་ལས་འགུལ་འདི་རིགས་རྒྱུན་མར་སྤེལ་རྒྱུར་འབད་བརྩོན་སྒོ་ཀུན་ནས་གནང་རྒྱུ་ནི་དོན་སྙིང་ལྡན་པའི་ང་ཚོའི་འོས་འགན་ཞིག་རེད།